ᓂᕼᐃᒤᐊᐅᑉ ᐊᒡᓚᖏᑦ 13
13
ᐅᖓᓯᒃᑐᒥᐅᑕᓂᒃ ᑲᑎᓐᖓᓯᒋᐊᖃᖏᓐᓂᖅ
1 #
ᒨᓯᓯ ᑕᓪᓕᒪᖏᑦ 23:3-5. ᑕᕝᕙᓂ ᐅᓪᓗᒥ ᒨᓯᓯᐅᑉ ᐊᒡᓚᖏᑦ ᐊᑐᐊᕐᑕᐅᓚᐅᕐᐳᑦ ᐃᓄᒐᓴᒡᔪᐊᑦ ᑐᓵᑎᓪᓗᒋᑦ, ᑕᕝᕙᓂ ᑎᑎᕋᕐᓯᒪᔪᓂᒃ ᓇᓂᓯᔪᖃᓚᐅᕐᐳᖅ ᐊᒧᓁᑎᒥᐅᑦ ᒧᐊᐱᒥᐅᓪᓗ ᒎᑎᐅᑉ ᑲᑎᓐᖓᔪᖁᑎᖏᓐᓄᑦ ᐃᓚᐅᑎᑕᐅᔭᕆᐊᖃᖏᓐᓂᖏᓐᓂᒃ ᐅᖃᕐᓯᒪᔪᕐᑕᖃᕐᒪᑦ; 2#ᒨᓯᓯ ᓯᑕᒪᖏᑦ 22:1-6.ᑐᓂᓯᔪᒪᓚᐅᖏᒻᒪᑕ ᓂᐊᖂᔭᒥᒃ ᐃᒥᕐᒥᒡᓗ ᐃᓴᕆᐊᓕᑎᒃᑯᓐᓄᑦ, ᐸᓛᒻᒥᒡᓕ ᑎᓕᓯᖔᓚᐅᕐᒪᑕ ᑖᒃᑯᓄᖓ ᐊᑭᕋᕐᑐᖁᓪᓗᒍ ᓯᕗᓂᕐᓗᒍᑎᒃᓴᖏᓐᓂᒡᓗ ᐱᓇᓱᐊᖁᓪᓗᒍ; ᒎᑎᑦᑕᓕ ᓯᕗᓂᕐᓗᒍᑎᒃᓴᐅᑎᑕᐅᓇᓱᐊᕐᑐᖅ ᓮᒻᒪᕐᑎᑕᐅᓂᕐᒧᑦ ᒧᒥᒃᑎᖔᓚᐅᕐᐹ. 3ᑕᒪᓐᓇᓕ ᐱᖁᔭᖅ ᑐᓴᕋᒥᑦᔪᒃ, ᑕᕝᕙ ᐃᓴᕆᐊᓕᒥᐅᓂᑦ ᐊᕕᑎᑕᐅᓚᐅᕐᐳᑦ ᐅᖓᓯᒃᑐᒥᑦ ᐱᓯᒪᔪᓕᒫᑦ.
