ᐃᓐᖏᕈᑎᑦ 147
147
ᒎᑎᒥᒃ ᓂᕐᑐᐃᓂᖅ ᐅᖃᐅᓯᖏᑦ ᐱᓐᖑᕐᑎᑦᓯᔨᐅᓂᖓᓗ ᐱᓪᓗᒍ
1ᐊᑕᓂᖅ ᓂᕐᑐᕐᑕᐅᓕ!
ᒎᑎᕗᑦ ᓂᕐᑐᕐᓗᒍ ᐃᓐᖏᕐᕕᒋᓗᒍᓗ ᐱᐅᔫᕗᖅ;
ᓂᑲᒍᓱᒃᑑᖕᒪᑦ, ᐃᓐᖏᕐᓗᓂ ᓂᕐᑐᕐᓗᒍ ᓈᒻᒪᓈᑦᓯᐊᕐᐳᖅ.
2ᐊᑕᓂᐅᑉ ᔨᕉᓴᓕᒻ ᓴᓇᕚ;
ᐊᐅᓪᓚᕈᑦᔭᐅᓯᒪᔪᓪᓗ ᐃᓴᕆᐊᓕᒥᐅᑦ ᑲᑎᕐᓱᕐᐰᑦ.
3ᐆᒻᒪᑎᒥᒍᑦ ᓯᖁᒥᓯᒪᔪᑦ ᒪᒥᑎᑉᐰᑦ,
ᒪᑦᑐᓯᕐᑐᕐᓗᒋᓪᓗ ᐃᑭᖏᑦ.
4ᐅᓪᓗᕆᐊᑦ ᖃᑦᓯᐅᓂᖏᑦ ᖃᐅᔨᒪᕔᑦ,
ᐊᑎᖃᕐᑎᓪᓗᒋᓪᓗ ᑕᒪᕐᒥᒃ ᐊᑐᓂᑦ.
5ᐊᑕᓂᕗᑦ ᐊᖏᔫᕗᖅ, ᐱᔪᓐᓇᕐᓂᖃᕐᓗᓂᓗ ᐊᖏᔪᒥᒃ;
ᖃᐅᔨᒪᓂᖓᓗ ᐆᒃᑐᕋᕐᑕᐅᔪᓐᓇᓐᖏᓚᖅ.
6ᐊᑕᓂᐅᑉ ᐱᐅᔪᕆᖏᑦᑐᑦ ᒪᑭᑎᑉᐰᑦ,
ᐱᐅᖏᑦᑐᓪᓕ ᓄᓇᒧᑦ ᐅᕐᕈᑎᓪᓗᒋᑦ.
7ᐊᑕᓂᖅ ᖁᔭᒋᓗᒍ ᐃᓐᖏᕐᕕᒋᓯᐅᒃ;
ᒎᑎᕗᑦ ᓂᓪᓕᐊᑎᑦᓯᕕᒋᓯᐅᒃ ᑯᑭᑦᑕᐸᐅᑎᐅᔭᓄᑦ.
8ᕿᓚᖕᒥᒃ ᐅᓕᒃᓯᔪᖅ ᓄᕗᔭᓄᑦ,
ᓄᓇᐅᓪᓗ ᓯᓚᓗᒃᑕᐅᓂᒃᓴᖓᓂᒃ ᐊᑐᐃᓐᓇᕈᐃᕙᒃᓗᓂ,
ᖃᖅᑲᓂᓗ ᐃᕕᒃᓱᒐᕐᓂᒃ ᐱᕈᕐᑎᑦᓯᕙᒃᑐᖅ.
9ᐆᒪᔪᓂᒃ ᓂᕿᒃᓴᖃᕐᑎᑦᓯᔪᖅ,
ᑐᓗᒑᕋᕐᓂᒡᓗ ᓂᕆᑎᑦᓯᔪᖅ ᓂᓪᓕᐊᔪᓂᒃ ᑖᑦᓱᒧᖓ.
10ᕿᒻᒥᕐᔪᐊᑉ ᓲᖑᓂᖏᓐᓂᒃ ᖁᕕᐊᓲᑎᖃᓐᖏᓚᖅ,
ᐃᓄᐃᓪᓗ ᐅᕿᓚᓂᖏᓐᓂᒃ ᖁᕕᐊᒋᔭᖃᕐᒥᓇᓂ.
