ᔮᓱᐊᑉ ᐊᒡᓚᖏᑦ 4
4
ᐅᔭᕅᑦ ᐃᖅᑲᐅᒪᑦᔪᑏᑦ ᐋᖅᑭᒃᑕᐅᓂᖏᑦ
1ᐃᓅᖃᑎᒌᒡᔪᐊᓕᒫᑦ ᐃᑳᕇᕐᒪᑕ ᔪᐊᕐᑕᓂᐅᑉ ᑰᖓᓂᒃ, ᐊᑕᓂᖅ ᐅᖃᕐᐳᖅ ᔮᓱᐊᒧᑦ, 2“ᓂᕈᐊᓕᕆᑦ ᐊᖑᑎᓂᒃ 12ᓂᒃ ᑭᖑᕚᕇᓕᒫᓂᑦ ᐊᑐᓂᑦ ᐱᓯᒪᔪᓂᒃ, 3ᐱᖁᒃᑭᑦ ᑎᒍᓯᖁᓗᒋᑦ ᐅᔭᕋᖕᓂᒃ 12ᓂᒃ ᐊᑕᐅᓯᕐᒥᒃ ᐊᑐᓂᑦ ᔪᐊᕐᑕᓂᐅᑉ ᑰᖓᓂᑦ ᐱᔪᓂᒃ, ᑐᓂᕐᕈᓯᕐᑎᑦᓯᔩᑦ ᑰᖕᒥᑦ ᓇᖏᕐᕕᒋᔭᖓᓐᓂᑦ, ᑖᒃᑯᐊᓗ ᐅᔭᕅᑦ ᓇᒃᓴᕐᑕᐅᖁᓪᓗᒋᑦ ᐃᓕᔭᐅᓗᑎᒡᓗ ᐅᓐᓄᒃ ᑕᖕᒫᕐᓯᒪᕕᒋᓂᐊᕐᑕᖏᓐᓄᑦ.”
4ᑕᕝᕙ ᔮᓱᐊ ᕾᖁᔨᓚᐅᕐᐳᖅ ᐊᖑᑎᓂᒃ 12ᓂᒃ ᓂᕈᐊᕐᑕᒥᓂᒃ ᑭᖑᕚᕇᓂᑦ ᐊᑐᓂᑦ ᐱᓯᒪᔪᓂᒃ; 5ᔮᓱᐊᓪᓗ ᐅᖃᐅᑎᕔᑦ, “ᔪᐊᕐᑕᓂᐅᑉ ᑰᖓᑕ ᕿᑎᐊᓄᐊᕆᑦᓯ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᑕ ᓯᕗᓂᖓᓄᐊᕐᓗᓯ ᐊᑕᓂᐅᑉ ᒎᑎᓯ ᐱᖓᑕ, ᐊᑐᓂᓪᓗ ᐅᔭᕋᖕᓂᒃ ᑎᒍᓯᓕᕆᑦᓯ ᐃᕐᓱᒡᓗᓯ ᐊᑕᐅᓯᕐᒥᒃ ᐃᓴᕆᐊᓕᒥᐅᑦ ᑭᖑᕚᖏᑕ ᐅᓄᕐᓂᖏᑦ ᒪᓕᒡᓗᒋᑦ. 6ᑖᒃᑯᐊ ᐅᔭᕅᑦ ᓇᓗᓁᒃᑯᑕᐅᔪᒫᕐᒪᑕ ᐃᓄᖕᓄᑦ ᐊᑕᓂᐅᑉ ᐱᓂᐊᕐᓂᕆᓚᐅᕐᑕᖓᓂᒃ, ᕿᑐᕐᖓᑦᓯᓐᓄᑦ ᐊᐱᕆᔭᐅᒍᑦᓯ ᖃᓄᖅ ᑖᒃᑯᐊ ᐅᔭᕅᑦ ᑐᑭᖃᕐᒪᖔᑕ, 7ᑭᐅᔪᒫᕋᑦᓯᐅᒃ ᔪᐊᕐᑕᓂᐅᑉ ᑰᖓ ᑰᒍᓐᓃᓚᐅᕐᓯᒪᓂᖓᓂᒃ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓ ᐃᑳᕈᑦᔭᐅᓕᕐᑎᓪᓗᒍ ᑰᖕᒥᒃ ᔪᐊᕐᑕᓂᒥᒃ, ᔪᐊᕐᑕᓂᐅᑉ ᑰᖓ ᓄᖅᑲᖓᑎᑕᐅᓚᐅᕐᒪᑦ. ᑖᒃᑯᐊ ᐅᔭᕅᑦ ᐃᓴᕆᐊᓕᒥᐅᓄᑦ ᖃᓄᖅ ᐱᔪᖃᓚᐅᕐᓯᒪᖕᒪᖔᑦ ᐃᖅᑲᐅᒪᑦᔪᑎᒃᓴᐅᓂᐊᕐᐳᑦ ᐃᓱᖃᖏᑦᑐᒧᑦ.”
