ᐃᓐᖏᕈᑎᑦ 59
59
ᓇᓗᓇᖏᑦᑐᒥᒃ ᐱᐅᖏᑦᑐᓕᔪᑦ ᐃᖅᑲᕐᑐᕐᑕᐅᓂᒃᓴᖓᑦ
ᑍᕕᑎᐅᑉ ᐃᓐᖏᕈᑖ
1ᒎᑏ, ᓴᐳᑎᓚᐅᓐᖓ ᐊᑭᕋᕐᑐᕐᑎᓐᓂᑦ;
ᓴᐳᑎᓚᐅᓐᖓ ᐅᕙᓐᓂᒃ ᐊᑭᕋᕐᑐᕈᒪᔪᓂᑦ.
2ᓴᐳᑎᓚᐅᓐᖓ ᐱᐅᖏᑦᑐᒥᒃ ᐱᓇᓱᐊᕐᑎᓂᑦ,
ᐱᐅᓕᓗᖓᓗ ᐃᓄᐊᕈᒪᔪᓂᑦ.
3ᑕᑯᒋᑦ, ᐃᔨᕐᓯᒪᓪᓗᑎᒃ ᐅᑕᖅᑭᕗᑦ ᑐᖁᑦᓱᒪᓪᓗᖓ;
ᐊᔪᖏᑦᑐᑦ ᑲᑎᕗᑦ ᐊᑭᕋᕐᑐᕈᒪᓪᓗᖓ.
ᐊᑕᓃᖅ, ᑕᒻᒪᕐᓂᒃᑲ ᐊᔪᕐᑐᓕᓂᒃᑲᓗ ᐱᑦᔪᑎᒋᓇᒋᑦ,
4ᑐᐊᕕᕐᐳᑦ ᐸᕐᓇᒃᓗᑎᒃ ᐱᐅᖏᑦᑐᓕᓚᐅᕐᓂᒃᑲ ᐱᓇᒋᑦ.
ᒪᑭᓕᕆᑦ, ᐃᑲᔪᓚᐅᓐᖓ ᑕᑯᓐᓇᕐᓗᑎᓪᓗ!
5ᐃᕝᕕᑦ, ᐊᑕᓃᖅ, ᕿᓚᖕᒥᐅᒐᓴᒡᔪᐃᑦ ᒎᑎᖓᑦ, ᐃᓴᕆᐊᓕᑎᑦ ᒎᑎᖓᑦ.
ᑐᐸᒃᓗᑎᑦ ᓱᒋᐊᓚᐅᒃᑭᑦ ᐃᓅᖃᑎᒌᒡᔪᐊᓕᒫᑦ;
ᐱᐅᖏᑦᑐᓕᔪᑦ ᓇᓪᓕᐊᓪᓘᓐᓃᑦ ᓂᑲᒋᖏᓪᓗᒋᑦ. ᓰᓚ
6ᐅᓐᓄᑕᒫᑦ ᐅᑎᖃᑦᑕᕐᐳᑦ, ᐃᕐᓯᓵᕆᓗᑎᒃ ᕿᒻᒥᑎᑐᑦ,
ᐃᒡᓗᒐᓴᒡᔪᐊᑦ ᐊᑯᓐᓂᖓᓂ ᕿᓂᖃᑦᑕᕐᐳᑦ.
7ᑕᑯᓕᕆᑦ, ᖃᓂᕐᒥᖕᓂᑦ ᐊᓂᑎᑕᖏᓐᓂᒃ,
ᖃᓂᕐᒥᒍᑦ ᐅᖃᐅᓯᕆᔭᖏᑦ ᓴᕕᒡᔪᐊᑎᑑᕐᐳᑦ,
ᐅᖃᕐᓗᑎᒡᓗ, “ᑭᐊ ᑐᓵᕚᑎᒍᑦ?”
8ᐃᕝᕕᓪᓕ, ᐊᑕᓃᖅ, ᐃᔪᕆᕙᑎᑦ;
ᐃᓅᖃᑎᒌᒡᔪᐊᑦ ᑍᒤᑦᑐᑦ ᒥᑕᐅᑎᒋᕙᑎᑦ.
9ᓴᓐᖏᔫᑦᔪᑎᒋᒐᒃᑭᑦ, ᓂᕐᑐᕐᓗᑎᑦ ᐃᓐᖏᕐᕕᒋᓂᐊᕐᐸᒋᑦ;
ᐃᕝᕕᑦ ᒎᑏ, ᕿᒫᕕᒋᓗᑎᑦ ᓴᐳᑦᔨᔨᒋᒐᒃᑭᑦ.
