ᔫᐱᐅᑉ ᐊᒡᓚᖏᑦ 24
24
1“ᓱᖕᒪᑦ ᐊᔪᒐᖃᖏᑦᑐᖅ ᐃᖅᑲᕐᑐᐃᕕᒃᓴᒥᒃ ᐋᖅᑭᒃᓯᓯᒪᓐᖏᓚᖅ,
ᑖᑦᓱᒥᖓᓗ ᖃᐅᔨᒪᔪᑦ ᓱᖕᒪᑦ ᐅᓪᓗᖏᓐᓂᒃ ᑕᑯᓚᐅᕐᓯᒪᓐᖏᓚᑦ?
2ᐃᓄᐃᑦ ᓄᓇᖁᑎᖏᑕ ᓇᓗᓁᒃᑯᑕᖏᓐᓂᒃ ᐃᓚᖏᑦ ᓅᑦᓯᓯᒪᕗᑦ;
ᓰᐱᖁᑕᐅᔪᓂᒡᓗ ᑎᒡᓕᒃᓗᑎᒃ ᓰᐱᖁᑎᒥᖕᓄᑦ ᐃᓚᓕᐅᑦᔨᕙᒃᓗᑎᒃ.
3ᐃᓕᐊᕐᔪᐃᑦ ᓯᐅᑎᖅᑯᕐᑐᔪᖁᑎᖏᓐᓂᒃ ᑎᒍᓯᑐᐃᓐᓇᕐᐸᒃᐳᑦ;
ᐅᐃᒡᒐᕐᓃᓪᓗ ᐃᒻᒧᒃᓯᐅᒐᖁᑎᖏᑕ ᐸᖕᓂᖏᓐᓂᒃ
ᑎᒍᓯᕙᒃᐳᑦ ᐊᑭᓕᒃᓴᖏᓐᓂᒃ ᐊᑭᓖᓚᐅᖏᓐᓂᖏᓐᓂ.
4ᐊᒃᓱᔪᓂᒃ ᐊᔭᐅᕆᕙᒃᐳᑦ ᐊᖅᑯᑎᐅᑉ ᓯᓚᑖᓄᑦ;
ᐊᔪᕐᓴᕐᑐᓕᒫᓪᓗ ᕿᒫᑎᑕᐅᕗᑦ ᐃᔨᕐᓯᒪᓕᕐᓗᑎᒃ.
5ᑕᑯᒋᑦ, ᓯᐅᑎᖅᑯᕐᑐᔪᑎᑐᑦ ᓄᔪᐊᕐᑕᑎᑐᑦ
ᓂᕿᒃᓴᕐᓯᐅᓕᕐᐳᑦ ᓄᓇᒥ ᐸᓂᕐᑐᒥ ᓱᓇᖃᖏᑦᑐᒥ,
ᕿᑐᕐᖓᖏᑕ ᓂᕿᒃᓴᖏᓐᓂᒃ.
6ᑕᕝᕙ ᐱᕈᕐᓰᕕᖕᓂ ᓇᑲᑎᕆᑎᑕᐅᓕᕐᐳᑦ ᐱᒋᓐᖏᑕᒥᖕᓂᒃ:
ᕔᓂᒃᓴᓂᒡᓗ ᑲᑎᑦᓯᓪᓗᑎᒃ ᐱᐅᖏᑦᑐᓕᔪᑦ ᐱᖁᑎᖏᓐᓂᑦ.
7ᐅᓐᓄᐊᒃᑯᑦ ᓯᓂᖃᑦᑕᕐᐳᑦ ᐊᓐᓄᕌᖃᕋᑎᒃ,
ᕿᐱᒃᓴᖃᕐᐸᒐᑎᒡᓗ ᓂᒡᓚᓱᒃᑎᓪᓗᒍ.
8ᖃᐅᓯᓕᖃᑦᑕᕐᐳᑦ ᖃᖅᑬᑦ ᑰᒐᕐᓂᖏᓐᓂᑦ,
ᐅᔭᕋᓱᒡᔪᖕᓂᓗ ᑲᑎᓐᖓᖃᑦᑕᕐᐳᑦ ᐅᖅᑯᐃᓯᒪᓇᓱᒃᓗᑎᒃ.
9ᓄᑕᖅᑲᑦ ᐊᑖᑕᖃᖏᑦᑐᑦ ᑎᒍᔭᐅᑲᓪᓚᖃᑦᑕᕐᐳᑦ ᐊᒫᒪᒃᑎᓪᓗᒋᑦ,
ᐊᒃᓱᔪᓪᓗ ᓄᑕᕋᖏᑦ ᐊᑭᓕᒃᓮᕈᑎᒋᔭᐅᖃᑦᑕᕐᐳᑦ ᐊᑭᓕᒃᓴᖏᓐᓄᑦ.
