ᐃᓐᖏᕈᑎᑦ 31
31
ᐊᑕᓂᖅ ᓴᐳᑦᔭᐅᕕᒃᓴᐅᕗᖅ ᐊᑭᕋᕐᑐᕐᑕᐅᓂᕐᒥ
ᐃᓐᖏᕐᑏᑦ ᑲᒪᔨᖓᓐᓄᑦ ᑍᕕᑎᐅᑉ ᐃᓐᖏᕈᑖ
1ᐃᕝᕕᑦ ᐊᑕᓃᖅ ᑕᑎᒋᕙᒋᑦ;
ᖃᖓᓕᒫᖅ ᑲᓐᖑᓱᒃᑎᑕᐅᖁᓂᐊᕐᓇᖓ;
ᓴᐳᑎᓚᐅᓐᖓ ᐃᓱᐊᕐᑑᓂᕐᓄᑦ.
2ᓯᐅᑏᑦ ᒪᓂᓚᐅᕈᒃ ᐅᕙᓐᓄᑦ, ᕾᓚᐅᕆᑦ ᑐᐊᕕᕐᓗᑎᑦ ᓴᐳᑎᓗᖓᓗ;
ᕾᕐᑐᕆᒐᒃᑭᑦ ᕿᒫᕕᒋᓪᓗᑎᓪᓗ ᕿᒫᕕᒃᓴᕆᓗᑎᑦ ᓴᐳᑦᔭᐅᕕᒃᓴᕆᒐᒃᑭᑦ.
3ᕾᕐᑐᕆᒐᒃᑭᑦ ᐃᒡᓗᕐᔪᐊᑐᑦ ᐊᐅᓚᔪᐃᑦᑐᑐᑦ;
ᑍᒤᒻᒪᑦ ᐊᑏᑦ ᐱᑦᔪᑎᒋᓗᒍ,
ᑕᓯᐅᕐᓗᖓᓗ ᓯᕗᓕᕐᑎᒋᓚᐅᕐᓚᒋᑦ.
4ᓄᓱᓚᐅᓐᖓ ᓄᓗᐊᓂᑦ ᐅᕙᓐᓄᑦ ᐃᓕᓯᒪᔪᓂᑦ,
ᖃᐅᔨᑎᓐᓇᖓ ᒪᓂᔭᐅᓚᐅᕐᑐᓂᑦ ᐅᕙᓐᓄᑦ,
ᐃᕝᕕᑦ ᓴᐳᑦᔨᔨᒋᒐᒃᑭᑦ.
5 #
ᓘᑲᓯ 23:46. ᐊᒡᒐᖕᓄᑦ ᐊᓂᕐᓂᕋ ᑐᓂᕙᕋ;
ᐃᕝᕕᑦ ᐅᑎᕐᑎᓚᐅᕐᐸᕐᒪ ᐃᓕᖕᓄᑦ,
ᐊᑕᓃᖅ ᒎᑎᐅᔪᑎᑦ ᓱᓕᑦᓯᐊᕐᑐᖅ.
6ᐆᒥᒋᖃᑦᑕᓯᒪᕙᒃᑲ ᑲᒪᒋᔭᖃᕐᑐᑦ ᒎᑎᓐᖑᐊᓂᒃ ᐊᑑᑎᖃᖏᑦᑐᓂᒃ;
ᐅᕙᖓᓕ ᐊᑕᓂᕐᒥᒃ ᑕᑎᖃᕐᐳᖓ.
7ᓂᕐᑐᐃᓂᐊᕐᐳᖓ ᖁᕕᐊᓱᒡᓗᖓᓗ ᓇᒡᓕᖕᓃᑦ ᓱᖁᓯᔪᐃᑦᑐᖅ ᐱᑦᔪᑎᒋᓗᒍ:
ᐅᖁᒤᒃᓴᕐᓂᕋ ᐃᓱᒪᒋᒐᕕᐅᒃ;
ᑕᕐᓂᕐᒪ ᐊᒃᓱᕈᕐᑎᑕᐅᓂᖓ ᖃᐅᔨᒪᒐᕕᐅᒃ.
8ᐊᑭᕋᕐᑐᕐᑎᒪ ᐊᒡᒐᖏᓐᓄᑦ ᑐᓂᓚᐅᖏᓐᓇᕕᖓ:
ᐃᑎᒐᒃᑲ ᐃᓕᒐᕕᒋᑦ ᐱᕕᑐᔪᒧᑦ.
