ᐃᓐᖏᕈᑎᑦ 109
109
ᓱᓕᒐᑎᒃ ᐊᑭᕋᕐᑐᕐᑐᑦ ᐊᑭᒋᐊᕐᑕᐅᖁᔭᐅᓂᖓᑦ
ᑍᕕᑎᐅᑉ ᐃᓐᖏᕈᑖ
1ᒎᑏ ᓂᕐᑐᕐᐸᒋᑦ; ᑍᒤᒻᒪᑦ ᓂᐰᑦᑑᓂᐊᕐᓇᒃ!
2ᐱᐅᖏᑦᑐᑦ ᓴᒡᓗᑐᔪᓪᓗ ᐅᕙᓐᓂᒃ ᐅᖃᐅᓯᖃᕐᐳᑦ ᐊᑭᕋᕐᑐᕐᓗᖓ;
ᓴᒡᓗᑎᖃᕐᓗᑎᒃ ᐅᕙᓐᓂᒃ ᐅᖃᐅᓯᖃᕐᐳᑦ.
3ᐊᕙᑎᓕᒫᓐᓃᑦ ᐆᒥᓱᖕᓂᕐᒧᑦ ᐅᖃᐅᓯᖃᕐᐳᑦ;
ᐊᑭᕋᕐᑐᕐᐹᖓ ᓱᓇᒥᒃ ᐱᑦᔪᑎᒃᓴᖃᕋᑎᒃ.
4ᓇᒡᓕᒋᔭᒃᑲ ᐅᕙᓐᓂᒃ ᐊᑭᓖᕗᑦ ᐊᑭᕋᕐᑐᕐᓂᕐᒥᒃ,
ᐅᕙᖓᓕ ᑐᒃᓯᐅᑎᕙᒃᑲ.
5ᐱᑦᓯᐊᕐᓂᕋ ᐊᑭᓕᕐᑕᐅᕗᖅ ᐱᑦᓯᐊᖏᓐᓂᕐᒧᑦ,
ᓇᒡᓕᖕᓂᕋᓗ ᐊᑭᓕᕐᑕᐅᕗᖅ ᐆᒥᓱᖕᓂᕐᒧᑦ.
6ᐱᐅᖏᑦᑐᖅ ᐊᖓᔪᖅᑳᓐᖑᕐᑎᒍᒃ ᑖᑦᓱᒧᖓ;
ᑕᓕᕐᐱᐊᓄᓪᓗ ᓵᑖᓇᓯ ᓂᑯᕕᑎᓪᓗᒍ.
7ᐃᖅᑲᕐᑐᕐᑕᐅᓕᕈᓂ ᐸᓯᔭᒃᓴᐅᓂᕋᕐᑕᐅᓕ;
ᑐᒃᓯᐊᕐᓂᖓᓗ ᐊᔪᕐᑐᓕᓂᓐᖑᕐᑎᑕᐅᓕ.
8 #
ᐋᐴᓯᑕᓖᑦ 1:20. ᐃᓅᓯᖓᑕ ᐅᓪᓗᖏᑦ ᓁᒡᓕᑎᑕᐅᓕᑦ;
ᐱᓇᓱᐊᕐᓂᖓᓗ ᐊᓯᐊᓄᑦ ᐱᔭᐅᓕᕐᓕ.
9ᕿᑐᕐᖓᖏᑦ ᐃᓕᐊᕐᔪᓐᖑᓕᕐᓕᑦ,
ᓄᓕᐊᖓᓗ ᐅᐃᒡᒐᕐᓂᓐᖑᕐᓗᓂ.
10ᕿᑐᕐᖓᖏᑦ ᐊᖏᕐᕋᖃᖏᓪᓗᑎᒃ ᕿᓄᔨᐅᓕᕐᓕᑦ:
ᐃᒡᓗᕕᓂᕐᓂᑦ ᐃᓂᒋᔭᒥᖕᓂᑦ ᐊᓂᑎᑕᐅᓕᕐᓕᑦ.
11ᐊᑭᓕᒃᓴᕐᑖᕐᕕᐅᓯᒪᔪᖅ ᐊᑭᓕᒃᓴᓕᐅᑉ ᐱᒋᔭᓕᒫᖏᓐᓂᒃ ᐱᑖᓕᕐᓕ;
ᐃᓅᖃᑎᑐᖃᕆᓐᖏᑕᖏᑦ ᐱᓇᓱᐊᓚᐅᕐᑕᓕᒫᖏᓐᓂᒃ ᐱᑖᓕᕐᓕᑦ.
12ᓇᓪᓕᐊᓐᓂᓪᓘᓐᓃᑦ ᐱᑦᓯᐊᕐᕕᐅᑦᑍᓕᓕ,
ᕿᑐᕐᖓᖏᓪᓗ ᐃᓕᐊᕐᔪᖁᑎᖏᑦ ᓇᒡᓕᒋᔭᐅᑦᑍᓕᓕᑦ.
