ᔨᕆᒤᐊᐅᑉ ᐊᒡᓚᖏᑦ 51
51
ᐹᐱᓘᓂᒥᐅᑦ ᐃᖅᑲᕐᑐᕐᑕᐅᓂᖓᑕ ᐃᓚᖓ
1ᐃᒫᒃ ᐊᑕᓂᖅ ᐅᖃᕐᐳᖅ, “ᑕᑯᒋᑦ ᐊᓯᕈᐃᔨᐅᑉ ᐱᔪᓐᓇᕐᓂᖓ ᐊᐅᓚᑦᔭᒃᑎᓐᓂᐊᕐᐸᕋ ᐹᐱᓘᓂᒥᐅᓄᑦ ᓕᐸ ᑲᒤᒥᐅᓪᓗ ᐃᓄᖏᓐᓄᑦ. 2ᐹᐱᓘᓂᒥᐅᓄᑦ ᑎᑭᑎᑦᓯᔪᒫᕐᐳᖓ ᓴᓃᔭᕐᓗᒍ ᓱᓁᕈᑦᔭᐅᖁᓪᓗᒍ ᓄᓇᖓᑦ, ᐊᓯᕈᕐᑕᐅᕕᒃᓴᖓᑦ ᓇᓪᓕᐅᑎᒃᐸᑦ ᐊᑭᕋᕐᑐᕐᑕᐅᑎᑦᓱᒫᕐᐸᕋ ᓇᑭᑐᐃᓐᓇᖅ. 3ᐱᑎᒃᓵᕐᑏᑦ ᐱᑎᒃᓯᒥᖕᓂᒃ ᐊᒃᓱᓈᓕᕐᓯᑦᑍᓕᓕᑦ, ᐅᓇᑕᐅᑎᒥᖕᓂᒡᓗ ᐊᓐᓄᕌᕐᑍᓕᓕ, ᐃᓅᓱᒃᑐᖁᑎᖏᑦ ᐊᒥᐊᒃᑯᔭᐅᑦᑍᓕᓕᑦ ᐅᓇᑕᕐᑎᖁᑎᖏᓪᓗ ᓄᖑᑕᐅᓕᑦ. 4ᑲᐅᓪᑎᐊᒥᐅᑦ ᓄᓇᖓᓂ ᑐᖁᕋᕈᒫᕐᐳᑦ, ᐊᖅᑯᑎᖏᓐᓂ ᐃᑭᓕᕐᑕᐅᔪᒫᕐᐳᑦ. 5ᐃᓴᕆᐊᓕᒥᐅᑦ ᔫᑕᒥᐅᓪᓗ ᕿᒪᒃᑕᐅᓯᒪᓐᖏᓚᑦ ᒎᑎᒥᖕᓄᑦ ᐊᑕᓂᕐᒧᑦ ᐊᔪᒐᖃᖏᑦᑐᕐᔪᐊᕐᒧᑦ ᓄᓇᖓᑦ ᐸᓯᔭᒃᓴᐅᒐᓗᐊᕐᑎᓪᓗᒍ ᐃᓴᕆᐊᓕᒥᐅᑦ ᐃᑦᔪᕐᓁᓐᓂᕐᐹᖁᑎᖓᑦᑕ ᓵᖓᓂ. 6ᐹᐱᓘᓂᒥᑦ ᕿᒫᓕᕆᑦᓯ ᐃᓅᔪᒪᒍᑦᓯ, ᐊᔪᕐᑐᓕᓂᖏᓐᓄᑦ ᐊᓯᕈᕐᑕᐅᑦᔪᑎᖃᕐᑍᓕᒋᑦᓯ, ᐊᑕᓂᐅᑉ ᐊᑭᓂᐊᕐᓂᒃᓴᖓ ᓇᓪᓕᐅᑎᖕᒪᑦ, ᐊᑕᓂᐅᑉ ᐊᑭᓂᐊᕐᕕᒋᓂᐊᕐᒪᒋᑦ ᐊᑭᓂᐊᕐᕕᐅᔭᕆᐊᖃᕐᓂᖏᑦ ᒪᓕᒡᓗᒋᑦ. 7#ᑕᑯᑎ 17:2-4; 18:3.ᐹᐱᓘᓂᒥᐅᑦ ᑏᑐᑎᑎᑐᑦ ᒎᓗᑎᑐᑦ ᑍᒤᓚᐅᕐᐳᑦ ᐊᑕᓂᐅᑉ ᐊᒡᒐᖏᓐᓂ ᓄᓇᕐᔪᐊᕐᒥᐅᓂᒡᓗ ᐋᖓᔮᓕᕐᑎᑦᓯᓚᐅᕐᐳᑦ, ᐃᓅᖃᑎᒌᒡᔪᐊᑦ ᐃᒥᕐᑎᓚᐅᕐᒪᑦᔪᒃ ᕔᓂᖁᑎᒥᖕᓂᑦ ᑐᑭᖃᕈᓐᓃᕐᐳᑦ. 8ᐹᐱᓘᓂᒥᐅᑦ ᐊᔪᓕᑳᓪᓚᒍᒫᕐᐳᑦ ᐊᓯᕈᕐᑕᐅᓗᑎᒡᓗ, ᕿᐊᑦᔪᑎᒋᓕᕐᓯᐅᒃ! ᐃᑭᖏᓐᓄᑦ ᒥᖑᐊᕈᑎᒃᓴᕐᓯᒋᑦᓯ, ᐋᖅᑭᒐᔭᕐᒪᖔᑦ ᐆᒃᑐᕐᑕᐅᖁᓪᓗᒋᑦ. 9#ᑕᑯᑎ 18:5.ᐹᐱᓘᓂᒥᐅᑦ ᐋᖅᑭᒍᓐᓇᕋᔭᓚᐅᕐᑑᒐᓗᐊᑦ ᐋᖅᑭᒃᑕᐅᓐᖏᓚᕐᓕ, ᕿᒪᒡᓗᒍ ᓄᓇᑐᖃᑦᑎᓐᓄᑦ ᐂᓕᕐᑕ, ᐃᖅᑲᕐᑐᕐᑕᐅᓂᒃᓴᖓ ᐊᖏᓗᐊᓕᕐᒪᑦ ᐱᕈᕐᓯᒪᓗᐊᓕᕐᓗᓂᓗ.
