ᔮᓱᐊᑉ ᐊᒡᓚᖏᑦ 8
8
ᐂᑉ ᓵᓚᐅᓂᖓ ᐊᓯᕈᕐᑕᐅᓂᖓᓗ
1ᐊᑕᓂᖅ ᐅᖃᕐᐳᖅ ᔮᓱᐊᒧᑦ, “ᐅᓇᑕᕐᑐᒃᓴᓕᒫᑦ ᐃᓚᒋᓗᒋᑦ ᐂᒨᓕᕆᑦᓯ; ᑲᑉᐱᐊᓱᒃᑍᓕᒋᑦᓯ ᓴᐱᕐᑍᓕᓗᓯᓗ, ᓵᓚᖃᕐᑎᓐᓂᐊᕐᐸᒋᑦ ᐂᑉ ᐊᖓᔪᖅᑳᕐᔪᐊᖓᓂᒃ, ᐃᓄᖁᑎᖏᓐᓂᒡᓗ, ᐃᒡᓗᒐᓴᖏᑦ ᓄᓇᖁᑎᖏᓪᓗ ᐱᓂᐊᕐᐸᓯ. 2ᐱᓂᐊᕐᓂᖃᕐᑐᒃᓴᐅᕗᓯ ᐂᑉ ᐊᖓᔪᖅᑳᕐᔪᐊᖓᓄᑦ ᑍᒫᑦᓮᓐᓇᖅ ᔨᕆᑰᑉ ᐊᖓᔪᖅᑳᕐᔪᐊᖓᓂᒃ ᐱᓂᐊᕐᕕᖃᓚᐅᕐᓂᑦᓯᑐᑦ; ᑭᓯᐊᓂᓕ ᑕᒪᑐᒪᓂ ᐱᖁᑎᖏᑦ ᐱᔪᓐᓇᕐᓂᐊᕐᐸᓯ ᐆᒪᔪᖁᑎᖏᓪᓗ ᓇᖕᒥᓂᕐᑖᕆᓗᒋᑦ; ᐅᓇᑕᕆᐊᓕᕐᓯᐅᒃ ᐃᒡᓗᒐᓮᑦ ᐅᐸᓗᐃᓗᒋᑦ ᑐᓄᐊᓂᑦ.”
3ᑕᕝᕙ ᔮᓱᐊ ᐊᑐᐃᓐᓇᐅᓕᕐᐳᖅ, ᐅᓇᑕᕐᑐᒃᓴᖁᑎᖏᓪᓗ ᐂᒧᑦ ᐅᓇᑕᕆᐊᕐᓂᐊᕐᓗᑎᒃ; ᓂᕈᐊᕐᐳᕐᓗ 30,000ᓂᒃ ᐱᔪᓐᓇᕐᓂᕐᐹᓂᒃ, ᑎᓕᕔᓪᓗ ᐅᓐᓄᐊᑯᑦ. 4ᐃᒫᒃ ᐅᖃᐅᑎᓪᓗᒋᑦ, “ᐃᔨᕐᓯᒪᓂᐊᕐᐳᓯ ᐃᒡᓗᒐᓮᑦ ᑐᓄᐊᓂ; ᐅᖓᓯᒋᔭᖓᓃᑦᑍᓕᒋᑦᓯ ᖃᓂᒋᔮᓂᓕ ᐊᑐᐃᓐᓇᐅᓂᐊᕐᐳᓯ ᐅᓇᑕᕐᓂᕐᒧᑦ. 5ᐅᕙᖓᓕ ᐃᓄᐃᓪᓗ ᐃᓚᒋᔭᒃᑲ, ᐃᒡᓗᒐᓮᑦ ᐅᐸᖕᓂᐊᕐᐸᕗᑦ, ᐂᒥᐅᑍᓪᓗ ᐅᐸᒃᐸᑎᒍᑦ, ᕿᒫᓂᐊᕐᐳᒍᑦ, ᑍᒫᑦᓮᓐᓇᖅ ᑍᒤᓚᐅᕋᑦᓯ ᓯᕗᓪᓕᕐᒥᒃ. 