ᓲᓗᒨᓂᐅᑉ ᐅᖃᓪᓚᖕᓂᖏᑦ 1
1
ᐅᖃᓪᓚᖕᓃᑦ ᐱᓪᓚᕆᐅᓂᖓᑦ
1 #
ᐊᑕᓃᑦ ᓯᕗᓪᓖᑦ 4:32. ᓲᓗᒨᓂᐅᑉ ᐅᖃᓪᓚᖕᓂᖏᑦ ᑍᕕᑎᐅᑉ ᐃᕐᓂᖓᑕ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑕ.
2ᐃᓄᐃᑦ ᖃᐅᔨᖁᓪᓗᒋᑦ ᓯᓚᑐᓂᕐᒥᒃ ᐃᓕᓐᓂᐊᕐᑎᑕᐅᓂᕐᒥᒡᓗ ᑐᑭᓯᑎᑦᓯᓗᑎᒃ ᐅᖃᓪᓚᖕᓃᑦ ᑐᑭᖏᓐᓂᒃ ᐃᑎᔪᓂᒃ. 3ᐃᓕᓐᓂᐊᕐᑎᑕᐅᖁᓪᓗᒋᑦ ᓯᓚᑐᓂᒃᑯᑦ ᐱᓂᐊᕐᓂᖃᕐᓂᕐᒥᒃ, ᓇᓛᒎᕐᓂᕐᒥᒃ ᓈᒻᒪᓈᕐᑐᒥᒡᓗ ᐊᑦᔨᒌᒃᑎᑦᓯᓂᕐᒥᒡᓗ. 4ᖃᐅᔨᓯᒪᖏᑦᑑᒐᓗᐊᒥᒃ ᐊᔪᕈᓐᓃᕐᑎᑦᓯᔪᓐᓇᕐᐳᑦ ᓯᓚᑐᓕᕐᑎᑦᓯᓗᑎᒃ, ᐃᓅᓱᒃᑐᓂᒡᓗ ᐊᔪᕆᕐᑐᐃᔪᓐᓇᕐᐳᑦ ᐊᑐᕐᓇᕐᑐᓂᒃ ᐱᓇᓱᐊᕈᓐᓇᕐᓯᖁᓪᓗᒋᑦ. 5ᓯᓚᑐᔪᓪᓗ ᑐᓴᕈᓐᓇᖁᓪᓗᒋᑦ ᑐᑭᓯᐅᒪᔭᖏᑦ ᐊᖏᓕᒃᑲᓐᓂᖁᓪᓗᒋᑦ, ᐊᖑᓪᓗ ᑐᑭᓯᐅᒪᔪᖅ ᐱᓇᓱᐊᕈᑎᒃᓴᖃᒃᑲᓐᓂᖁᓪᓗᒍ. 6ᑐᑭᓯᖁᓪᓗᒋ ᓯᓚᑐᔪᒧᑦ ᐅᖃᓪᓚᖕᓃᑦ ᑐᑭᖏᓐᓂᒃ ᐃᔨᕐᓯᒪᔪᓂᒃ ᓯᓚᑐᔫᓪᓗ ᐅᖃᐅᓯᕆᔭᖏᑎᒍᑦ ᑐᑭᖏᓐᓂᒃ.
ᐃᓅᓱᒃᑐᓄᑦ ᐅᖃᐅᑦᔪᐃᑦᔪᑏᑦ
7 #
ᔫᐱ 28:28; ᐃᓐᖏᕈᑦ 111:10; ᓲᓗᒨᓂ 9:10. ᐊᑕᓂᕐᒥᒃ ᐃᓕᕋᓱᖕᓂᖅ ᑐᑭᓯᐅᒪᓂᕐᒥᒃ ᐱᒋᐊᕐᓂᐅᕗᖅ, ᓯᓔᑦᑐᓪᓕ ᓯᓚᑐᓂᕐᒥᒃ ᓇᕐᕈᕗᑦ ᐃᓕᓐᓂᐊᕐᓂᕐᒥᒡᓗ.