10“ᐊᑕᓂᐅᑉ ᓮᒻᒪᐅᑎᓯᒪᖕᒪᑎᒍᑦ, ᕾᒋᑦᓯ, ᐅᖃᐅᓯᕆᓚᕗᑦ ᓮᐅᓂᒥ ᐊᑕᓂᐅᑉ ᒎᑎᑦᑕ ᐱᓂᐊᕐᓂᕆᔭᖏᑦ.
11“ᖃᕐᔪᓯ ᑮᓐᓇᒃᓴᓕᕐᓯᒋᒃ ᓴᐴᓗᑕᓯᓗ ᑎᒍᓗᒋᑦ! ᐊᑕᓂᐅᑉ ᒥᑏᔅᑯᑦ ᐊᖓᔪᖅᑳᕐᔪᐊᖏᑦ ᐊᐅᓚᑦᔭᒃᑎᒻᒪᒋᑦ ᐹᐱᓘᓂᒥᐅᓂᒃ ᐊᓯᕈᐃᔪᒪᓪᓗᓂ ᐃᓱᒪᒋᔭᖃᕐᒪᑦ, ᐊᑕᓂᖅ ᐊᑭᓂᐊᕈᒫᕐᒪᑦ ᑐᒃᓯᐊᕐᕕᒃᔪᐊᖁᑎᓂ ᐱᑦᔪᑎᒋᓗᓂᐅᒃ. 12ᐹᐱᓘᓂᒥᐅᑦ ᐊᑭᕋᕐᑐᕐᕕᒋᓕᕐᓯᒋᒃ ᓇᓗᓁᒃᑯᓯᔭᕐᓗᓯᓗ, ᖃᐅᔨᓴᕐᑎᐅᔪᑦ ᐱᔪᓐᓇᕐᓯᑎᒋᐊᒃᑲᓐᓂᕐᓯᐅᒃ, ᐅᓐᓄᐊᕐᓯᐅᕐᑏᓪᓗ ᐅᐸᓗᐃᓗᒋᑦ ᐱᒋᐊᕐᓂᕆᓂᐊᕐᑕᑦᓯᓐᓂᒃ ᐋᖅᑭᒃᓱᐃᓕᕆᑦᓯ ᐊᑕᓂᐅᑉ ᐋᖅᑭᒃᓯᒪᔭᓂ ᑲᔪᓯᑎᓐᓂᐊᕐᒪᒍ ᐹᐱᓘᓂᒥᐅᓄᑦ ᐅᖃᕐᓯᒪᔭᓂ. 13#ᑕᑯᑎ 17:1.ᐃᒪᖁᑎᖃᕐᑐᓯ ᐅᓄᕐᑐᓂᒃ, ᓄᓇᖃᕐᑐᓯᓗ ᐊᔪᕐᓴᖏᑦᔪᑎᒃᓴᖃᕐᑐᓂᒃ, ᐊᔪᓕᕐᕕᒃᓴᓯ ᑎᑭᑉᐳᖅ, ᐃᓅᑦᔪᑎᒃᓴᖃᕈᓐᓃᕐᕕᒃᓴᓯ ᓈᕗᖅ. 14ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕕᒍᑎᒋᕗᖅ ᐃᒻᒥᓂᒃ, ᐅᓇᑕᕐᑐᒃᓴᓂᒃ ᑕᑕᑕᐅᑎᑦᓱᒫᕐᐸᑦᓯ ᐱᒡᓕᕐᑕᐅᔮᕐᑐᑎᑐᑦ ᐅᓄᕐᑎᒋᔪᓂᒃ, ᕾᒐᓛᕈᒫᕐᐳᓪᓗ ᐃᓕᑦᓯᓐᓂᒃ ᓵᓚᖃᕐᓂᑎᒃ ᐱᑦᔪᑎᒋᓗᒍ.”
ᐃᓐᖏᐅᑎ ᒎᑎᒥᒃ ᓂᕐᑐᐃᓂᕐᒧᑦ
15ᐊᑕᓂᐅᑉ ᐱᔪᓐᓇᕐᓂᕐᒥᓄᑦ ᓄᓇ ᓴᓇᓚᐅᕐᐹ;
ᓯᓚᕐᔪᐊᕐᓗ ᐱᓐᖑᕐᑎᓚᐅᕐᐹ ᓯᓚᑐᓂᕐᒥᓄᑦ
ᕿᓚᒡᓗ ᓯᐊᒻᒪᖓᑎᑉᐹ ᑐᑭᓯᐅᒪᑦᓯᐊᕐᓂᕐᒥᓄᑦ.
16ᓂᐱᒥᓄᑦ ᓂᓪᓕᕌᖓᑦ ᓯᓚ ᐃᒃᑑᓕᔮᕈᓐᓇᕐᐳᖅ,
ᓄᕗᔭᓂᒃ ᓴᖅᑭᑎᑦᓯᔪᓐᓇᕐᑐᖅ ᓄᓇᕐᔪᐊᑉ ᑭᒡᓕᖓᓂᑦ,
ᓯᓚᓗᓕᕌᖓᑦ ᖃᐅᒻᒪᓪᓚᖃᕐᑎᑦᓯᔪᓐᓇᕐᐳᖅ,
ᐊᓄᕌᓕᕐᑎᑦᓯᕙᒃᑐᖅ ᐊᓄᕆᒃᑯᕕᖁᑎᒥᓂᑦ.