6ᒪᓕᖕᓂᐊᕐᐹᑎᒍᓪᓗ, ᐃᒡᓗᒐᓮᑦ ᐅᖓᓯᒋᔮᓄᐊᕐᑎᓐᓇᓱᖕᓂᐊᕐᐸᕗᑦ; ᐃᓱᒪᓂᐊᕐᒪᑕ ᕿᒫᔭᐅᓇᓱᒋᓗᑎᒃ, ᑍᒫᑦᓮᓐᓇᖅ ᑍᒤᓚᐅᕋᑦᑕ. 7ᑍᒪᓕ ᐃᔨᕐᓯᒪᕕᑦᓯᓐᓂᑦ ᐊᓂᓗᓯ ᐃᒡᓗᒐᓮᑦ ᐅᐸᖕᓂᐊᕐᐸᓯ ᓵᓚᒋᓗᒋᓪᓗ; ᐊᑕᓂᐅᑉ ᒎᑎᑦᓯ ᑐᓂᓂᐊᕐᐹ ᐃᓕᑦᓯᓐᓄᑦ. 8ᐃᒡᓗᒐᓮᑦ ᓵᓚᒋᒍᑦᓯᐅᒃ ᐃᑯᐊᓪᓚᒃᑎᓐᓂᐊᕐᐸᓯ ᐊᑕᓂᖅ ᑍᒫᒃ ᑎᓕᓯᓚᐅᕐᒪᑦ; ᑖᒃᑯᐊ ᑕᕝᕙ ᑎᓕᓯᑦᔪᑎᒋᔭᒃᑲ ᐃᓕᑦᓯᓐᓄᑦ.” 9ᑕᕝᕙ ᔮᓱᐊᑉ ᐊᐅᓪᓚᕐᑎᑉᐰᑦ; ᐃᔨᕐᕕᒃᓴᒥᖕᓄᓪᓗ ᐂᕗᑦ, ᐅᑕᖅᑭᓕᕐᓗᑎᒡᓗ ᑕᕝᕙᓂ, ᐂᑉ ᓯᕿᓂᖓᑕ ᓂᐱᕕᐊᑕ ᓇᓛᓃᑦᑐᒧᑦ, ᐂᓪᓗ ᐱᑎᓕᐅᓪᓗ ᐊᑯᓐᓂᖓᓃᑦᑐᒧᑦ, ᔮᓱᐊᓕ ᓯᓂᓚᐅᕐᐳᖅ ᑕᖕᒫᕐᓯᒪᕕᖕᒥᓂ.
10ᔮᓱᐊᓗ ᐅᓪᓛᒻᒪᕆᒃᑯᑦ ᒪᑭᑉᐳᖅ ᐅᓇᑕᕐᑐᒃᓴᖁᑎᖏᓪᓗ, ᐃᓴᕆᐊᓕᒥᐅᓪᓗ ᐊᖓᔪᖅᑳᖏᑦ ᐃᓚᒋᓪᓗᒋᑦ ᐂᒧᐊᕐᐳᑦ. 11ᐅᓇᑕᕐᑐᒃᓮᓪᓗ ᐃᓚᒋᓪᓗᒋᑦ ᐃᒡᓗᒐᓮᑦ ᐃᑎᕐᑕᕐᕕᖓᑕ ᖃᓂᒋᔮᓄᐊᕋᒥᒃ ᑕᖕᒫᕐᐳᑦ ᐃᒡᓗᒐᓮᑦ ᐅᓐᓄᐊᖓᑕ ᓇᓛᓄᑦ, ᑖᒃᑯᐊᓗ ᐂᓪᓗ ᐊᑯᓐᓂᖓᓂ ᓇᑎᕐᓇᕐᑕᖃᓚᐅᕐᐳᖅ. 12ᐊᖑᑎᓪᓗ 5,000ᓮᑦ ᐃᓚᒋᓪᓗᒋᑦ ᐃᔨᕆᐊᕐᑐᕐᐳᑦ, ᐃᒡᓗᒐᓮᑦ ᓯᕿᓂᐅᑉ ᓂᐱᕕᐊᑕ ᓇᓛᓄᑦ, ᐂᓪᓗ ᐱᑎᓕᐅᓪᓗ ᐊᑯᓐᓂᖓᓄᑦ. 