ᓂᕼᐃᒤᐊᐅᑉ ᐋᖅᑮᒋᐊᒃᑲᓐᓂᕐᓂᖓ
4ᑕᒪᑐᒪᓕ ᓯᕗᓂᖓᒍᑦ, ᐃᓔᐊᓯᑉ ᑐᓂᕐᕈᓯᕐᑎᑦᓯᔨ, ᑖᓐᓇ ᐊᖓᔪᖅᑳᓐᖑᑎᑕᐅᓯᒪᔪᖅ ᒎᑎᑦᑕ ᐃᒡᓗᖓᓂ ᑐᓂᔭᐅᖃᑦᑕᕐᑐᑦ ᐃᓂᒃᓴᖏᓐᓄᑦ, ᐊᑯᓂ ᐱᓇᓱᐊᖃᑎᖃᖃᑦᑕᓚᐅᕐᐳᖅ ᑐᐱᐊᒥᒃ. 5ᑖᓐᓇᓗ ᑐᐱᐊ ᐃᓂᒃᓴᖃᓕᕐᑎᓚᐅᕐᐹ ᓱᓇᑐᐃᓐᓇᖃᐅᑎᒥ ᐊᖏᔪᒥᒃ, ᐱᕈᕐᑐᕕᓃᑦ ᑐᓂᕐᕈᑎᐅᓯᒪᔪᑦ ᐃᓂᒃᓴᕆᖃᑦᑕᓚᐅᕐᑕᖓᓂ, ᑎᐱᑦᓯᐊᕆᒃᓴᐅᑏᓪᓗ, ᐴᒍᑍᓪᓗ, ᓂᐊᖂᔭᒃᓮᓪᓗ ᑕᓪᓕᒪᐅᔪᐃᕈᑕᐅᓯᒪᔪᑦ, ᕔᓃᑦ, ᐅᕐᓱᒃᓮᓪᓗ, ᐱᖁᔭᑎᒍᑦ ᑐᓂᔭᐅᖁᔭᐅᓯᒪᔪᑦ ᓕᕔᑎᒃᑯᓐᓄᑦ, ᐃᓐᖏᕐᑎᓄᓪᓗ, ᐃᑎᕐᑕᕐᕕᐅᓪᓗ ᑲᒪᔨᖏᓐᓄᑦ, ᑐᓂᕐᕈᑎᒃᓴᐅᓪᓗᑎᒡᓗ ᑐᓂᕐᕈᓯᕐᑎᑦᓯᔨᓄᑦ. 6ᑕᒪᓐᓇᓕ ᐊᑐᕐᑕᐅᓕᕐᑎᓪᓗᒍ ᔨᕉᓴᓕᒦᓚᐅᓐᖏᓚᖓ, ᐊᖓᔪᖅᑳᕐᔪᐊᑉ ᐋᕐᑕᔮᒃᓯᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᖓᔪᖅᑳᖑᓂᖓᑕ ᐊᕐᕌᒍᖏᑦ 32ᖑᓕᕐᑎᓪᓗᒋᑦ ᐅᐸᒃᓯᒪᓚᐅᕋᒃᑯ. ᐊᑯᓂᐅᓕᕐᒥᑎᓪᓗᒍᓕ ᐊᖓᔪᖅᑳᕐᔪᐊᕐᒧᑦ ᐊᐱᕆᓚᐅᕐᓗᖓ ᕿᒪᓕᓚᐅᕆᕙᕋ, 7ᔨᕉᓴᓕᒧᓪᓗ ᑎᑭᓐᓇᒪ, ᖃᐅᔨᓕᓚᐅᕐᐳᖓ ᐃᓔᐊᓯᐅᑉ ᐱᐅᖏᑦᑐᒥᒃ ᐱᓕᕆᓯᒪᓂᖓᓂᒃ ᑐᐱᐊ ᐱᑦᔪᑎᒋᓪᓗᒍ, ᐃᓂᒃᓴᖃᓕᕐᑎᓚᐅᕐᒪᒍ ᓱᓇᑐᐃᓐᓇᖃᐅᑎᒥ ᒎᑎᐅᑉ ᐃᒡᓗᖓᓃᑦᑐᒥᒃ. 8ᑕᒪᓐᓇᓕ ᐊᖏᔪᒥᒃ ᓂᓐᖓᒍᑎᒋᓚᐅᕐᐸᕋ; ᑕᕝᕙᓃᑦᑐᓪᓗ ᐱᖁᑎᑦ ᐃᒋᐅᖅᑲᓚᐅᕐᐸᒃᑲ ᑐᐱᐊᑉ ᐱᖁᑎᖏᑦ ᓱᓇᑐᐃᓐᓇᖃᐅᑎᒥᑦ ᐊᓂᑎᓪᓗᒋᑦ. 9ᑕᕝᕙ ᑎᓕᓯᓚᐅᕐᐳᖓ ᓴᓗᒻᒪᕐᓴᕐᑕᐅᖁᓪᓗᒍ ᑖᓐᓇ ᓱᓇᑐᐃᓐᓇᖃᐅᑎ; ᑕᕝᕙ ᐅᑎᕐᑎᓚᐅᕐᐸᒃᑲ ᐴᒍᑍᑦ ᑕᓪᓕᒪᐅᔪᐃᕈᑎᒃᓴᓄᑦ ᐆᒃᑐᕋᐅᑕᐅᕙᒃᑐᑦ ᒎᑎᐅᑉ ᐃᒡᓗᖓᓄᑦ, ᐃᓚᖃᕐᑎᓪᓗᒋᑦ ᓂᕿᒃᓴᓂᒃ ᑐᓂᕐᕈᑕᐅᓯᒪᔪᓂᒃ ᑎᐱᑦᓯᐊᕆᒃᓴᐅᑎᒃᓴᓂᒡᓗ.
