ᐃᓐᖏᕈᑎᑦ 22
22
ᐃᓐᖏᕈᑦ ᓴᓐᓂᖓᔪᓕᒃ ᐱᓪᓗᒍ
ᐃᓐᖏᕐᑏᑦ ᑲᒪᔨᖓᓐᓄᑦ ᑍᕕᑎᐅᑉ ᐃᓐᖏᕈᑖ
1 #
ᒫᑎᐅᓯ 27:46; ᒫᑯᓯ 15:34. ᒎᑎᒐ, ᒎᑎᒐ, ᓲᖅ ᕿᒪᒃᐱᖔ?
ᓲᖅ ᐃᑲᔪᕐᓃᑦ ᐅᖓᓯᒃᐸ ᐅᕙᓐᓂᑦ?
ᓂᐹᓂᕐᒪᓗ ᑐᓴᕐᓴᐅᓂᖓᓂᑦ?
2ᐆ ᒎᑎᒐ, ᐅᓪᓗᒃᑯᑦ ᓂᓪᓕᐊᕗᖓ, ᑐᓴᓚᐅᓐᖏᓚᕐᒪ;
ᐅᓐᓄᐊᒃᑯᓪᓘᓐᓃᑦ, ᓂᐰᑦᑑᓐᖏᓚᖓ.
3ᐃᕝᕕᓪᓕ ᐃᑦᔪᕐᓁᑦᑑᕗᑎᑦ,
ᐃᓂᖃᕐᓗᑎᓪᓗ ᐃᓴᕆᐊᓕᑎᑦ ᓂᕐᑐᓕᕐᓂᖏᓐᓂ.
4ᓯᕗᓕᕗᑦ ᑕᑎᖃᓚᐅᕐᐳᑦ ᐃᓕᖕᓂᒃ;
ᑕᑎᖃᕐᒪᑕᓗ, ᓴᐳᑎᓚᐅᕐᐸᑎᑦ.
5ᓂᓪᓕᐊᖕᒪᑕ ᐃᓕᖕᓄᑦ, ᓴᐳᑎᓚᐅᕐᐸᑎᑦ;
ᐃᓕᖕᓂᒃ ᑕᑎᖃᓚᐅᕐᒪᑕ, ᑲᓐᖑᓱᒃᑎᑕᐅᓚᐅᓐᖏᓚᑦ.
6ᐅᕙᖓᓕ ᖁᐱᕐᕉᕗᖓ, ᐃᓅᓇᖓᓗ;
ᐃᓄᖕᓄᑦ ᓇᕐᕈᓇᕐᐳᖓ,
ᐃᓄᒋᐊᒃᑐᓂᑦ ᐃᓚᒋᔭᐅᔪᒪᓐᖏᓚᖓ.
7 #
ᒫᑎᐅᓯ 27:39; ᒫᑯᓯ 15:29; ᓘᑲᓯ 23:35. ᐅᕙᓐᓂᒃ ᑕᑯᔪᑦ ᑕᒪᕐᒥᒃ ᐃᔪᕆᕚᖓ ᒥᑕᐅᑎᒋᓪᓗᖓ;
ᖃᓂᕐᒥᖕᓄᓪᓗ ᐅᖃᕐᓂᕐᓗᒡᕕᒋᕚᖓ, ᐃᓕᕿᑕᒫᕐᓗᑎᒡᓗ, ᐅᖃᕐᐳᑦ,
8 #
ᒫᑎᐅᓯ 27:43. “ᐊᑕᓂᕐᒥᒃ ᑕᑎᖃᓚᐅᕐᒪᑦ, ᑖᑦᓱᒪ ᓴᐳᑎᓕᕐᓕᐅᒃ;
ᑖᑦᓱᒪ ᓴᐳᑎᓕᕐᓕᐅᒃ, ᖁᕕᐊᒋᖕᒪᒍ!”
9ᐃᕝᕕᑦ ᐃᒡᓕᐊᕐᒥᑦ ᐊᓂᑎᓚᐅᕐᐸᕐᒪ;
ᐃᕝᕕᑦ ᑕᑎᖃᕈᓐᓇᕐᓯᑎᓚᐅᕐᐸᕐᒪ, ᐊᓈᓇᓐᓂᑦ ᐊᒫᒪᒃᑎᓪᓗᖓ.
10ᐃᓕᖕᓄᑦ ᑐᓂᔭᐅᓚᐅᕐᐳᖓ ᐃᕐᓂᐊᖑᒐᒪ.
ᐊᓈᓇᒪ ᐃᒡᓕᐊᖓᓂᑦ ᑍᒪᓐᖓᑦ ᒎᑎᒋᕙᒋᑦ.
11ᐅᖓᓯᖕᓂᐊᕐᓇᒃ ᐅᕙᓐᓂᑦ, ᑲᑉᐱᐊᓇᕐᑐᑦ ᖃᓂᒻᒪᑕ;
ᑍᑲᓂ ᐃᑲᔪᕐᑎᒃᓴᖃᖏᒻᒪᑦ.
