ᒫᑎᐅᓯᐅᑉ ᐊᒡᓚᖏᑦ 7
7
ᐊᓯᑦᓯᓐᓂᒃ ᐃᖅᑲᕐᑐᐃᓂᐊᕋᓯ
ᓘᑲᓯ 6:37-38,41-42
1“ᐊᓯᑦᓯᓐᓂᒃ ᐃᖅᑲᕐᑐᐃᓂᐊᕋᓯ, ᐃᖅᑲᕐᑐᕐᑕᐅᖁᓇᓯ. 2#ᒫᑯᓯ 4:24.ᐃᖅᑲᕐᑐᐃᓂᓯ ᒪᓕᒡᓗᒍ ᑍᒫᓪᓗᐊᖅ ᐃᖅᑲᕐᑐᕐᑕᐅᔪᒫᕆᕗᓯ, ᐱᓇᓱᐊᕐᓂᓯ ᒪᓕᒡᓗᒍ ᑍᒫᓪᓗᐊᖅ ᐱᓇᓱᐊᕐᕕᐅᔪᒫᕆᕗᓯ. 3ᓱᖕᒪᑦ ᐃᓅᖃᑎᕕᑦ ᐃᑦᔨᓯᒪᐅᑎᖓ ᒥᑭᔪᑯᓗᒃ ᑕᑯᕕᐅᒃ? ᐅᕝᕙ ᓇᖕᒥᓂᖅ ᐃᔨᖕᓃᑦᑐᖅ ᓇᐹᕐᑐᕕᓂᐊᓗᒃ ᐃᒃᐱᒋᓇᒍ? 4ᐅᕝᕙᓗ ᖃᓄᖅ ᐃᓅᖃᑎᖕᓄᑦ ᐅᖃᕈᓐᓇᕐᐱᑦ ‘ᐃᑦᔨᓯᒪᐅᑏᓄᓇ ᒥᑭᑦᔪᑯᓗᒃ ᐲᓚᐅᕐᓚᒍ,’ ᐅᕝᕙ ᓇᖕᒥᓂᖅ ᓇᐹᕐᑐᕕᓂᐊᓗᖕᒥᒃ ᐃᔨᖕᓃᑦᑐᖃᕐᑎᓪᓗᒍ? 5ᑕᒃᑯᕐᒨᕐᑐᑎᑦ! ᐃᔨᖕᓃᑦᑐᖅ ᓇᐹᕐᑐᕕᓂᐊᓗᒃ ᐲᖅᑳᓚᐅᕈᒃ, ᑕᕝᕙ ᑕᑯᑦᓯᐊᕈᓐᓇᕐᓯᓂᐊᕐᐳᑎᑦ ᐃᓅᖃᑎᕕᑦ ᐃᑦᔨᓯᒪᐅᑎᖓᓂᒃ ᐲᕐᓯᓇᓱᐊᓕᕈᕕᑦ ᒥᑭᔪᑯᓗᖕᒥᒃ.
6“ᐃᑦᔪᕐᓁᑦᑐᒥᒃ ᑐᓂᓯᓂᐊᕋᓯ ᕿᒻᒥᓄᑦ; ᓴᐸᖓᖁᑎᓯᓗ ᐊᑭᑐᔪᑦ ᐃᒋᓐᓂᐊᕐᓇᒋᑦ ᑰᒃᑰᓰᑦ ᓯᕗᓂᖓᓐᓄᑦ, ᑖᒃᑯᓇᓐᖓᑦ ᑐᓪᓕᕋᕐᑕᐅᑐᐃᓐᓇᕋᔭᕐᒪᑕ ᐃᓕᖕᓄᓪᓗ ᓵᓪᓗᑎᒃ ᐹᔭᐅᑐᐃᓐᓇᕆᐊᖃᕋᕕᑦ.”