8ᐊᖑᑏᑦ ᐱᓇᓱᐊᓚᐅᕐᐳᑦ ᔮᓱᐊᑉ ᑎᓕᓯᑦᔪᑎᖓᓂᒃ, ᐅᕋᔭᖕᓂᒃ ᑎᒍᓯᓚᐅᕐᐳᑦ 12ᓂᒃ ᔪᐊᕐᑕᓂᐅᑉ ᑰᖓᓂᑦ, ᐃᓴᕆᐊᓕᒥᐅᑦ ᑭᖑᕚᖏᑕ ᐊᕕᒃᑐᕐᓯᒪᓂᖏᑦ ᐊᑐᓂᑦ ᒪᓕᒡᓗᒋᑦ, ᑍᒫᒃ ᐊᑕᓂᐅᑉ ᑎᓕᓚᐅᕐᒪᒍ ᔮᓱᐊ; ᐅᔭᕅᓪᓗ ᐊᒡᔭᕐᑕᐅᓚᐅᕐᐳᑦ ᑕᖕᒫᕐᓯᒪᕕᖕᒥᖕᓄᐊᕈᑦᔭᐅᓪᓗᑎᒃ. 9ᔮᓱᐊᓗᑕᐅᖅ ᐃᓕᓯᓚᐅᕆᕗᖅ ᐅᔭᕋᖕᓂᒃ 12ᓂᒃ ᔪᐊᕐᑕᓂᐅᑉ ᑰᖓᑕ ᕿᑎᐊᓄᑦ, ᑐᓂᕐᕈᓯᕐᑎᑦᓯᔩᑦ ᐊᖏᖃᑎᒌᖕᓂᐅᑉ ᐃᒃᓯᕐᕕᖓᓂᒃ ᐊᒡᔭᕐᓯᔪᑦ ᓇᖏᕐᕕᒋᓚᐅᕐᑕᖏᓐᓄᑦ; ᑖᒃᑯᐊᓗ ᐅᓪᓗᒥ ᓱᓕ ᐅᔭᕅᑦ ᑍᑲᓃᑉᐳᑦ. 10ᑐᓂᕐᕈᓯᕐᑎᑦᓯᔩᑦ ᓇᖏᓚᐅᕐᐳᑦ ᔪᐊᕐᑕᓂᒥ ᑰᑉ ᕿᑎᐊᓂ ᐱᔭᕇᓚᐅᖅᑳᕐᑎᓐᓇᒋᑦ ᐊᑕᓂᐅᑉ ᑎᓕᑦᔪᑎᒋᓚᐅᕐᑕᖓᓂᒃ ᔮᓱᐊᒧᑦ, ᑕᒪᓐᓇ ᒨᓯᓯᐅᑉ ᑎᓕᓯᑦᔪᑎᒋᓚᐅᕐᒪᒍ ᔮᓱᐊᒧᑦ.