13ᑖᑦᓱᒪ ᑭᖑᕚᖏᑦ ᓄᖑᑕᐅᓕᑦ;
ᐊᑎᖓᓗ ᑭᖑᕚᕇᓂᑦ ᐲᕐᑕᐅᓕ.
14ᑖᑦᓱᒪ ᓯᕗᓕᕆᓚᐅᕐᑕᖏᑕ ᐊᔪᕐᓂᖏᑦ
ᐃᖅᑲᐅᒪᔭᐅᓕᑦ ᐊᑕᓂᐅᑉ ᓵᖓᓂ,
ᐊᓈᓇᖓᑕᓗ ᐊᔪᕐᓂᖏᑦ ᐲᕐᑕᐅᑦᑍᓕᓕᑦ!
15ᑖᑦᓱᒪ ᐊᔪᕐᓂᖏᑦ ᐊᑕᓂᐅᑉ ᐃᖅᑲᐅᒤᓐᓇᕐᓕᒋᑦ,
ᐃᖅᑲᐅᒪᔭᐅᓂᖓ ᓄᓇᒥ ᐲᕐᑕᐅᑦᓯᐊᒻᒪᕆᖁᓪᓗᒍ!
16ᑖᓐᓇ ᐱᑦᓯᐊᕆᐊᒃᓴᕐᓘᓐᓃᑦ ᐃᖅᑲᐅᒪᓚᐅᕐᓯᒪᓐᖏᓚᖅ,
ᐊᑭᕋᕐᑐᖃᑦᑕᓚᐅᕐᐳᕐᓕ ᐊᔪᕐᓴᕐᑐᓂᒃ ᐃᑲᔪᕐᑕᐅᔭᕆᐊᓕᖕᓂᒡᓗ,
ᐆᒻᒪᑎᒥᒍᑦ ᐋᓐᓂᐊᔪᑦ ᐊᒡᓛᑦ ᑐᖁᑦᓱᒪᖃᑦᑕᓚᐅᕐᐰᑦ.
17ᓯᕗᓂᕐᓗᖁᔨᓂᕐᒥᒃ ᖁᕕᐊᒋᔭᖃᕋᒥ; ᓯᕗᓂᕐᓗᖕᓂᕐᒥᑦ ᑎᑭᑕᐅᓚᐅᕐᓕ!
ᓮᒻᒪᕐᑎᑕᐅᓂᕐᒥᒃ ᖁᕕᐊᒋᔭᖃᖏᓐᓇᒥ; ᓮᒻᒪᕐᑎᑕᐅᓂᕐᒧᑦ ᑎᑭᑕᐅᑦᑍᓕᓕ!
18ᓯᕗᓂᕐᓗᖁᔨᓂᕐᒥᒃ ᐊᑐᖃᑦᑕᓚᐅᕐᒪᑦ ᐊᓐᓄᕌᕐᓯᒪᔪᕐᑎᑐᑦ,
ᑕᒪᓐᓇ ᑎᒥᖓᓄᑦ ᑎᑭᐅᑎᓚᐅᕐᓕ ᐃᒥᕐᒧᑦ ᑭᓂᑕᐅᓯᒪᔪᑐᑎᑐᑦ,
ᐅᕐᓱᑎᑐᓪᓗ ᓴᐅᓂᖏᓐᓄᑦ ᐃᑦᓮᔪᑎᑐᑦ!
19ᐊᓐᓄᕌᕐᓯᒪᔪᑎᑐᑦ ᑎᒥᖓ ᐅᓕᒃᑕᐅᓚᐅᕐᓕ ᑕᒪᑐᒧᖓ,
ᑕᑦᓯᕈᑎᑎᑐᓪᓗ ᐊᒃᑐᐊᔭᐅᖏᓐᓇᓚᐅᕐᓕ ᖃᐅᑕᒫᑦ ᑕᑦᓯᕈᓯᖃᑦᑕᕐᓂᕐᒥᑐᑦ!
20ᑍᒫᒃ ᐊᑕᓂᕐᒧᑦ ᐊᑭᓕᕐᑕᐅᓚᐅᕐᓕᑦ ᐊᑭᕋᕐᑐᕐᑎᒃᑲ,
ᑕᕐᓂᓐᓂᒡᓗ ᐱᐅᖏᑦᑐᒥᒃ ᐅᖃᐅᓯᖃᕐᑐᑦ ᐊᑭᕋᕐᑐᕐᓗᖓ.
