ᓂᕼᐃᒤᐊᐅᑉ ᐊᒡᓚᖏᑦ 8
8
1ᑕᕝᕙᓂ ᑕᖅᑭᒥ ᐅᓪᓘᑉ ᓯᕗᓪᓕᕐᐹᖓᓂ ᐃᓄᐃᓪᓗ ᐃᓘᓐᓇᑎᒃ ᑲᑎᓚᐅᕐᐳᑦ ᐃᓄᒃᑐᑦ ᐊᑕᐅᓯᕐᑐᑦ ᐱᕕᑐᓂᕐᒥ ᐃᒥᕐᑕᕐᕕᐅᑉ ᐃᑎᕐᑕᕐᕕᖓᑕ ᐃᓗᐊᓂ. ᐄᓱᕋᓗ ᐊᒡᓚᖕᓂᒃ ᐅᖃᓕᒫᖁᔭᐅᓚᐅᕐᐳᖅ, ᑐᓂᕐᕈᓯᕐᑎᑦᓯᔨ ᐃᓕᓐᓂᐊᕐᓯᒪᒻᒪᕆᒃᑐᕐᓗ ᒨᓯᓯᐅᑉ ᐱᖁᔭᖏᓐᓂᒃ, ᐊᑕᓂᐅᑉ ᐱᖁᔭᓕᐊᕆᓚᐅᕐᑕᖏᓐᓂᒃ ᐃᓴᕆᐊᓕᑎᓄᑦ. 2ᑕᕝᕙ ᐄᓱᕋᐅᑉ ᑐᓂᕐᕈᓯᕐᑎᑦᓯᔨᐅᑉ ᑲᑎᒪᔪᓄᐊᕈᑎᓚᐅᕐᐰᑦ ᐃᓄᖕᓄᑦ ᐊᖑᑎᓄᑦ ᐊᕐᓇᓄᓪᓗ ᕿᑐᕐᖓᖏᓐᓄᓪᓗ ᑐᓴᕈᓐᓇᕐᑐᓄᑦ ᑐᑭᓯᔪᓐᓇᓕᕐᑐᓕᒫᓄᑦ ᐅᓪᓘᑉ ᓯᕗᓪᓕᕐᐹᖓᓂ ᑕᖅᑭᐅᑉ 7ᖓᑦᑕ. 3ᑍᑲᓂ ᐱᕕᑐᓂᕐᒥ ᐃᒥᕐᑕᕐᕕᐅᑉ ᐃᑎᕐᑕᕐᕕᖓᑕ ᓴᓂᐊᓂ ᐅᖃᓕᒫᓚᐅᕐᐰᑦ ᐅᓪᓛᒻᒪᕆᖕᒥᑦ ᐱᒋᐊᕐᓗᓂ ᐅᓪᓘᑉ ᕿᑎᕋᓕᕐᓂᖓᓄᑦ ᑎᑭᓪᓗᒍ, ᐃᓄᖕᓄᑦ ᐊᖑᑎᓄᑦ ᐊᕐᓇᓄᓪᓗ ᑐᓴᕈᓐᓇᕐᑐᓄᑦ ᑐᑭᓯᔪᓐᓇᓕᕐᑐᓕᒫᓄᑦ; ᐃᓘᓐᓇᑎᒃ ᕿᑲᕐᓗᑎᒃ ᓈᓚᑦᓯᐊᓚᐅᕐᐳᑦ ᐊᒡᓚᖕᓂᒃ ᐱᖁᔭᓂᒃ.