13ᑕᕝᕙ ᐅᓇᑕᕐᑐᒃᓮᑦ ᐋᖅᑭᒃᓱᕐᐳᑦ ᐅᓇᑕᕐᓂᕐᒧᑦ, ᐃᓚᖏᓪᓗ ᑕᖕᒫᕐᓗᑎᒃ ᐃᒡᓗᒐᓮᑦ ᐅᓐᓄᐊᖓᑕ ᓇᓛᓄᑦ, ᐊᓯᓕᒫᖏᑦ ᐃᒡᓗᒐᓮᑦ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᒧᑦ ᐂᕗᑦ, ᔮᓱᐊᓕ ᐅᓐᓄᒥ ᑕᕝᕙᓂ ᓯᓂᒃᑕᕐᐳᖅ ᓇᕐᓴᒥ. 14ᐂᑉ ᐊᖓᔪᖅᑳᕐᔪᐊᖓ ᔮᓱᐊᑉ ᐃᓄᖁᑎᖏᓐᓂᒃ ᑕᑯᒐᒥ ᐅᐃᒻᒪᒃᓗᓂ ᐱᒋᐊᓚᐅᕐᐳᖅ, ᐊᖑᑎᓕᒫᑦ ᐃᓚᒋᓪᓗᒋᑦ ᐊᓂᕗᑦ ᔪᐊᕐᑕᓂᐅᑉ ᓇᑎᕐᓇᖓᑕ ᓇᓛᓄᑦ ᐅᓇᑕᕆᐊᕐᓗᑎᒃ ᐃᓴᕆᐊᓕᒥᐅᓂᒃ ᑕᕝᕗᖓᑦᓮᓐᓇᖅ ᐅᓇᑕᕐᕕᒋᓚᐅᕐᑕᒥᖕᓄᑦ; ᖃᐅᔨᒪᓚᐅᓐᖏᓚᕐᓕ ᐃᒡᓗᒐᓴᖏᑕ ᑐᓄᐊᓂᑦ ᐱᒋᐊᕐᑕᐅᓕᒑᓂᕐᒥᖕᓂᒃ. 15ᔮᓱᐊᓗ ᐃᓴᕆᐊᓕᒥᐅᓕᒫᓪᓗ ᑲᑉᐱᐊᓱᓐᖑᐊᓚᐅᕐᐳᑦ, ᕿᒫᓪᓗᑎᒡᓗ ᐃᓄᖃᔪᐃᑦᑐᒧᑦ. 16ᐊᖑᑎᓕᒫᑦ ᐃᒡᓗᒐᓴᖕᒥᐅᑦ ᑎᓕᔭᐅᓚᐅᕐᐳᑦ ᒪᓕᒃᓴᖁᔭᐅᓪᓗᑎᒃ ᔮᓱᐊᒃᑯᓐᓂᒃ, ᒪᓕᒃᑎᓪᓗᒋᑦ ᕿᒤᕙᓪᓕᐊᑎᑕᐅᓚᐅᕐᐳᑦ ᐃᒡᓗᒐᓴᖕᓂᒃ. 17ᐊᖑᑎᓕᒫᑦ ᐂᒦᑦᑐᑦ ᐱᑎᓕᒦᑦᑐᓪᓗ ᒪᓕᓚᐅᕐᐳᑦ ᐃᓴᕆᐊᓕᒥᐅᓂᒃ; ᐃᒡᓗᒐᓴᒥᓂᒃ ᕿᒤᓪᓗᑎᒃ ᐅᒃᑯᐃᓐᖔᕐᑐᒥᒃ ᓴᐳᑦᔨᔨᒃᓴᖃᖏᑦᑐᓂᒃ, ᐃᓴᕆᐊᓕᒥᐅᓂᒃ ᒪᓕᒡᓗᑎᒃ.