17ᐃᓄᓕᒫᑦ ᑐᑭᓯᒪᓐᖏᓚᑦ ᖃᐅᔨᒪᓇᑎᒡᓗ;
ᒎᓗᒥᒃ ᓴᓇᓐᖑᐊᕐᑏᑦ
ᒎᑎᓐᖑᐊᓕᐊᒥᖕᓂᒃ ᑲᓐᖑᓲᑎᒃᓴᓕᐅᕐᐸᒃᐳᑦ,
ᓴᓇᓐᖑᐊᕐᑕᖏᑦ ᓱᓕᖏᒻᒪᑕ ᐊᓂᕐᓂᖃᕋᑎᒡᓗ.
18ᐊᑐᕐᓇᓐᖏᓚᑦ ᒥᑕᐅᑎᒋᔭᒃᓴᓕᐅᑐᐃᓐᓇᕐᐳᑦ,
ᖃᐅᔨᓇᓱᐊᕐᑕᐅᒃᐸᑕ ᐊᑐᕐᑐᒃᓴᐅᖏᓐᓂᖏᑦ
ᓇᓗᓇᕈᓐᓃᕋᔭᕐᐳᑦ.
19ᔧᑰᓪᓕ ᒎᑎᖓ ᑖᒃᑯᑎᑐᓇᖅ ᑍᒤᓐᖏᓚᖅ,
ᑕᒤᓐᓂᒃ ᐱᓐᖑᕐᑎᑦᓯᔨᐅᖕᒪᑦ,
ᐃᓄᖁᑎᖏᑕᓗ ᑭᖑᕚᕇᖏᑦ ᐱᒋᐊᕐᑎᓯᒪᕔᑦ,
ᐊᑕᓂᕐᒥᒃ ᐊᔪᒐᖃᖏᑦᑐᕐᔪᐊᕐᒥᒃ ᑖᓐᓇ ᐊᑎᖃᕐᐳᖅ.
ᐊᑕᓂᐅᑉ ᑲᐅᑕᐅᔭᖓ
20ᐊᑕᓂᖅ ᐅᖃᕐᐳᖅ,
“ᑲᐅᑕᕆᕙᒋᑦ ᓱᒋᐅᑎᒋᓪᓗᑎᓪᓗ ᐅᓇᑕᕐᑎᓪᓗᖓ;
ᐊᑐᕐᓗᑎᑦ ᐃᓅᖃᑎᒌᒡᔪᐊᓂᒃ ᐊᐅᓚᑦᔧᓯᒪᕗᖓ,
ᐊᑐᕐᓗᑎᓪᓗ ᐊᖓᔪᖅᑲᐅᕕᒃᔪᐊᓂᒃ ᐊᓯᕈᐃᓯᒪᕗᖓ.
21ᐊᑐᕐᓗᑎᑦ ᐊᓯᕈᐃᓚᐅᕐᐳᖓ
ᕿᒻᒥᕐᔪᐊᓂᒃ ᐃᑭᒪᔨᐊᖏᓐᓂᒡᓗ,
ᐊᑐᕐᓗᑎᓪᓗ ᐊᓯᕈᐃᓚᐅᕐᐳᖓ
ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ ᐃᑭᒪᔨᐊᖏᓐᓂᒡᓗ.
22ᐊᑐᕐᓗᑎᑦ ᐊᓯᕈᐃᓚᐅᕐᐳᖓ
ᐊᖑᑎᓂᒃ ᐊᕐᓇᓂᒡᓗ,
ᐊᑐᕐᓗᑎᓪᓗ ᐊᓯᕈᐃᓚᐅᕐᐳᖓ
ᐃᓄᑐᖃᐅᓕᕐᑐᓂᒃ ᐃᓅᓱᒃᑐᓂᒡᓗ,
ᐊᑐᕐᓗᑎᑦᑕᐅᖅ ᐊᓯᕈᐃᓚᐅᕐᐳᖓ
ᓄᓖᑦᑐᓂᒃ ᐅᐃᒡᒐᓱᖕᓂᒡᓗ.
23ᐊᑐᕐᓗᑎᑦ ᐊᓯᕈᐃᓚᐅᕐᐳᖓ
ᓰᐱᓕᕆᔨᓂᒃ ᓰᐱᖁᑎᖏᓐᓂᒡᓗ,
ᐊᑐᕐᓗᑎᓪᓗ ᐊᓯᕈᐃᓚᐅᕐᐳᖓ
ᐆᒪᔪᓕᕆᔨᓂᒃ ᐆᒪᔪᖁᑎᖏᓐᓂᒡᓗ,
ᐊᑐᕐᓗᑎᑦᑕᐅᖅ ᐊᓯᕈᐃᓚᐅᕐᐳᖓ
ᐊᐅᓚᑦᓯᔨᓂᒃ ᐊᖓᔪᖅᑳᖑᔪᓂᒡᓗ.”