4ᐄᓱᕋᓕ ᓇᖏᓚᐅᕐᐳᖅ ᐳᕐᑐᓯᒋᐊᕐᓯᒪᔪᒥ ᕿᔪᖕᒥᒃ ᓇᑎᓕᖕᒥ ᓴᓇᔭᐅᓯᒪᔪᒥᒃ ᓇᓪᓕᐅᓂᖅ ᐱᑦᔪᑎᒋᓪᓗᒍ; ᐅᑯᐊ ᐊᖑᑎᑦ ᑕᓕᕐᐱᐊᓂ ᓇᖏᓚᐅᕐᐳᑦ: ᒪᑎᑍᐊ, ᓰᒪ, ᐊᓁᐊ, ᔪᕅᐊ, ᕼᐅᓪᑬᐊ, ᒫᓯᐊᓗ; ᐅᑯᐊᓗ ᓴᐅᒥᐊᓂ ᓇᖏᓚᐅᕆᕗᑦ; ᐱᑍᐊ, ᒥᓮᐅᓪ, ᒪᓪᑬᔭ, ᕼᐊᓲᒻ, ᕼᐊᓱᐸᑖᓇ, ᓴᑲᕅᐊ, ᒥᓱᓚᒻᓗ.
5ᐄᓱᕋᓗ ᓇᖏᓚᐅᕐᐳᖅ ᕿᔫᑉ ᓇᑎᓕᐅᑉ ᖄᖓᓂ ᐳᕐᑐᔪᒥ ᐃᓄᐃᑦ ᓇᔪᕐᑕᖏᓐᓂᑦ ᖁᕝᕙᓯᖕᓂᕐᓴᒥ; ᐊᒡᓔᓪᓗ ᒪᒃᐱᕐᒪᒋᑦ ᐃᓄᐃᑦ ᐃᓘᓐᓇᑎᒃ ᓂᑯᕕᑉᐳᑦ. 6ᐄᓱᕋᓗ ᓂᕐᑐᐃᓚᐅᕐᐳᖅ, “ᐊᑕᓂᖅ ᓂᕐᑐᕐᑕᐅᓕ, ᒎᑎᓗ ᐊᖏᓂᕐᐸᐅᔪᖅ!”
ᑕᕝᕙ ᐃᓄᐃᑦ ᐃᓘᓐᓇᑎᒃ ᑕᓕᕐᒥᖕᓂᒃ ᖁᒻᒧᐊᒃᑎᑦᓯᓪᓗᑎᒃ ᑭᐅᕗᑦ, “ᐋᒦᓐ! ᐋᒦᓐ!” ᓰᖅᑯᕐᓗᑎᒡᓗ ᑐᒃᓯᐊᓕᕐᐳᑦ ᐊᑕᓂᕐᒧᑦ ᒪᓂᖅᑲᒧᑦ ᐳᓪᓗᑎᒃ.
7ᒪᑭᓐᓇᒥᒡᓗ ᓇᖏᓕᕐᐳᑦ ᐃᓂᒋᔭᒥᖕᓂ, ᓕᕔᑎᓪᓗ ᓇᓗᓁᕐᓯᓚᐅᕐᐳᑦ ᐱᖁᔧᑦ ᑐᑭᖏᓐᓂᒃ ᐃᓄᖕᓄᑦ ᐅᑯᐊᖑᓪᓗᑎᒃ: ᔩᓱᐊ, ᐹᓂ, ᓯᕆᐰᐊ, ᔭᒥᓐ, ᐊᑯᑉ, ᓴᐱᑍ, ᕼᐅᑍᐊ, ᒫᓯᐊ, ᑭᓔᑕ, ᐊᔭᕅᐊ, ᔫᓴᐸᑦ, ᕼᐊᓇᓐ, ᐱᓔᐊᓗ. 8ᑕᕝᕙ ᑐᑭᓯᓇᑦᓯᐊᕐᑐᒥᒃ ᐱᖁᔭᓂᒃ ᓇᓗᓁᕐᓯᓚᐅᕐᐳᑦ, ᐊᒡᓚᖕᓂᒃ ᒎᑎᐅᑉ ᐱᖁᔭᖏᓐᓂᒃ; ᑐᑭᓯᓇᕐᓯᑎᑦᓯᓚᐅᕐᐳᑦ ᐃᓄᖕᓄᑦ ᑐᑭᓯᔪᓐᓇᖁᓪᓗᒋᑦ ᐊᑐᐊᕐᑕᐅᔪᓂᒃ.