18ᐊᑕᓂᕐᓕ ᐅᖃᕐᐳᖅ ᔮᓱᐊᒧᑦ, “ᖃᓗᒋᐊᑦ ᑎᒃᑯᐊᕐᑎᓚᐅᕈᒃ ᐂᒧᑦ; ᐃᓕᖕᓄᑦ ᑐᓂᓂᐊᓕᕋᒃᑯ.” ᑕᕝᕙ ᔮᓱᐊ ᓈᓚᒃᐳᖅ ᐅᖃᐅᑦᔭᐅᑦᔪᑎᒥᓂᒃ ᖃᓗᒋᐊᓂᓗ ᑎᒃᑯᐊᕐᑎᑉᐹ ᐃᒡᓗᒐᓴᖕᓄᑦ. 19ᐊᒡᒐᓂ ᐃᓴᑐᐊᕐᒪᒋᑦ, ᐊᖑᑏᑦ ᐃᔨᕐᓯᒪᔪᑦ ᐃᓂᒥᖕᓂᑦ ᑐᐊᕕᕐᓗᑎᒃ ᒪᑭᑉᐳᑦ, ᐅᓪᓚᒃᓗᑎᒡᓗ ᐃᒡᓗᒐᓴᖕᓄᑦ ᐃᑎᕐᐳᑦ ᓵᓚᒋᓪᓗᒍᓗ, ᑐᐊᕕᕐᓗᑎᒡᓗ ᐃᒡᓗᒐᓮᑦ ᐃᑯᐊᓪᓚᒃᑎᑉᐰᑦ. 20ᐊᖑᑏᓪᓕ ᐂᒥᐅᑦ ᐅᑎᒧᑦ ᑕᑯᓴᕋᒥᒃ, ᑕᑯᕗᑦ ᐃᓯᕐᓗᖕᒥᒃ ᓯᓚᒥ ᐃᒡᓗᒐᓴᖕᓂᑦ ᐱᔪᒥᒃ; ᕿᒫᕖᒍᑎᓪᓗᑎᒡᓗ ᓇᒧᑐᐃᓐᓇᖅ, ᐃᓴᕆᐊᓕᒥᐅᓪᓗ ᕿᒫᓚᐅᕐᑐᑦ ᐃᓄᖃᔪᐃᑦᑐᒧᑦ ᐅᑎᒧᑦ ᓵᓪᓗᑎᒃ ᒪᓕᒃᑐᓂᒃ ᐅᓇᑕᕆᐊᓕᕐᐳᑦ. 21ᔮᓱᐊᓕ ᐃᓄᖁᑎᖏᓪᓗ ᑕᑯᒐᒥᒃ ᐃᒡᓗᒐᓮᑦ ᓵᓚᐅᓂᖓᓂᒃ ᐃᑯᐊᓪᓚᒃᑕᐅᓂᖓᓂᒡᓗ, ᐅᑎᒧᑦ ᓵᓪᓗᑎᒃ ᑐᖁᕅᓕᕐᐳᑦ ᐂᒥᐅᓂᒃ. 22ᐃᓴᕆᐊᓕᒥᐅᓪᓗ ᐃᓚᖏᑦ ᐃᒡᓗᒐᓴᖕᓂᑦ ᐊᓂᓪᓗᑎᒃ ᐅᓇᑕᕆᐊᓕᕐᐳᑦ; ᐂᒥᐅᓪᓕ ᖃᐅᔨᓕᕐᐳᑦ ᐊᕙᓗᔭᐅᓯᒪᓂᕐᒥᖕᓂᒃ ᐃᓴᕆᐊᓕᒥᐅᓄᑦ; ᕿᒪᒃᓯᔪᖃᓚᐅᓐᖏᓚᖅ ᐊᓐᓇᒃᑐᖃᕋᓂᓗ ᑕᕝᕙᓐᖓᑦ. 23ᐂᓪᓕ ᐊᖓᔪᖅᑳᕐᔪᐊᖓ ᑐᖁᑕᐅᓇᓂ ᑎᒍᔭᐅᕗᖅ, ᔮᓱᐊᒨᕈᑎᔭᐅᓪᓗᓂᓗ.
