ᔫᐱᐅᑉ ᐊᒡᓚᖏᑦ 38
38
ᐊᑕᓂᐅᑉ ᑭᐅᓂᖓ ᔫᐱᒥᒃ
ᐊᑕᓂᖅ
1ᑕᕝᕙ ᐅᓚᔪᔭᕐᒥᑦ ᐊᑕᓂᖅ ᐅᖃᕐᐳᖅ ᔫᐱᒧᑦ, ᐅᖃᕐᓗᓂᓗ:
2“ᖃᓄᐃᑦᑑᕙ ᑖᓐᓇ ᐃᓕᓯᒪᓂᐅᖏᑦᑐᒥᒃ ᐅᖃᐅᓯᓕᒃ?
3ᐊᖑᑎᓪᓚᕆᒃᑎᑐᑦ ᑕᑦᓯᕈᓯᓕᕆᑦ,
ᐊᐱᕐᓱᕐᓂᐊᕋᒃᑭᑦ, ᐅᕙᓐᓄᑦ ᑭᐅᖃᑦᑕᕐᑎᓪᓗᑎᑦ.
4ᓇᓃᓚᐅᕐᐲᑦ ᓄᓇᕐᔪᐊᕐᒥᒃ ᑐᓐᖓᕕᓕᐅᓕᕐᑎᓪᓗᖓ?
ᐅᖃᐅᑎᓚᐅᓐᖓ, ᑕᒪᑐᒥᖓ ᖃᐅᔨᒪᒍᕕᑦ.
5ᑭᓇ ᓄᓇᕐᔪᐊᑉ ᐊᖏᓂᒃᓴᖓᓂᒃ ᖃᐅᔨᒪᓚᐅᕐᐸ?
ᑭᓇᓗ ᐆᒃᑑᒻᒥᒃ ᐃᓯᕕᑦᓯᓚᐅᕐᐹ ᐆᒃᑐᕋᕐᓗᓂᐅᒃ?
ᑕᒪᓐᓇ ᑭᐅᔪᓐᓇᕐᐱᐅᒃ?
6ᓱᓇᒧᓪᓕ ᓄᓇᕐᔪᐊᑉ ᑐᓐᖓᕕᖏᑦ ᓇᐸᑎᑕᐅᕙᑦ?
ᑭᐊ ᓄᓇᕐᔪᐊᑉ ᑐᓐᖓᕕᖓᑕ ᑎᕆᖅᑯᐊ ᐋᖅᑭᓚᐅᕐᐸᐅᒃ?
7ᑍᑦᓱᒪᓂ ᐅᓪᓘᑉ ᖃᐅᓕᕐᓂᖓᓂ ᐅᓪᓗᕆᐊᑦ ᐃᓐᖏᖃᑎᒌᓚᐅᕐᒪᑕ,
ᒎᑎᐅᓪᓗ ᕿᑐᕐᖓᓕᒫᖏᑦ ᖁᕕᐊᓱᖕᓂᕐᒧᑦ ᕾᒐᓛᓚᐅᕐᐳᑦ.
8 #
ᔨᕆᒤᐊ 5:22. ᑭᐊᓗ ᐃᒪᕐᕕᐅᑉ ᐅᒃᑯᐊᕐᔪᐊᖓ ᒪᑐᓯᒪᕙᐅᒃ?
ᓄᓇᕐᔪᐊᑉ ᐃᒡᓕᐊᖓᓂᑦ ᐊᓂᓂᐅᓴᑎᓪᓗᒍ?
9ᐃᒪᕐᔪᐊᖅ ᓄᕗᔭᓂᒃ ᐊᓐᓄᕌᕐᑎᓚᐅᕐᐸᕋ,
ᐃᒻᒧᓯᕐᓗᒍᓗ ᓄᕗᑦᑕᕆᒃᑐᒥᒃ ᑖᕐᑐᕐᔪᐊᕐᒥᒃ.
10ᐃᒪᕐᔪᐊᓪᓗ ᐊᕕᒃᓯᒪᑦᔪᑎᒃᓴᖏᑦ ᓇᓗᓁᓚᐅᕐᐸᒃᑲ,
ᓴᓐᓂᕈᐊᓕᐅᓚᐅᕐᐸᕋᓗ ᐅᒃᑯᐊᓕᐅᕐᓗᒍᓗ.