9ᐊᑕᓃᖅ, ᓂᑲᒋᓚᐅᓐᖓ, ᐅᖁᒤᑦᑐᒦᓗᐊᓕᕋᒪ;
ᐃᔩᒃᑲᒃ ᓴᓐᖐᑦᑑᓕᕐᐳᒃ ᕿᒃᓵᖕᓂᕐᒧᑦ;
ᐃᓛᒃ ᑕᕐᓂᕋ ᑎᒥᒐᓗᑦᑕᐅᖅ,
10ᐃᓅᓯᕋ ᓄᖑᑕᐅᓕᕐᐳᖅ ᐃᓱᒪᔮᕐᓂᕐᒧᑦ;
ᐊᕐᕌᒍᒃᑲᓗᑦᑕᐅᖅ ᐊᓂᕐᓴᐅᒥᓂᕐᒧᑦ;
ᓄᑭᖏᕈᑎᕗᖓ ᐊᔪᕐᑐᓕᓂᒃᑲ ᐱᑦᔪᑎᒋᓪᓗᒋᑦ,
ᓴᐅᓂᒃᑲᓘᓐᓃᑦ ᓴᓐᖐᑦᑑᓕᕐᐳᑦ.
11ᐊᑭᕋᕐᑐᕐᑎᓐᓄᑦ ᒥᑕᐅᑎᒃᓴᐅᓕᓚᐅᕐᐳᖓ,
ᐱᓗᐊᕐᑐᒥᒡᓕ ᓄᓇᖃᑎᒪ ᐊᑯᓐᓂᖓᓐᓂ,
ᖃᐅᔨᒪᔭᓐᓄᓪᓗ ᓇᕐᕈᓇᕐᓯᓪᓗᖓ;
ᐅᕙᓐᓂᒃ ᓯᓚᒥ ᑕᑯᔪᑦ ᕿᒫᕚᖓ.
12ᐳᐃᒍᕐᑕᐅᓯᒪᕗᖓ ᑐᖁᖓᔪᑎᑐᑦ ᐃᓱᒪᔪᓐᓇᕈᓐᓃᕐᑐᑐᑦ;
ᐃᓗᓕᖁᑎᑐᑦ ᓯᖁᒥᓯᒪᔪᑎᑐᖅ ᑍᒤᓕᕐᐳᖓ.
13ᐅᓄᕐᑐᑦ ᐅᖃᕐᓂᕐᓘᑎᖃᕐᑐᑦ ᑐᓵᕙᒃᑲ;
ᑲᑉᐱᐊᓇᕐᑐᑦ ᐊᕙᑎᓐᓃᑉᐳᑦ;
ᑲᑎᒪᖃᑎᒌᒃᑎᓪᓗᒋᑦ ᐱᑦᔪᑎᒋᓪᓗᖓ,
ᐃᓱᒪᓕᐅᖃᑎᒌᒃᐳᓪᓗ ᐃᓅᓯᕋ ᐃᓱᓕᑎᑦᓱᒪᓪᓗᒍ.
14ᐅᕙᖓᓕ ᐊᑕᓃᖅ ᑕᑎᒋᕙᒋᑦ;
ᐅᖃᕐᐳᖓᓗ, “ᐃᕝᕕᑦ ᒎᑎᒋᕙᒋᑦ.”
15ᐱᕕᒃᓴᒃᑲ ᐊᒡᒐᖕᓃᑉᐳᑦ;
ᓴᐳᑎᓚᐅᓐᖓ ᐊᑭᕋᕐᑐᕐᑎᓐᓂᑦ ᐅᕙᓐᓂᒡᓗ ᓵᓚᖃᕋᓱᐊᕐᑐᓂᑦ.
16ᑮᓁᑦ ᖃᐅᒪᑎᓕᕈᒃ ᐱᔨᖕᓄᑦ;
ᓴᐳᑎᓚᐅᓐᖓ ᓇᒡᓕᒍᓱᖕᓂᕐᔪᐊᑦ ᐱᑦᔪᑎᒋᓗᒍ.