21ᒎᑏ ᐊᑕᓂᐅᔪᑎᑦ, ᐱᓇᓱᐊᕐᕕᒋᓚᐅᓐᖓ ᐊᑏᑦ ᐱᑦᔪᑎᒋᓗᒍ;
ᓇᒡᓕᒍᓱᖕᓃᑦ ᓱᖁᓯᔪᐃᑦᑐᖅ ᐱᐅᔫᖕᒪᑦ, ᐱᐅᓕᓚᐅᓐᖓ!
22ᐊᔪᕐᓴᕋᒪ ᐃᑲᔪᕐᑕᐅᔭᕆᐊᖃᓕᕐᓗᖓᓗ,
ᐆᒻᒪᑎᒐ ᐋᓐᓂᕐᓯᒪᖕᒪᑦ ᐃᓗᓐᓂ.
23ᓄᖑᓕᕐᐳᖓ ᓲᕐᓗ ᐅᓐᓄᒃᑯᑦ ᑕᕐᕋᓕᓂᐅᑉ ᓄᖑᑉᐸᓪᓕᐊᓂᖓᑐᑦ;
ᐱᒡᓕᕐᑕᐅᔮᕐᑐᑎᑐᑦ ᐱᕈᕐᑐᓂᑦ ᐲᕐᑎᑕᐅᔪᑎᑐᑦ ᑍᒤᓕᕐᐳᖓ.
24ᓰᖅᑰᒃᑲᒃ ᓄᑭᖏᕈᑎᕘᒃ ᓂᕆᑦᑍᓕᓂᕐᒧᑦ;
ᑎᒥᒐᓗ ᓴᓪᓗᕈᕐᐳᖅ ᐅᕕᓂᖃᕈᓐᓃᕐᓗᓂ.
25 #
ᒫᑎᐅᓯ 27:39; ᒫᑯᓯ 15:29. ᐊᑭᕋᕐᑐᕐᑎᒃᑲ ᐅᕙᓐᓂᒃ ᑕᑯᓴᕐᑐᑦ ᒥᑕᐅᑎᒃᓴᕐᐳᑦ;
ᓂᐊᖁᕐᒥᖕᓂᒃ ᐃᓕᕿᓴᒫᕐᓗᑎᒃ.
26ᐃᑲᔪᓚᐅᓐᖓ ᐊᑕᓃᖅ ᒎᑏ!
ᐱᐅᓕᓚᐅᓐᖓ ᓇᒡᓕᖕᓃᑦ ᓱᖁᓯᔪᐃᑦᑐᖅ ᒪᓕᒡᓗᒍ!
27ᖃᐅᔨᖁᓪᓗᒋᑦ ᐊᒡᒐᖕᓄᑦ ᐱᓇᓱᐊᕋᕕᑦ;
ᐊᑕᓃᖅ, ᑕᒪᑐᒥᖓ ᐱᓕᕆᒐᕕᑦ!
28ᓯᕗᓂᕐᓗᖁᔨᒐᓗᐊᕐᐸᑕ, ᓮᒻᒪᕐᑎᑦᓯᓂᐊᕐᐳᑎᑦ!
ᐅᕙᓐᓂᒃ ᐊᑭᕋᕐᑐᕋᓱᐊᓕᕈᑎᒃ, ᑲᓐᖑᓱᒃᑎᑕᐅᓚᐅᕐᓕᑦ;
ᐱᔩᓪᓕ ᖁᕕᐊᓱᒃᑎᑕᐅᑎᓪᓗᒍ!
29ᐊᑭᕋᕐᑐᕐᑎᒃᑲ ᑲᓐᖑᓱᒃᑎᑕᐅᓂᕐᒥᒃ ᐊᓐᓄᕌᕐᑎᑕᐅᓚᐅᕐᓕᑦ,
ᓇᓗᓕᕐᓂᕐᒧᑦ ᐅᓕᒃᑕᐅᓚᐅᕐᓕᑦ, ᑕᒪᑐᒥᖓ ᕿᐱᒃᓯᒪᔪᑎᑐᑦ.
30ᐊᑕᓂᖅ ᖃᓂᓐᓄᑦ ᐊᖏᔪᒥᒃ ᓂᕐᑐᕐᓂᐊᕐᐸᕋ;
ᐃᓛᒃ, ᓂᕐᑐᕐᓂᐊᕐᐸᕋ ᐃᓄᒐᓴᒃᔪᐊᑦ ᐊᑯᕐᖓᓐᓂ.
31ᑖᓐᓇ ᐊᔪᕐᓴᕐᑑᑉ ᑕᓕᕐᐱᐊᓂ ᓇᖏᕐᓂᐊᕐᒪᑦ,
ᐱᐅᓕᔪᒪᓪᓗᒍ ᑖᒃᑯᓇᓐᖓᑦ ᑐᖁᑕᒃᓴᓐᖑᕐᑎᑦᓯᔪᓂᑦ.
Currently Selected:
ᐃᓐᖏᕈᑎᑦ 109: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
