ᐃᓐᖏᕈᑎᑦ 40
40
ᐅᒃᐱᕐᓂᐅᑉ ᓱᖁᓯᔪᐃᑦᑑᓂᖓ ᐆᒃᑐᕐᓗᒃᑕᐅᓂᕐᒥ
ᐃᓐᖏᕐᑏᑦ ᑲᒪᔨᖓᓐᓄᑦ ᑍᕕᑎᐅᑉ ᐃᓐᖏᕈᑖ
1ᐅᑕᖅᑭᕗᖓ ᕿᓄᐃᓵᕐᓗᖓ ᐊᑕᓂᕐᒥᒃ;
ᓵᕝᕕᒋᕚᖓ ᓂᓪᓕᐊᓂᕋᓗ ᑐᓴᕐᐹ.
2ᕿᓗᕚᖓᓗ ᐃᑎᕐᓵᓗᖕᒥᑦ ᐊᓯᐅᓇᕐᑐᒥᑦ,
ᒪᕐᕋᕐᒥᑦ ᐊᕿᑦᑐᐊᓗᖕᒥᑦ, ᐃᑎᒐᒃᑲᓗ ᕾᕐᑐᒧᐊᕐᑎᑉᐰᑦ,
ᐊᓪᓗᕐᕕᒋᓂᐊᕐᑕᒃᑲᓗ ᐋᖅᑭᑦᓯᐊᕐᐰᑦ.
3ᐃᓐᖏᐅᑎᒥᒡᓗ ᓄᑖᒥᒃ ᖃᓂᓐᓄᑦ ᐃᓕᓯᕗᖅ,
ᒎᑎᕗᑦ ᓂᕐᑐᕐᓗᒍ.
ᐅᓄᕐᑐᑦ ᖃᐅᔨᓂᐊᕐᐹᑦ ᓯᕘᕋᓗᑎᒡᓗ,
ᐊᑕᓂᕐᒥᒡᓗ ᑕᑎᖃᓕᕐᓗᑎᒃ.
4ᖁᕕᐊᓱᑦᓯᐊᕐᐳᖅ ᐃᓄᒃ ᐊᑕᓂᕐᒥᒃ ᑕᑎᖃᓕᕐᑐᖅ,
ᐱᐅᔪᕆᔪᓂᒡᓗ ᐅᐱᒋᔭᖃᖏᑦᑐᖅ, ᓴᖑᕙᒃᑐᓂᒡᓗ ᒎᑎᐅᖏᑦᑐᓄᑦ ᐅᐱᒍᓱᖏᑦᑐᖅ.
5ᐊᑕᓃᖅ, ᒎᑎᒐ, ᐱᓂᐊᕐᓂᑎᑦ ᑲᒪᓇᕐᑐᑦ ᐅᓄᕐᑑᕗᑦ, ᐱᓂᐊᕐᓂᕆᖃᑦᑕᕐᓯᒪᔭᑎᑦ.
ᐅᕙᑦᑎᓐᓂᒡᓗ ᐃᓱᒪᓕᐅᕈᑎᖃᕐᓂᑎᑦ
ᐃᓕᖕᓄᑦ ᑭᖑᓕᕇᒃᓗᑎᒃ ᐃᖅᑲᐅᒪᔭᐅᔪᓐᓇᓐᖏᓚᑦ;
ᓇᓗᓁᕋᓱᐊᕈᒃᑭᑦ ᐅᖃᐅᓯᕆᓗᒋᓪᓗ, ᐅᓄᓗᐊᕐᒪᑕ ᓈᓴᕐᑕᐅᔪᓐᓇᖏᓚᑦ.
6 #
ᐄᑉᕈᐃᓄᑦ 10:5-7. ᐆᒪᔪᐃᑦ ᐆᑕᒃᓮᑦ ᑐᓂᕐᕈᑎᒃᓮᓪᓗ ᐊᓯᖏᑦ ᐱᔪᒪᓐᖏᓚᑎᑦ;
ᓯᐅᑏᒃᑲᒃ ᐊᖕᒪᓚᐅᕋᕕᒋᒃ.
ᑐᓂᕐᕈᑎᑦ ᐆᑕᒃᓮᑦ ᐊᔪᕐᓂᕐᓗ ᐱᓪᓗᒍ ᑐᓂᕐᕈᑎᑦ ᐱᔪᒪᓚᐅᓐᖏᓚᑎᑦ.
7ᐅᖃᓚᐅᕐᐳᖓᓕ, ᑕᑯᒋᑦ ᕾᕗᖓ;
ᐊᒡᓚᖕᓂ ᐃᒧᓯᒪᔪᓂ ᑎᑎᕋᐅᓯᐅᓯᒪᕗᖓ.
8ᐱᔪᒪᔧᑦ ᐱᓇᓱᐊᕐᓗᒍ ᖁᕕᐊᒋᕙᕋ, ᒎᑏᒃ ᐱᖁᔭᑎᓪᓗ ᐆᒻᒪᑎᓐᓃᑉᐳᑦ.
9ᐅᖃᐅᓯᖃᓚᐅᕐᐳᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ
ᐃᓱᐊᕐᑑᓂᕐᓂᒃ ᐃᓄᒋᐊᒃᑐᕐᔪᐊᑦ ᑲᑎᒪᕕᖓᓂ;
ᐃᓛᒃ, ᓂᓪᓕᐊᑦᑍᓕᓚᐅᓐᖏᓚᖓ, ᐊᑕᓃᖅ, ᐃᕝᕕᑦ ᖃᐅᔨᒪᕗᑎᑦ.