10 #
ᒨᓯᓯ ᑕᓪᓕᒪᖏᑦ 12:19. ᖃᐅᔨᓕᓚᐅᕆᕗᖓ ᓕᕔᑎᒃᑯᓐᓄᑦ ᑐᓂᔭᐅᖃᑦᑕᕆᐊᓖᑦ ᑐᓂᔭᐅᖃᑦᑕᕐᓯᒪᖏᓐᓂᖏᓐᓂᒃ; ᑖᒃᑯᐊ ᓕᕔᑏᑦ ᐃᓐᖏᕐᑏᓪᓗ ᐊᑐᓂᑦ ᐱᓇᓱᐊᖃᑦᑕᕆᐊᓖᑦ ᐱᕈᕐᓰᕕᖁᑎᒥᖕᓄᑦ ᕿᒫᓪᓗᑎᒃ ᐅᑎᕐᓯᒪᓕᕐᑐᕕᓂᐅᓂᖏᓐᓂᒃ. 11ᐊᖓᔪᖅᑳᓪᓕ ᓱᐊᒃᓗᒋᑦ ᐅᖃᐅᑎᓚᐅᕐᐸᒃᑲ, “ᓱᖕᒪᑦ ᒎᑎᐅᑉ ᐃᒡᓗᖓ ᕿᒪᒃᑕᐅᕚ?” ᑕᕝᕙ ᑲᑎᓐᖓᑎᓚᐅᕐᐸᒃᑲ ᐃᓂᒃᓴᖏᓐᓄᓪᓗ ᐊᑐᓂᑦ ᑎᓕᓪᓗᒋᑦ. 12#ᒪᓚᑬ 3:10.ᑕᕝᕙ ᔫᑕᒃᑯᑦ ᐱᕈᕐᑎᑕᓕᒫᖏᑕ, ᕔᓃᓪᓗ, ᐅᕐᓱᒃᓮᓪᓗ ᑕᓪᓕᒪᐅᔪᖏᓐᓂᒃ ᑐᓂᓯᔭᕐᑐᓚᐅᕐᐳᑦ ᓱᓇᑐᐃᓐᓇᖃᐅᑎᒧᐊᕐᓗᒋᓪᓗ. 13ᑮᓇᐅᔭᓕᕆᔨᒃᓴᓂᒡᓗ ᑎᓕᓯᓚᐅᕐᐳᖓ ᑐᓂᔭᐅᔪᑦ ᓱᓇᑐᐃᓐᓇᖃᐅᑎᖓᓂ ᑲᒪᔨᐅᓂᐊᕐᑐᓂᒃ ᓯᓕᒤᐊ ᑐᓂᕐᕈᓯᕐᑎᑦᓯᔨ, ᔭᑑᒃ ᐱᖁᔭᓂᒃ ᐃᓕᓯᒪᔪᖅ, ᓕᕔᑎ ᐱᑍᐊ, ᐃᑲᔪᕐᑎᒃᓴᖃᕐᓗᑎᒃ ᕼᐊᓇᓐᒥᒃ ᔭᑯᕆᐅᑉ ᐃᕐᓂᖓᓂᒃ, ᒪᑕᓁᐊᐅᑉ ᐃᕐᖑᑕᖓᓂᒃ, ᑖᒃᑯᐊ ᐱᑦᓯᐊᕈᓐᓇᕋᓱᒋᔭᐅᓚᐅᕐᒪᑕ; ᐱᔭᒃᓴᖃᕐᐳᑦ ᐃᓅᖃᑎᒥᖕᓄᑦ ᐂᑦᑐᕐᑐᐃᖃᑦᑕᖁᓪᓗᒋᑦ.
