ᔨᕆᒤᐊᐅᑉ ᐊᒡᓚᖏᑦ 52
52
ᔨᕉᓴᓕᐅᑉ ᐊᔪᓕᕐᓂᖓ
ᐊᑕᓃᑦ ᐂᑉᐸᖏᑦ 24:18—25:7
1ᔨᑎᑬᐊ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐊᕐᕌᒍᖃᓕᕐᓗᓂ 21ᓂᒃ, ᐊᖓᔪᖅᑳᕐᔪᐊᕆᔭᐅᓚᐅᕐᐳᕐᓗ ᔨᕉᓴᓕᒥ ᐊᕐᕌᒍᓂᒃ 11ᓂᒃ, ᐊᓈᓇᖓ ᐊᑎᖃᕐᐳᖅ ᕼᐊᒧᑕᓕᒥᒃ ᔨᕆᒤᐊᐅᑉ ᐸᓂᖓ ᓕᑉᓇᒥ ᓄᓇᖃᕐᓗᓂ. 2ᔨᑎᑬᐊ ᐊᑕᓂᐅᑉ ᓵᖓᓂ ᐊᔪᕐᑐᓕᓚᐅᕆᕗᖅ ᔨᕼᐅᐃᐊᑭᒻᑎᑐᑦ. 3ᐊᑕᓂᐅᑉ ᓂᓐᖓᒡᕕᒋᓚᐅᕐᒪᒋᑦ ᔨᕉᓴᓕᒥᐅᑦ ᔫᑕᒥᐅᓪᓗ ᐊᓯᕈᕐᑕᐅᓚᐅᕐᐳᑦ, ᐊᑕᓂᐅᓪᓗ ᐃᒋᓚᐅᕐᐰᑦ ᓵᒥᓂᑦ.
ᔨᑎᑬᐊᓕ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᐊᑭᕋᕐᑐᓕᓚᐅᐳᖅ. 4#ᐃᓯᑭᐊᓕ 24:2.ᔨᑎᑬᐊᐅᑉ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᖏᑦᑕ 9ᖓᓐᓂ ᑕᖅᑮᑦ 10ᖓᓐᓂ, ᐅᓪᓗᖏᑦᑕ 10ᒋᓕᕐᑕᖓᓐᓂ ᓂᐱᑯᓁᓴ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᐅᓇᑕᕆᐊᓕᓚᐅᕐᐳᖅ ᔨᕉᓴᓕᒥᐅᓂᒃ, ᐅᓇᑕᕐᑎᖁᑎᓕᒫᓂ ᐃᓚᒋᓪᓗᒋᑦ, ᔨᕉᓴᓕᐅᓪᓗ ᐊᕙᓗᕐᔪᐊᖓᑕ ᓯᓚᑖᓂ ᐊᕙᓗᓯᒪᓪᓗᒍ ᑕᖕᒫᕐᑎᓚᐅᕐᐳᑦ ᔨᕉᓴᓕᒥᐅᑦ ᐊᓂᔪᓐᓁᓪᓕᑎᓪᓗᒋᑦ. 5ᐃᒡᓗᒐᓴᒡᔪᐊᓪᓗ ᑍᒫᒃ ᐊᔪᓕᕐᑎᑕᐅᓯᒪᓚᐅᕐᐳᑦ, ᔨᑎᑬᐊᐅᑉ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᖏᑦᑕ 11ᖓᑦ ᑎᑭᓪᓗᒍ. 