ᑐᒃᓯᐊᕐᓂᖅ, ᕿᓂᕐᓂᖅ, ᑎᒡᓗᒃᑐᕐᓂᖅ
ᓘᑲᓯ 11:9-13
7“ᑐᒃᓯᐊᕆᑦᓯ, ᑐᓂᓯᕕᐅᒐᔭᕐᐳᓯ ᑕᕝᕙ; ᕿᓂᕆᑦᓯ, ᓇᓂᓯᒐᔭᕐᐳᓯ ᑕᕝᕙ; ᑎᒡᓗᒃᑐᕆᑦᓯ ᒪᑐᐃᕈᑦᔭᐅᒐᔭᕐᐳᓯ ᑕᕝᕙ. 8ᑐᒃᓯᐊᕐᑐᑦ ᑕᒪᕐᒥᒃ ᑐᓂᓯᕕᐅᒐᔭᕐᐳᑦ; ᕿᓂᕐᑐᓪᓗ ᓇᓂᓯᒐᔭᕐᐳᑦ; ᑎᒡᓗᒃᑐᕐᑐᓪᓗ ᒪᑐᐃᕈᑦᔭᐅᒐᔭᕐᐳᑦ. 9ᓇᓪᓕᐊᑦ ᐊᑖᑕᐅᔪᓯ ᐃᕐᓂᑦᓯᓐᓄᑦ ᑐᒃᓯᕋᕐᕕᐅᒍᑦᓯ ᓂᐊᖂᔭᒥᒃ, ᐅᔭᖅᑲᒥᒃ ᐂᑦᑐᕋᔭᕐᐱᓯᐅᒃ? 10ᐅᕝᕙᓗ ᕿᑐᕐᖓᓯ ᐃᖃᓗᖕᒥᒃ ᑐᒃᓯᕋᕐᑎᓪᓗᒍ, ᖁᒡᓗᒋᐊᒥᒃ ᐂᑦᑐᕋᔭᕐᐱᓯᐅᒃ? 11ᐱᐅᖏᑦᑑᒐᓗᐊᕐᑐᓯ, ᐱᐅᔪᓂᒃ ᑐᓂᓯᔭᕆᐊᒃᓴᖅ ᕿᑐᕐᖓᑦᓯᓐᓄᑦ ᖃᐅᔨᒪᒐᑦᓯ; ᐊᑖᑕᓯᓕ ᕿᓚᖕᒦᑦᑐᖅ ᐱᐅᔪᓂᒃ ᑐᓂᓯᔭᕆᐊᒃᓴᖅ ᖃᐅᔨᒪᑦᓯᐊᕐᓂᕐᓴᐅᕗᖅ ᑐᒃᓯᐊᕐᕕᒋᔨᒥᓄᑦ.
12 #
ᓘᑲᓯ 6:31. “ᑍᒤᒻᒪᑦ ᐃᓅᖃᑎᑦᓯᓐᓄᑦ ᐱᓇᓱᐊᕐᕕᐅᔪᒪᓂᑦᓯᑎᑐᑦ, ᑍᒫᓪᓗᐊᖅ ᐱᓇᓱᐊᕐᑐᒃᓴᐅᕗᓯ: ᑕᒪᓐᓇ ᑍᒤᓕᐅᕐᓂᖅ ᒨᓯᓯᐅᑉ ᐱᖁᔭᖏᑕ ᑐᑭᒋᖕᒪᒍ, ᓇᓚᐅᑦᑍᔪᓪᓗ ᐊᔪᕆᕐᑐᐃᑦᔪᑎᒋᓪᓗᓂᐅᒃ.”
ᐃᑎᕐᕕᒃ ᓂᕈᑭᑦᑐᖅ
ᓘᑲᓯ 13:24
13“ᐃᑎᕐᕕᑭᑦᑐᒃᑯᑦ ᐃᑎᕆᑦᓯ, ᐃᑎᕐᕕᒃ ᓂᕈᑐᖕᒪᑦ ᑲᑉᐱᐊᓇᕐᑐᕕᖕᒧᑦ ᑐᕌᖓᔪᖅ, ᐊᖅᑯᑎᖓ ᐱᔭᕐᓂᕐᑑᓪᓗᓂ, ᐊᒥᓱᑦ ᑕᒪᓐᓇ ᐊᑐᕐᐹᑦ. 14ᐃᑎᕐᕕᒃ ᓂᕈᑭᑦᑑᕗᖅ ᐃᓅᓯᕐᒧᑦ ᓄᖑᓱᐃᑦᑐᒧᑦ ᑐᕌᖓᔪᖅ, ᐊᖅᑯᑎᖓ ᐱᔭᕐᓂᖏᑦᑑᓪᓗᓂ, ᐅᓄᖏᑦᑐᑦ ᑕᒪᓐᓇ ᓇᓂᕚᑦ.”