11ᐊᑕᓂᐅᓪᓕ ᓯᕘᕋᒋᔨᓂ ᖁᕕᐊᒋᕔᑦ,
ᑖᑦᓱᒪ ᓇᒡᓕᖕᓂᖓᓂᒃ ᓱᖁᓯᔪᐃᑦᑐᒥᒃ ᓂᕆᐅᒋᔭᒃᓴᖃᕐᑐᑦ.
12ᔨᕉᓴᓕᒻ, ᐊᑕᓂᖅ ᓂᕐᑐᕈᒃ! ᓮᐅᓃ, ᒎᑏᑦ ᓂᕐᑐᕈᒃ!
13ᑖᑦᓱᒪ ᐃᑎᕐᑕᕐᕕᒡᔪᐊᕕᑦ ᐅᒃᑯᐊᖏᑕ ᓴᓐᓂᕈᐊᖏᑦ ᓲᖑᔫᑎᒻᒪᒋᑦ;
ᕿᑐᕐᖓᑎᓪᓗ ᓮᒻᒪᕐᑎᓪᓗᓂᒋᑦ ᐃᓕᖕᓃᑦᑐᑦ.
14ᓄᓇᖁᑎᕕᓪᓗ ᑭᒡᓕᖓᓄᑦ ᑎᑭᑦᑐᒥᒃ ᖃᓄᐃᓐᓇᖏᑦᑐᒦᑎᑉᐹᑎᑦ,
ᓂᕿᒃᓴᖃᕐᑎᑉᐹᑎᓪᓗ ᓂᐊᖂᔭᒃᓴᑦᓯᐊᕙᐅᓂᕐᐹᖑᔪᓂᒃ.
15ᑖᑦᓱᒪ ᐱᖁᔨᓂᓂ ᑎᓕᕚ ᓄᓇᕐᔪᐊᒧᑦ;
ᐅᖃᐅᓯᖓᓗ ᓱᒃᑲᔫᓪᓗᓂ ᑎᑭᐅᑎᕗᖅ.
16ᐊᐳᒻᒥᒃ ᑐᓂᓯᕗᖅ ᓰᐱᐅᑉ ᒥᖅᑯᖏᑎᑐᑦ ᖃᑯᕐᑐᒥᒃ;
ᓯᐊᒻᒪᕐᑎᑦᓯᓪᓗᓂᓗ ᓄᓇᒥ ᐸᑐᖕᒥᒃ ᐊᕐᔭᓕᐅᕐᓂᑎᑐᑦ.
17ᓇᑕᖅᑯᕐᓇᖁᑎᓂ ᓈᕕᑉᐰᑦ ᓂᕿᒃᓴᑎᑐᑦ ᑕᒧᐊᔭᒃᓴᑎᑐᑦ;
ᑭᐊᓕ ᑖᑦᓱᒪ ᓂᒡᓕᓇᕐᑐᖁᑎᖓ ᓇᔪᕈᓐᓇᕐᐸᐅᒃ?
18ᑖᑦᓱᒪ ᐅᖃᐅᓯᓂ ᑎᓕᖕᒪᒍ, ᑕᕝᕙ ᐊᐅᒃᑎᑉᐰᑦ;
ᐊᓄᕆᖁᑎᓂ ᓱᐴᓕᕐᑎᒻᒪᒍ, ᑕᕝᕙ ᐃᒪᕈᕐᓗᑎᒃ ᖁᕕᓕᕐᐳᑦ.
19ᑖᑦᓱᒪ ᐅᖃᐅᓯᓂ ᖃᐅᔨᔭᐅᑎᑉᐹ ᔧᑯᒧᑦ,
ᐊᑐᕐᑕᐅᖁᔭᓂ ᐃᓱᐊᕆᔭᓂᓗ ᐃᓴᕆᐊᓕᒧᑦ ᖃᐅᔨᔭᐅᑎᓪᓗᒋᑦ.
20ᐃᓅᖃᑎᒌᒡᔪᐊᑦ ᓇᓪᓕᐊᓪᓘᓐᓃᑦ ᑍᒤᓕᐅᕐᕕᒋᓚᐅᓐᖏᓔᑦ;
ᑖᑦᓱᒪ ᐃᓱᐊᕆᔭᖏᑦ ᖃᐅᔨᒪᔭᐅᓐᖏᓚᑦ ᑖᒃᑯᓄᖓ.
ᐊᑕᓂᖅ ᓂᕐᑐᕐᑕᐅᓕ!
Currently Selected:
ᐃᓐᖏᕈᑎᑦ 147: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