6ᑕᖅᑮᑦ ᓯᑕᒪᒋᓕᕐᑕᖓᓐᓂ ᐅᓪᓗᖏᑦᑕ 9ᖓᓐᓂ ᑳᖕᓇᕐᑐᕐᔪᐊᖃᓕᓚᐅᕐᐳᖅ ᑕᕝᕙᓂ, ᐃᓄᐃᑦ ᓂᕿᒃᓮᕈᑎᓚᐅᕐᒪᑕ. 7#ᐃᓯᑭᐊᓕ 33:21.ᔨᕉᓴᓕᐅᑉ ᐊᕙᓗᕐᔪᐊᖓ ᐊᖕᒪᕐᑕᐅᖕᒪᑦ, ᐅᓇᑕᕐᑎᖁᑎᖏᑦ ᕿᒫᓚᐅᕐᐳᑦ, ᐅᓐᓄᐊᒃᑯᑦ ᐊᓂᐅᕋᕐᓗᑎᒃ ᐃᑎᕐᑕᕐᕕᒃᑯᑦ ᐊᕙᓗᕐᔪᐊᒃ ᒪᕐᕉᒃ ᐅᖓᓕᕇᒃ ᐊᑯᓐᓂᖓᓃᑦᑐᒃᑯᑦ, ᐊᖓᔪᖅᑳᕐᔪᐊᑉ ᐱᕈᕐᓰᕕᖁᑎᖓᑕ ᖃᓂᒋᔮᒍᑦ, ᑲᐅᓪᑎᐊᒥᐅᑦ ᐊᕙᑕᖏᕐᓯᓯᒪᒐᓗᐊᕐᑎᓪᓗᒋᑦ, ᕿᒫᕗᑦ ᓄᓇᐅᑉ ᐊᕋᐹᒥᒃ ᐊᑎᖃᕐᑑᑉ ᓇᓛᓄᑦ. 8ᑲᐅᓪᑎᐊᒥᐅᓪᓕ ᐅᓇᑕᕐᑐᒃᓴᖁᑎᖏᑕ ᔨᑎᑬᐊᒃᑯᑦ ᒪᓕᒃᑲᒥᑦᔪᒃ, ᐊᖑᕚᑦ ᔨᕆᑰᑉ ᓇᑎᕐᓇᕐᔪᐊᖓᓂ, ᔨᑎᑬᐊᐅᓪᓗ ᐅᓇᑕᕐᑎᖁᑎᖏᑦ ᑕᕝᕙᓂ ᐊᕕᒃᑐᕐᓗᑎᒃ ᓇᒧᑐᐃᓐᓇᖅ ᕿᒫᕗᑦ, ᕿᒤᓪᓗᑎᒃ ᐊᖓᔪᖅᑳᒥᖕᓂᒃ. 9ᔨᑎᑬᐊᓗ ᑎᒍᔭᐅᕗᖅ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᓇᔪᕐᑕᖓᓄᑦ ᐋᑕᐅᕗᖅ ᕆᑉᓚᒦᑎᓪᓗᒍ ᕼᐊᒫᑎᐅᑉ ᓄᓇᖓᓂ, ᐃᖅᑲᕐᑐᕐᐹᓗ. 10ᓄᓇᒥ ᕇᑉᓚᒥ ᔨᑎᑬᐊᐅᑉ ᐃᕐᓂᖏᑦ ᑐᖁᕋᕐᑕᐅᑎᑉᐰᑦ, ᔨᑎᑬᐊ ᑕᑯᓐᓇᕐᑎᓪᓗᒍ. ᔫᑕᒥᐅᑦ ᐊᖓᔪᖅᑳᖁᑎᖏᑦ ᑕᒪᕐᒥᒃ ᑐᖁᑕᐅᑎᒃᑭᕔᑦ. 11#ᐃᓯᑭᐊᓕ 12:13.ᔨᑎᑬᐊᐅᑉ ᐃᔨᖏᒃ ᖄᕐᑕᐅᓚᐅᕐᐴᒃ, ᐊᕐᓵᕐᑑᔭᓄᓪᓗ ᐊᑦᓱᖏᕐᓯᒪᓕᕐᑎᓪᓗᒍ ᐹᐱᓘᓂᒧᐊᕈᑎᕚᑦ, ᑎᒍᔭᐅᓯᒤᓐᓇᓕᕐᓗᓂᓗ ᑐᖁᑐᐃᓐᓇᓚᐅᕐᐳᖅ.