9ᐃᓄᓕᒫᑦ ᑐᓴᕋᒥᒃ ᐱᖁᔭᓂᒃ, ᐊᒃᑐᕐᑕᐅᒻᒪᕆᒃᐳᑦ ᕿᐊᓕᕐᓗᑎᒡᓗ. ᑍᒤᒻᒪᑦ ᓂᕼᐃᒤᐊ, ᑖᓐᓇ ᐊᐅᓚᑦᓯᔨᐅᔪᖅ, ᐄᓱᕋᓗ, ᑐᓂᕐᕈᓯᕐᑎᑦᓯᔨ ᐱᖁᔭᓂᒡᓗ ᐃᓕᓯᒪᔪᖅ, ᓕᕔᑏᓪᓗ ᐱᖁᔭᓂᒃ ᑐᑭᓯᓇᕐᓯᑎᑦᓯᓚᐅᕐᑐᑦ ᐃᓄᖕᓄᑦ ᐅᖃᕐᐳᑦ, “ᐅᓪᓗᖅ ᑖᓐᓇ ᐃᑦᔪᕐᓁᑦᑑᕗᖅ ᐊᑕᓂᕐᒧᑦ ᒎᑎᑦᓯᓐᓄᑦ, ᑍᒤᒻᒪᑦ ᕿᒃᓵᒃᑐᒃᓴᐅᓐᖏᓚᓯ, ᕿᐊᖏᓪᓗᓯᓗ. 10ᐊᖏᕐᕋᓕᕆᑦᓯ ᓂᕆᖃᑎᒌᒃᓗᓯᓗ, ᓂᕆᖃᑎᖃᕐᓗᓯ ᐃᒥᖃᑎᖃᕐᓗᓯᓗ ᐱᖃᓐᖏᓗᐊᕐᑐᓂᒃ, ᐅᓪᓗᖅ ᑖᓐᓇ ᐃᑦᔪᕐᓁᑦᑑᕗᖅ ᐊᑕᓂᑦᑎᓐᓄᑦ, ᕿᒃᓵᖏᓪᓗᓯ, ᖁᕕᐊᓱᖕᓂᖅ ᐊᑕᓂᕐᒥᑦ ᐱᔪᖅ ᓲᖑᑦᔪᑎᒋᕙᓯ.”
11ᑕᕝᕙ ᓕᕔᑎᑦ ᐃᓄᖕᓄᐊᕐᓗᑎᒃ ᓂᓪᓕᐊᔪᓐᓃᕐᑎᑦᓯᕗᑦ ᐅᖃᐅᑎᓪᓗᒋᓪᓗ, “ᕿᐊᔪᓐᓃᕆᑦᓯ, ᐅᓪᓗᖅ ᑖᓐᓇ ᐃᑦᔪᕐᓁᑦᑑᖕᒪᑦ, ᕿᒃᓵᒍᓐᓃᕆᑦᓯ.” 12ᐃᓄᐃᓪᓗ ᐃᓘᓐᓇᑎᒃ ᐊᖏᕐᕋᓕᕐᐳᑦ ᓂᕆᔭᕐᑐᕐᓗᑎᒃ ᐃᒥᕆᐊᕐᑐᕐᓗᑎᒡᓗ ᑲᑐᑦᔨᖃᑎᒌᒡᓗᑎᒡᓗ ᐊᖏᔪᒥᒃ ᖁᕕᐊᓱᓕᕐᐳᑦ, ᑐᑭᓯᑦᓯᐊᓚᐅᕋᒥᒃ ᐅᖃᐅᓯᕐᓂᒃ ᐅᖃᓕᒫᕐᑕᐅᓚᐅᕐᑐᓂᒃ.