11ᐅᖃᐅᑎᓪᓗᒍᓗ, ‘ᑎᑭᑦᓴᕆᐊᖃᕐᑕᕕᑦ ᐅᖓᑖᓅᕆᐊᖃᓐᖏᓚᑎᑦ,
ᐃᖏᐅᓕᒡᔪᐊᑎᓪᓗ ᑕᒪᐅᖓ ᓄᖅᑲᕆᐊᖃᕐᐳᑦ.’
12ᑍᒪᓐᖓᑦ ᐃᓅᓕᕋᕕᑦ ᐅᓪᓛᒃᑯᑦ ᖃᐅᓕᖁᓪᓗᒍ ᑎᓕᓯᓚᐅᕐᓯᒪᕖᑦ,
ᖃᐅᕙᓪᓕᐊᓂᖓ ᐱᒋᐊᕐᕕᒃᓴᒥᓂᒃ ᖃᐅᔨᒪᔪᓐᓇᖁᓪᓗᒍ?
13ᖃᐅᕙᓪᓕᐊᓕᕐᐸᑦ ᓄᓇᕐᔪᐊᖅ ᐃᓱᐊᒍᑦ ᑎᒍᔭᐅᖁᓪᓗᒍ,
ᐱᐅᖏᑦᑐᓕᔪᓪᓗ ᓈᕕᑕᐅᓗᑎᒃ ᑲᑕᒐᕐᑎᑕᐅᖁᓪᓗᒋᑦ?
14ᑕᕝᕙ ᐊᓯᑦᔨᕐᑕᐅᒐᔭᕐᐳᖅ ᒪᕐᕋᑎᑐᑦ ᐆᑕᐅᓪᓗᑎᒃ ᑕᕐᓴᕐᑖᕐᑐᑎᑐᑦ,
ᐊᓐᓄᕌᑎᑐᓪᓗ ᑕᕐᓯᕐᑐᕐᓯᒪᔪᑎᑐᑦ ᐃᑦᓴᒃᑎᑕᐅᓗᑎᒃ.
15ᐅᓪᓘᑉ ᖃᐅᒪᓂᖓ ᖃᐅᒪᓗᐊᕐᒪᑦ ᐱᐅᖏᑦᑐᓕᔪᓄᑦ,
ᖁᒻᒧᓪᓗ ᑕᓕᕐᒥᖕᓂᒃ ᐃᓴᐅᑦᔨᔪᑦ ᑕᓕᖏᑦ ᓯᖁᒥᑕᐅᓪᓗᑎᒃ.
16ᐃᒪᕐᕕᐅᑉ ᐃᓗᐊᓂ ᓄᓇᒥᑦ ᑯᕕᔪᓄᐊᓚᐅᕐᓯᒪᕖᑦ?
ᐅᕝᕙᓗ ᐃᒪᕕᐅᑉ ᐃᑎᓂᖓᑕ ᐃᖅᑲᖓᒍᑦ ᐱᓱᓚᐅᕐᓯᒪᕖᑦ?
17ᑐᖂᑉ ᐃᑎᕐᑕᕐᕕᖓᓂᒃ ᑕᑯᑎᑕᐅᓚᐅᕐᓯᒪᕖᑦ?
ᐅᕝᕙᓗ ᑖᕐᑐᕐᔪᐊᑉ ᐃᑎᕐᑕᕐᕕᖓᓂᒃ ᑕᑯᓚᐅᕐᓯᒪᕕᑦ?
18ᖃᐅᔨᒪᒐᓚᒃᐱᐅᒃ ᓄᓇᕐᔪᐊᖅ ᖃᓄᖅ ᐊᖏᓂᖃᕐᒪᖔᑦ?
ᐊᑏ ᐅᖃᐅᑎᓚᐅᓐᖓ, ᑕᒪᑐᒥᖓ ᖃᐅᔨᒪᑐᐊᕈᕕᑦ.
19ᖃᐅᒪᔫᑉ ᐃᓂᖓᑕ ᐊᖅᑯᑎᖓ ᖃᐅᔨᒪᕕᐅᒃ?
ᑖᕐᔪᐊᓪᓗ ᐃᓂᖓ ᓇᓃᑉᐹ?
20ᑖᒃᑯᐊ ᐃᓂᒋᔭᖓᓄᐊᕈᑦᔨᔪᓐᓇᕐᐲᑦ?
ᐊᖏᕐᕋᖏᓐᓄᐊᖓᔪᒥᒃ ᐊᖅᑯᒻᒥᒃ ᖃᐅᔨᖁᓪᓗᑎᑦ?
21ᖃᐅᔨᒪᔪᑎᑦ, ᑍᑦᓱᒪᓂ ᐃᓅᓯᒪᓕᓚᐅᕋᕕᑦ,
ᐅᓪᓗᑎᓪᓗ ᐅᓄᕐᑐᐊᓘᓕᕐᒪᑕ!
