ᔫᐱᐅᑉ ᐊᒡᓚᖏᑦ 40
40
1ᐊᑕᓂᕐᓗ ᐅᖃᒃᑲᓐᓂᕐᐳᖅ ᔫᐱᒧᑦ ᐅᖃᕐᓗᓂ:
2“ᐊᔪᒐᖃᖏᑦᑐᒥᒃ ᓈᒻᒪᖏᑦᔪᑎᒃᓴᕐᓯᐅᕐᓗᑎᑦ ᐊᑭᒪᔪᒪᕖᑦ?
ᒎᑎᒥᒃ ᐂᕙᖃᑎᖃᕈᒪᔫᑉ, ᑕᒪᓐᓇ ᑭᐅᓕᕐᓕᐅᒃ.”
ᔫᐱ
3ᑕᕝᕙ ᔫᐱᐅᑉ ᐊᑕᓂᖅ ᑭᐅᕚ:
4“ᑕᑯᒋᑦ, ᓯᓔᑦᑐᐊᓘᓪᓗᖓ ᐅᖃᓪᓚᓚᐅᕐᐳᖓ;
ᖃᓄᖅ ᑭᐅᔪᒃᓴᐅᕗᖓ?
ᖃᓂᕋ ᐊᒡᒐᓐᓄᑦ ᒪᑐᕙᕋ ᐅᖃᒃᑲᓐᓂᖁᓇᖓ.
5ᐅᖃᓪᓚᒌᓚᐅᕋᒪ, ᑭᐅᓂᐊᕈᓐᓁᕐᐳᖓ;
ᐂᑉᐸᖓᓂᒡᓗ, ᐅᖃᓪᓚᓗᐊᕐᓯᒪᓕᕇᕐᐳᖓ.”
ᐊᑕᓂᐅᑉ ᔫᐱᒧᑦ ᐅᖃᓪᓚᖕᓂᖓᑕ ᐂᑉᐸᖓ
6ᑕᕝᕙ ᐊᑕᓂᐅᑉ ᔫᐱ ᑭᐅᕚ
ᐊᓄᕆᕐᔪᐊᕐᒦᓪᓗᓂ, ᐅᖃᕐᐳᖅ:
ᐊᑕᓂᖅ
7“ᒫᓐᓇ ᐅᐸᓗᖎᔭᓕᕆᑦ ᐊᖑᑎᓪᓚᕆᒃᑎᑐᑦ;
ᐊᐱᕐᓱᕈᒪᒐᒃᑭᑦ, ᑭᐅᖃᑦᑕᕐᑎᓪᓗᑎᑦ.
8ᓈᒻᒪᓈᕐᓯᒪᖏᓐᓂᕋ ᓇᓗᓁᕈᓐᓇᕐᐱᐅᒃ?
ᑕᒻᒪᕐᓯᒪᓂᕋᕈᓐᓇᕐᐱᖔ ᐃᓕᖕᓂᒃ ᑕᒻᒪᕐᓯᒪᖏᓐᓂᕋᕐᓗᑎᑦ?
9ᒎᑎᑐᑦ ᓲᖑᓂᖃᕐᑎᒋᕖᑦ?
ᓂᐱᖅᑯᕐᑐᔪᓐᓇᕐᐲᑦ ᑖᑦᓱᑐᓇᖅ ᑲᓪᓕᕐᕙᓗᒃᑐᑎᑐᑦ?
10ᓇᓗᓁᔭᓕᕆᑦ ᐊᔪᖏᑦᑐᕐᔪᐊᖑᓂᕐᓂᒃ ᖃᓄᐃᑦᑑᓂᕐᓂᒡᓗ;
ᐅᐱᓐᓇᕐᓯᑎᓪᓗᑎᑦ ᓂᕐᑐᕐᓇᕐᓯᑎᓪᓗᑎᓪᓗ;
11ᑕᑯᓚᐅᒃᑭᑦ ᒪᑯᐊ ᐱᐅᔪᕆᓃᑦ,
ᓂᓐᖓᒡᕕᒋᓚᐅᒃᑭᑦ ᓂᑲᒋᖏᓪᓗᒋᑦ, ᒥᑭᒡᓕᑎᓕᖁᓪᓗᒋᑦ.
12ᑕᑯᓚᐅᒃᑭᑦ ᐱᐅᔪᕆᔪᓕᒫᑦ, ᐅᕐᕈᑎᓪᓗᒋᓪᓗ;
ᐱᐅᖏᑦᑐᓕᔪᓪᓗ ᑐᓐᖓᕕᖏᑦ ᑐᓪᓕᕋᕐᓗᒋᑦ.
13ᓄᓇᒧᑦ ᐃᔨᓚᐅᒃᑭᑦ ᐊᑕᖏᕐᓗᒋᑦ ᐊᑕᐅᑦᓯᒃᑯᑦ;
ᑕᓕᑎᓪᓗᒋᑦ ᑮᓇᖏᑦ ᓄᓇᐅᑉ ᐊᑖᓄᑦ.