8ᐃᕐᓃᒃ ᓈᓚᑦᓯᐊᕆᑦ ᐊᑖᑕᕕ ᐃᓕᓮᓂᖏᓐᓂᒃ, ᐊᓈᓇᕕᓪᓗ ᐊᔪᕆᕐᑐᐃᑦᔪᑎᖏᓐᓂᒃ ᓇᕐᕈᓂᐊᕐᓇᒃ; 9ᓄᓇᕋᕐᓂᒃ ᑕᑯᒥᓇᕐᑐᓂᒃ ᓂᐊᖂᓯᕐᓯᓯᒪᔪᑎᑐᑦ ᑍᒤᒻᒪᑕ, ᓲᕐᓗ ᐅᔭᒦᓪᓘᓐᓃᑦ ᑕᑯᒥᓇᕐᑐᑦ.
10ᐃᕐᓃᒃ ᐊᔪᕐᑐᓕᔪᓄᑦ ᑲᔪᖏᕐᓴᕐᑕᐅᒍᕕᑦ ᐊᖏᕐᑍᓕᕙᒃᑭᑦ. 11ᐅᖃᕐᐸᑕ, “ᕾᓗᑎᑦ, ᑐᖁᑕᒃᓴᑦᑎᓐᓂᒃ ᐅᑕᖅᑭᓚᐅᕐᑕ, ᐃᓄᖕᒥᒃ ᐸᓯᔭᒃᓴᐅᖏᑦᑐᒥᒃ ᐱᕋᔭᒡᓗᑕ ᐅᐸᓗᐃᓯᓚᐅᕐᑕ. 12ᐃᓅᑎᓪᓗᒋᑦ ᑲᑉᐱᐊᓇᕐᑐᕕᖕᒧᑦ ᐄᔭᐅᓂᐊᕐᒪᑕ ᐃᓗᐃᑦᑑᓗᑎᒃ, ᐃᑎᕐᓴᒧᑦ ᑲᑕᒃᑐᑎᑐᑦ: 13ᓇᓂᓯᓂᐊᕐᐳᒍᑦ ᐱᖁᑎᓂᒃ ᐊᑭᑐᔪᓂᒃ, ᐃᒡᓗᕗᓪᓗ ᓵᓚᖃᐅᓯᐊᑦᑎᓐᓂᒃ ᑕᑕᓪᓗᑎᒍ! 14ᐊᑏ ᐅᕙᑦᑎᓐᓄᑦ ᐃᓚᐅᓚᐅᕆᑦ ᓇᓚᐅᑦᑖᕈᑎᒃᑯᑦ, ᑎᒡᓕᒐᑦᑎᓐᓂᒃ ᑲᑐᑦᔨᓗᑕ ᐱᖃᑕᐅᓂᐊᕋᕕᑦ.”
15ᐃᕐᓃᒃ, ᑍᒤᓕᐅᕐᑐᓄᑦ ᐱᖃᑕᐅᑦᑍᓕᒋᑦ, ᐃᑎᒐᑎᑦ ᐊᖅᑯᑎᖏᓐᓂᒃ ᒪᓕᒃᑍᓕᓕᑦ. 16ᐃᑎᒐᖏᑦ ᐊᕐᐸᖏᕐᐳᑦ ᐊᔪᕐᑐᓕᔪᒪᓂᕐᒧᑦ, ᐃᓄᐊᕈᒤᓐᓇᕐᓗᑎᒡᓗ. 17ᓈᒻᒪᖏᒻᒪᑦ ᓄᓗᑦᔨᕐᓗᓂ ᑎᖕᒥᐊᕋᓱᒃᑕᑦ ᑕᑯᓐᓇᕐᑎᓪᓗᒍ ᓄᓗᐊᓂᒃ ᐋᖅᑭᒐᓱᒃᑕᕐᓂᒃ. 18ᐃᓄᐃᑦ ᑍᒤᑦᑐᑦ ᓇᖕᒥᓂᖅ ᐊᔪᓕᕐᕕᒃᓴᒥᖕᓂᒃ ᓴᓇᖕᒪᑕ, ᐃᓅᓯᕐᒥᖕᓂ ᐅᐸᓗᐃᔭᐅᑦᔪᑎᒃᓴᒥᖕᓂᒃ ᐋᖅᑭᒃᓱᐃᓪᓗᑎᒃ. 19ᑍᒤᑉᐸᒃᐳᑦ ᑕᒪᕐᒥᒃ ᐱᕋᔭᖕᓂᒃᑯᑦ ᐊᔪᕐᓴᕈᓐᓃᕋᓱᒃᑐᑦ, ᑎᒡᓕᒐᕐᓂᖅ ᐃᓅᓯᒃᓮᕈᑦᔨᕙᒃᐳᖅ ᑎᒡᓕᒃᑐᕕᓂᕐᒥᒃ.
