ᐃᓐᖏᕈᑎᑦ 139
139
ᒎᑎᐅᑉ ᖃᐅᔨᒪᑦᓯᐊᕐᓂᖓ ᑲᒪᑦᓯᐊᕐᓂᖓᓗ
ᐃᓐᖏᕐᑏᑦ ᑲᒪᔨᖓᓄᑦ ᑍᕕᑎᐅᑉ ᐃᓐᖏᕈᑖ
1ᐊᑕᓃᖅ, ᖃᐅᔨᓴᕐᓯᒪᒐᕕᖓ, ᖃᐅᔨᒪᓕᕐᐸᕐᒪ.
2ᖃᐅᔨᒪᕙᕐᒪ ᐃᒃᓯᕙᑎᓪᓗᖓ ᓇᖏᕐᑎᓪᓗᖓᓗ;
ᐃᓱᒪᒋᔭᒃᑲ ᖃᐅᔨᒪᕙᑎᑦ ᐅᖓᓯᒋᔭᓐᓂᑦ.
3ᑕᑯᓐᓈᕐᐸᕐᒪ ᐱᓱᒃᑎᓪᓗᖓ ᓇᓪᓚᖓᑎᓪᓗᖓᓗ,
ᐱᓇᓱᐊᕐᓂᓕᒫᑦᓯᐊᒃᑲ ᖃᐅᔨᒪᕙᑎᑦ.
4ᐊᒡᓛᑦ ᐅᖃᕋ ᐅᖃᐅᓯᕐᒥᒃ ᐅᖃᓚᐅᕐᑎᓐᓇᒍᓘᓐᓃᑦ,
ᐃᕝᕕᑦ ᐊᑕᓃᖅ, ᑕᒤᑎᒍᑦᓯᐊᖅ ᖃᐅᔨᒪᕙᕐᒪ.
5ᑭᖑᓂᓐᓂ ᓯᕗᓂᓐᓂᓗ ᑕᒤᑎᒍᑦ ᐃᓗᒪᕙᕐᒪ,
ᐊᒡᒐᑎᓪᓗ ᖁᓕᓐᓃᑎᑉᐸᑎᑦ.
6ᑕᒪᓐᓇ ᖃᐅᔨᒪᓃᑦ ᐅᕙᓐᓄᑦ ᐱᐅᓗᐊᒻᒪᕆᒃᐳᖅ;
ᖁᕝᕙᓯᓗᐊᕐᐳᖅ ᐅᕙᓐᓄᑦ ᑎᑭᑕᒃᓴᐅᓇᓂᓗ.
7ᓇᒧᑦ ᐂᔪᓐᓇᕐᐳᖔ ᐊᓂᕐᓂᕐᓂᑦ?
ᐅᕝᕙᓗ ᓇᒧᑦ ᕿᒫᔪᓐᓇᕐᐳᖔ ᓇᔫᑎᓂᕐᓂᑦ?
8ᕿᓚᖕᒧᑦ ᖁᒻᒧᐊᒐᔭᕈᒪ, ᑕᕝᕙ ᑕᕝᕙᓃᑉᐳᑎᑦ;
ᑐᖁᖓᔪᑦ ᐃᓂᖓᓄᑦ ᓇᓪᓚᕋᔭᕈᒪ, ᑕᑯᒋᑦ, ᑕᕝᕙ ᑕᕝᕙᓃᓐᓂᕗᑎᑦ.
9ᖃᐅᕙᓪᓕᐊᔫᑉ ᐊᐅᐸᕐᓯᓕᕐᓂᖓᓄᐊᕋᔭᕈᒪ,
ᐃᒪᕐᐱᖕᒥᓗ ᐅᖓᓯᖕᓂᕐᐹᒥ ᐃᓂᒃᓴᕐᓯᐅᕋᔭᕈᒪ,
10ᑕᕝᕙ ᑕᕝᕙᓂᑦᑕᐅᖅ ᐊᒡᒐᒃᐱᑦ ᑕᓯᐅᕋᔭᕐᐹᖓ,
ᑕᓕᕐᐱᒃᐱᓪᓗ ᑎᒍᒥᐊᕋᔭᕐᐹᖓ.
11ᐅᖃᕋᔭᕈᒪ, “ᖁᓚᕐᓇᓐᖏᓚᖅ ᑖᕐᑐᕐᔪᐊᒧᑦ ᐅᓕᒃᑕᐅᓯᒪᓂᐊᕋᒪ,
ᖃᐅᒪᔪᕐᓗ ᓇᔪᕐᑕᕋ ᐅᓐᓄᐊᓐᖑᕐᑎᑕᐅᓗᓂ.”
12ᐊᒡᓛᑦ ᑖᕐᑐᕐᔪᐊᖅ ᐃᓕᖕᓄᑦ ᑖᕐᑑᓐᖏᓚᖅ,
ᐅᓐᓄᐊᖑᒐᓗᐊᕐᐸᑦ ᐅᓪᓗᑎᑐᑦ ᖃᐅᒪᑎᒋᕗᖅ;
ᑖᕐᑐᕐᓗ ᖃᐅᒪᔪᕐᓗ ᐊᑦᔨᒌᒃᐴᒃ ᐃᓕᖕᓄᑦ.