ᑐᒃᓯᐊᕐᕕᒡᔪᐊᑉ ᓯᖁᑦᑎᕐᑕᐅᓂᖓ
ᐊᑕᓃᑦ ᐂᑉᐸᖏᑦ 25:8-17
12ᓂᐱᑯᓁᓴᐅᑉ ᐊᖓᔪᖅᑲᐅᓂᖓᑕ ᐹᐱᓘᓂᒥ ᐊᕐᕌᒍᖏᑕ 19ᖓᓐᓂ ᑕᖅᑮᑦ ᑕᓪᓕᒪᖓᓐᓂ, ᐅᓪᓗᖏᑕ ᖁᓕᖓᓐᓂ, ᓂᐳᔭᕋᑕᓐ ᐊᖓᔪᖅᑳᕐᔪᐊᑉ ᐅᓇᑕᕐᑎᖁᑎᖏᑕ ᐊᖓᔪᖅᑳᖓᑦ ᐱᔨᑦᓯᕐᓗᓂ ᐊᖓᔪᖅᑳᕐᔪᐊᒥᓂᒃ ᔨᕉᓴᓕᒧᑦ ᐃᑎᕐᐳᖅ. 13#ᐊᑕᓃᑦ ᓯᕗᓪᓖᑦ 9:8.ᑐᒃᓯᐊᕐᕕᒡᔪᐊᕐᓗ ᐃᑯᐊᓪᓚᒃᐹ, ᐊᖓᔪᖅᑳᕐᔪᐊᓪᓗ ᐃᒡᓗᖏᑦ ᐃᒡᓗᒐᓴᒡᔪᐊᓕᒫᓪᓗ ᔨᕉᓴᓕᒥ, ᐃᒡᓗᐃᑦ ᐱᒻᒪᕆᐅᓂᓕᒫᖏᑦ ᐃᑯᐊᓪᓚᒃᐰᑦ. 14ᑲᐅᓪᑎᐊᒥᐅᑦ ᐅᓇᑕᕐᑎᖏᑦ ᐊᖓᔪᖅᑳᒥᖕᓂᒃ ᐃᓚᓖᑦ ᔨᕉᓴᓕᐅᑉ ᐊᕙᓗᕐᔪᐊᓕᒫᖓ ᓯᖁᑦᑎᓚᐅᕐᐹᑦ. 15ᓂᐳᔭᕋᑕᓐ ᐊᖓᔪᖅᑳᒻᒪᕆᒋᔭᐅᔪᖅ ᐅᓇᑕᕐᑎᓄᑦ ᐊᐅᓪᓚᕈᑦᔨᓚᐅᕐᐳᖅ, ᐃᒡᓗᒐᓴᒡᔪᐊᕐᓂ ᐊᒥᐊᒃᑰᔪᕕᓂᕐᓂᒃ, ᐹᐱᓘᓂᐅᓪᓗ ᐊᖓᔪᖅᑳᕐᔪᐊᖓᓐᓄᑦ ᑐᓂᑦᔪᑎᒋᓂᑯᓂᒃ. 16ᓂᐳᔭᕋᑕᓐ ᕿᒤᓚᐅᐳᖅ ᐊᔪᕐᓴᕐᓂᕐᐹᑦ ᐃᓚᖏᓐᓂᒃ ᐱᕈᕐᓰᕕᖕᓂ ᑲᒪᔨᐅᖁᓪᓗᒋᑦ.