22ᖃᓐᓂᒃᓮᑦ ᐊᐳᑎᑦ ᐃᓂᖏᓐᓄᑦ ᐃᑎᓚᐅᕐᓯᒪᕖᑦ,
ᐅᕝᕙᓗ ᓇᑕᖅᑯᕐᓁᑦ ᐃᓂᖏᓐᓂᒃ ᑕᑯᓚᐅᕐᓯᒪᕕᑦ?
23ᑕᕝᕙᓃᑎᑉᐸᒃᑲ ᐊᑲᐅᖏᑦᑐᕐᑕᖃᓕᕐᑐᒧᑦ ᖁᒥᐅᑎᒋᓪᓗᒋᑦ,
ᐅᓇᑕᕐᓂᐅᑉ ᐅᓇᑕᕐᓂᕐᔪᐊᓪᓗ ᐅᓪᓗᖓᓄᑦ.
24ᖃᐅᒪᔫᑉ ᐱᒋᐊᕐᓂᖓᑕ ᐊᖅᑯᑎᖓᓄᐊᕆᐊᒥᒃ ᖃᐅᔨᒪᕖᑦ?
ᐅᕝᕙᓗ ᐊᓄᕆᐅᑉ ᐱᒋᐊᕐᕕᖓᓂᒃ ᓯᕿᓂᐅᑉ ᓄᐃᕕᐊᓂᓐᖔᕐᑐᒥᒃ?
25ᑭᓇ ᐃᑎᕐᓴᓕᐅᓚᐅᕐᐸ ᓯᓚᓘᑉ ᑯᕕᕕᒃᓴᖓᓂᒃ?
ᑭᐊᓗ ᖃᐅᒻᒪᓪᓚᒃ ᓯᓚᕐᓂᕐᓗᒡᓗ ᐊᖅᑯᓯᕐᐸᐅᒃ?
26ᓯᓚᓗᒃᑎᑦᓯᓪᓗᓂ ᓄᓇᒧᑦ ᐃᓄᖃᖏᑦᑐᒧᑦ,
ᓯᐅᕅᓐᓇᕐᒧᑦ ᐃᓄᖃᖏᑦᑐᒧᑦ;
27ᐃᒥᕐᑎᑦᓯᔪᒪᓪᓗᓂ ᓄᓇᒥᒃ ᐸᓂᕐᑐᒥᒃ ᐃᒥᕈᒃᑐᒥᒡᓗ,
ᑕᒪᓐᓇ ᓄᓇ ᐃᕕᒡᓱᒐᕐᓂᒃ ᐱᕈᕐᕕᐅᓕᖁᓪᓗᒍ.
28ᓯᓚᓗᒃ ᐊᑖᑕᖃᕐᐹ?
ᐅᕝᕙᓗ ᖃᑯᐊᕐᑎᓐᓂᖅ ᑭᓇᒧᑦ ᐃᕐᓂᐊᕆᔭᐅᓯᒪᕙ?
29ᑭᓇᒧᑦ ᓯᑯ ᐃᕐᓂᐊᕆᔭᐅᓯᒪᕚ?
ᑭᓇᒧᓪᓗ ᓄᓇᐅᑉ ᖃᑯᐊᕐᑎᖓᓂᖓ ᐃᕐᓂᐊᕆᔭᐅᕙ?
30ᐃᒥᖅ ᐅᔭᕋᒃᑎᑐᑦ ᓯᑎᑎᒋᓕᖃᑦᑕᕐᐳᖅ,
ᐃᒪᕐᔪᐊᓪᓗ ᖄᖓ ᖁᐊᖃᑦᑕᕐᓗᓂ.
31 #
ᔫᐱ 9:9; ᐂᒨᓯ 5:8. ᓴᑭᐊᑦᑎᐊᑦ ᐅᐃᒍᓕᕇᖑᓂᖏᑦ ᕿᓚᒃᓱᕈᓐᓇᕐᐱᒌᑦ?
ᐅᓪᓗᕆᐊᓪᓗ ᐅᓪᓚᐅᑦᑐᑦ ᐊᒃᑐᐊᓂᖏᑦ ᐊᕕᑎᑦᓱᓐᓇᕐᐱᒌᑦ?