24ᐃᓴᕆᐊᓕᒥᐅᓪᓕ ᑐᖁᕅᔭᕇᕋᒥᒃ ᐊᑭᕋᒥᖕᓂᒃ ᐃᓄᖃᔪᐃᑦᑐᒧᑦ ᒪᓕᓚᐅᕐᑐᓂᒃ, ᐂᒧᑦ ᐅᑎᕐᓗᑎᒃ ᑍᑲᓃᑦᑐᓕᒫᑦ ᑐᖁᕋᕐᐰᑦ. 25ᐂᒥᐅᓕᒫᑦ ᐅᓪᓗᒥ ᑍᑦᓱᒪᓂ, ᐊᖑᑏᑦ ᐊᕐᓁᓪᓗ 12,000ᓮᑦ ᑐᖁᑕᐅᓚᐅᕐᐳᑦ. 26ᔮᓱᐊᑉ ᖃᓗᒋᐊᓂ ᑎᒃᑯᐊᖎᓐᓇᓚᐅᕐᐹ ᐂᒧᑦ, ᐃᓄᓕᒫᖏᑦ ᑐᖁᑕᐅᔪᐃᓐᓇᐅᓚᐅᖄᕐᑎᓐᓇᒋᑦ. 27ᐃᓴᕆᐊᓕᒥᐅᑦ ᐃᒡᓗᒐᓴᖕᓃᑦᑐᓂᒃ ᐆᒪᔪᓂᒃ ᐱᖁᑎᓂᒡᓗ ᐱᓚᐅᕐᐳᑦ, ᐊᑕᓂᐅᑉ ᑍᒫᒃ ᔮᓱᐊ ᐅᖃᐅᑎᓚᐅᕐᒪᒍ. 28ᔮᓱᐊᑉ ᐃᑯᐊᓪᓚᓚᐅᕐᐹ ᐂ, ᕿᒪᓚᐅᕐᐹᓗ ᐊᓯᕈᒻᒪᕆᒡᓗᒍ, ᐅᓪᓗᒥᒧᑦ ᓱᓕ ᑍᒤᓕᖓᕗᖅ ᐃᓄᖃᕋᓂ. 29ᐂᑉ ᐊᖓᔪᖅᑳᕐᔪᐊᖓ ᕿᒥᓚᐅᕐᐹ ᓇᐹᕐᑐᒥ; ᑕᕝᕙᓃᑎᓚᐅᕐᐹᓗ ᐅᓐᓄᒃ ᑎᑭᓪᓗᒍ, ᓯᕿᓂᖅ ᓂᐱᓕᕐᑎᓪᓗᒍ ᔮᓱᐊ ᑎᓕᓯᕗᖅ ᑎᒥᖓ ᐲᕐᑕᐅᖁᓪᓗᒍ, ᐃᓕᔭᐅᕗᕐᓗ ᐃᒡᓗᒐᓮᑦ ᐃᑎᕐᑕᕐᕕᖓᑕ ᓯᕗᕌᓄᑦ, ᐱᕉᕐᓗᒍᓗ ᐅᔭᖅᑲᓄᑦ ᐳᕐᑐᓯᒻᒪᕆᒃᓗᒍ, ᐅᓪᓗᒥ ᓱᓕ ᑍᒤᓕᖓᕗᖅ.
ᐱᖁᔧᑦ ᐅᖃᓕᒫᕐᑕᐅᓂᖏᑦ ᖃᖅᑲᒥ ᐄᐸᓪᒥ
30 #
ᒨᓯᓯ ᑕᓪᓕᒪᖏᑦ 27:2-8. ᔮᓱᐊᓗ ᖃᖅᑲᒥ ᐄᐸᐅᓪᒥ ᑐᓂᕐᕈᓯᕐᕕᓕᐅᕐᐳᖅ ᐊᑕᓂᕐᒧᑦ, ᐃᓴᕆᐊᓕᒥᐅᑉ ᒎᑎᖓᓄᑦ. 31#ᒨᓯᓯ ᐂᑉᐸᖏᑦ 20:25.ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᓴᓇᖁᔨᓚᐅᕐᓂᖓᓂᒃ ᑲᔪᓯᑎᑦᓯᓪᓗᓂ ᑎᓕᓯᑦᔪᑎᒋᓚᐅᕐᑕᖏᓐᓂᒃ ᐃᓴᕆᐊᓕᒥᐅᓄᑦ, ᑍᒫᒃ ᒨᓯᓯᐅᑉ ᐱᖁᔭᖏᓐᓂ ᑎᑎᕋᕐᓯᒪᖕᒪᑦ: “ᑐᓂᕐᕈᓯᕐᕕᒃ ᓇᑲᑎᕐᑕᐅᓯᒪᖏᑦᑐᓂᒃ ᐅᔭᕋᖃᕆᐊᖃᕐᐳᖅ, ᓴᕕᕋᔭᖕᓄᑦ ᓴᓇᕐᕈᑎᓄᑦ ᐊᒃᑐᕐᑕᐅᓯᒪᖏᓪᓗᑎᒃ.” ᖄᖓᓂ ᑐᓂᕐᕈᓯᓚᐅᕐᐳᖅ ᐃᑯᐊᓚᑎᑦᓯᓪᓗᑎᒃ ᐊᑕᓂᕐᒧᑦ, ᑐᓂᕐᕈᓯᕐᓗᑎᒡᓗ ᓮᒻᒪᕐᑎᑕᐅᓂᕐᒧᑦ ᑐᓂᕐᕈᑎᒥᒃ. 