ᓇᓪᓕᐅᓐᓂᕐᓯᐅᕐᓂᖅ ᑐᐲᓐᓇᕐᒦᖃᑦᑕᓚᐅᕐᓂᕐᒥᒃ
13ᖃᐅᑎᓪᓗᒍ ᐃᓚᒌᓕᒫᑦ ᐊᖓᔪᖅᑳᖏᑦ, ᑐᓂᕐᕈᓯᕐᑎᑦᓯᔩᓪᓗ ᓕᕔᑎᓪᓗ ᐃᓚᒋᓪᓗᒋᑦ, ᐄᓱᕋᒧᐊᕐᐳᑦ ᐱᖁᔭᓂᒃ ᐃᓕᓮᔨᒧᑦ, ᐃᓕᓐᓂᐊᕆᐊᕐᓗᑎᒃ ᐱᖁᔭᓂᒃ. 14#ᒨᓯᓯ ᐱᖓᔪᖏᑦ 23:33-36,39-43; ᒨᓯᓯ ᑕᓪᓕᒪᖏᑦ 16:13-15.ᖃᐅᔨᓚᐅᕐᐳᑦ ᐱᖁᔧᑦ ᐊᑕᓂᐅᑉ ᑐᓂᓚᐅᕐᑕᖏᑦ ᒨᓯᓯᒃᑯᑦ, ᐱᖁᔨᓯᓯᒪᖕᒪᑕ ᐃᓴᕆᐊᓕᒥᐅᓂᒃ ᐊᖏᕐᕋᖃᑬᓐᓇᖃᑦᑕᖁᓪᓗᒋᑦ ᑐᐱᕐᒥ ᓇᓪᓕᐅᓐᓂᕐᓯᐅᕐᓂᕐᒥᖕᓂᒃ ᑐᐱᑐᐃᓐᓇᕐᒦᓐᓂᕐᒥᒃ ᑕᖅᑭᐅᑉ 7ᖓᓐᓂ. 15ᑕᒪᓐᓇᓗ ᓇᓗᓁᕐᑕᐅᔭᕆᐊᖃᕐᓗᓂ ᔨᕉᓴᓕᒥᐅᓕᒫᓄᑦ, ᐃᒡᓗᒐᓴᖕᓄᓪᓗ ᓄᓇᓕᖕᓄᓪᓗ ᐊᓯᖏᓐᓃᑦᑐᓄᑦ, ᐅᖃᕐᓗᓂᒃ, “ᖃᖅᑲᓄᑦ ᐂᓕᕆᑦᓯ ᓇᐹᕐᑑᓪᓗ ᐊᕙᓚᖓᔪᖏᓐᓂᒃ ᑎᒍᓯᓗᓯ ᓇᐹᕐᑐᓂᑦ ᐅᕐᓱᒃᓴᓕᖕᓂᑦ, ᓇᐹᕐᑑᓪᓗ ᐅᕐᓱᒃᓴᓖᑦ ᐊᕙᓚᖓᔪᖏᓐᓂᒃ, ᒨᕐᑐᐃᓪᓗ ᐊᕙᓚᖓᔪᖏᓐᓂᒃ, ᐹᓪᒦᓪᓗ ᐊᕙᓚᖓᔪᖏᓐᓂᒃ, ᐊᓯᖏᓐᓂᒡᓗ ᓇᐹᕐᑐᓂᒃ ᐊᕙᓚᖓᔪᖏᓐᓂᒃ ᐅᖃᐅᔭᓕᖕᓂᒃ ᖁᓕᑦᔪᑎᒃᓴᑦᓯᓐᓂᒃ ᐱᖁᔧᑦ ᐱᖁᔨᓯᒪᓂᖏᑦ ᒪᓕᒡᓗᒋᑦ.”