10ᐊᓐᓄᕌᒃᓴᖃᓐᖏᒧᑦ ᐊᓃᖃᑦᑕᕐᐳᑦ ᓱᓇᑕᖃᕋᑎᒃ;
ᑳᖃᑦᑕᕐᐳᑦ ᓂᐊᖂᔭᒃᓴᓂᒃ ᐊᒡᔭᕐᑐᖃᑦᑕᕋᓗᐊᕐᓗᑎᒃ.
11ᓇᐹᕐᑑᑉ ᐸᐅᕐᖓᖏᓐᓂᒃ ᐃᑦᓰᔧᖃᑦᑕᕐᐳᑦ ᐅᕐᓱᒃᓴᓕᐅᕐᓗᑎᒃ;
ᕔᓂᒃᓴᓂᒡᓗ ᑐᓪᓕᖃᑦᑕᕐᐳᑦ ᐃᑦᓰᔧᓪᓗᑎᒃ, ᐃᒥᕈᒃᑐᐊᓘᓪᓗᑎᒃ.
12ᐃᒡᓗᒐᓴᖕᓂᑦ ᐊᖑᑎᑦ ᑐᖁᓕᒑᔪᑦ ᐋᓐᓂᐊᓂᕐᒧᑦ ᓂᐹᕗᑦ,
ᐃᑭᓕᕐᑕᐅᓯᒪᔪᓪᓗ ᓂᐹᕗᑦ ᐃᑲᔪᕐᑕᐅᔪᒪᓪᓗᑎᒃ;
ᒎᑎᐅᓪᓕ ᑲᒪᒋᓐᖏᓔᑦ ᑐᒃᓯᐊᕐᓂᕆᔭᖏᑦ.
13ᐃᓄᒃᑕᖃᕆᕗᖅ ᖃᐅᒪᔪᒥᒃ ᐊᑭᕋᕐᑐᕐᑐᓂᒃ,
ᐃᓅᓯᕆᔭᐅᖁᔭᐅᔪᒥᒡᓗ ᖃᐅᔨᒪᖏᑦᑐᓂᒃ,
ᐊᖅᑯᑎᐅᖁᔭᐅᔪᒦᖏᑦᑐᓂᒡᓗ.
14ᐃᓄᐊᕐᑏᑦ ᐅᓐᓄᐊᒃᑯᑦ ᒪᑭᑉᐸᒃᐳᑦ,
ᑐᖁᑦᓯᔪᒪᓪᓗᑎᒃ ᐊᒃᓱᔪᓂᒃ ᐊᔪᕐᓴᕐᑐᓂᒡᓗ;
ᐅᓐᓄᐊᒃᑯᓪᓗ ᑎᒡᓕᒐᕐᑎᐅᓕᕐᐸᒃᓗᑎᒃ.
15ᐊᓯᓐᓂᐊᕐᑏᑦ ᑖᕐᓯᑦᑏᕙᒃᑭᕗᑦ,
ᑮᓇᕐᒥᖕᓂᒡᓗ ᒪᑐᐊᕐᓯᓯᒪᕙᒃᓗᑎᒃ ᐃᓕᑕᕆᔭᐅᔪᒪᓐᖏᒧᑦ.
16ᑎᒡᓕᒃᑏᑦ ᑖᕐᑎᓪᓗᒍ ᑎᒡᓕᒋᐊᕐᑐᕐᐸᒃᐳᑦ ᐃᒡᓗᓄᑦ;
ᐅᓪᓘᓕᕅᖕᒪᓪᓕ ᐃᔨᕐᓯᒪᕙᒃᓗᑎᒃ;
ᖃᐅᒪᔪᒥᒃ ᖃᐅᔨᒪᖏᓐᓇᒥᒃ.
17ᑖᕐᑐᐊᓗᖕᒥᒃ ᐅᓪᓛᖃᖔᕐᐳᑦ ᑕᒪᕐᒥᒃ;
ᑲᑉᐱᐊᓵᕆᔨᓂᒃ ᑖᕐᑐᐊᓗᖕᒥᐅᑕᓂᒡᓗ ᐃᓚᓐᓇᕆᔭᖃᕐᐳᑦ.”