ᐃᓄᐃᑦ ᑐᐊᕕᓚᐅᕐᐳᑦ ᑰᖕᒥᒃ ᐃᑳᕐᓗᑎᑦ. 11ᐊᑭᐊᓃᑦᑐᐃᓐᓇᐅᓕᕐᒪᑕᓗ, ᑐᓂᕐᕈᓯᕐᑎᑦᓯᔩᑦ ᐊᒡᔭᕐᓯᔪᑦ ᐊᑕᓂᐅᑉ ᐊᖏᕈᑎᖓᑕ ᐃᒃᓯᕐᕕᖁᑎᖓᓂᒃ ᐃᑳᓕᓚᐅᕐᐳᑦ ᐃᓄᐃᑦ ᑕᑯᓐᓇᕐᑎᓪᓗᒋᑦ. 12ᕉᐱᓂᐅᑉ ᑭᖑᕚᖏᑦ, ᒑᓪᓗ ᑭᖑᕚᖏᑦ ᒫᓇᓯᐅᓪᓗ ᑭᖑᕚᖏᑦᑕ ᐊᕝᕙᖏᑦ ᑖᒃᑯᐊ ᐅᓇᑕᐅᑎᓖᑦ ᐃᑳᖅᑳᓚᐅᕐᐳᑦ ᐊᑐᐃᓐᓇᐅᓪᓗᑎᒃ ᐅᓇᑕᕐᓂᕐᒧᑦ, ᒨᓯᓯᐅᑉ ᑍᒫᒃ ᐅᖃᐅᑎᓚᐅᕐᓯᒪᖕᒪᒋᑦ. 13ᐊᑕᓂᐅᑉ ᓵᖓᓂ ᐊᖑᑏᑦ 40,000ᓮᑦ ᐅᓇᑕᕐᓂᕐᒧᑦ ᐊᑐᐃᓐᓇᐅᓚᐅᕐᐳᑦ ᐃᑳᕐᓗᑎᒡᓗ ᓇᑎᕐᓇᒧᑦ ᔨᕆᑰᑉ ᖃᓂᒋᔮᓄᑦ. 14ᐅᓪᓗᒥ ᑍᑦᓱᒪᓂ ᐊᑕᓂᐅᑉ ᐅᐱᓐᓇᕐᓯᑎᓚᐅᕐᐹ ᔮᓱᐊ ᐃᓴᕆᐊᓕᒥᐅᑦ ᑕᑯᓐᓇᕐᑎᓪᓗᒋᑦ; ᐃᒃᐱᒋᔭᐅᑦᓯᐊᓚᐅᕐᐳᕐᓗ ᐃᓅᓯᖓᑕ ᐃᓱᐊ ᑎᑭᓪᓗᒍ, ᑍᒫᑦᓮᓐᓇᖅ ᒨᓯᓯᒥᒃ ᐃᒃᐱᒍᓱᑦᓯᐊᓚᐅᕐᓂᕐᒥᑐᑦ.
15ᐊᑕᓂᐅᓪᓗ ᐅᖃᐅᑎᕚ ᔮᓱᐊ ᐅᖃᕐᓗᓂ, 16“ᑐᓂᕐᕈᓯᕐᑎᑦᓯᔩᑦ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᓂᒃ ᐊᒃᔭᕐᓯᔪᑦ ᔪᐊᕐᑕᓂᒥᑦ ᒪᔪᖁᓕᒃᑭᑦ.” 17ᑍᒤᒻᒪᑦ ᔮᓱᐊᑉ ᑐᓂᕐᕈᓯᕐᑎᑦᓯᔩᑦ ᐅᖃᐅᑎᕔᑦ ᐅᖃᕐᓗᓂ, “ᔪᐊᕐᑕᓂᐅᑉ ᑰᖓᓂᑦ ᒪᔪᓕᕆᑦᓯ.” 18ᑐᓂᕐᕈᓯᕐᑎᑦᓯᔩᓪᓗ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᓂᒃ ᐊᒡᔭᕐᓯᔪᑦ ᔪᐊᕐᑕᓂᒥᑦ ᑰᖕᒥᑦ ᒪᔪᕐᒪᑕ, ᐃᑎᒐᖏᑦ ᑰᑉ ᑭᒡᓕᖓᓄᑦ ᐸᓂᕐᑐᒧᑦ ᑐᑎᑐᐊᕐᒪᑕ, ᔪᐊᕐᑕᓂᐅᑉ ᑰᖓ ᐅᑎᓚᐅᕐᐳᖅ ᑰᓕᕐᓗᓂᓗ ᑰᖕᓂᕆᓚᐅᕐᑕᒥᑐᑦ.