10ᐃᔨᕐᓯᒪᓇᓱᓚᐅᓐᖏᓚᕋᓗ ᐃᓱᐊᕐᑐᓕᓃᑦ ᐆᒻᒪᑎᓐᓂ;
ᐅᖃᐅᓯᕆᓚᐅᕐᐸᕋᓗ ᓱᖁᓯᔪᐃᑦᑑᓃᑦ ᐱᐅᓕᕐᓯᓃᓪᓗ;
ᓇᒡᓕᖕᓃᓪᓗ ᓱᖁᓯᔪᐃᑦᑐᖅ ᐃᔨᕐᓯᒪᓚᐅᓐᒋᓚᕋ ᓱᓕᑦᓯᐊᕐᓃᓪᓗ
ᐃᓄᒋᐊᒃᑐᕐᔪᐊᓂᑦ ᑲᑎᒪᔪᓂᑦ.
11ᓂᑲᒍᓱᖕᓃ ᓱᖁᓯᔪᐃᑦᑐᖅ ᑐᓂᑦᑍᓕᓂᐊᕐᓇᒍ ᐅᕙᓐᓄᑦ, ᐊᑕᓃᖅ;
ᓇᒡᓕᖕᓂᕕᑦ ᓱᖁᓯᔪᐃᑦᑑᑉ ᑲᔪᓯᑦᓯᐊᕐᓂᕕᓪᓗ ᑍᒪᓐᖓᑦ ᓴᐳᑎᓯᒪᓕᖓ.
ᐃᑲᔪᕐᑕᐅᔪᒪᓂᕐᒧᑦ ᑐᒃᓯᐊᕐᓂᖅ
ᐃᓐᖏᕈᑦ 70
12ᓈᓴᒐᒃᓴᐅᖏᑦᑐᑦ ᐱᐅᖏᑦᑐᑦ ᐊᕙᓗᓯᒪᕚᖓ;
ᐱᐅᖏᑦᑐᓕᓂᕐᒪᓗ ᓵᓚᒋᓯᒪᖕᒪᖓ,
ᖁᒻᒧᓪᓘᓐᓃᑦ ᑕᑯᓴᕈᓐᓁᓪᓕᓪᓗᖓ;
ᐅᓄᕐᓂᕐᓴᐅᖕᒪᑕ ᓄᔭᓐᓂᑦ ᓂᐊᖁᓐᓃᑦᑐᓂᑦ;
ᑍᒤᒻᒪᑦ ᐆᒻᒪᑎᒐ ᐊᔪᓕᕐᐳᖅ.
13ᖁᕕᐊᓱᓚᐅᕆᑦ, ᐅᕙᓐᓂᒃ ᐱᐅᓕᕐᓯᔪᒪᓂᕐᒧᑦ;
ᐊᑕᓃᖅ, ᑐᐊᕕᓚᐅᕆᑦ ᐃᑲᔪᕐᓗᖓ!
14ᑲᓐᖑᓱᒃᑎᓚᐅᒃᑭᑦ ᓇᓗᓕᕐᓇᕐᑐᒧᓪᓗ ᑎᑭᑎᑎᓪᓗᒋᑦ
ᐃᓅᓯᓐᓂᒃ ᐊᓯᕈᐃᔪᒪᔪᑦ;
ᐅᑎᕆᐊᕐᑎᓪᓗᒋᓪᓗ ᓇᕐᕈᒋᔭᐅᓇᕐᑐᒧᑦ ᑎᑭᓪᓗᑎᒃ.
ᐅᕙᓐᓂᑦ ᐱᐅᖏᑦᑐᒥᒃ ᐱᖁᔨᔪᑦ.
15ᓇᓗᓕᓕᕐᓕᑦ ᑲᓐᖑᓱᖕᓂᑎᒃ ᐱᑦᔪᑎᒋᓪᓗᒍ,
ᐅᕙᓐᓂᒃ ᐅᖃᐅᓯᖃᕐᑐᑦ, “ᐋᕼᐊ, ᐋᕼᐊ!”
16ᐃᓕᖕᓂᒃ ᕿᓂᕐᑐᓕᒫᑦ ᖁᕕᐊᓱᒡᓕᑦ
ᐃᓕᖕᓂᒡᓗ ᖁᕕᐊᓲᑎᖃᕐᓗᑎᒃ;
ᐱᐅᓕᕐᓯᓂᕐᓂᒡᓗ ᓇᒡᓕᒍᓱᒃᑐᑦ ᑍᒪᓐᖓᑦ ᐅᖃᓕᕐᓕᑦ,
“ᐊᑕᓂᖅ ᐊᖏᔪᕈᕐᑎᑕᐅᓕ!”
17ᐊᔪᕐᓴᕐᑑᕗᖓᓕ ᐃᑲᔪᕐᑕᐅᔭᕆᐊᖃᕐᓗᖓᓗ;
ᓱᓕᓕ ᐊᑕᓂᐅᑉ ᐃᓱᒪᒋᕚᖓ.
ᐃᑲᔪᕐᑎᒋᕙᒋᑦ ᓴᐳᑦᔨᔨᒋᓪᓗᑎᓪᓗ;
ᒎᑏᒃ, ᐃᑲᔪᕐᓇᓵᕐᓂᐊᕐᓇᖓ.
Currently Selected:
ᐃᓐᖏᕈᑎᑦ 40: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