32ᐅᓪᓗᕆᐊᑦ ᓴᖅᑭᑎᑦᓱᓐᓇᕐᐱᒌᑦ ᓇᓪᓕᐅᓐᓂᖏᑦ ᓇᓪᓕᐅᑎᔭᕌᖓᑕ,
ᑐᒃᑐᕐᔪᐃᓪᓗ ᐃᓚᖏᓪᓗ ᐅᓪᓗᕆᐊᑦ ᐊᐅᓚᑦᓱᓐᓇᕐᐱᒌᑦ?
33ᕿᓚᐅᑉ ᐋᖅᑭᒃᓯᒪᓂᕆᔭᕆᐊᖃᕐᑕᖏᓐᓂᒃ ᖃᐅᔨᒪᕖᑦ?
ᓄᓇᕐᔪᐊᒥᓗ ᑕᒪᒃᑯᐊ ᒪᓕᒃᑕᐅᔪᓐᓇᕐᓯᑎᑦᓱᓐᓇᕐᐱᒌᑦ?
34ᓄᕗᔭᓄᑦ ᕾᒐᓛᕐᓗᑎᑦ ᑎᓕᓯᔪᓐᓇᕐᐲᑦ?
ᓯᓚᓗᖕᒧᑦ ᖃᐅᓯᓕᕐᑎᑕᐅᔪᒪᓗᑎᑦ?
35ᖃᐅᒻᒪᓪᓚᖕᓂᒃ ᑎᓕᓯᔪᓐᓇᕐᐲᑦ ᓇᒧᑦ ᑲᓪᓕᖁᔨᓗᑎᑦ,
ᑖᒃᑯᓇᓐᖓᓪᓗ ᐅᖃᐅᑦᔭᐅᓗᑎᑦ, ‘ᐊᑐᐃᓐᓇᐅᕗᖓ’?
36ᑭᓇ ᓯᓚᑐᓂᕐᒥᒃ ᓄᕗᔭᓄᑦ ᐱᑎᑦᓯᕙ?
ᐅᕝᕙᓗ ᑭᓇ ᑐᑭᓯᓂᕐᒥᒃ ᐆᒻᒪᑎᒧᐊᕐᓯᕙ?
37ᑭᓇ ᓯᓚᑐᓂᕐᒥᓄᑦ ᓄᕗᔭᓂᒃ ᓈᓮᔪᓐᓇᕐᐹ?
ᐅᕝᕙᓗ ᑭᓇ ᐃᒥᒃᑯᕕᖕᒥᒃ ᕿᓚᖕᒦᑦᑐᒥᒃ ᑯᕕᑎᑦᓯᔪᓐᓇᕐᐸ?
38ᓄᓇ ᓯᓚᓗᖕᒧᑦ ᖃᐅᓯᕐᑎᑕᐅᔭᕌᖓᒥ ᓯᑎᒃᑎᑎᑕᐅᕙᒃᐹ
ᓯᑎᒃᑎᓐᓂᑯᐃᓪᓗ ᐃᒻᒥᖕᓄᑦ ᑲᑎᓐᓇᒥᒃ ᓂᐱᖃᑦᑕᐅᑎᕙᒃᐸᑦ?
39ᓛᔭᑦ ᓂᕿᒃᓴᖏᓐᓂᒃ ᐆᒪᔪᕐᓯᐅᕈᓐᓇᕐᐲᑦ?
ᓛᔭᓪᓗ ᕿᑐᕐᖓᖏᑦ ᑳᒃᑐᑦ ᐊᕿᐊᑦᑐᕐᑎᑦᓱᓐᓇᕐᐱᒌᑦ?
40ᓯᑎᒥᖕᓂ ᐃᔨᕐᓯᒪᓗᑎᒃ ᐊᖁᐱᑎᓪᓗᒋᑦ,
ᐅᕝᕙᓗ ᓯᑎᒥᖕᓂ ᓇᓪᓚᖓᓗᑎᒃ ᐅᑕᖅᑭᑎᓪᓗᒋᑦ?
41ᑭᓇ ᑐᓗᒊᑦ ᓂᕿᒃᓴᖏᓐᓂᒃ ᑐᓂᓯᕙᒃᐸ?
ᓂᕿᒃᓴᕐᓯᐅᕐᓗᑎᒃ ᓇᒧᑐᐃᓐᓇᖅ ᖃᖓᑕᖃᑦᑕᓕᕌᖓᑕ,
ᐱᐊᕋᖏᑦ ᑳᓕᕌᖓᒥᒃ ᐅᕙᓐᓄᑦ ᓂᓪᓕᐊᓕᕌᖓᑕ?”
Currently Selected:
ᔫᐱᐅᑉ ᐊᒡᓚᖏᑦ 38: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