16ᑍᒤᒻᒪᑦ ᐃᓄᐃᑦ ᐊᕙᓚᖓᔪᓂᒃ ᐱᓚᐅᕐᐳᑦ ᓴᓇᓪᓗᑎᒡᓗ ᑐᐱᕐᒥᖕᓂᒃ ᖁᓕᓯᕗᑦ ᐃᒡᓗᖏᑕ ᐊᑐᓂᑦ ᖄᖓᓂ, ᓯᓚᑎᑦᓯᐊᒥᖕᓂᓘᓐᓃᑦ, ᑐᒃᓯᐊᕐᕕᐅᓪᓗ ᐱᕕᑐᓂᖓᓂ, ᐃᓄᑐᐃᓐᓇᕐᓄᓪᓗ ᐃᓂᒋᔭᐅᕙᒃᑑᑉ ᐱᕕᑐᓂᖓᓂ, ᐃᒥᕐᑕᕐᕕᐅᓪᓗ ᐃᑎᕐᑕᕐᕕᖓᑕ ᓴᓂᐊᓂ ᐃᕗᕅᑎᐅᓪᓗ ᐃᑎᕐᑕᕐᕕᖓᑕ ᓴᓂᐊᓂ. 17ᐃᓄᓕᒫᑦ ᑎᒍᔭᐅᓯᒪᕕᖕᒥᑦ ᐅᑎᓚᐅᕐᑐᑦ ᓴᓇᓚᐅᕐᐳᑦ ᖁᓕᓯᒪᔪᓂᒃ ᓯᓂᒃᑕᕐᕕᒃᓴᓂᒃ ᐊᖏᕐᕋᕆᓕᕐᓗᒍᓗ. ᑕᒪᓐᓇ ᐊᑐᕐᑕᐅᓕᑍᓐᓇᓚᐅᕐᐳᖅ ᓯᕗᓪᓕᕐᐹᒥᒃ ᑍᑦᓱᒪᓂ ᐊᑐᕐᑕᐅᕙᓚᐅᕐᓯᒪᖕᒪᑦ ᔩᓱᐊᑉ ᓈᓂᐅᑉ ᐃᕐᓂᖓᑕ ᐅᓪᓗᖏᓐᓂ. ᐊᖏᔪᒥᒃ ᖁᕕᐊᓱᒡᓗᑎᒃ ᐊᓕᐊᓁᒍᓱᒃᑐᐊᓘᓚᐅᕐᐳᑦ. 18ᐅᓪᓘᑉ ᐱᒋᐊᕐᓂᖓᓂᑦ ᓇᓪᓕᐅᓐᓂᕐᓯᐅᕐᕕᐅᑉ ᐅᓪᓗᒧᑦ ᑭᖑᓪᓕᕐᐹᒧᑦ ᑎᑭᓪᓗᒍ, ᒎᑎᐅᑉ ᐱᖁᔭᖏᑦ ᐅᖃᓕᒫᕐᑕᐅᓚᐅᕐᐳᑦ ᖃᐅᑕᒫᑦ. ᓇᓪᓕᐅᓐᓂᕐᓯᐅᓚᐅᕐᐳᓪᓗ ᐅᓪᓗᓂᒃ 7ᓂᒃ, ᐅᓪᓗᐃᓪᓗ 8ᖓᓐᓂ ᑲᑎᖃᑎᒌᒃᓗᑎᒃ ᐅᒃᑯᐊᕐᓯᓚᐅᕐᐳᑦ ᓇᓪᓕᐅᓐᓂᕐᓯᐅᕐᓂᕐᒥᖕᓂᒃ, ᐱᖁᔧᑦ ᑍᒫᒃ ᐱᖁᔨᓂᖏᑦ ᒪᓕᒡᓗᒋᑦ.
Currently Selected:
ᓂᕼᐃᒤᐊᐅᑉ ᐊᒡᓚᖏᑦ 8: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