14ᒎᑎᒐ ᐃᖅᑲᐅᒪᓐᖓ, ᑕᒪᒃᑯᐊ ᐱᑦᔪᑎᒋᓗᒋᑦ, ᐱᓇᓱᐊᑦᓯᐊᕐᓂᕆᓚᐅᕐᑕᒃᑲᓗ ᒎᑎᒪ ᐃᒡᓗᖓᓄᑦ ᐳᐃᒍᕐᑍᓕᒃᑭᑦ ᑖᑦᓱᒪᓗ ᐱᓇᓱᐊᕐᑕᐅᖁᓯᒪᔭᖏᓐᓂᒃ ᐱᓇᓱᐊᕐᓯᒪᔭᒃᑲ.
15 #
ᒨᓯᓯ ᐂᑉᐸᖏᑦ 20:8-10; ᒨᓯᓯ ᑕᓪᓕᒪᖏᑦ 5:12-14; ᔨᕆᒤᐊ 17:21,22. ᑍᑦᓱᒪᓂᐅᑎᓪᓗᒍ ᐃᓄᖕᓂᒃ ᔫᑕᒥᐅᓂᒃ ᑕᑯᓚᐅᕐᐳᖓ ᐸᐅᕐᖓᓂᒃ ᕔᓂᒃᓴᓂᒃ ᐃᑦᑏᔧᕕᖕᒥ ᑐᓪᓕᕐᑐᓂᒃ ᓴᐸᑎᐅᑎᓪᓗᒍ, ᓂᐊᖂᔭᒃᓴᓂᒡᓗ ᓇᑲᑎᕐᓯᒪᔪᓂᒃ ᐊᒡᔭᕐᓯᓪᓗᑎᒃ ᓯᐅᑎᖅᑯᕐᑐᔪᖁᑎᒥᖕᓄᑦ ᐅᓯᓕᕐᑐᐃᔪᓂᒃ; ᕔᓂᓂᒡᓗ, ᐸᐅᕐᖓᓂᒡᓗ ᕔᓂᒃᓴᓂᒃ, ᐸᐅᕐᖓᓂᒡᓗ ᐱᒋᓕᖕᓂᒃ, ᐊᓯᖏᓐᓂᒡᓗ ᐅᖁᒤᑦᑐᓂᒃ ᐱᓕᕆᔪᓂᒃ, ᔨᕉᓴᓕᒧᐊᕈᑦᔨᖃᑦᑕᕐᑐᓂᒃ ᐅᓪᓗᖅ ᓴᐸᑎᐅᑎᓪᓗᒍ. ᐃᓂᕐᑎᓚᐅᕐᐸᒃᑲᓕ ᐅᓪᓗᒥ ᑕᕝᕙᓂ ᓂᐅᕐᕈᓯᖃᑦᑕᖁᓇᒋᑦ ᓂᕿᒃᓴᓂᒃ. 16ᐃᓄᐃᑦᑕᐅᖅ ᑍᕆᒥᐅᑍᑦ, ᑕᕝᕙᓂ ᐃᒡᓗᒐᓴᖕᓂ ᓄᓇᖃᓚᐅᕆᕗᑦ, ᐃᖃᓗᖕᓂᒃ ᐊᓯᖏᓐᓂᒡᓗ ᖃᓄᐃᑦᑐᑐᐃᓐᓇᓂᒃ ᓂᐅᕕᐊᒃᓴᖃᖃᑦᑕᓚᐅᕆᕗᑦ ᓴᐸᑎᐅᑎᓪᓗᒍ ᔫᑕᐅᑉ ᐃᓄᖏᓐᓄᑦ, ᔨᕉᓴᓕᒥᓗ. 17ᑕᕝᕙ ᔫᑕᐅᑉ ᐊᖓᔪᖅᑳᖏᑦ ᓱᐊᓚᐅᕐᐸᒃᑲ ᐅᖃᐅᑎᓪᓗᒋᓪᓗ, “ᓱᖕᒪᑦ ᐱᐅᖏᑦᑐᒥᒃ ᐱᓕᕆᓕᕐᐱᓰ, ᓴᐸᑎᒥᒃ ᓇᕐᕈᓇᕐᓯᑎᑦᓯᒐᑦᓯ? 18ᓯᕗᓕᓯ ᑍᒤᓕᐅᖃᑦᑕᓚᐅᓐᖏᓛᑦ, ᒎᑎᑦᑕ ᐱᐅᖏᑦᑐᒥᒃ ᐱᓇᓱᐊᕐᕕᒋᓚᐅᓐᖏᓛᑎᒎᑦ ᑕᕝᕙᓂ ᐃᒡᓗᒐᓴᖕᓂ? ᐃᓕᑦᓯᓕ ᓂᓐᖓᐅᑦᔭᐅᓇᕐᑐᒥᒃ ᐃᓴᕆᐊᓕᒥᐅᓄᑦ ᐱᑎᑦᓯᕗᓯ ᓴᐸᑎᒥᒃ ᓇᕐᕈᓇᕐᓯᑎᑦᓯᒐᑦᓯ.”