19ᐃᓄᐃᑦ ᐃᑳᓚᐅᕐᐳᑦ ᑰᖕᒥᒃ ᔪᐊᕐᑕᓂᒥᒃ ᑕᖅᑭᐅᑉ ᓯᕗᓪᓕᕐᐹᖓᑕ ᐅᓪᓗᖓᑕ 10ᖓᓂ, ᑕᖕᒫᕐᓗᑎᒡᓗ ᒋᐅᓪᒐᐅᓪᒧᑦ ᔨᕆᑰᑉ ᓄᓇᖓᑕ ᑭᒡᓕᖓᓄᑦ ᓯᕿᓂᖓᑕ ᓄᐃᕕᐊᑕ ᓇᓛᓃᑦᑐᒧᑦ. 20ᑕᕝᕙᓂᓗ ᔮᓱᐊᑉ ᐅᔭᕅᑦ 12 ᔪᐊᕐᑕᓂᒥᑦ ᐱᔭᐅᔪᕕᓃᑦ, ᐋᖅᑭᒃᓱᓚᐅᕐᐰᑦ ᒋᐅᓪᒐᐅᓪᒥ. 21ᐅᖃᐅᑎᓪᓗᒋᓪᓗ ᐃᓴᕆᐊᓕᒥᐅᑦ, “ᕿᑐᕐᖓᑦᓯᓐᓂᑦ ᐊᐱᕆᔭᐅᒍᑦᓯ ᓯᕗᓂᑦᑎᓐᓂ, ᖃᓄᖅ ᑖᒃᑯᐊ ᐅᔭᕅᑦ ᑐᑭᖃᕐᒪᖔᑕ, 22ᐅᖃᐅᑎᔪᒫᕐᐸᓯ, ‘ᐃᓴᕆᐊᓕᒥᐅᑦ ᐃᑳᓚᐅᕐᓯᒪᖕᒪᑕ ᔪᐊᕐᑕᓂᐅᑉ ᑰᖓᒍᑦ ᓄᓇᒃᑯᑦ ᓴᓗᐊᒪᔪᒃᑯᑦ.’ 23ᐊᑕᓂᐅᑉ ᒎᑎᑦᓯ ᔪᐊᕐᑕᓂᐅᑉ ᐃᒪᖓ ᓴᓗᐊᕐᑎᓚᐅᕐᒪᒍ ᐃᑳᕇᓚᐅᖅᑳᕐᑎᓐᓇᓯ ᔪᐊᕐᑕᓂᐅᑉ ᑰᖓᓂᒃ, ᑍᒫᑦᓮᓐᓇᖅ ᐊᑕᓂᐅᑉ ᒎᑎᑦᓯ ᐃᒪᖅ ᐊᐅᐸᓗᒃᑕᖅ ᓴᓗᐊᕐᑎᓚᐅᕐᒪᒍ ᐃᑳᕐᑐᐃᓐᓇᐅᓛᐅᖅᑳᕐᑎᓐᓇᑕ. 24ᐃᓄᓕᒫᑦ ᓄᓇᕐᔪᐊᕐᒥᐅᑦ ᖃᐅᔨᖁᓪᓗᒋᑦ ᐊᑕᓂᐅᑉ ᐱᔪᓐᓇᕐᓂᕐᔪᐊᖓᓂᒃ; ᐃᓕᑦᓯᓗ ᐃᓕᕋᓱᐃᓐᓇᕐᓂᐊᕋᑦᓯ ᐊᑕᓂᕐᒥᒃ ᒎᑎᑦᓯᓐᓂᒃ ᐃᓱᖃᖏᑦᑐᒧᑦ.”
Currently Selected:
ᔮᓱᐊᑉ ᐊᒡᓚᖏᑦ 4: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
