ᔫᐱᐅᑉ ᐊᒡᓚᖏᑦ 26
26
ᔫᐱ
1ᔫᐱᓕ ᑭᐅᕗᖅ:
2“ᖃᓄᖅ ᐃᑲᔪᕐᓯᒪᕕᐅᒃ ᐱᔪᓐᓇᕐᓂᖃᖏᑦᑐᖅ!
ᖃᓄᕐᓗ ᓴᐳᑎᓯᒪᕕᐅᒃ ᓲᖑᓂᖃᖏᑦᑐᖅ!
3ᖃᓄᖅ ᐅᖃᖃᑎᒋᓪᓗᒍ ᐃᑲᔪᕐᓯᓯᒪᕕᐅᒃ ᓯᓚᑐᓂᖃᖏᑦᑐᖅ,
ᖃᓄᕐᓗ ᖃᐅᔨᒪᑦᓯᐊᕐᓂᕐᓂᒃ ᐊᔪᕆᕐᑑᑎᓯᒪᓪᓗᒍ!
4ᐅᖃᐅᓯᕆᔭᑎᑦ ᑭᓇᒧᑦ ᐃᑲᔫᑎᒃᓴᐅᓇᓱᒋᕕᒌᑦ?
ᑭᓇᒧᓪᓗ ᑕᒪᒃᑯᓂᖓ ᐅᖃᓪᓚᖁᔭᐅᓯᒪᕕᑦ?”
ᐱᐅᓪᑖᑦ
5“ᑐᖁᖓᔪᑦ ᐊᓂᕐᓂᖏᑦ ᐊᖏᔪᒥᒃ ᓴᔪᒃᐳᑦ,
ᐃᒪᐅᑉ ᐊᑖᓃᑦᑐᑦ ᐃᒪᕐᒥᐅᑕᓕᒫᓪᓗ.
6ᑐᖁᖓᔪᑦ ᐃᓂᖓᑦ ᐊᓐᓄᕌᖃᓐᖏᓚᖅ ᒎᑎᐅᑉ ᓵᖓᓂ,
ᐊᓯᕈᕐᑕᐅᓂᕐᓗ ᐅᓕᒃᓯᒪᓇᓂ ᑖᑦᓱᒪᓂ.
7ᑖᑦᓱᒪ ᐅᓐᓄᐊᓪᓗᐊᖅ ᐃᓯᕕᑉᐹ ᓱᓇᖃᖏᑦᑐᒥ,
ᓄᓇᕐᔪᐊᕐᓗ ᓂᕕᓐᖓᕐᑎᑉᐹ ᐱᑕᖃᖏᑦᑐᒧᑦ.
8ᑖᑦᓱᒪ ᓄᕗᑦᓴᕆᒃᑐᑦ ᐃᒥᕐᒥᒃ ᐃᒻᒥᕐᐰᑦ,
ᐃᒪᖃᕈᓐᓇᕐᑎᑉᐰᓪᓗ ᖄᖁᓇᒋᑦ ᐃᒥᐅᑉ ᐅᖁᒤᓐᓂᖓᓄᑦ.
9ᑕᖅᑭᖅ ᐃᓗᐃᑦᑑᓕᕐᑎᓪᓗᒍ ᑕᓕᑎᖃᑦᑕᕐᐹ,
ᓄᕗᔭᖁᑎᓂ ᐃᓯᕕᓪᓗᒋᑦ ᑕᖅᑭᐅᑉ ᒥᒃᓯᑦᑎᒍᑦ.
10ᐃᒪᐅᑉ ᖁᓛᓂ ᑭᒡᓕᓕᐅᕆᓯᒪᕗᖅ,
ᐊᕕᒃᓯᒪᐅᑎᐅᖁᓪᓗᒍ ᖃᐅᒪᔪᒧᑦ ᑖᕐᑐᒧᓪᓗ.
11ᕿᓚᐅᑉ ᓱᑲᖏᑦ ᓴᔪᒃᐱᓗᒃᐳᑦ,
ᖁᐊᕐᓵᕐᓗᑎᒡᓗ ᑖᑦᓱᒪ ᓱᐊᖕᓂᖓᓄᑦ.
12ᐱᔪᓐᓇᕐᓂᕐᒥᓄᑦ ᐃᒪᕐᕕᒃ ᓂᒫᓪᓚᒃᑎᑉᐹ;
ᖃᐅᔨᒪᓂᕐᒥᓄᓪᓗ ᒪᓕᒡᔪᐊᖅ ᕆᕼᐋᑉ ᓄᖅᑲᕐᑎᑉᐹ.
13ᐊᓄᕆᖓᓄᑦ ᕿᓚᒃ ᓴᓗᒻᒪᕐᑎᑕᐅᕗᖅ;
ᐊᒡᒐᖏᑕ ᖁᒡᓗᒋᐊᖅ ᕿᒫᓇᓱᒃᑐᖅ ᑲᐱᓪᓗᒍ ᑐᖁᑉᐹ.
14ᑕᒪᒃᑯᐊᓕ ᐊᖅᑯᑎᖏᑕ ᐃᓱᐊᐱᑐᐃᓐᓇᖓᓐᓂᒃ ᓇᓗᓁᕐᓯᕗᑦ;
ᓂᐱᑭᓪᓗᓂᓗ ᐅᖃᕐᓂᖓᓂᒃ ᑐᓴᒐᓛᒃᓯᒪᕗᒍᑦ!
ᑭᐊᓕ ᐱᔪᓐᓇᕐᑐᕐᔪᐊᖑᓗᓂ ᑲᓪᓗᖕᓂᖓ ᑐᑭᓯᔪᓐᓇᕐᐸᐅᒃ?”
Currently Selected:
ᔫᐱᐅᑉ ᐊᒡᓚᖏᑦ 26: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