19ᑕᕝᕙ ᑖᕐᓯᕙᓪᓕᐊᓕᕐᒪᑦ ᔨᕉᓴᓕᐅᑉ ᐃᑎᕐᑕᕐᕕᖏᓐᓂ ᓴᐸᑎᐅᓂᐊᓕᕐᑎᓪᓗᒍ, ᑎᓕᓯᓚᐅᕐᐳᖓ ᐃᑎᕐᑕᕐᕕᐅᑉ ᐅᒃᑯᐊᖏᑦ ᐅᒃᑯᐊᕐᑕᐅᖁᓪᓗᒋᑦ ᓴᐸᑎ ᐊᓂᒍᓚᐅᖏᓐᓂᖓᓂ ᐅᒃᑯᐃᕐᑍᓕᖁᓪᓗᒋᓪᓗ. ᐱᔨᒪᓗ ᐃᓚᖏᓐᓂᒃ ᑎᓕᓯᓚᐅᕐᐳᖓ ᐃᑎᕐᑕᕐᕕᖕᒦᖁᓪᓗᒋᑦ, ᓇᓪᓕᐊᓐᓂᒡᓘᓐᓃᑦ ᓱᓇᑐᐃᓐᓇᕐᒥᒃ ᐃᑎᕈᑦᔨᔪᖃᖁᓇᒍ ᓴᐸᑎᐅᑎᓪᓗᒍ. 20ᑕᕝᕙ ᓂᐅᕕᕋᓱᐊᕐᑏᑦ ᓂᐅᕐᕈᓯᕐᑏᓪᓗ ᓱᓇᑐᐃᓐᓇᕐᓂᒃ ᓂᐅᕐᕈᑎᒃᓴᓂᒃ ᓇᔪᕐᑎᖃᕐᓗᑎᒃ ᓯᓂᒃᑕᖃᑦᑕᓚᐅᕐᐳᑦ ᐊᑕᐅᓯᐊᕐᓗᑎᒃ ᐅᕝᕙᓗ ᒪᕐᕈᕕᒡᓗᑎᒃ ᔨᕉᓴᓕᐅᑉ ᓯᓚᑖᓂ. 21ᐃᓂᕐᑎᓚᐅᕐᐸᒃᑲᓕ ᐅᖃᐅᑎᓪᓗᒋᓪᓗ, “ᓱᖕᒪᑦ ᐊᕙᓗᕐᔪᐊᑉ ᓯᓚᑖᓂ ᓯᓂᒃᑕᕐᐱᓰ? ᑍᒤᓕᑐᐊᕐᒥᒍᑦᓯ ᑕᕝᕙ ᐱᒋᐊᓛᓕᕐᐳᖓ ᐃᓕᑦᓯᓐᓂᒃ.” ᑕᕝᕙᓐᖓᑦ ᐱᒋᐊᕐᓗᑎᒃ ᓴᐸᑎᐅᑎᓪᓗᒍ ᕾᖃᑦᑕᕈᓐᓃᓚᐅᕐᐳᑦ. 22ᑕᕝᕙ ᓕᕔᑏᑦ ᐱᖁᓚᐅᕐᐸᒃᑲ ᐃᒻᒥᖕᓂᒃ ᑐᒃᓯᐊᕐᓂᒃᑯᑦ ᓴᓗᒻᒪᕐᓴᖅᑳᕐᓗᑎᒃ, ᐃᑎᕐᑕᕐᕖᑦ ᖃᐅᔨᓴᕐᑕᐅᖃᑦᑕᖁᓪᓗᒋᑦ, ᐅᓪᓗᖅ ᓴᐸᑎ ᐃᑦᔪᕐᓁᑎᑕᐅᖁᓪᓗᒍ.