ᐹᐱᓘᓂᒥᐅᑦ ᐊᑭᓂᐊᕐᑕᐅᓂᖓ
24ᐊᑕᓂᖅ ᐅᖃᕐᐳᖅ, “ᑕᐅᑐᒃᑎᓪᓗᓯ ᐹᐱᓘᓂ ᐊᑭᓂᐊᓛᕐᐸᕋ ᑕᕝᕙᓂᓗ ᓄᓇᖃᕐᑐᑦ ᑲᐅᓪᑎᐊᒥᐅᑦ, ᐱᐅᖏᑦᑐᓕᓂᕆᓚᐅᕐᑕᖏᓐᓄᑦ ᓮᐅᓂᒥ. 25ᑕᑯᒋᑦ, ᐊᑭᕋᕆᓕᕐᐸᒋᑦ ᐊᓯᕈᕐᓮᔨᑐᐃᓐᓇᐅᒐᕕᑦ, ᓄᓇᕐᔪᐊᓕᒫᒥ ᐊᓯᕈᐃᔨᐅᒐᕕᑦ, ᐊᑕᓂᖅ ᐅᖃᕐᐳᖅ. ᑕᓖᒃᑲᒃ ᐃᓵᒃᑎᒍᒃᑭᒃ ᐃᓐᓈᕉᑉ ᓯᓇᕐᔪᐊᓂᑦ ᐃᔪᒃᑲᕈᕕᑦ, ᖃᖅᑲᐅᓕᕈᒫᕐᐳᑎᑦ ᐃᑭᓐᓂᑯᑎᑐᑦ ᑍᒤᓕᕐᓗᑎᑦ. 26ᐃᒡᓗᓕᐅᕐᑐᓄᑦ ᑎᕆᖅᑯᒃᓴᒥᒃ ᐅᔭᕋᒃᓴᕐᑖᕐᕕᐅᓚᐅᕐᓯᒪᒃᔮᓐᖏᓚᑎᑦ, ᑐᓐᖓᕕᒃᓴᐅᓂᐊᕐᑐᒥᒡᓘᓐᓃᑦ ᐅᔭᕋᒃᑖᕐᕕᐅᓂᐊᓐᖏᓚᑎᑦ, ᓱᓁᕈᓯᒪᔪᒫᕋᕕᑦ ᐃᓱᖃᖏᑦᑐᒧᑦ, ᐊᑕᓂᖅ ᐅᖃᕐᐳᖅ.
27“ᓄᓇᓕᖕᓂ ᓇᓗᓁᒃᑯᑕᕐᒥᒃ ᓴᖅᑭᑦᑎᓕᕆᑦᓯ, ᖁᖁᐊᕈᑦ ᓂᓪᓕᕐᑎᓕᕐᓯᐅᒃ ᐃᓅᖃᑎᒌᒡᔪᐊᓪᓗ ᐊᑐᐃᓐᓇᕈᕐᑎᓕᕐᓯᐅᒃ ᐅᓇᑕᕆᐊᖁᓪᓗᒋᑦ, ᕾᖁᔨᓕᕆᑦᓯ ᐊᖓᔪᖅᑲᐅᕕᖕᓂᒃ ᐅᑯᓂᖓ; ᐊᕋᕌᑦᒥᐅᓂᒃ, ᒥᓐᓂᒥᐅᓂᒃ, ᐊᔅᑭᓇᔅᒥᐅᓂᒡᓗ, ᑖᒃᑯᐊ ᐊᐅᓚᑦᓯᔨᒋᓂᐊᕐᑕᖏᓐᓂᒃ ᓇᓗᓁᕐᓯᓗᓯ ᕿᒻᒥᕐᔪᐊᒦᑦᑐᓂᒃ ᑎᓕᓯᓕᕆᑦᓯ ᐱᒡᓕᕐᑕᐅᔮᕐᑐᑎᑐᑦ ᐅᓄᕐᑎᒋᔪᓂᒃ. 28ᐃᓅᖃᑎᒌᒡᔪᐊᑦ ᐅᓇᑕᕆᐊᕐᑐᒃᓴᓕᐊᕆᓗᒋᑦ ᐅᐸᓗᖕᒊᔭᓕᕐᓯᒋᒃ ᐹᐱᓘᓂᒧᑦ, ᒥᑏᔅᒥᐅᑦ ᐊᖓᔪᖅᑳᕐᔪᐊᖏᑦ ᐊᐅᓚᑦᓯᔨᖁᑎᖏᓪᓗ, ᐊᖓᔪᖅᑳᖁᑎᖏᓪᓗ, ᓄᓇᓖᓪᓗ ᑖᒃᑯᓄᖓ ᐊᐅᓚᑕᐅᔪᑦ. 29ᓄᓇ ᓴᔪᒃᐱᓗᒃᐳᖅ ᐋᓐᓂᕇᓯᕐᑐᑎᑐᑦ, ᐊᑕᓂᐅᑉ ᐹᐱᓘᓂᒥᐅᓄᑦ ᐊᑭᓂᐊᕐᓂᕆᔪᒪᔭᖓ ᓇᓪᓕᐅᑎᖕᒪᑦ, ᐹᐱᓘᓂᒥᐅᑦ ᓄᓇᖓᑦ ᓱᓁᕈᑦᔭᐅᖕᒪᑦ ᓄᓇᖃᕐᕕᐅᔪᓐᓇᕈᓐᓃᕐᐳᖅ ᑭᓇᒃᑯᑐᐃᓐᓇᕐᓄᑦ. 30ᐹᐱᓘᓂᒥᐅᑦ ᐅᓇᑕᕐᑎᖁᑎᖏᑦ ᓴᐱᓕᕐᐳᑦ, ᐱᔭᐅᑦᑍᓕᕕᖕᒥᓃᒃᑲᓗᐊᕐᓗᑎᒃ, ᑕᖃᓂᕐᒧᑦ ᐊᕐᓇᑎᑐᑦ ᑍᒤᓕᕐᒪᑕ, ᐊᖏᕐᕋᖏᑦ ᐃᑯᐊᓪᓚᒃᑕᐅᖕᒪᑕ, ᐃᑎᕐᑕᕐᕕᖏᑕᓗ ᓴᕕᕋᔭᒃᑕᖏᑦ ᓯᖁᑦᑎᕐᑕᐅᖕᒪᑕ. 31ᑐᐊᕕᕐᑐᒥᒃ ᑐᓴᕐᑎᑦᓯᔩᑦ ᐅᐃᒍᓕᕇᒡᓗᑎᒃ ᑐᓴᕐᑎᑦᓯᔭᕐᑐᕐᐳᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᐃᒡᓗᒐᓴᒡᔪᐊᖁᑎᖏᑕ ᐱᔭᐅᓂᖏᓐᓂᒃ ᐃᓱᐊᓂᑦ ᐃᓱᐊᓄᑦ. 32ᑰᑦ ᐃᑳᕈᑎᖃᕈᓐᓃᕐᑎᑕᐅᕗᑦ, ᐃᒡᓗᐃᑦ ᐱᔭᐅᑦᔧᕐᓯᒪᔪᑦ ᐃᑯᐊᓪᓚᒃᑕᐅᕗᑦ, ᐅᓇᑕᕐᑏᓪᓗ ᐅᐃᒻᒪᒃᑎᑕᐅᕗᑦ. 33ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ; ᐹᐱᓘᓂᒥᐅᑦ ᐸᓂᖓ ᓂᐊᖂᔭᒃᓴᓂᒃ ᓴᓃᔧᕕᒃᑎᑐᑦ ᑍᒤᑉᐳᖅ, ᑐᓪᓕᕋᕐᑕᐅᓚᐅᕐᓗᓂ ᑲᑎᕐᓱᐃᕕᒃᓴᖓ ᓇᓪᓕᐅᑎᔪᒫᕆᕗᖅ.”
34ᓂᐱᑯᓁᓴᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ
ᔨᕉᓴᓕᒥᐅᖑᔪᒍᑦ ᓂᕆᓚᐅᕐᐹᑎᒍᑦ,
ᒪᕐᕋᑎᑐᑦ ᐃᓗᓕᖃᖏᑦᑐᑎᑐᑦ ᑍᒤᑎᓚᐅᕐᐹᑎᒍᑦ,
ᖁᒡᓗᒋᐊᑎᑐᑦ ᐄᕚᑎᒍᑦ,
ᓂᕆᓚᐅᕐᓗᓂᑎᒍᓪᓗ ᐅᕆᐊᕆᕚᑎᒍᑦ.
35ᓮᐅᓂᒥᐅᑦ ᐅᖃᕐᓕᑦ,
“ᐹᐱᓘᓂᒥᐅᑦ ᐊᑭᒋᐊᕐᑕᐅᔪᒃᓴᐅᕗᑦ
ᐋᓐᓂᐊᑎᑦᓯᓂᕆᓚᐅᕐᑕᖏᑎᑐᑦ.”
ᔨᕉᓴᓕᒥᐅᑦᑕᐅᖅ ᐅᖃᕐᓕᑦ,
“ᑲᐅᓪᑎᐊᒥᐅᑦ ᑐᖁᕋᕐᑕᐅᓕᑦ ᑐᖁᕅᓯᒪᓂᖏᑎᑐᑦ.”
ᐊᑕᓂᐅᑉ ᐃᓴᕆᐊᓕᒥᐅᑦ ᐃᑲᔪᕐᓂᐊᕐᐰᑦ
36ᑍᒤᒻᒪᑦ, ᐃᒫᒃ ᐊᑕᓂᖅ ᐅᖃᕐᐳᖅ, “ᑕᑯᒋᑦ, ᓴᐳᑎᓂᐊᕐᐸᑦᓯ ᓯᕐᓈᕐᓗᖓ ᐊᑭᒋᐊᕈᑎᓂᐊᕐᐸᑦᓯ; ᑕᕆᐅᖁᑎᖏᑦ ᐃᒤᕈᑎᑎᓐᓂᐊᕐᐸᒃᑲ, ᓄᓇᒥᓪᓗ ᑰᒃᑐᖁᑎᖏᑦ ᓴᓗᐊᕐᑎᓪᓗᒋᑦ. 37ᐹᐱᓘᓂᒥᐅᑦ ᖃᑦᑎᒃᓯᓯᒪᓕᕈᒫᕐᐳᑦ ᓄᓇᓕᕕᓂᑐᐃᓐᓇᐅᓕᕈᑎᒃ, ᑎᕆᒐᓂᐊᖓᔪᓄᑦ ᐃᓂᐅᓕᕐᓂᐊᕐᐳᖅ ᑕᑯᒥᓁᑦᑐᕐᔪᐊᖑᔪᒫᕐᐳᖅ, ᐃᓄᖃᖏᓪᓗᓂᓗ. 38ᐃᓄᖏᑦ ᓛᔭᑎᑐᑦ ᓂᓪᓕᐊᕗᑦ, ᓛᔮᕋᕐᑎᑐᓪᓗ ᖃᓕᖑᐊᕐᓗᑎᒃ. 39ᐆᒻᒪᕆᒃᓴᕐᓂᖏᓐᓂ ᓂᕆᕕᒃᔪᐊᕐᑎᑦᓱᒪᕙᒃᑲ, ᐋᖓᔮᓕᕐᑎᓪᓗᒋᓪᓗ, ᐃᒡᓚᒪᔭᖁᓪᓗᒋᑦ ᑍᒤᑦᑑᓕᕐᓗᑎᒃ ᓯᓂᓕᕈᑎᒃ ᐃᖅᑯᒻᒪᓐᖏᓮᓐᓇᖁᓪᓗᖏᑦ, ᐊᑕᓂᖅ ᐅᖃᕐᐳᖅ. 40ᑐᖁᑕᐅᑎᑦᓱᒫᕐᐸᒃᑲ ᓄᕐᕋᐅᔭᑎᑐᑦ, ᑐᖁᑕᐅᔭᕐᑐᕐᑎᓪᓗᒋᓪᓗ ᓰᐱᑎᑐᑦ ᐊᖑᓴᓪᓗᕐᑎᑐᑦ ᒎᑦᓯᑎᑐᓪᓗ.”