17 #
ᐊᑕᓃᑦ ᓯᕗᓪᓖᑦ 7:15-47. ᑲᐅᓪᑎᐊᒥᐅᑦ ᓯᖁᑦᑎᕆᓚᐅᕆᕗᑦ ᐊᑕᓂᐅᑉ ᐃᒡᓗᖓᓂᒃ, ᑲᓐᓄᔭᓂᑦ ᓴᓇᓯᒪᔪᑦ ᐃᒡᓘᑉ ᓱᑲᖏᓐᓂᒃ, ᐃᑯᕐᕋᒃᓮᓪᓗ ᑕᒫᓃᕐᕆᔪᑦ, ᖃᑦᑕᕐᔪᐊᓪᓗ ᑲᓐᓄᔭᒥᑦ ᓴᓇᓯᒪᔪᑦ, ᓱᓇᑐᐃᓐᓁᓪᓗ ᑲᓐᓄᔭᐅᑐᐊᕐᒪᑕ ᑕᒪᕐᒥᒃ ᓇᒃᓴᕐᐰᑦ ᐹᐱᓘᓂᒧᑦ. 18ᒪᑯᐊᑦᑕᐅᖅ ᓇᒃᓴᕐᑕᐅᓚᕐᐳᑦ, ᐅᒃᑯᓰᑦ, ᐳᐊᕐᕆᑏᓪᓗ, ᑕᖅᑯᑏᓪᓗ, ᒪᒃᑲᐅᔧᑦ ᓯᕐᐸᕐᓮᑦᔪᑏᑦ, ᖃᔪᓕᕆᑦᔪᑏᑦ, ᓱᓇᑐᐃᓐᓁᓪᓗ ᑲᓐᓄᔭᒥᑦ ᓴᓇᓯᒪᔪᑦ ᑐᒃᓯᐊᕐᕕᒡᔪᐊᕐᒥ ᐊᑐᕐᑕᐅᖃᑦᑕᕐᑐᓕᒫᑦ. 19ᐊᒻᒪᑦᑕᐅᖅ ᐅᓇᑕᕐᑏᑦ ᐊᖓᔪᖅᑳᒻᒪᕆᖓᑦᑕ ᑎᒍᓚᓚᐅᕆᕔᑦ, ᐅᐊᓴᕐᕖᑦ, ᐊᓪᓕᕅ, ᒪᒃᑲᐅᔧᑦ, ᖃᑦᑍᑦ, ᓇᓂᕈᐊᖃᕐᕖᑦ, ᖃᔪᓕᕆᑦᔪᑏᑦ, ᐃᒥᐅᑏᑦ, ᓱᓇᑐᐃᓐᓁᓪᓗ ᒎᓗᒥᑦ ᓯᐅᓪᕕᕆᒥᓪᓘᓐᓃᑦ ᓴᓇᔭᐅᓯᒪᔪᑦ. 20ᑖᒃᑯᐊ ᑲᓐᓄᔭᓂᑦ ᓴᓇᓯᒪᔪᑦ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᓴᓇᔭᐅᑎᓚᐅᕐᑕᕕᓂᖏᑦ ᑐᒃᓯᐊᕐᕕᒃᔪᐊᓕᐅᕐᑎᑦᓯᒐᒥ, ᑲᑎᓐᓇᒥᒃ ᑕᒪᒃᑯᐊ ᐅᖁᒤᑦᑐᐊᓘᓚᐅᕐᐳᑦ, ᓱᑳᒡᓗ ᒪᕐᕉᒃ ᐃᑯᕐᕋᒃᓮᑦ, ᐃᒪᖃᐅᑏᓪᓗ, ᐃᒻᒧᒃᓯᐅᒊᓪᓗ ᐊᖑᓴᓪᓗᓐᖑᐊᖏᑦ 12 ᐅᕐᕈᑦᔧᒃᑯᑎᒋᔭᖏᑦ, ᑖᒃᑯᐊ ᑲᑎᓪᓗᒋᑦ ᐅᖁᒤᓐᓂᕐᓂᐊᕆᐊᖏᑦ ᐅᖁᒤᓗᐊᓚᐅᕐᐳᑦ. 21ᓱᑳᒡᓗ ᑕᑭᓂᖃᕐᐴᒃ 27ᓂᒃ ᐃᑎᒐᖕᓂᒃ, 18ᓂᒃ ᐃᑎᒐᖕᓂᒃ ᓯᓕᖕᓂᖃᕐᓗᑎᒃ, ᐃᑦᔪᓂᖃᕐᓗᑎᒡᓗ ᐊᒡᒐᐅᑉ ᓯᓕᖕᓂᖓᑐᑦ ᓱᓪᓗᓕᐅᓪᓗᑎᒃ. 22ᐊᑐᓂᑦ ᓴᓇᓐᖑᐊᕐᕕᒋᓯᒪᓪᓗᑎᒃ ᖄᖓᒍᑦ ᐊᖓᔪᖅᑳᕐᔪᐊᑉ ᓇᓗᓁᒃᑯᑕᖓᓂᒃ 7ᓂᒃ ᕿᑎᖅᑲᒥᒡᓗ ᐃᑎᒐᖕᓂᒃ ᐊᖏᓂᖅᑲᕐᑑᖕᓂᒃ, ᑕᒪᕐᒥᒃ ᓴᓇᓐᖑᐊᕐᕕᒋᓯᒪᓪᓗᑎᒃ ᑲᓐᓄᔭᓂᒃ ᐹᒥᒍᕌᓐᖑᐊᓂᒃ ᑕᑯᒥᓇᕈᑎᒃᑲᓐᓂᕐᓂᒃ. 23ᑕᑯᒥᓇᕈᑎᓕᐅᕐᓯᒪᒃᑲᓐᓂᕆᓪᓗᓂ ᓴᓂᕌᒍᑦ ᐹᒥᒍᕌᓐᖑᐊᓂᒃ 96ᓂᒃ; ᐹᒥᒍᕌᓐᖑᐊᑦ ᑕᑯᒥᓇᕐᓴᐅᑎᖏᑦ ᑲᑎᓪᓗᒋᑦ 100ᐅᓚᐅᕐᐳᑦ.