ᓯᓚᑐᖁᔭᐅᓂᖅ
20 #
ᓲᓗᒨᓂ 8:1-3. ᓯᓚᑐᓂᖅ ᐊᖅᑯᑎᓂ ᓂᐱᖅᑯᕐᑐᓪᓗᓂ ᓂᓪᓕᐊᕗᖅ; ᓂᐅᕕᕐᕕᖕᓂᓗ ᓂᓪᓕᐊᕗᖅ ᓂᐱᖅᑯᕐᑐᓂᕐᓴᐅᓪᓗᓂ. 21ᐃᒡᓗᒐᓴᒡᔪᐊᑦ ᐊᕙᓗᕐᔪᐊᖏᑕ ᖃᖏᓐᓂ ᓂᓪᓕᐊᕗᖅ; ᐃᒡᓗᒐᓮᓪᓗ ᐃᑎᕐᑕᕐᕕᖏᓐᓂ ᐅᖃᓪᓚᒃᐳᖅ.
22ᓯᓔᑦᑑᔪᓯ ᖃᓄᖅ ᐊᑯᓂᐅᑎᒋᔪᖅ ᓯᓔᑦᑑᓂᕐᒥᒃ ᖁᕕᐊᒋᔭᖃᕐᓂᐊᕐᐱᓰ? ᖃᓄᕐᓗ ᐊᑯᓂᐅᑎᒋᔪᖅ ᒥᑕᐅᑎᖃᕐᑐᑦ ᖁᕕᐊᒋᔭᖃᕐᓂᐊᕐᐸᑦ ᒥᑕᐅᑎᒃᓴᕐᓂᕐᒥᒃ ᓯᓔᑦᑐᓪᓗ ᖃᐅᔨᒪᓂᕐᒥᒃ ᐱᐅᒃᓴᖏᓪᓗᑎᒃ. 23ᓈᓚᒋᑦ ᐃᓂᕐᑎᕆᑦᔪᑎᓐᓂᒃ; ᐃᓱᒪᒋᔭᒃᑲ ᐃᓕᖕᓄᑦ ᑯᕕᑎᓐᓂᐊᕋᒃᑭᑦ; ᐅᖃᐅᓯᒃᑲᓗ ᐃᓕᖕᓄᑦ ᖃᐅᔨᔭᐅᑎᓐᓂᐊᕋᒃᑭᑦ. 24ᕾᖁᓚᐅᕋᒃᑭᑦ ᓈᓚᒍᒪᓚᐅᓐᖏᓚᑎᑦ, ᐃᓴᒻᒥᖃᑦᑕᕐᓯᒪᕗᖓ ᓇᓪᓕᐊᓐᓄᓪᓘᓐᓃᑦ ᐅᐸᒋᐊᕐᑕᐅᓚᐅᕐᓯᒪᓇᖓ. 25ᐅᖃᐅᑦᔪᐃᑦᔪᑎᒋᔭᓕᒫᒃᑲ ᑲᒪᒋᓇᓱᐊᓚᐅᓐᖏᓚᑎᑦ ᐃᓂᕐᑎᕆᑦᔪᑎᒃᑲ ᐊᑐᕈᒪᓇᒋᑦ. 26ᐅᖁᒤᒃᓴᕐᓇᕐᑐᒦᓕᕈᕕᑦ ᐃᔪᕆᔪᒫᓕᕐᐸᒋᑦ; ᐅᐃᒪᔮᕐᓇᕐᑐᒦᓕᕈᕕᓪᓗ ᒥᑕᐅᑎᒋᔪᒫᓕᕐᐸᒋᑦ. 