32ᑕᕝᕙᓂᓗ ᐃᓴᕆᐊᓕᒥᐅᑦ ᑕᑯᓐᓇᕐᑎᓪᓗᒋᑦ, ᔮᓱᐊᑉ ᑎᑎᕋᓚᐅᕐᐳᖅ ᐅᔭᕋᒃᑎᒍᑦ ᒨᓯᓯᐅᑉ ᐱᖁᔭᖏᑦ ᐊᑦᔨᓕᐅᕐᓗᒋᑦ, ᑖᑦᓱᒪ ᑎᑎᕋᕐᓯᒪᔭᖏᑦ. 33#ᒨᓯᓯ ᑕᓪᓕᒪᖏᑦ 11:29; 27:11-14.ᐃᓴᕆᐊᓕᒥᐅᓕᒫᑦ, ᐊᖓᔪᖅᑳᖏᓪᓗ ᐅᓇᑕᕐᑐᒃᓮᓪᓗ ᐊᖓᔪᖅᑳᖏᑦ, ᐃᓱᒪᓕᐅᕆᔩᓪᓗ ᓄᓇᓕᑐᖃᐅᖏᑦᑐᓪᓗ ᐃᓚᒋᔭᖏᑦ ᓇᖏᓚᐅᕐᐳᑦ ᐊᑭᓕᕇᒃᓗᑎᒃ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᑕ ᓴᓂᐊᓂ, ᓵᓐᖓᓪᓗᑎᒃ ᓕᕔᑎᓄᑦ ᑐᓂᕐᕈᓯᕐᑎᑦᓯᔨᓄᑦ ᐊᒡᔭᕐᓯᔪᓄᑦ ᑖᑦᓱᒥᖓ, ᐃᓄᐃᑦ ᐊᕝᕙᖏᑦ ᓇᖏᕐᐳᑦ ᖃᖅᑲᐅᑉ ᒋᕆᔨᐅᑉ ᓵᖓᓂ, ᐊᕝᕙᖏᓪᓗ ᖃᖅᑲᐅᑉ ᐄᐸᐅᑉ ᓵᖓᓃᓪᓗᑎᒃ, ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᑍᒫᒃ ᐱᖁᓚᐅᕐᒪᒋᑦ ᓯᕗᓪᓕᕐᐹᒥᒃ, ᐃᓴᕆᐊᓕᒥᐅᓕᒫᑦ ᓮᒻᒪᕐᑕᐅᕕᒃᓴᖓᑦ ᓇᓪᓕᐅᑎᒃᐸᑦ. 34ᑭᖑᓂᖓᒍᑦ ᔮᓱᐊᑉ ᓂᐱᖃᕐᓗᓂ ᐱᖁᔭᓕᒫᑦ ᐅᖃᓕᒫᓕᕐᐰᑦ, ᓮᒻᒪᕐᑎᑕᐅᓇᕐᑐᑦ ᓱᒋᐊᕐᑕᐅᓇᕐᑐᓪᓗ, ᑍᒫᒃ ᐱᖁᔧᑦ ᑎᑎᕋᕐᓯᒪᔪᑦ ᒪᓕᒡᓗᒋᑦ. 35ᒨᓯᓯᐅᑉ ᐱᖁᔭᓕᒫᖏᑦ ᔮᓱᐊᑉ ᐅᖃᓕᒫᓚᐅᕐᐰᑦ ᑲᑎᒪᔪᓄᑦ ᐃᓴᕆᐊᓕᒥᐅᓄᑦ, ᐊᕐᓁᑦ ᕿᑐᕐᖓᖏᓪᓗ ᓄᓇᓕᑐᖃᐅᖏᑦᑐᓪᓗ ᐃᓅᖃᑎᖏᑦ ᐱᖃᑕᐅᔪᐃᓐᓇᐅᑎᓪᓗᒋᑦ.
Currently Selected:
ᔮᓱᐊᑉ ᐊᒡᓚᖏᑦ 8: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