13ᐃᓗᒥᐅᑕᓕᒫᒃᑲ ᐱᓐᖑᕐᑎᓚᐅᕐᐸᑎᑦ,
ᐊᓈᓇᒪ ᐃᒡᓕᐊᖓᓃᑎᓪᓗᖓ ᐋᖅᑭᒃᓱᓚᐅᕐᐸᕐᒪ.
14ᓂᕐᑐᕐᐸᒋᑦ, ᓯᕘᕋᓇᕐᑐᒥᒃ ᐱᐅᔪᐊᓗᖕᒥᒡᓗ ᓴᓇᔭᐅᓯᒪᒐᒪ,
ᐱᓇᓱᐊᕐᓂᑎᑦ ᑲᒪᓇᕐᑐᐊᓘᕗᑦ! ᐃᓘᓐᓇᓕᒫᓐᓂ ᖃᐅᔨᒪᑦᓯᐊᕋᕕᖓ;
15ᓴᐅᓂᒃᑲ ᐃᓕᖕᓂ ᐃᔨᕐᓯᒪᔪᖃᓐᖏᓚᑦ,
ᑕᑯᒃᓴᐅᖏᑦᑐᒥ ᓴᓇᔭᐅᓕᕐᑎᓪᓗᖓ,
ᐋᖅᑭᒃᓱᕐᑕᐅᓕᕐᑎᓪᓗᖓᓗ ᓄᓇᐅᑉ ᐊᒃᐸᓯᖕᓂᕐᐹᖓᓂ.
16ᑕᑯᓐᓇᓚᐅᕐᐸᕐᒪ ᓱᓇᕈᓚᐅᖅᑳᕐᑎᓐᓇᖓ ᓱᓕ,
ᐊᒡᓚᖁᑎᖕᓂ ᐃᓘᓐᓇᖏᑦ ᐊᑐᓂᑦ ᑎᑎᕋᕐᓯᒪᓚᐅᕐᐳᑦ,
ᐅᓪᓗᐃᑦ ᐊᑐᕈᒫᕐᑕᒃᑲ, ᓱᓇᓕᒫᑦ ᓱᓕ ᐊᑐᕆᐊᓚᐅᖅᑳᕐᑎᓐᓇᒋᑦ.
17ᒎᑏ, ᐃᓱᒪᑎᑦ ᐅᕙᓐᓄᑦ ᐱᐅᔪᕐᔪᐊᕌᓘᕗᑦ!
ᑲᑎᓐᓇᓱᒋᐊᖏᑦ ᐅᓄᕐᑐᕐᔪᐊᕌᓘᕗᑦ!
18ᓈᓴᕆᐊᖃᕋᔭᕈᒃᑭᑦ, ᑕᕝᕙ ᐅᓄᕐᓂᕐᓴᐅᒐᔭᕐᐳᑦ ᓯᐅᕋᕐᓂᑦ.
ᑐᐸᒑᖓᒪ, ᓱᓕ ᑕᕝᕙ ᐃᓕᖕᓃᑉᐳᖓ.
19ᒎᑏ, ᑕᕝᕙᑐᖅ ᐱᐅᖏᑦᑐᑦ ᑐᖁᓚᐅᒃᑭᑦ!
ᐅᕙᓐᓂᒃ ᕿᒤᓚᐅᕆᑦᓯ ᐃᓅᑉ ᐊᐅᖓᓂᒃ ᐃᒥᕈᒃᑎᐅᔪᓯ!
20ᑖᒃᑯᐊ ᐃᓕᖕᓂᒃ ᐅᖃᕐᓂᕐᓘᑎᖃᕐᐳᑦ ᐱᐅᖏᑦᑐᐊᓗᖕᒥᒃ,
ᐊᑭᕋᕐᑐᕐᑎᑎᑦ ᐊᑎᕐᓂᒃ ᐊᑑᑎᖃᖏᑦᑐᒧᑦ ᐊᑐᕐᐳᑦ.
21ᐊᑕᓃᖅ, ᐃᓕᖕᓂᒃ ᐆᒥᓱᒃᑐᑦ ᐆᒥᒋᓐᖏᓚᒃᑳ?
ᕿᒃᓵᒍᑎᒋᓐᖏᓚᒃᑲᓘ ᐃᓕᖕᓂᒃ ᐊᑭᕋᕐᑐᕐᑐᑦ?
22ᐆᒥᒋᕙᒃᑲ ᐆᒥᒋᓪᓚᕆᒃᓗᒋᑦ; ᐊᑭᕋᕐᑐᕐᑎᓐᓂᒡᓗ ᑍᓪᓗᒋᑦ.
23ᒎᑏ, ᖃᐅᔨᓴᓚᐅᓐᖓ, ᐆᒻᒪᑎᒐᓗ ᖃᐅᔨᓗᒍ!
ᐆᒃᑐᕋᓚᐅᓐᖓ, ᐃᓱᒪᒋᔭᒃᑲᓗ ᖃᐅᔨᓗᒋᑦ!
24ᑕᑯᓗᑎᓪᓗ ᖃᓄᑐᐃᓐᓇᖅ ᐱᐅᖏᑦᑐᒥᒃ ᐃᓅᓯᓐᓃᑦᑐᖃᕐᒪᖔᑦ,
ᑕᓯᐅᕐᓗᖓᓗ ᐃᓅᓯᕐᒧᑦ ᐃᓱᖃᖏᑦᑐᒧᑦ!
Currently Selected:
ᐃᓐᖏᕈᑎᑦ 139: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