ᒎᑎᒐ ᐃᖅᑲᐅᒪᓐᖓ, ᑕᒪᓐᓇ ᐱᑦᔪᑎᒋᓗᒍᑦᑕᐅᖅ, ᓴᐳᑎᓗᖓᓗ ᓇᒡᓕᒍᓱᒃᑐᕐᔪᐊᖑᓃᑦ ᐱᑦᔪᑎᒋᓗᒍ.
23 #
ᒨᓯᓯ ᐂᑉᐸᖏᑦ 34:11-16; ᒨᓯᓯ ᑕᓪᓕᒪᖏᑦ 7:1-5. ᐊᒻᒪ ᑕᒪᒃᑯᐊ ᓇᓪᓕᐅᓯᒪᑎᓪᓗᒋᑦ ᖃᐅᔨᓚᐅᕆᕗᖓ ᔫᑎᑦ ᓄᓕᐊᓂᖃᑦᑕᓕᕐᓂᕐᒪᑕ ᐊᕐᓇᓂᒃ ᐋᔅᑖᑦᒥᐅᓂᒃ, ᐊᒧᓂᒥᐅᓂᒡᓗ, ᒧᐊᐱᒥᐅᓂᒡᓗ; 24ᕿᑐᕐᖓᖏᑕᓗ ᕿᑎᖅᑲᖏᑦ ᐋᔅᑖᑦᒥᐅᑎᑐᑦ ᐅᖃᐅᓯᖃᕐᐳᑦ, ᔫᑕᒥᐅᓪᓗ ᐅᖃᐅᓯᖏᑎᑐᑦ ᐅᖃᕈᓐᓇᕋᑎᒃ, ᐃᓅᖃᑎᒌᓪᓕ ᓇᓪᓕᐊᑦᑕ ᐅᖃᐅᓯᖏᓐᓂᒃ ᐅᖃᐅᓯᖃᖔᕐᐳᑦ. 25ᓱᐊᓚᐅᕐᐸᒃᑲᓕ ᐅᖃᕐᓂᕐᓗᒡᕕᒋᓪᓗᒋᓪᓗ, ᐃᓚᖏᓪᓗ ᐋᓐᓂᕐᓯᓚᐅᕐᐸᒃᑲ ᓄᔮᕐᑐᕐᓗᒋᓪᓗ; ᐊᖏᒻᒪᕆᒃᑎᓚᐅᕐᐸᒃᑲ ᒎᑎᐅᑉ ᐊᑎᖓᓂ, ᐅᖃᐅᑎᓪᓗᒋᓪᓗ, “ᐸᓂᓯ ᑐᓂᔭᒃᓴᕆᓐᖏᓚᓯ ᑍᒃᑯᐊ ᐃᕐᓂᖏᓐᓄᑦ, ᐅᕝᕙᓗ ᑍᒃᑯᐊ ᐸᓂᖏᓐᓂᒃ ᑎᒍᓯᔪᒃᓴᐅᓐᖏᓚᓯ ᐃᕐᓂᑦᓯᓐᓄᑦ, ᓇᖕᒥᓂᑦᓯᓐᓄᓪᓘᓐᓃᑦ. 26#ᓴᒧᐃᓕ ᐂᑉᐸᖏᑦ 12:24,25; ᐊᑕᓃᑦ ᓯᕗᓪᓖᑦ 11:1-8.ᓲᓗᒨᓂ ᐃᓴᕆᐊᓕᒃᑯᑦ ᐊᖓᔪᖅᑳᕐᔪᐊᖓᑦ ᐊᔪᕐᑐᓕᑦᔪᑎᖃᓚᐅᓐᖏᓛᖅ ᐊᕐᓇᓄᑦ ᑍᒤᓕᐅᕐᓂᕐᒥᓄᑦ? ᐃᓅᖃᑎᒌᒡᔪᐊᓕᒫᓂᑦ ᑖᑦᓱᑐᓇᖅ ᐊᔪᓐᖏᑎᒋᔪᒥᒃ ᐊᖓᔪᖅᑳᕐᔪᐊᕐᑕᖃᓚᐅᓐᖏᓚᖅ, ᒎᑎᖓᑕᓗ ᓇᒡᓕᒋᓪᓗᓂᐅᒃ, ᒎᑎᐅᓪᓗ ᐃᓴᕆᐊᓕᓕᒫᒧᑦ ᐊᖓᔪᖅᑳᕐᔪᐊᓐᖑᕐᑎᓚᐅᕐᐹ; ᔫᑎᐅᖏᑦᑐᓪᓕ ᐊᕐᓇᖏᑕ ᐊᔪᕐᑐᓕᑎᓚᐅᕐᐹᑦ. 27ᑕᕝᕙ ᐃᓕᑦᓯᓐᓂᒃ ᒪᓕᑐᐃᓐᓇᕐᓗᑕ ᐱᐅᖏᑦᑐᓕᓂᐊᓗᖕᒥᒃ ᐱᓇᓱᐊᕐᓂᐊᓕᕐᐱᑖ ᑍᒫᒃ ᒎᑎᕗᑦ ᐊᔪᕐᑐᓕᕕᒋᓗᒍ ᔫᑎᐅᖏᑦᑐᓂᒃ ᓄᓕᐊᓂᖃᑦᑕᕐᓗᑖ?”
