ᐃᓐᖏᕈᑎᑦ 27
27
ᖁᕕᐊᓱᖕᓂᕐᒧᑦ ᐅᖃᐅᓯᖃᕐᓂᖅ ᐅᒃᐱᕐᓂᖃᕐᓂᕐᒥᒃ
ᑍᕕᑎᐅᑉ ᐃᓐᖏᕈᑖ
1ᐊᑕᓂᖅ ᖃᐅᒪᓂᕆᕙᕋ, ᐱᐅᓕᔭᐅᑦᔪᑎᒋᓪᓗᒍᓗ;
ᑭᓇᒥᒃ ᓯᕘᕋᔪᒃᓴᐅᕗᖓ?
ᐃᓅᓯᕐᒪ ᐊᑕᓂᖅ ᓴᓐᖏᔫᑦᔪᑎᒋᕚ; ᑭᓇᒥᒃ ᓯᕘᕋᒋᔭᖃᕐᑐᒃᓴᐅᕗᖓ?
2ᐱᐅᖏᑦᑐᓕᔪᑦ ᕾᓕᕐᐸᑕ ᐅᕙᓐᓂᒃ ᐊᑭᕋᕐᑐᕈᒪᓗᑎᒃ ᐅᕕᓂᒐ ᓂᕆᔪᒪᓗᒍ,
ᐊᑭᕋᕐᑐᕐᑎᒃᑲ ᐅᓇᖕᒥᔨᒃᑲᓗ ᐅᐸᒃᑐᕐᐸᑕ, ᑕᕝᕙ ᐹᓪᓚᒃᐳᑦ ᐅᕐᕈᓪᓗᑎᒡᓗ.
3ᐅᓇᑕᕐᑐᒃᓮᑦ ᐊᕙᑎᓐᓂ ᐅᖓᓗᓯᒐᓗᐊᕐᐸᑕ,
ᐆᒻᒪᑎᒐ ᑕᕝᕙ ᑲᑉᐱᐊᓱᖕᓂᐊᓐᖏᓚᖅ;
ᐅᓇᑕᕐᓂᖃᓕᕋᓗᐊᕐᐸᓪᓗ ᐅᕙᓐᓄᑦ, ᑍᒤᑦᑐᒥᒃ ᖁᓚᕈᑎᖃᓐᖏᓚᖓ.
4ᐊᑕᐅᓯᖅ ᕿᓄᐊᕆᕙᕋ ᐊᑕᓂᕐᒥᑦ, ᕿᓂᕐᓗᒍᓗ ᓇᓂᔪᒪᓪᓗᒍ;
ᐊᑕᓂᐅᑉ ᐃᒡᓗᖓᓂ ᐃᓂᖃᕈᒪᓪᓗᖓ, ᐃᓅᓯᕐᒪ ᐅᓪᓗᖃᕐᓂᖓᓂ.
5ᐅᓪᓗᒥᒃ ᐃᓱᐊᖏᑦᑐᖃᓕᕐᐸᑦ, ᐃᒡᓗᒥᓂ ᓴᐳᑎᓯᒪᓂᐊᕐᐹᖓ;
ᑐᐱᕐᔪᐊᖁᑎᒥᓂ ᐃᔨᕐᓯᒪᓂᐊᕐᐹᖓ ᐳᕐᑐᔪᒧᐊᕐᑎᓪᓗᖓᓗ ᕾᕐᑐᒧᑦ.
6ᒫᓐᓇᓗ ᓂᐊᖁᕋ ᐋᕐᓗᕐᓂᐊᕐᐸᕋ, ᐊᑭᕋᕐᑐᕐᑎᒪ ᐃᓗᒪᔨᒪ ᖁᓛᑦᑎᒍᑦ;
ᑍᒤᒻᒪᑦ ᑐᐱᕐᔪᐊᖓᓂ ᑐᓂᕐᕈᑎᒃᓴᓂᒃ
ᑐᓂᕐᕈᓯᕐᓂᐊᕐᐳᖓ ᓂᐱᖅᑯᕐᑐᓗᖓ ᖁᕕᐊᓱᖕᓂᕐᒥᒃ:
ᐃᓐᖏᕐᓂᐊᕐᐳᖓ ᐃᓛᒃ, ᓂᕐᑐᕈᑎᓂᒃ ᐃᓐᖏᕐᓂᐊᕐᐳᖓ ᐊᑕᓂᕐᒧᑦ.
