ᐃᓐᖏᕈᑎᑦ 25
25
ᕿᓄᓂᖅ ᓴᐳᑎᔭᐅᔪᒪᓂᕐᒧᑦ ᐃᓱᒪᒋᔪᓐᓁᕐᕕᐅᔪᒪᓂᕐᓗ
ᑍᕕᑎᐅᑉ ᐃᓐᖏᕈᑖ
1ᐃᓕᖕᓄᑦ ᐊᑕᓃᖅ, ᑕᕐᓂᕋ ᖁᒻᒧᐊᒃᑎᑉᐸᕋ;
2ᒎᑏᒃ, ᐃᕝᕕᑦ ᑕᑎᒋᕙᒋᑦ, ᑲᓐᖑᓱᒃᑎᑕᐅᖁᓂᐊᕐᓇᖓ,
ᐊᑭᕋᕐᑐᕐᑎᒃᑲ ᐅᕙᓐᓂᒃ ᓵᓚᖃᕐᑎᓐᓂᐊᕐᓇᒋᑦ.
3ᐃᓛᒃ, ᐃᓘᓐᓇᑎᒃ ᐃᓕᖕᓂᒃ ᓂᕆᐅᒃᑐᑦ ᑲᓐᖑᓱᒃᑎᑕᐅᓂᐊᓐᖏᓚᑦ;
ᑲᓐᖑᓱᒃᑎᑕᐅᔭᕆᐊᖃᕐᐳᓪᓕ ᐱᑦᔪᑎᒃᓴᖃᕋᑎᒃ ᑲᑉᐱᐊᒋᔭᐅᔪᓂᒃ ᐱᓇᓱᐊᕐᑐᑦ.
4ᐊᑕᓃᖅ ᐱᓂᐊᕐᓂᕐᓂᒃ ᖃᐅᔨᑎᓚᐅᓐᖓ;
ᐊᖅᑯᑎᖕᓂᒡᓗ ᐃᓕᓐᓂᐊᕐᑎᓪᓗᖓ.
5ᓱᓕᑦᓯᐊᕐᓂᒃᑯᑦ ᑕᓯᐅᓚᐅᓐᖓ, ᐃᓕᓐᓂᐊᕐᑎᓪᓗᖓᓗ,
ᐱᐅᓕᔨᒋᓪᓗᑎᑦ ᒎᑎᒋᒐᒃᑭᑦ;
ᐃᓕᖕᓂᓪᓗ ᓂᕆᐅᒋᔭᖃᕐᐳᖓ ᐅᓪᓗᖅ ᓈᓪᓗᒍ.
6ᓈᒃᑭᒍᓱᖕᓂᕐᔪᐊᑎᑦ ᐃᖅᑲᐅᒪᒃᑭᑦ ᓇᒡᓕᒍᓱᖕᓃᓪᓗ ᓱᖁᓯᔪᐃᑦᑐᖅ,
ᑖᒃᑯᐊ ᑍᒪᓐᖓᓂᑦ ᐱᓯᒪᔪᑐᖃᐅᖕᒪᑕ.
7ᐃᓅᓱᒃᑑᓂᓐᓄᑦ ᐊᔪᕐᑐᓕᓂᕆᓚᐅᕐᑕᒃᑲ ᐃᖅᑲᐅᒪᓂᐊᕐᓇᒋᑦ,
ᑕᐸᓱᖕᓂᕆᓚᐅᕐᑕᒃᑲᓘᓐᓃᑦ;
ᓇᒡᓕᒍᓱᖕᓂᕐᓄᑦ ᓱᖁᓯᔪᐃᑦᑐᒧᑦ, ᐃᖅᑲᐅᒪᓐᖓ, ᐱᐅᔫᒐᕕᑦ, ᐊᑕᓃᖅ.
8ᐱᐅᔫᕗᖅ ᐃᓱᐊᕐᑑᑦᓮᓐᓇᕐᓗᓂᓗ ᐊᑕᓂᖅ;
ᑍᒤᒻᒪᑦ ᐊᔪᕐᑐᓕᔪᑦ ᐊᖅᑯᑎᒥᓂᒃ ᐃᓕᓐᓂᐊᕐᑎᑉᐰᑦ.
9ᐱᐅᔪᕆᖏᑦᑐᑦ ᑕᓯᐅᕐᐰᑦ ᐊᑲᐅᔪᒧᑦ,
ᐱᐅᔪᕆᖏᑦᑐᑦ ᐃᓕᓐᓂᐊᕐᑎᑉᐰᑦ ᐊᖅᑯᑎᒥᓂᒃ.