ᓇᐹᕐᑐᑦ ᐱᕈᕐᑐᖏᓐᓄᑦ ᖃᐅᔨᒪᔭᐅᔪᓐᓇᕐᐳᑦ
ᓘᑲᓯ 6:43-44
15“ᖃᐅᔨᓴᑦᓯᐊᕆᑦᓯ ᓇᓚᐅᑦᑍᔫᔮᕐᑐᓂᒃ ᓱᓕᖏᑦᑐᓂᒃ; ᑍᒃᑯᐊ ᓯᓚᑎᒥᒃᑎᒍᑦ ᓰᐱᐅᖅᑰᔨᓇᓱᐊᕐᓗᑎᒃ ᐃᓕᑦᓯᓐᓄᐊᕐᓂᐊᕐᒪᑕ, ᐃᓗᒥᒃᑎᒍᓪᓕ ᐹᔪᒪᔪᑎᑐᑦ ᐊᒪᕈᕐᑎᑐᑦ ᑍᒤᑉᐳᑦ. 16ᐱᓂᐊᕐᓂᖏᑎᒍᓪᓕ ᖃᐅᔨᒪᔪᓐᓇᕐᓂᐊᕐᐸᓯ. ᐅᕐᐱᒊᑦ ᑲᑭᓐᓇᕐᑐᓖᑦ ᐸᐅᕐᖓᓂᒃ ᐱᕈᕐᕕᐅᓲᖑᓐᖏᓚᑦ, ᐅᕐᐱᒐᐅᔮᕐᑐᓪᓗ ᑲᑭᓪᓚᕐᓇᕐᑐᓖᑦ ᐊᕐᐱᐅᔮᕐᑐᓂᒃ ᐱᕈᕐᕕᐅᕙᖏᓐᓂᕗᑦ. 17ᓇᐹᕐᑐᖅ ᐆᒻᒪᑦᓯᐊᕐᑐᖅ ᐱᐅᔪᓂᒃ ᐱᕈᕐᕕᐅᕙᒃᐳᖅ, ᓇᐹᕐᑐᕐᓕ ᐱᐅᖏᑦᑐᖅ ᐱᐅᖏᑦᑐᓂᒃ ᐱᕈᕐᕕᐅᕙᒃᐳᖅ. 18ᓇᐹᕐᑐᖅ ᐆᒻᒪᑦᓯᐊᕐᑐᖅ ᐱᕈᕐᓂᕐᓗᒡᕕᐅᕙᓐᖏᓚᖅ, ᓇᐹᕐᑐᕐᓗ ᐱᐅᖏᑦᑐᖅ ᐱᐅᔪᓂᒃ ᐱᕈᕐᕕᐅᕙᖏᓐᓂᕗᖅ. 19#ᒫᑎᐅᓯ 3:10; ᓘᑲᓯ 3:9.ᓇᐹᕐᑐᖅ ᓇᓪᓕᐊᑦ ᐱᐅᔪᓂᒃ ᐱᕈᕐᕕᐅᖏᑦᑐᖅ, ᓇᑲᑕᐅᓗᓂ ᐃᒋᑕᐅᓂᐊᕐᐳᖅ ᐃᑯᒪᒧᑦ. 20#ᒫᑎᐅᓯ 12:33.ᑍᒫᒃᑕᐅᖅ, ᒎᑎᒧᑦ ᓇᓚᐅᑦᑍᔪᖁᑎᒋᔭᐅᔫᔮᕐᑐᑦ ᓱᓕᖏᑦᑐᑦ, ᐱᓂᐊᕐᓂᖏᑎᒍᑦ ᖃᐅᔨᒪᓂᐊᕐᐸᓯ.”
ᖃᐅᔨᒪᓚᐅᕐᓯᒪᓐᖏᓚᑦᓯ
ᓘᑲᓯ 13:25-27
21“ᐅᕙᓐᓂᒃ ᐊᑕᓂᖃᕐᓂᕋᕐᑐᓕᒫᑦ ᒎᑎᐅᑉ ᐊᑕᓂᐅᕕᖓᓄᑦ ᐃᑎᕐᓂᐊᓐᖏᓚᑦ, ᐊᑖᑕᒪᓕ ᕿᓚᖕᒦᑦᑑᑉ ᐱᓇᓱᐊᕐᑕᐅᖁᔭᖓᓂᒃ ᓈᓚᒃᑐᑦ ᑭᓯᒥ. 22ᐃᖅᑲᕐᑐᕐᑕᐅᕕᐅᑉ ᐅᓪᓗᖓᓂ, ᐊᒥᓱᑦ ᐅᕙᓐᓄᑦ ᐅᖃᕈᒫᕐᐳᑦ, ‘ᐊᑕᓃᖅ, ᐊᑕᓃᖅ! ᐊᑎᕐᓂ ᒎᑎᐅᑉ ᐅᖃᕐᑕᐅᖁᔭᖓᓂᒃ ᐅᖃᓪᓚᖃᑦᑕᓚᐅᕐᐳᒍᑦ, ᐊᑎᕐᓂᓗ ᐊᓂᕐᓂᕐᓗᐃᑦ ᐊᒥᓱᑦ ᐃᓄᖕᓂᑦ ᐊᓂᑎᖃᑦᑕᓚᐅᕐᐸᕗᑦ, ᐅᓄᕐᑐᓂᒡᓗ ᑲᒪᓇᕐᑐᓕᓂᕐᓂᒃ ᓴᖅᑭᑎᑦᓯᖃᑦᑕᓚᐅᕐᐳᒍᑦ!’ 23#ᐃᓐᖏᕈᑦ 6:8.ᑕᕝᕙ ᑭᐅᔪᒫᕐᐸᒃᑲ, ‘ᖃᐅᔨᒪᓚᐅᕐᓯᒪᓐᖏᓚᑦᓯ; ᑕᒫᓃᓐᖏᓚᐅᕆᑦᓯ! ᐊᔪᕐᑐᓕᔪᐊᓘᔪᓯ!’”