7ᐊᑕᓃᖅ ᓂᐱᒐ ᑐᓴᕈᒃ ᓂᓪᓕᐊᓕᕅᒍᒪ: ᓂᑲᒋᓗᖓ ᑭᐅᓚᐅᓐᖓ.
8ᐅᖃᕋᕕᑦ, “ᑮᓇᕋ ᕿᓂᕈᒃ,”
ᐆᒻᒪᑎᒐ ᑕᕝᕙ ᐃᓕᖕᓄᑦ ᐅᖃᕐᐳᖅ, “ᑮᓁᑦ, ᐊᑕᓃᖅ ᕿᓂᕈᒪᕙᕋ.”
9ᑮᓁᑦ ᐊᓚᐅᒪᑎᓐᓂᐊᕐᓇᒍ ᐅᕙᓐᓂᑦ!
ᐱᔩᑦ ᐊᔭᒃᑐᕐᓂᐊᕐᓇᒍ ᓂᓐᖓᐅᒪᓂᕐᒧᑦ; ᐃᑲᔪᕐᑎᒋᖃᑦᑕᕐᓯᒪᒐᒃᑭᑦ.
ᓇᕐᕈᒋᓕᕐᓂᐊᕐᓇᖓ, ᕿᒪᖕᓂᐊᕐᓇᖓᓗ,
ᒎᑏᒃ ᐱᐅᓕᔨᒋᒐᒃᑭᑦ!
10ᐊᑖᑕᒪ ᐊᓈᓇᒪᓗ ᕿᒪᒃᑲᓗᐊᕐᐸᖓ,
ᐊᑕᓂᐅᓪᓕ ᑲᒪᒋᑦᓯᐊᕐᓂᐊᕐᐹᖓ.
11ᐊᑕᓃᖅ, ᐊᖅᑯᑎᖕᓂᒃ ᐃᓕᓐᓂᐊᕐᑎᓚᐅᓐᖓ;
ᑕᓯᐅᓚᐅᓐᖓᓗ ᐊᖅᑯᑎᒃᑯᑦ ᒪᓂᕋᑦᓯᐊᒃᑯᑦ,
ᐊᑭᕋᕐᑐᕐᑎᒃᑲ ᐱᑦᔪᑎᒋᓪᓗᒋᑦ.
12ᐊᑭᕋᕐᑐᕐᑎᒪ ᐱᔪᒪᔭᖏᓐᓄᑦ ᑐᓂᓂᐊᕐᓇᖓ;
ᓴᒡᓗᓪᓗᑎᒃ ᐸᓯᒃᓯᓇᓱᒃᑐᑦ ᐊᑭᕋᕐᑐᕐᒪᖓ,
ᐊᓂᕐᓵᕐᑐᕐᒪᑕ ᑲᑉᐱᐊᓱᒃᑎᑦᓯᔪᒪᓂᕐᒥᒃ.
13ᓴᐱᓕᕋᔭᓚᐅᕋᒪ ᐅᒃᐱᓚᐅᖏᒃᑯᒪ ᐊᑕᓂᐅᑉ
ᐱᑦᓯᐊᕐᓂᖓᓂᒃ ᑕᑯᑎᑕᐅᓂᐊᕐᓂᓐᓂᒃ, ᐃᓅᔪᑦ ᓄᓇᖓᓂ.
14ᐊᑕᓂᖅ ᐅᑕᖅᑭᒍᒃ; ᑯᒃᓴᓱᖏᓪᓗᑎᑦ,
ᑕᕝᕙ ᐆᒻᒪᑏᑦ ᓴᓐᖏᓂᕐᒥᒃ ᑐᓂᓯᕕᒋᓂᐊᕐᐹ;
ᐅᖃᕐᐳᖓ, ᐊᑕᓂᖅ ᐊᑏ ᐅᑕᖅᑭᒍᒃ!
Currently Selected:
ᐃᓐᖏᕈᑎᑦ 27: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