ᔪᐸᕆ
18“ᐅᖃᖅᑲᐅᒐᕕᑦ, ‘ᐱᐅᖏᑦᑐᓕᔪᑦ ᐅᓕᕕᒡᔪᐊᒧᑦ ᐊᐅᓪᓚᕈᑦᔭᐅᕗᑦ;
ᓄᓇᖁᑎᖏᓪᓗ ᒎᑎᐅᑉ ᓱᒋᐊᕈᒪᔭᖓᓃᓪᓗᑎᒃ;
ᐱᕈᕐᓰᕕᖁᑎᒥᖕᓄᓪᓗ ᐱᓇᓱᐊᕆᐊᕐᑐᕐᑐᖃᓚᐅᕐᓯᒪᔪᓐᓃᕐᓗᑎᒃ.
19ᐸᓂᕐᓇᕐᑐᒧᑦ ᐅᖅᑰᔪᒧᓪᓗ ᐊᐳᑦ ᐸᓂᕐᓗᓂ ᐊᓯᐅᓲᖑᖕᒪᑦ:
ᑍᒫᒃᑕᐅᖅ ᐊᔪᕐᑐᓕᔪᑦ ᐊᓯᐅᔪᒫᕆᕗᑦ ᓄᓇᒥ ᐃᓅᔪᓂ.
20ᐊᒡᓛᑦ ᐊᓈᓇᖏᑕ ᐳᐃᒍᕈᓐᓇᕐᐰᑦ;
ᐊᑎᖏᓪᓘᓐᓃᑦ ᐃᖅᑲᐅᒪᔭᐅᔪᓐᓁᕐᓗᑎᒃ;
ᑍᒤᒻᒪᑦ ᐱᐅᖏᑦᑐᓕᓂᖅ ᓇᑲᑕᐅᓯᒪᕗᖅ ᓇᐹᕐᑐᑎᑐᑦ.’
21ᑍᒤᓚᕿᕗᑦ ᐅᐃᒡᒐᕐᓂᕐᓂᒃ ᐱᑦᓯᐊᖃᑦᑕᕐᓯᒪᖏᓐᓇᒥᒃ:
ᐊᕐᓇᓂᒡᓗ ᕿᑐᕐᖓᖃᖏᑦᑐᓂᒃ ᓂᕆᑎᑦᓯᖃᑦᑕᖔᕐᓗᑎᒃ.
22ᒎᑎᓕ ᐊᔪᖏᑦᑐᕐᔪᐊᓂᒃ ᐊᓯᕈᐃᕗᖅ ᐱᔪᓐᓇᕐᓂᕐᒥᒍᑦ;
ᑖᒃᑯᐊ ᐱᕙᓪᓕᐊᒐᓗᐊᕐᐳᑦ ᐃᓄᓯᖏᓪᓕ ᓴᐱᕐᓇᕐᑐᒧᐊᕐᐳᑦ.
23ᒎᑎᐅᑉ ᐃᓱᒫᓗᓇᖏᑦᑐᒦᑎᑉᐰᑦ, ᓴᐳᒻᒥᓪᓗᒋᓪᓗ;
ᑍᒪᓐᖓᓪᓕ ᐱᓂᐊᕐᓂᖏᑦ ᑕᑯᓐᓇᕐᐰᑦ.
24ᐱᐅᖏᑦᑐᓕᔪᖅ ᐊᑯᓂᐅᖏᑦᑐᖅ ᓂᕐᑐᕐᓇᑬᓐᓇᕐᐳᖅ,
ᐊᑯᓂᐅᖏᑦᑐᕐᓗ ᑕᕝᕙᐅᔪᓐᓃᕐᐳᖅ; ᑐᖁᓕᕗᖅ ᐱᕈᕐᑐᑎᑐᑦ;
ᓂᐊᖂᔭᒃᓮᑦ ᓄᕗᖏᑎᑐᑦ ᓇᑲᑕᐅᕗᑦ.
25ᑕᒪᓐᓇ ᑍᒤᖏᑉᐸᑦ, ᓇᓪᓕᐊᑦᑕ ᓱᓕᖏᓐᓂᕋ ᓇᓗᓁᕈᓐᓇᕐᐸᐅᒃ?
ᑭᓇᓗ ᓇᓗᓁᕐᓯᔪᓐᓇᕐᐹ ᐅᖃᐅᓯᕆᔭᒪ ᓱᓕᖏᓐᓂᖏᓐᓂᒃ?”
Currently Selected:
ᔫᐱᐅᑉ ᐊᒡᓚᖏᑦ 24: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