14ᑕᕝᕙ ᐅᕙᖓᑦᑕᐅᖅ ᓇᓗᓁᕐᓂᐊᕐᐸᒋᑦ ᐅᐱᓐᓇᕐᓯᑎᓪᓗᑎᑦ,
ᐱᔪᓐᓇᕐᓂᕐᓄᑦ ᓇᖕᒥᓂᖅ ᓵᓚᖃᕈᓐᓇᕐᓯᓂᕐᓂᒃ.
15ᑕᑯᒍᒃ ᓂᕐᔪᑎᐊᓗᒃ ᐱᕼᐃᒧᓯᒥᒃ ᐊᑎᓕᒃ,
ᑖᓐᓇᑦᑕᐅᖅ ᓴᓇᓚᐅᕐᐸᕋ ᐃᓕᒃᑐᑦ ᓴᓇᓚᐅᕋᒃᑭᑦ;
ᐃᕕᒃᓱᒐᕐᓂᒃ ᓂᕆᕙᒃᐳᖅ ᐃᒻᒧᒃᓯᐅᒊᑦ ᐊᖑᓴᓪᓗᖏᑎᑐᑦ.
16ᑕᑯᒋᑦ, ᑖᑦᓱᒪ ᓴᓐᖏᓐᓂᖓ ᖁᒃᑐᕋᖏᓐᓃᑉᐳᖅ,
ᐱᔪᓐᓇᕐᓂᖓᓗ ᓈᖓᑕ ᓄᑭᖏᓐᓃᑉᐳᖅ.
17ᐸᒥᐅᖓ ᓯᑎᕗᖅ ᓇᐹᕐᑐᑎᑐᑦ ᓰᑕᕆᑐᑦ ᓯᑕᒃᑕᑎᑐᑦ;
ᖁᒃᑐᕋᖏᒃᑕ ᓄᑭᖏᑦ ᓴᓐᖏᕗᑦ ᕿᓚᒃᓱᕐᓯᒪᔪᑎᑐᑦ.
18ᓴᐅᓂᖏᑦ ᑲᓐᓄᔭᑎᑐᑦ ᓯᑎᑎᒋᕗᑦ,
ᓂᐅᖏᓪᓗ ᓴᕕᕋᔭᒃᑎᑐᑦ ᑍᒤᓪᓗᑎᒃ.
19ᑕᒪᒃᑯᐊ ᒎᑎᐅᑉ ᓴᓇᔭᖏᓐᓄᑦ ᓯᕗᓪᓕᕐᐸᐅᓯᒪᕗᑦ;
ᑖᑦᓱᒪᑐᐊᕐᓗ ᓴᓇᓚᐅᕐᑑᑉ ᓵᓚᒋᔪᓐᓇᕐᓗᓂᒋᑦ.
20ᖃᖅᑬᑦ ᐱᕈᕐᑎᑦᓯᕗᑦ ᑖᒃᑯᐊ ᓂᕿᒃᓴᖏᓐᓂᒃ
ᑕᕝᕙᓂ ᐆᒪᔪᓕᒫᑦ ᓄᔪᐊᕐᑐᑦ ᐱᓐᖑᐊᖃᑎᒌᒃᐸᒃᐳᑦ.
21ᐃᓂᓪᓚᖓᕙᒃᐳᖅ ᐅᕐᐱᐅᔮᕐᑐᑦ ᓇᐹᕐᑐᑦ ᑕᕐᕋᓕᓂᖏᓐᓂ,
ᐃᕕᐅᔧᓪᓗ ᑕᑭᔫᑎᑦ ᐅᕐᔪᐃᓪᓗ ᐊᑖᓂ ᐃᔨᕐᓯᒪᕙᒃᓗᑎᒃ.
22ᐅᕐᐱᐅᔮᕐᑐᓄᑦ ᓇᐹᕐᑐᓄᑦ ᐅᓕᒃᑕᐅᓯᒪᕙᒃᐳᑦ;
ᐅᕐᐱᖕᓄᓪᓗ ᑰᖕᒥᐅᑕᓄᑦ ᑕᑭᔫᑎᓄᑦ ᐊᕙᓗᔭᐅᓯᒪᕙᒃᓗᑎᒃ.
23ᑕᑯᒋᑦ, ᑰᒑᓗᒃ ᑰᓪᓚᕆᓕᕋᓗᐊᕐᐸᑦ ᑲᑉᐱᐊᓱᓕᕐᐸᓐᖏᓚᑦ;
ᔪᐊᕐᑕᓂᐅᓪᓗ ᑰᖓ ᑰᓕᕋᓗᐊᕐᐸᑦ ᑮᓇᖓᓄᑦ ᐅᐃᒪᔭᓕᕈᑎᒋᕙᓐᖏᓛ.
24ᑭᐊ ᐱᔭᕆᔪᓐᓇᕐᐸᐅᒃ ᓂᒃᓯᖃᕐᑎᓪᓗᓂᐅᒃ?
ᕿᖓᖓᒍᓪᓗ ᐳᑐᔭᐅᔪᓐᓇᕐᐹ ᓂᒐᕐᑎᑕᐅᓗᓂ?”
Currently Selected:
ᔫᐱᐅᑉ ᐊᒡᓚᖏᑦ 40: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