12ᐃᒻᒧᒃᓯᐅᒊᑦ ᐊᖑᓴᓪᓗᖏᑕ ᐊᕙᓗᓯᒪᕚᖓ;
ᐊᖑᓴᓪᓗᐃᑦ ᓴᓐᖏᔪᑦ ᐹᓴᓂᒥᐅᑦ ᐊᕙᑎᓐᓃᑉᐳᑦ.
13ᖃᓂᑎᒃ ᐂᑦᑕᕐᐰᑦ ᐅᕙᓐᓄᑦ,
ᓛᔭᑎᑐᑦ ᐃᕐᓯᓇᕐᑐᑐᑦ ᓂᓪᓕᐊᔪᑐᑦ.
14ᐃᒥᕐᑐᑦ ᑯᕕᔭᐅᕗᖓ,
ᓇᒡᒍᐊᒃᑲ ᑕᒪᕐᒥᒃ ᐃᓂᒥᓂᑦ ᓄᓱᒃᓯᒪᕗᑦ;
ᐆᒻᒪᑎᒐ ᐸᑎᐅᔭᑐᑦ#22:14 ᐸᑎᐅᔭᕐᑐᑦ ᐅᕝᕙᓗ ᐸᖅᑯᔭᑐᑦ ᑍᒤᓕᕐᐳᖅ;
ᐊᐅᒃᓯᒪᓪᓗᓂ ᓴᒡᕕᖕᒪ ᐃᓗᐊᓂ;
15ᓄᑭᒃᑲ ᐸᓂᕐᓯᒪᕗᑦ ᓄᓇᑐᑦ ᐸᓐᓇᕆᒃᑐᑐᑦ,
ᐅᖃᕋᓗ ᓂᐱᑉᐳᖅ ᐊᒡᓕᕈᓐᓄᑦ;
ᐃᓕᕙᕐᒪᓗ ᑐᖂᑉ ᐳᔪᕐᓗᖓᓄᑦ.
16ᕿᒻᒦᑦ ᐊᕙᑎᓕᒫᓐᓃᑉᐳᑦ;
ᐱᐅᖏᑦᑐᓕᔪᑦ ᑲᑐᑦᔨᔪᑦ ᐃᓗᒪᕚᖓ.
ᐊᒡᒐᒃᑲ ᐃᑎᒐᒃᑲᓗ ᐳᑐᕔᑦ;
17ᓴᐅᓂᓕᒫᒃᑲ ᓈᓴᕈᓐᓇᕐᐸᒃᑲ.
ᑕᑯᓐᓇᕐᐳᑦ ᐃᔨᒋᓪᓗᑎᒡᓗ ᐅᕙᓐᓂᒃ.
18 #
ᒫᑎᐅᓯ 27:35; ᒫᑯᓯ 15:24; ᓘᑲᓯ 23:34; ᔪᐊᓇᓯ 19:24. ᐊᓐᓄᕌᒃᑲ ᑐᓂᐅᖅᑲᕐᐰᑦ ᐃᒻᒥᖕᓄᑦ,
ᐊᓐᓄᕌᕋ ᓇᓚᐅᑦᑖᕈᑎᒃᑯᑦ ᐃᒻᒥᕋᐅᑎᒋᕚᑦ.
19ᐃᕝᕕᓪᓕ, ᐊᑕᓃᖅ, ᐅᖓᓯᖕᓂᐊᕐᓇᒃ ᐅᕙᓐᓂᑦ;
ᐱᔪᓐᓇᐅᑎᒋᒐᒃᑭᑦ, ᑐᐊᕕᕆᑦ ᐃᑲᔪᕆᐊᕐᓗᖓ!
20ᓴᕕᒡᔪᐊᒥᑦ ᓴᐳᑎᓚᐅᓐᖓ,
ᐃᓄᓯᕋᓗ ᕿᒻᒥᐅᑉ ᐱᔪᓐᓇᕐᓂᖓᓂᑦ ᓴᐳᑎᓗᒍ.
21ᓴᐳᑎᓚᐅᓐᖓ ᓛᔭᐅᑉ ᖃᓂᖓᓂᑦ!
ᐃᒻᒧᒃᓯᐅᒊᓪᓗ ᓄᔪᐊᕐᑐᑦ ᓇᒡᔪᖏᓐᓂᑦ,
ᐃᕝᕕᓪᓕ ᓴᐳᑎᓚᐅᕐᐸᕐᒪ.
22 #
ᐄᑉᕈᐃᓄᑦ 2:12. ᐊᑏᑦ ᐅᖃᐅᓯᕆᔪᒪᕙᕋ ᖃᑕᓐᖑᑎᓐᓄᑦ;
ᐅᒃᐱᕐᑑᖃᑎᒌᒡᔪᐊᓪᓗ ᐊᑯᓐᓂᖓᓂ ᓂᕐᑐᕈᒪᕙᒋᑦ.