10ᐊᑕᓂᐅᑉ ᐊᖅᑯᓯᓂᓕᒫᖏᑦ ᓇᒡᓕᖕᓂᐅᕗᑦ ᓱᖁᓯᔪᐃᑦᑑᓪᓗᑎᒡᓗ,
ᐊᖏᖃᑎᒌᒍᑎᖓᓂᒃ ᒪᓕᒃᑐᓄᑦ ᐅᖃᐅᓯᕆᓯᒪᔭᖏᓐᓂᒡᓗ ᓈᓚᒃᑐᓄᑦ.
11ᐊᑏᑦ ᐱᓪᓗᒍ, ᐊᑕᓃᖅ, ᐃᓱᒪᒋᔪᓐᓁᕐᕕᒋᓐᖓ ᑕᒻᒪᕐᓂᓐᓂᒃ,
ᐅᓄᕐᑐᐊᓘᒐᓗᐊᕐᑎᓪᓗᒋᑦ.
12ᑭᓇ ᑍᒪ ᐃᓄᒃ ᓯᕘᕋᕙ ᐊᑕᓂᕐᒥᒃ?
ᑖᓐᓇᐅᕗᖅ ᐊᔪᕆᑐᕐᓂᐊᕐᑕᖓ ᐊᖅᑯᑎᒥᒃ ᓂᕈᐊᕐᓯᒪᔭᒥᓂᒃ ᑖᑦᓱᒧᖓ.
13ᑖᑦᓱᒪ ᑕᕐᓂᖓ ᐊᔪᕐᓴᕐᓇᖏᑦᑐᒥ ᐃᓂᖃᕐᓂᐊᕐᐳᖅ;
ᑭᖑᕚᖏᑕᓗ ᓄᓇ ᐱᒋᔪᒫᕐᐹᑦ.
14ᐊᑕᓂᐅᑉ ᐃᔨᕐᓯᒪᔭᓂ ᖃᐅᔨᔭᐅᑎᑉᐰᑦ ᓯᕘᕋᒋᔨᒥᓄᑦ;
ᐊᖏᖃᑎᒌᒍᑎᒥᓂᒡᓗ ᑕᑯᑎᓐᓂᐊᕐᐰᑦ.
15ᐃᔩᖕᒪ ᐊᑕᓂᖅ ᑕᑯᓐᓈᑦᓮᓐᓇᕐᐹ;
ᑖᑦᓱᒪ ᐃᑎᒐᒃᑲ ᐲᔭᕐᓂᐊᕐᒪᒋᑦ ᓄᓗᐊᓂᑦ.
16ᐅᕙᓐᓄᑦ ᓵᓚᐅᕆᑦ, ᓂᑲᒋᓗᖓᓗ;
ᐃᓄᑑᓂᕐᒧᑦ ᑭᐱᓐᖑᒐᒪ ᐋᓐᓂᐊᓪᓗᖓᓗ.
17ᐆᒻᒪᑎᒪ ᐅᖁᒤᓪᓕᐅᕐᓂᖏᑦ ᐅᓄᕐᑑᕗᑦ;
ᓴᐱᓕᕈᑎᒃᑲᓗ ᐲᔭᓚᐅᒃᑭᑦ!
18ᐋᓐᓂᐊᕐᓂᒃᑲ ᑕᑯᓐᓈᑭᑦ ᐅᖁᒤᓪᓕᐅᕐᓂᒃᑲᓗ;
ᐊᔪᕐᓂᒃᑲᓗ ᑕᒪᕐᒥᒃ ᐃᓱᒪᒋᔪᓐᓁᓚᐅᒃᑭᑦ.
19ᐊᑭᕋᕐᑐᕐᑎᒃᑲ ᐃᓱᒪᒋᓚᐅᒃᑭᑦ; ᐅᓄᕐᑐᐊᓘᖕᒪᑕ,
ᑖᒃᑯᐊᓗ ᐅᕙᓐᓂᒃ ᐆᒥᓱᒃᐳᑦ ᐊᒃᓱᕈᕐᓗᑎᒃ.
20ᑕᕐᓂᕋ ᑲᒪᒋᒍᒃ, ᓴᐳᑎᓗᖓᓗ;
ᑲᓐᖑᓱᒃᑎᑕᐅᑎᓐᓂᐊᕐᓇᖓ, ᐃᓕᖕᓂᒃ ᑕᑎᖃᕋᒪ.
21ᐸᓯᔭᒃᓴᐅᖏᓐᓂᕐᒪ ᓱᖁᓯᔪᐃᓐᓂᕐᒪᓗ ᓴᐳᑎᓕᖓ;
ᐃᓕᖕᓂᑦ ᓂᕆᐅᖕᓂᖃᕋᒪ.
22ᐃᓴᕆᐊᓪ ᓴᐳᑎᓚᐅᕈᒃ, ᒎᑏ, ᐅᖁᒤᓪᓕᐅᕐᓂᓕᒫᖓᓂᑦ.
Currently Selected:
ᐃᓐᖏᕈᑎᑦ 25: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