ᐃᒡᓗᓕᐅᕐᑏᒃ ᒪᕐᕉᒃ
ᓘᑲᓯ 6:47-49
24“ᑍᒤᒻᒪᑦ, ᓇᓪᓕᐊᑦ ᐅᖃᐅᓯᕆᔭᓐᓂᒃ ᑐᓴᕐᑐᖅ, ᐊᑐᕐᓗᒋᓪᓗ, ᑖᓐᓇ ᐊᑦᔨᐅᕗᖅ ᐊᖑᒻᒧᑦ ᓯᓚᑐᔪᒧᑦ ᕾᕐᑐᒥ ᐃᒡᓗᓕᐅᕐᑐᒧᑦ; 25ᑕᕝᕙ ᓯᓚᓗᒻᒪᕆᓕᕐᒪᑦ, ᑰᑦ ᖄᒥᓕᕐᓗᑎᒃ, ᐃᒡᓗ ᐊᓄᕌᕐᕕᐅᒻᒪᕆᓕᕐᓗᓂ, ᐅᕐᕈᓐᖏᓚᖅ, ᕾᕐᑐᒧᑦ ᑐᓐᖓᒐᒥ.
26“ᓇᓪᓕᐊᓪᓕ ᐅᖃᐅᓯᕆᔭᓐᓂᒃ ᑐᓴᕐᑐᖅ ᐊᑐᓕᕋᓂᓗ, ᑖᓐᓇ ᐊᑦᔨᐅᕗᖅ ᐊᖑᒻᒧᑦ ᓯᓔᑦᑐᒧᑦ ᓯᐅᕋᕐᒥ ᐃᒡᓗᓕᐅᕐᑐᒧᑦ. 27ᑕᕝᕙ ᓯᓚᓗᒻᒪᕆᓕᕐᒪ, ᑰᑦ ᖄᒥᓕᕐᓗᑎᒃ, ᐃᒡᓗ ᐊᓄᕌᕐᕕᐅᒻᒪᕆᓕᕐᓗᓂ, ᐅᕐᕈᕗᖅ; ᓯᖁᒥᒻᒪᕆᒡᓗᓂ!”
ᔩᓱᓯᐅᑉ ᐱᔪᓐᓇᕐᑎᑕᐅᓂᖓ ᑲᒪᓂᐊᕆᔭᐅᕗᖅ
28 #
ᒫᑯᓯ 1:22; ᓘᑲᓯ 4:32. ᔩᓱᓯᐅᑉ ᑕᒪᒃᑯᐊ ᐅᖃᐅᓰᑦ ᐅᖃᐅᓯᕆᔭᕇᕐᒪᒋᑦ, ᐃᓄᒋᐊᒃᑐᕐᔪᐊᑦ ᑲᒪᓂᐊᕐᐳᑦ ᐊᔪᕆᕐᑐᐃᓪᓗᓂ ᐱᐅᓯᕆᔭᖓᓂᒃ. 29ᐊᔪᕆᕐᓱᐃᖕᒪᑦ ᐱᔪᓐᓇᕐᓂᖃᕐᑐᑐᑦ ᐱᖁᔭᓂᒃ ᐃᓕᓮᔨᑎᑑᖏᑦᑐᖅ.
Currently Selected:
ᒫᑎᐅᓯᐅᑉ ᐊᒡᓚᖏᑦ 7: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