23ᐃᓕᑦᓯ ᐊᑕᓂᕐᒥᒃ ᓯᕘᕋᔪᓯ, ᑖᓐᓇ ᓂᕐᑐᕐᓯᐅᒃ!
ᔧᑰᑉ ᑭᖑᕚᖏᑦ ᑕᒪᑦᓯ, ᐅᐱᒋᑦᓯᐊᕐᓯᐅᒃ,
ᐃᓴᕆᐊᓕᐅᑉ ᕿᑐᕐᖓᓕᒫᖏᑦ ᑖᓐᓇ ᐃᓕᕋᒋᓯᐅᒃ!
24ᖁᔭᓈᕐᓯᖏᒻᒪᑦ ᓇᕐᕈᓇᓂᓗ ᑲᑉᐱᐊᓱᒃᑎᑕᐅᔪᑦ ᑲᑉᐱᐊᓱᒃᑎᑕᐅᓂᖏᓐᓂᒃ;
ᑮᓇᓂᓗ ᐃᔨᓚᐅᓐᖏᓛ ᑖᒃᑯᓇᓐᖓᑦ; ᓂᓪᓕᐊᓕᕐᐸᑕᓕ ᑐᓴᕐᐰᑦ.
25ᓂᕐᑐᓕᕐᓂᕋ ᐃᓕᖕᓂᑦ ᐱᔪᒫᕐᐳᖅ, ᐃᓄᒋᐊᒃᑐᕐᔪᐊᑦ ᑲᑎᒪᔪᑦ ᐊᑯᕐᖓᓐᓂ;
ᑖᑦᓱᒥᖓ ᓯᕘᕋᔪᑦ ᑕᒃᑯᐊᓂ, ᐊᖏᕈᑎᒋᓯᒪᔭᒃᑲ ᑲᔪᓯᑎᑦᓱᒪᕙᒃᑲ.
26ᐊᔪᕐᓴᕐᑐᑦ ᓂᕆᔪᒫᕐᐳᑦ ᐊᕿᐊᑦᑐᕐᓗᑎᒡᓗ;
ᑖᑦᓱᒥᖓᓗ ᕿᓂᕐᑐᑦ, ᐊᑕᓂᖅ ᓂᕐᑐᕈᒫᕐᐹᑦ.
ᐆᒻᒪᑎᓯ ᐃᓅᓕᑦ ᐃᓱᖃᖏᑦᑐᒧᑦ.
27ᓄᓇᕐᔪᐊᕐᒦᑦᑐᑦ ᑕᒪᕐᒥᒃ ᐃᖅᑬᔪᒫᕐᐳᑦ, ᐊᑕᓂᕐᒧᓪᓗ ᓵᓪᓗᑎᒃ,
ᐃᓚᒌᓕᒫᓪᓗ ᐃᓅᖃᑎᒌᒡᔪᐊᓂ, ᑐᒃᓯᐊᕈᒫᕐᐳᑦ ᓵᖕᓂ.
28ᐊᑕᓂᐅᕕᒃ ᐊᑕᓂᐅᑉ ᐱᒋᕚ,
ᐃᓅᖃᑎᒌᒡᔪᐊᓄᓪᓗ ᐊᖓᔪᖅᑳᕐᔪᐊᖑᕗᖅ.
29ᓄᓇᒥ ᐊᔪᕐᓴᖏᑦᑐᓕᒫᑦ ᐅᑯᔪᒫᕐᐳᑦ ᑐᒃᓯᐊᕐᓗᑎᒡᓗ;
ᒪᓂᖅᑲᒧᓪᓗ ᐅᕐᕈᔪᑦ ᑖᑦᓱᒧᖓ ᐅᑯᔪᒫᕐᐳᑦ,
ᐃᒻᒥᖕᓂᒃ ᐆᒪᑎᑦᓱᓐᓇᖏᑦᑐᓕᒫᑦ.
30ᑭᖑᕚᖃᕈᒫᕐᐳᖅ ᐱᔨᑦᓯᕐᑐᓂᒃ ᑖᑦᓱᒥᖓ;
ᓯᕗᓂᕐᒥ ᐃᓅᔪᒫᕐᑐᑦ ᐊᑕᓂᕐᒥᒃ ᐅᖃᐅᑎᔭᐅᔪᒫᕐᐳᑦ.
31ᕾᔪᒫᕐᐳᑦ ᐃᓱᐊᕐᓂᖓᓗ ᐅᓂᒃᑲᐅᑎᒋᓗᒍ,
ᐃᓅᖃᑎᒌᓄᑦ ᓯᕗᓂᕐᒥ ᐃᓅᔪᒫᕐᑐᓄᑦ,
ᑍᒫᒃ ᐱᓂᐊᓚᐅᕐᓂᕋᕐᓗᒍ.
Currently Selected:
ᐃᓐᖏᕈᑎᑦ 22: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