28 #
ᓂᕼᐃᒤᐊ 4:1. ᐃᓔᐊᓯᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓᑕ ᐃᓚᖓᑦ, ᔨᕼᐅᐃᐊᑕ ᓴᓐᐸᓪᓛᑎᐅᑉ ᕼᐅᕈᓁᑎᐅᑉ ᓂᖓᐅᒋᓚᐅᕐᒪᒍ; ᑍᒤᒻᒪᑦ ᑕᕝᕙᓐᖓᑦ ᐊᐅᓪᓚᕐᑎᓚᐅᕐᐸᕋ.
29ᒎᑎᒐ ᐃᖅᑲᐅᒪᒃᑭᑦ, ᑐᓂᕐᕈᓯᕐᑎᑦᓯᔨᓂᒃ ᓇᕐᕈᓇᕐᓯᑎᑦᓯᖕᒪᑕ; ᐊᖏᖃᑎᒌᒍᑎᒋᓯᒪᔭᓕᒫᖏᓐᓂᒡᓗ ᑐᓂᕐᕈᓯᕐᑎᑦᓯᔩᑦ ᓕᕔᑎᓪᓗ. 30ᓴᓗᒻᒪᕐᓴᓚᐅᕐᐸᒃᑲ ᐃᓚᖃᕈᓐᓁᕐᑎᓪᓗᒋᓪᓗ ᐅᖓᓯᒃᑐᒥᐅᑕᓂᒃ, ᑐᓂᕐᕈᓯᕐᑎᑦᓯᔩᓪᓗ ᓕᕔᑎᓪᓗ ᐱᓇᓱᐊᒐᒃᓴᖏᓐᓂᒃ ᓇᓗᓁᕐᓯᓚᐅᕐᐳᖓ, ᐊᑐᓂᑦ ᐱᓇᓱᐊᖃᑦᑕᕐᓂᐊᕐᑕᖏᓐᓂᒃ. 31ᕿᔪᖕᓂᒡᓗ ᐊᑐᐃᓐᓇᕈᐃᓚᐅᕐᐳᖓ ᑐᓂᕐᕈᓯᓕᕐᑎᓪᓗᒋᑦ ᐃᑯᐊᓚᒍᑎᒃᓴᓂᒃ, ᑐᓂᕐᕈᓯᕐᕕᒃᓴᖅ ᓇᓪᓕᐅᓐᓂᖅ ᓈᒻᒪᒃᓯᔭᕌᖓᑦ, ᐱᕈᕐᑐᓪᓗ ᓯᕗᓪᓕᕐᐹᑦ ᐱᕈᕐᑎᑕᐅᔪᑦ ᑐᓂᔭᐅᓂᒃᓴᖏᓐᓂ.
ᒎᑎᒐ, ᐃᖅᑲᐅᒪᓐᖓ, ᐱᐅᔪᓂᒃ ᐱᓇᓱᐊᓚᐅᕐᑕᓐᓄᑦ.
Currently Selected:
ᓂᕼᐃᒤᐊᐅᑉ ᐊᒡᓚᖏᑦ 13: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