ᐹᐱᓘᓂᐅᑉ ᐃᓱᓕᑎᑕᐅᓂᖓ
41ᐊᑕᓂᖅ ᐅᖃᕐᐳᖅ, “ᓯᓵᒃ ᐹᐱᓘᓂ ᓵᓚᒋᔭᐅᓗᓂ ᐱᔭᐅᔪᒫᕐᐳᖅ, ᓄᓇᕐᔪᐊᕐᒥᐅᓄᑦ ᓂᕐᑐᕐᑕᐅᓂᕐᐹᖑᕙᒃᑐᖅ ᑕᑯᒥᓁᑦᑐᕐᔪᐊᖑᓕᕈᒫᕐᐳᖅ ᐃᓅᖃᑎᒌᒡᔪᐊᓄᑦ ᑕᑯᔭᐅᓗᑎᒃ. 42ᑕᕆᐅᑉ ᐅᓕᑎᓐᓂᖓᓄᑦ ᐹᐱᓘᓂᒥᐅᑦ ᑎᑭᑕᐅᔪᒫᕐᐳᑦ, ᐃᖏᐅᓕᒡᔪᐊᖏᓐᓄᓪᓗ ᐅᓕᒃᑕᐅᔪᒫᕐᐳᖅ. 43ᓄᓇᓕᖁᑎᖏᑦ ᓱᓁᕈᑎᔪᒫᕐᐳᑦ, ᐸᓂᕐᓗᑎᒃ ᓯᐅᕋᕐᔪᐊᑎᑐᑦ ᑍᒤᓕᕐᓗᑎᒃ ᓄᓇᖃᕐᕕᐅᔪᓐᓃᕐᓗᑎᒡᓗ, ᐃᖏᕐᕋᔪᓄᓪᓗ ᐊᖅᑯᑎᐅᔪᓐᓃᕐᓗᑎᒃ. 44ᐹᐱᓘᓂᒥᐅᑦ ᒎᑎᒋᔭᖓᑦ ᐱᐊᓪ ᓱᒋᐊᕈᒫᕐᐸᕋ, ᒥᕆᐊᕐᑎᓪᓗᒍᓗ ᐄᔭᕕᓂᖏᓐᓂᒃ, ᐃᓅᖃᑎᒌᒡᔪᐊᓄᑦ ᐅᐸᒃᑕᐅᕙᒍᓐᓃᕈᒫᕐᐳᖅ.
“ᐹᐱᓘᓂᒥᐅᑦ ᐊᕙᓗᕐᔪᐊᖓ ᐅᕐᕈᔪᒫᕐᒪᑦ. 45ᐃᓄᖁᑎᒃᑲ ᑕᕝᕙᓐᖓᑦ ᐊᓂᓕᕆᑦᓯ! ᐅᓪᓚᒃᓯᓕᕆᑦᓯ ᐃᓅᔪᒪᒍᑦᓯ! ᕿᒫᓗᓯ ᐊᑕᓂᐅᑉ ᓂᓐᖓᖕᓂᕐᔪᐊᖓᓂᑦ. 46ᑲᑉᐱᐊᓱᖕᓂᐊᕋᓯ ᓯᕘᕋᓇᓯᓗ, ᐅᖃᐅᓯᐅᕈᓘᔭᕐᑐᓂᒃ ᑐᓴᓕᕋᓗᐊᕈᑦᓯ ᐊᕐᕌᒍᑕᒫᑦ ᐅᖃᐅᓯᐅᕈᓘᔭᕐᑐᑦ ᐅᖃᐅᓯᐅᖃᑦᑕᕐᒪᑕ ᑲᑉᐱᐊᓇᕐᑐᖃᕐᓂᕅᔪᑦ ᓄᓇᒥ, ᐊᖓᔪᖅᑳᖑᔪᓪᓗ ᐊᖓᔪᖅᑳᖑᖃᑎᒥᖕᓄᑦ ᐊᑭᕋᕐᑐᕐᓂᕋᕐᑕᐅᔪᑦ. 47ᑍᒤᒻᒪᑦ, ᑕᑯᒋᑦ, ᐅᓪᓗᐃᑦ ᓇᓪᓕᐅᑎᔪᒫᕐᐳᑦ ᐹᐱᓘᓂᒥᐅᑦ ᒎᑎᖏᓐᓂᒃ ᓱᒋᐊᕐᓯᔪᒫᕐᓂᕋ, ᓄᓇᓕᒫᖓᑦ ᐱᐅᔪᓐᓃᕐᑎᑦᓱᒫᕐᐸᕋ, ᑐᖁᕋᕐᑕᐅᓂᑯᐃᑦ ᓄᓇᖓᓐᓂ ᓇᓂᑐᐃᓐᓈᕈᒫᕐᐳᑦ. 48#ᑕᑯᑎ 18:20.ᕿᓚᖕᒥᓗ ᓄᓇᒥᓗ ᓯᕆᑦᔪᑕᐅᔪᒫᕐᐳᖅ ᐹᐱᓘᓂ, ᐅᓐᓄᐊᓪᓗᐊᑉ ᓇᓛᓂᑦ ᐊᓯᕈᐃᔪᒃᓴᑦ ᑎᑭᑦᓱᒫᕐᒪᑕ, ᐊᑕᓂᖅ ᐅᖃᕐᐳᖅ. 49#ᑕᑯᑎ 18:24.ᐃᓴᕆᐊᓕᒥᐅᓂ ᑐᖁᕋᕐᑕᐅᖃᑦᑕᕐᓯᒪᔪᑦ ᐱᓪᓗᒋᑦ ᐹᐱᓘᓂᒥᐅᑦ ᑲᑕᒍᑎᒋᔪᒫᕐᐰᑦ, ᑍᒫᒃᑕᐅᖅ ᓄᓇᖃᕐᑐᑦ ᐅᓄᕐᑐᑦ ᑲᑕᖃᑦᑕᕐᓯᒪᖕᒪᑕ ᐹᐱᓘᓂᒥᐅᑦ ᑐᖁᕅᖃᑦᑕᕐᓯᒪᓂᖏᓐᓄᑦ.”