27ᐅᐃᒪᔮᕐᓇᕐᑐᒧᑦ ᑎᑭᑕᐅᒍᕕᑦ ᓯᓚᕐᓂᕐᓗᖕᒧᑦ ᑎᑭᑕᐅᔪᑎᑐᑦ, ᐅᖁᒤᒃᓴᕐᓂᕐᓗ ᐅᓚᔪᔭᕐᑎᑐᑦ ᑎᑭᐅᑎᒃᐸᑦ, ᐱᕖᓱᐊᓂᖅ ᐃᓱᒪᔮᕐᓂᕐᓗ ᐃᓕᖕᓄᑦ ᑎᑭᑉᐸᑦ. 28ᑕᕝᕙ ᐅᕙᓐᓄᑦ ᓂᓪᓕᐊᓕᕈᒫᕐᐳᑎᑦ, ᑭᓯᐊᓂᓕ ᑭᐅᑦᔮᓐᖏᓚᖓ; ᐊᒃᓱᕈᕐᓗᑎᑦ ᐅᕙᓐᓂᒃ ᕿᓂᓕᕈᒫᕐᐳᑎᑦ ᓇᓂᔭᐅᓂᐊᓐᖏᓚᖓᓕ. 29ᑐᑭᓯᐅᒪᓂᖅ ᓇᕐᕈᒋᓚᐅᕐᒪᑦᔪᒃ ᐊᑕᓂᕐᒥᒡᓗ ᐃᓕᕋᓱᒍᒪᓚᐅᕋᑎᒃ. 30ᐅᕙᓐᓄᓪᓗ ᐅᖃᐅᑦᔪᕐᑕᐅᔪᒪᓐᖏᓚᑦ, ᐃᓂᕐᑎᕆᑦᔪᑎᒃᑲᓗ ᓇᕐᕈᒋᕔᑦ, 31ᑍᒤᒻᒪᑦ ᐱᕈᕐᑎᑕᒥᖕᓂᒃ ᓂᕆᔪᒫᕐᐳᑦ, ᓇᖕᒥᓂᕐᓗ ᐱᓂᐊᕐᓂᕐᒥᖕᓄᑦ ᐊᕿᐊᑦᑐᕈᒫᕐᐳᑦ. 32ᓯᓔᑦᑐᑦ ᑐᖁᒧᑦ ᑎᑭᑉᐸᒃᐳᑦ ᑲᒪᓐᖏᒧᑦ, ᓯᓔᑦᑐᑦ ᐊᓯᕈᕐᑕᐅᓕᕐᐸᒃᐳᑦ ᓈᒻᒪᒐᓱᒋᓂᕐᒧᑦ. 33ᓇᓪᓕᐊᓪᓕ ᐅᕙᓐᓂᒃ ᓈᓚᒃᑐᖅ ᐃᓅᓯᕐᒥᓂᒃ ᐃᓂᖃᕐᓂᐊᕐᐳᖅ ᓴᐳᑦᔭᐅᓯᒪᔪᒥ ᖃᓄᐃᓐᓇᖏᑦᑐᒦᓐᓂᐊᕐᐳᖅ ᑲᑉᐱᐊᓲᑎᒃᓴᖃᖏᓪᓗᓂᓗ.
Currently Selected:
ᓲᓗᒨᓂᐅᑉ ᐅᖃᓪᓚᖕᓂᖏᑦ 1: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