10ᒎᑎᒪ ᓇᒡᓕᖕᓂᕐᒥᓄᑦ ᓱᖁᓯᔪᐃᑦᑐᒧᑦ ᐅᐸᖕᓂᐊᕐᐹᖓ;
ᒎᑎᐅᓪᓗ ᑕᑯᑎᓐᓂᐊᕐᐹᖓ ᐊᑭᕋᕐᑐᕐᑎᒃᑲ ᓵᓚᐅᑎᓪᓗᒋᑦ.
11ᑐᖁᓐᓂᐊᕐᓇᒋᑦ, ᐃᓅᖃᑎᒃᑲ ᐳᐃᒍᖁᓇᒋᑦ;
ᐊᕕᒃᑐᕐᑎᒃᑭᓪᓕ ᐱᔪᓐᓇᕐᓂᕐᓄᑦ, ᑲᑕᒃᑎᓪᓗᒋᓪᓗ,
ᐊᑕᓃᖅ ᓴᐴᓗᑕᕆᔭᕗᑦ.
12ᖃᓂᕐᒥᒍᑦ ᐊᔪᕐᑐᓕᓂᖏᑦ, ᐅᖃᐅᓯᕆᔭᖏᓪᓗ ᐱᓪᓗᒋᑦ,
ᐱᐅᔪᕆᓂᕐᒥᖕᓄᑦ ᐃᒻᒥᖕᓂᒃ ᒥᑭᒋᐊᕐᑎᓚᐅᕐᓕᑦ.
ᓱᕈᕐᑎᕆᓃᑦ ᓴᒡᓗᓃᓪᓗ ᐅᖃᐅᓯᕆᔭᖏᑦ ᐱᓪᓗᒋᑦ,
13ᓂᓐᖓᐅᒪᓂᕐᒧᑦ ᓄᖑᒃᑭᑦ, ᓄᖑᒃᑭᑦ ᐱᑕᖃᕈᓐᓃᕐᑎᑦᓯᐊᕐᓗᒋᑦ;
ᖃᐅᔨᓕᖁᓪᓗᒋᑦ ᒎᑎ ᐊᐅᓚᑦᓯᖕᒪᑦ ᔧᑯᒃᑯᓐᓂᒃ
ᓯᓚᕐᔪᐊᑉ ᐃᓱᐊᓄᑦ ᑎᑭᓪᓗᒍ. ᓰᓚ
14ᐅᓐᓄᑕᒫᑦ ᐅᑎᖃᑦᑕᕐᐳᑦ, ᐃᕐᓯᓵᕆᓪᓗᑎᒃ ᕿᒻᒥᑎᑐᑦ,
ᐃᒡᓗᒐᓴᒡᔪᐊᑦ ᐊᑯᓐᓂᖓᓂ ᕿᓂᖃᑦᑕᕐᐳᑦ.
15ᕿᒻᒥᑎᑐᑦ ᓇᒧᑐᐃᓐᓇᖅ ᓂᕿᒃᓴᕐᓯᐅᕐᑐᑎᑐᑦ,
ᒥᐊᒡᒎᖃᑦᑕᕐᓗᑎᒡᓗ ᐊᕿᐊᑦᑐᓚᐅᖏᓐᓂᕐᒥᖕᓂ.
16ᐊᔪᒐᖃᖏᓐᓃᓪᓕ ᐃᓐᖏᕈᑎᒋᔪᒪᕙᕋ;
ᓂᐱᖅᑯᕐᑐᓗᖓ ᐅᓪᓛᒃᑯᑦ ᐃᓐᖏᕈᒪᕗᖓ ᓇᒡᓕᒍᓱᖕᓂᕐᓂᒃ.
ᓴᐳᑦᔨᔨᒋᖃᑦᑕᕋᒃᑭᑦ ᕿᒫᕕᒋᓪᓗᑎᓪᓗ ᐅᓪᓗᐃᑦ ᐅᖁᒤᑦᑐᑦ ᑎᑭᓯᒪᑎᓪᓗᒋᑦ.
17ᓴᓐᖏᔫᑦᔪᑎᒋᕙᒋᑦ, ᐃᓐᖏᕈᒪᕗᖓ ᓂᕐᑐᕐᓗᑎᑦ,
ᒎᑎ ᐃᕝᕕᑦ ᓴᐳᑦᔨᔨᒋᒐᒃᑭᑦ, ᒎᑎ ᓇᒡᓕᖕᓂᕐᒥᓂᒃ ᓴᖅᑭᑎᑦᓯᔪᖅ.
Currently Selected:
ᐃᓐᖏᕈᑎᑦ 59: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
