ᐃᓐᖏᕈᑎᑦ 85
85
ᑐᒃᓯᐊᕐᓂᖅ ᐃᓅᖃᑎᒌᒡᔪᐊᑦ ᓮᒻᒪᕐᑎᑕᐅᖁᓪᓗᒋᑦ
ᑰᕋᐅᑉ ᐃᕐᓂᖏᑕ ᐃᓐᖏᕈᑖ ᐃᓐᖏᕈᑕᐅᓯᒪᔪᖅ ᑰᕋᑯᑦ ᐃᓐᖏᕐᓂᕐᒥᒃ ᑕᓯᐅᕐᑎᐅᑎᓪᓗᒋᑦ
1ᐊᑕᓃᖅ, ᓄᓇᖁᑏᑦ ᓮᒻᒪᕐᑎᓯᒪᓚᐅᕐᐸᑦ;
ᐊᐅᓪᓚᕈᑦᔭᐅᓯᒪᔪᓪᓗ ᔧᑯᒃᑯᓐᓂᑦ ᐅᑎᕐᑎᓚᐅᕐᐸᑎᑦ.
2ᐃᓄᖁᑎᑎᑦ ᐃᓱᒪᒋᔪᓐᓁᕐᕕᒋᓚᐅᕐᐸᑎᑦ ᐊᔪᕐᑐᓕᓂᕐᒥᑦ;
ᐊᔪᕐᓂᓕᒫᖏᓪᓗ ᒪᑐᓚᐅᕐᐸᑎᑦ. ᓰᓚ
3ᓂᓐᖓᐅᒪᓃᑦ ᐃᓘᓐᓇᖓ ᓄᖅᑲᕐᑎᓚᐅᕐᐸᑦ;
ᓂᓐᖓᐅᑦᔨᓯᒪᓂᕕᓪᓗ ᐋᓐᓂᐊᓇᕐᓂᖓᓂᒃ ᕿᒤᓚᐅᕐᐳᑎᑦ.
4ᐋᖅᑭᓚᐅᕐᑎᒍᑦ ᐅᑎᕐᑎᓪᓗᑕ, ᒎᑎᕗᑦ ᐱᐅᓕᔨᒋᔭᕗᑦ,
ᓴᓂᕐᕙᓕᕈᒃ ᐅᕙᑦᑎᓐᓂᒃ ᓂᓐᖓᐅᑦᔨᓯᒪᓃᑦ!
5ᐃᓱᖃᖏᑦᑐᒧᑦ ᓂᓐᖓᐅᑎᓯᒪᔪᒪᓕᕐᐱᑎᒎᑦ?
ᓂᓐᖓᐅᑦᔨᓯᒪᓃᑦ ᑲᔪᓯᑎᑦᓱᒪᕕᐅᒃ ᑭᖑᕚᕇᒍᔪᓕᒫᓄᑦ?
6ᓂᑯᕕᑎᒋᐊᓪᓚᒍᒪᔪᓐᓃᕐᐱᑎᒎᑦ?
ᐃᓄᖁᑎᑎᑦ ᐃᓕᖕᓂᒃ ᓂᕐᑐᐃᔪᓐᓇᖁᓪᓗᒋᑦ?
7ᐊᑕᓃᖅ, ᓇᒡᓕᖕᓃᑦ ᓱᖁᓯᔪᐃᑦᑐᖅ ᐅᕙᑦᑎᓐᓄᑦ ᓴᖅᑭᑎᓚᐅᕈᒃ,
ᐱᐅᓕᕐᓯᓂᕐᓂᒡᓗ ᑐᓂᓯᕕᒋᓗᑕ.
8ᓈᓚᒍᒪᕗᖓ ᖃᓄᖅ ᒎᑎ ᐊᑕᓂᖅ ᐅᖃᕐᓂᐊᕐᒪᖔᑦ,
ᓮᒻᒪᓇᕐᑐᓂᒃ ᐃᓄᖁᑎᒥᓄᑦ ᐅᖃᕐᓂᐊᕐᒪᑦ ᐃᑦᔪᕐᓁᑦᑐᖁᑎᒥᓄᑦ,
ᐅᑎᕐᓂᐊᖏᑉᐸᑕ ᓯᓔᓐᓇᕐᑐᒥᒃ ᐃᓅᓂᕐᒧᑦ.
9ᐄᓛᒃ ᑖᑦᓱᒪ ᐱᐅᓕᔭᐅᕕᒃᓴᖃᕐᑎᑦᓯᓂᖓ
ᐊᑐᐃᓐᓇᐅᕗᖅ ᓯᕘᕋᔪᓄᑦ ᑖᑦᓱᒥᖓ,
ᓂᕐᑐᕐᓇᕐᓂᖅ ᐃᓂᖃᕈᓐᓇᖁᓪᓗᒍ ᓄᓇᑦᑎᓐᓂ.
10ᓇᒡᓕᖕᓂᖅ ᓱᖁᓯᔪᐃᑦᑐᖅ ᓱᕐᕋᔪᐃᑦᑑᓂᕐᓗ ᐃᒻᒥᖕᓄᑦ ᑲᑎᓂᐊᕐᐴᒃ;
ᐃᓱᐊᕐᑐᓕᓂᕐᓗ ᖃᓄᐃᖏᑦᓯᐊᕐᓂᕐᓗ ᐃᒻᒥᖕᓄᑦ ᑯᓂᖃᑦᑕᐅᑎᓂᐊᕐᐴᒃ.
11ᓱᖁᓯᔪᐃᑦᑑᓂᖅ ᓄᓇᐅᑉ ᐃᓗᐊᓂᑦ ᓄᐃᓂᐊᕐᐳᖅ,
ᐃᓱᐊᕐᑐᓕᓂᕐᓕ ᕿᓚᖕᒥᑦ ᑕᑯᓐᓇᕐᓂᐊᕐᐳᖅ.
12ᐄᓛᒃ ᐊᑕᓂᖅ ᐱᐅᔪᒥᒃ ᑐᓂᓯᓂᐊᕐᐳᖅ,
ᑕᕝᕙ ᓄᓇᕗᑦ ᐱᕈᕐᑎᑦᓯᓂᐊᕐᐳᖅ ᐱᕈᕐᑐᒥᓂᒃ.
13ᐃᓱᐊᕐᑐᓕᓂᖅ ᑖᑦᓱᒪ ᓵᖓᓄᑦ ᐃᖏᕐᕋᓂᐊᕐᐳᖅ,
ᑐᒥᓂᓗ ᐊᖅᑯᑎᒃᓴᓐᖑᕐᑎᓐᓂᐊᕐᐰᑦ.
Currently Selected:
ᐃᓐᖏᕈᑎᑦ 85: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