ᐊᑕᓂᐅᑉ ᐅᖃᐅᑦᔨᓂᖓ ᐃᓴᕆᐊᓕᒥᐅᓂᒃ ᐹᐱᓘᓂᒦᑦᑐᓂᒃ
50“ᐅᓇᑕᕐᑐᓂ ᑐᖁᑕᐅᓐᓂᖏᒃᑯᑦᓯ ᐊᐅᓪᓚᑲᐅᑎᒋᔪᒃᓴᐅᕗᓯ ᓄᖅᑲᖓᑐᐃᓐᓇᖏᓪᓗᓯ! ᐊᑕᓂᖅ ᐃᖅᑲᕐᓯᐅᒃ ᐅᖓᓯᒃᑐᒦᓐᓂᑦᓯᓐᓄᑦ, ᔨᕉᓴᓕᒻᓗ ᐃᓱᒪᒋᓯᐅᒃ. 51ᑲᓐᖑᓇᕐᑐᒥᒃ ᐊᑐᕐᑎᑕᐅᒐᑦᑕ, ᒥᑕᐅᑎᒋᔭᐅᓯᒪᓂᑦᑎᓐᓄᑦ ᑲᓐᖑᓱᓕᕐᐳᒍᑦ, ᐃᓅᖃᑎᒋᓚᐅᕐᓯᒪᓐᖏᑕᑦᑎᓐᓄᑦ ᑐᒃᓯᐊᕐᕕᒡᔪᐊᖅ ᐊᑕᓂᐅᑉ ᐃᑦᔪᕐᓁᑦᑐᖁᑎᖓ ᐃᓵᕐᑕᐅᓯᒪᖕᒪᑦ. 52ᑍᒤᒻᒪᑦ, ᑕᑯᒋᑦ, ᐅᓪᓗᐃᑦ ᑎᑭᑦᓱᒫᕐᐳᑦ, ᐊᑕᓂᖅ ᐅᖃᕐᐳᖅ, ᒎᑎᒋᔭᖏᑦ ᓱᒋᐊᕈᒫᕋᒃᑭᑦ, ᓄᓇᖏᓐᓂᓗ ᓇᓂᑐᐃᓐᓇᖅ ᓂᐹᔪᖃᕈᒫᕐᐳᖅ ᐃᑭᓕᕐᑕᐅᓂᑯᓂᒃ. 53ᐹᐱᓘᓂᒥᐅᑦ ᕿᓚᖕᒧᑦ ᑎᑭᐅᓯᒪᔪᓐᓇᕋᓗᐊᕐᐸᑕ, ᐱᔭᐅᑦᔧᕐᓯᒪᓂᖓᓄᑦ ᐅᓇᖕᒥᓇᖏᒃᑲᓗᐊᕐᐸᑕ, ᐊᓯᕈᐃᔪᒃᓴᓂᒃ ᑎᑭᕝᕕᐅᑎᑦᓱᒫᕐᐸᒃᑲ, ᐊᑕᓂᖅ ᐅᖃᕐᐳᖅ.”
ᐹᐱᓘᓂᒥᐅᑦ ᓱᓕ ᓱᕋᒃᑎᕐᑕᐅᕙᓪᓕᐊᓂᒃᓴᖓ
54“ᓈᓚᒋᑦᓯ, ᕿᐊᔪᑦ ᑐᓴᕐᓴᐅᕗᑦ ᐹᐱᓘᓂᒥᑦ,
ᐊᓯᕈᕐᑕᐅᔪᑦ ᑐᓴᕐᓴᐅᖕᒪᑕ,
ᑲᐅᓪᑎᐊᒥᐅᑦ ᓄᓇᖓᓂ.
55ᐊᑕᓂᐅᑉ ᐹᐱᓘᓂᒥᐅᑦ ᐊᓯᕈᕈᒫᕐᐰᑦ,
ᓂᐱᕐᔪᐊᖏᑦ ᓂᐰᕐᑎᓪᓗᒋᑦ,
ᐊᑭᕋᖏᓐᓄᑦ ᑎᑭᑕᐅᔪᒫᕐᐳᑦ ᒪᓕᒡᔪᐊᑎᑐᑦ,
ᐊᑭᕋᖏᑕ ᐅᓇᑕᕐᑎᖁᑎᕐᔪᐊᖏᓐᓄᑦ.
56ᐹᐱᓘᓂᒥᐅᑦ ᑎᑭᑕᐅᓂᐊᕐᒪᑕ ᐊᓯᕈᐃᔨᒧᑦ
ᐅᓇᑕᕐᑎᖁᑎᖏᑦ ᑎᒍᔭᐅᓂᐊᕐᐳᑦ,
ᐱᑎᒃᓯᖏᓪᓗ ᓱᕋᒃᑎᕐᑕᐅᓗᑎᒃ.
ᒎᑎ ᐊᑕᓂᖅ ᐊᑭᓂᐊᕐᑎᐅᖕᒪᑦ,
ᐊᑭᓂᐊᕈᒫᕐᐰᑦ ᖁᓚᕐᓇᖏᑦᑐᒥᒃ.
57ᐊᖓᔪᖅᑳᖁᑎᖏᑦ ᓯᓚᑐᔪᖁᑎᖏᓪᓗ ᐋᖓᔮᓕᕐᑎᓐᓂᐊᕐᐸᒃᑲ,
ᐊᐅᓚᑦᓯᔨᖏᑦ ᐅᓇᑕᕐᑐᒃᓴᖁᑎᖏᑦ ᐅᓇᑕᕐᑐᒃᓴᓪᓗ
ᐊᖓᔪᖅᑳᖏᑦ ᐱᖃᓯᐅᑎᓗᒋᑦ,
ᓯᓂᓕᕈᑎᒃ ᑐᐸᒍᒫᓐᖏᓚᑦ;
ᐊᖓᔪᖅᑳᖑᓂᕐᐹᖅ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓂᒃ
ᐊᑎᖃᕐᑐᖅ ᑕᒪᑐᒥᖓ, ᐅᖃᕐᐳᖅ.
58ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ,
ᐹᐱᓘᓂᒥᐅᑦ ᐊᕙᓗᕐᔪᐊᖓ ᐃᑦᔪᔪᐊᓘᒐᓗᐊᖅ
ᓄᖑᑎᑕᐅᓗᓂ ᒪᓂᖅᑲᒦᓕᕈᒫᕐᐳᖅ,
ᐃᑎᕐᑕᕐᕕᖏᓪᓗ ᐃᑯᐊᓪᓚᒃᑕᐅᓗᑎᒃ.
ᐃᓄᐃᑦ ᐱᓇᓱᐊᕕᒃᔪᐊᕐᓂᕆᓚᐅᕐᑕᖏᑦ ᐊᑐᕐᓇᕐᓂᖃᓐᖏᓚᑦ,
ᐃᓅᖃᑎᒌᒡᔪᐊᓪᓗ ᓴᓇᖃᑦᑕᕐᓯᒪᔭᖏᑦ ᐃᑯᐊᓪᓚᖅᑯᑎᒃᓴᓐᖑᕐᐳᑦ.”
ᔨᕆᒤᐊᑉ ᐅᖃᐅᓯᖏᑦ ᐹᐱᓘᓂᒧᑦ
59ᐅᑯᐊ ᐅᖃᐅᓰᑦ ᔨᕆᒤᐊᐅᑉ ᑐᓂᑦᔪᑎᒋᓚᐅᕐᐰᑦ ᐅᓇᑕᕐᑏᑦ ᐊᖓᔪᖅᑳᖓᓐᓄᑦ ᓯᕅᐊᒧᑦ ᓂᕅᐊᐅᑉ ᐃᕐᓂᖓᓄᑦ, ᒪᕼᐊᓮᐊᐅᑉ ᐃᕐᖑᑕᖓᓄᑦ, ᐹᐱᓘᓂᒧᐊᓕᕐᑎᓪᓗᒍ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᔨᑎᑬᐊᒥᒃ ᐱᖃᑎᖃᕐᓗᓂ ᐊᐅᓚᑦᓯᓂᖏᑕ ᐊᕐᕌᒍᐃᑦ ᓯᑕᒪᒋᓕᕐᑕᖓᓐᓂ, ᓯᕅᐊ ᐅᓇᑕᕐᑏᑦ ᐊᖓᔪᖅᑳᕆᓚᐅᕐᐹᑦ. 60ᔨᕆᒤᐊᐅᑉ ᑎᑎᕋᓚᐅᕐᑕᖏᓐᓂᑦ ᐊᒡᓚᑎᒍᑦ ᐃᒧᑦᑕᕐᑐᑎᒍᑦ, ᐹᐱᓘᓂᒥᐅᓄᑦ ᑎᑭᐅᑎᔪᒫᕐᑐᓂᒃ ᐹᐱᓘᓂᒥᐅᓪᓗ ᐊᑐᕈᒫᕐᑕᖏᓐᓂᒃ ᐅᖃᐅᓯᖃᕐᑐᓂᒃ. 61ᔨᕆᒤᐊ ᓯᕅᐊᒧᑦ ᐅᖃᕐᐳᖅ, “ᐹᐱᓘᓂᒧᑦ ᑎᑭᒃᑯᕕᑦ, ᑖᒃᑯᐊ ᐅᖃᓕᒫᕈᒫᕐᐸᑎᑦ ᓂᐱᖃᑦᓯᐊᕐᓗᑎᑦ ᐃᓄᖕᓄᑦ. 62ᐅᖃᕐᓗᑎᓪᓗ, ‘ᐊᑕᓃᖅ, ᐅᖃᓚᐅᕋᕕᑦ ᑖᒃᑯᐊ ᓄᓇᓖᑦ ᐊᓯᕈᕈᒫᕐᓂᕋᕐᓗᒋᑦ ᓇᔪᒐᒃᓴᐅᔪᓐᓃᖁᓪᓗᒋᑦ ᐆᒪᔪᓄᑦ ᐃᓄᖕᓄᓪᓗ, ᓱᓇᖃᕈᓐᓁᕈᒫᕐᒪᑦ ᐃᓱᖃᖏᑦᑐᒧᑦ.’ 63#ᑕᑯᑎ 18:21.ᐊᒡᓔᑦ ᐅᑯᐊ ᐅᖃᓕᒫᕇᕈᕕᒋᑦ ᐅᔭᖅᑲᒥᒃ ᕿᓚᒃᓯᕕᒋᓗᒋᑦ ᑰᑉ ᐃᕗᕅᑎᐅᑉ ᕿᑎᖓᓄᑦ ᐃᒋᑦᓱᒫᕐᐸᑎᑦ. 64ᐅᖃᕐᓗᑎᓪᓗ, ‘ᐹᐱᓘᓂᑦᑕᐅᖅ ᑍᒫᒃ ᑭᕕᑎᑦᓱᒫᕐᐸᕋ ᒪᑭᒃᑲᓐᓂᕈᓐᓁᕐᓗᓂᓗ ᑲᑉᐱᐊᓇᕐᑐᓄᑦ ᑎᑭᕝᕕᐅᑎᑦᓱᒫᕋᒃᑯ, ᐃᓄᖏᓪᓗ ᑲᑕᒍᒫᕐᐳᑦ.’”
ᑕᕝᕗᖓ ᑎᑭᓪᓗᒋᑦ ᔨᕆᒤᐊᐅᑉ ᐅᖃᐅᓯᖏᑦ ᐃᓱᓕᑉᐳᑦ.
Currently Selected:
ᔨᕆᒤᐊᐅᑉ ᐊᒡᓚᖏᑦ 51: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