ᔫᑕᐅᑉ ᐃᓄᖏᑕ ᐹᐱᓘᓂᒧᐊᕈᑦᔭᐅᓂᖏᑦ
ᐊᑕᓃᑦ ᐂᑉᐸᖏᑦ 25:18-21,27-30
24ᐅᓇᑕᕐᑐᒃᓮᑦ ᐊᖓᔪᖅᑳᒻᒪᕆᖓᑦ ᐊᐅᓪᓚᕈᑦᔨᓚᐅᕆᕗᖅ ᑎᒍᔭᒥᓂᒃ ᑐᓂᕐᕈᓯᕐᑎᑦᓯᔨᒥᒃ ᓯᕅᐊᒥᒃ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖑᔪᒥᒃ, ᔨᐸᓁᐊᒥᒡᓗ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᑐᖓᓕᖓᓂᒃ, ᐱᖓᓱᓪᓗ ᐃᑎᕐᑕᕐᕕᖕᒥ ᑲᒪᔨᐅᔪᑦ. 25ᐃᒡᓗᒐᓴᒡᔪᐊᓂ ᐊᒥᐊᒃᑰᔪᕕᓃᑦ ᐱᖃᓯᐅᑎᓚᐅᕆᕔᑦ, ᐅᓇᑕᕐᑐᒃᓴᓄᑦ ᐊᖓᔪᖅᑳᖑᔪᑦ, ᐊᖓᔪᖅᑳᕐᔪᐊᑉ ᐃᑲᔪᕐᑎᖏᑦ 7, ᑎᑎᕋᕐᑎᐅᔪᓪᓗ ᐊᖓᔪᖅᑳᕐᔪᐊᑉ ᑎᑎᕋᖁᑎᖏᓐᓂᒃ ᑲᒪᔩᑦ ᐃᓄᐃᑦ ᑎᑎᕋᕐᑕᐅᓯᒪᓂᖏᓐᓂᒃ ᐊᐅᓚᑦᓯᔪᑦ, 60ᐅᔪᓪᓗ ᐱᒻᒪᕆᐅᔪᑦ ᐊᖓᔪᖅᑳᕐᔪᐊᕐᒧᑦ. 26ᓂᐳᔭᕋᑕᐅᑉ ᐅᓇᑕᕐᑏᑦ ᐊᖓᔪᖅᑳᒻᒪᕆᖓᑦᑕ ᑖᒃᑯᐊ ᑎᒍᔭᓂ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᐊᕈᑎᕔᑦ ᕆᑉᓚᒦᑦᑐᒧᑦ. 27ᑕᕝᕙᓂᓗ ᕆᑉᓚᒦᓪᓗᑎᒃ ᓱᓕ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑕ ᑖᒃᑯᐊ ᑐᖁᑕᐅᑎᑉᐰᑦ ᕼᐊᒫᑎᒥ, ᑕᕝᕙ ᔫᑕᒥᐅᑦ ᐃᓄᖏᑦ ᑎᒍᔭᐅᓚᐅᕐᐳᑦ ᐊᐅᓪᓚᕈᑦᔭᐅᓪᓗᑎᒡᓗ ᓄᓇᑐᖃᒥᖕᓂᑦ. 