17ᑲᓐᖑᓱᒃᑎᑕᐅᖁᓂᐊᕐᓇᖓ ᐊᑕᓃᖅ,
ᐃᓕᖕᓄᑦ ᓂᓪᓕᐊᓚᐅᕋᒪ;
ᐱᐅᖏᑦᑐᓕᔪᑦ ᑲᓐᖑᓱᒃᑎᓚᐅᒃᑭᑦ;
ᐃᓗᕕᕐᒦᓪᓗᑎᒃ ᓂᐱᖃᕈᓐᓃᕐᓕᑦ.
18ᖃᓂᖏᑦ ᓴᒡᓗᑐᔪᑦ ᓂᐰᕐᓕᑦ,
ᐱᐅᔪᕆᓂᕐᒧᑦ ᐃᓕᕋᓇᕈᒪᓂᕐᒧᓪᓗ ᓂᓪᓕᐊᔪᑦ
ᓇᓛᒎᕐᑐᑦ ᒥᑕᐅᑎᖃᕐᓗᑎᒃ.
19ᐱᐅᔫᓃᑦ ᐊᖏᔪᐊᓘᕗᖅ,
ᖁᒥᕐᕈᑎᒋᔧᑦ ᐃᓕᖕᓂᒃ ᓯᕘᕋᔪᓄᑦ,
ᑕᒪᓐᓇ ᐸᕐᓇᒃᓯᒪᔧᑦ ᐃᓕᖕᓂᒃ ᑕᑎᖃᕐᑐᓄᑦ
ᐃᓄᐃᑦ ᕿᑐᕐᖓᖏᑕ ᑕᒃᑯᐊᓐᓂ!
20ᐃᕝᕕᑦ ᓇᔪᒐᕐᓂ ᖃᐅᔨᒪᔭᐅᖏᑦᑐᒥ ᐃᔨᕐᓯᒪᓂᐊᕐᐸᑎᑦ
ᐃᓄᐃᑦ ᑐᖁᑦᓯᔪᒪᒧᑦ ᐃᓱᒪᓕᐅᖃᑎᒌᖕᓂᖏᓐᓂᑦ;
ᐃᒡᓗᖕᓂ ᓴᐳᑎᓯᒪᓂᐊᕐᐸᑎᑦ ᖃᐅᔨᒪᔭᐅᖏᑦᑐᒥ ᐅᖃᕐᓂᑦ ᐸᓯᒃᓯᕐᑐᓂᑦ.
21ᐊᑕᓂᖅ ᓂᕐᑐᕐᑕᐅᓕ,
ᑕᑯᑎᓚᐅᕐᒪᖓ ᐱᑦᓯᐊᕐᓂᕐᒥᓂᒃ ᑲᒪᓇᕐᑐᒥᒃ
ᐃᒡᓗᒐᓴᒡᔪᐊᓂ ᓴᓐᖏᔪᓂ!
22ᐅᐃᒪᔮᕐᓗᖓ ᐅᖃᓚᐅᕋᒪ,
“ᐃᕝᕕᑦ ᐃᔨᖕᓂᑦ ᑕᕐᕆᓯᒪᕗᖓ”;
ᕿᓄᒐᒪᓕ ᓂᐱᒐ ᑐᓴᓚᐅᕐᐸᑦ ᓂᓪᓕᐊᓕᕋᒪ ᐃᓕᖕᓄᑦ.
23ᐊᑕᓂᖅ ᓇᒡᓕᒋᓯᐅᒃ ᐃᑦᔪᕐᓁᑦᑐᖁᑎᒋᖕᒪᓯ!
ᐊᑕᓂᐅᑉ ᓴᐳᑎᓯᒪᕔᑦ ᓱᖁᓯᔪᐃᑦᑐᑦ,
ᐱᐅᔪᕆᔪᕐᓕ ᓱᒋᐊᕐᐹ ᓱᒋᐊᕐᑕᐅᔭᕆᐊᖃᕐᓂᖓᓄᑦ.
24ᓴᐱᖏᓪᓗᓯ, ᐆᒻᒪᑎᓯ ᓴᓐᖏᓂᕐᒥᒃ ᑐᓂᓂᐊᕐᐰᑦ,
ᐃᓕᑦᓯ ᑕᒪᑦᓯ ᐊᑕᓂᕐᒥᑦ ᓂᕆᐅᒃᕕᖃᕐᑐᓯ.
Currently Selected:
ᐃᓐᖏᕈᑎᑦ 31: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