28ᐅᑯᐊ ᑕᕝᕙ ᐃᓄᐃᑦ ᐅᓄᕐᓂᖏᑦ ᓂᐱᑯᓁᓴᐅᑉ ᐊᐅᓪᓚᕈᑎᓚᐅᕐᑕᖏᑦ; ᐊᕐᕌᒍᐃᑦ 7ᖓᓐᓂ ᐊᐅᓪᓚᕈᑦᔨᓚᐅᕐᐳᖅ ᔫᑎᓂᒃ ᐅᓄᕐᓂᖃᕐᑐᓂᒃ 3,023ᓂᒃ. 29ᓂᐱᑯᓁᓴᐅᑉ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᐃᑦ 18ᖓᓐᓂ ᐊᐅᓪᓚᕈᑦᔨᓚᐅᕐᐳᖅ ᔨᕉᓴᓕᒥᐅᓂᒃ 832ᓂᒃ. 30ᓂᐱᑯᓁᓴᐅᑉ ᐊᖓᔪᖅᑳᕐᔪᐊᖑᓂᖓᑕ 23ᖓᓐᓂ ᐊᐅᓪᓚᕈᑦᔨᓚᐅᕐᐳᖅ ᔫᑎᓂᒃ 745ᓂᒃ. ᓂᐳᔭᕋᑕᓐ ᐅᓇᑕᕐᑏᑦ ᐊᖓᔪᖅᑳᒻᒪᕆᖓᑦᑕ ᐊᐅᓪᓚᕈᑎᔭᖏᑦ ᑲᑎᓕᒫᕐᓗᒋᑦ 4,600ᐅᓚᐅᕐᐳᑦ ᐃᓄᐃᑦ.
31ᔫᑕᒥᐅᑦ ᐊᖓᔪᖅᑳᕐᔪᐊᖓᑦᑕ ᔨᕼᐅᐃᐊᑭᐅᑉ ᐊᐅᓪᓚᕈᑦᔭᐅᓯᒪᓂᖓᑕ 37ᖓᓐᓂ ᐃᕗᓪᒥᕈᑖᒃ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐹᐱᓘᓂᒥ, ᔨᕼᐅᐃᐊᑭᓐ ᑎᒍᔭᐅᓯᒪᕕᖕᒥᑦ ᐊᓂᑎᓚᐅᕐᐹ ᑕᖅᑮᑦ 12ᖓᑦᑕ ᐅᓪᓗᖏᑦᑕ 25ᖓᓐᓂ. 32ᐱᑦᓯᐊᕐᕕᒋᓚᐅᕐᐹᓗ, ᐃᓂᑖᕐᑎᓪᓗᓂᐅᒡᓗ ᐅᐱᓐᓇᕐᓂᕐᐹᖑᖃᑕᐅᔪᒥ ᐊᖓᔪᖅᑳᕐᔪᐊᓂᑦ ᑎᒍᔭᐅᓯᒪᖃᑎᒋᔭᖏᓐᓂᑦ ᐹᐱᓘᓂᒥ. 33ᔨᕼᐅᐃᐊᑭᐅᑉ ᑎᒍᔭᐅᓯᒪᓪᓗᓂ ᐊᓐᓄᕌᑦ ᐊᑐᕐᑕᕕᓂᓂ ᐲᕐᓗᓂᒋᑦ, ᐊᓯᖏᓐᓂᒃ ᐊᑎᓪᓗᓂ ᓂᕆᖃᑕᐅᖏᓐᓇᖃᑦᑕᓕᓚᐅᕐᐳᖅ ᐃᓅᓯᓕᒫᒥᓂ ᐊᖓᔪᖅᑳᕐᔪᐊᑉ ᓂᕆᕕᒋᕙᒃᑕᖓᓂ. 34ᖃᐅᑕᒫᓪᓗ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᓅᑦᔪᑎᒃᓴᖏᓐᓂᒃ ᑐᓂᓯᕕᒋᓚᐅᕐᐹ ᐃᓅᓂᓕᒫᖓᓂ, ᑐᖁᓂᖓ ᑎᑭᓪᓗᒍ.
Currently Selected:
ᔨᕆᒤᐊᐅᑉ ᐊᒡᓚᖏᑦ 52: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
