ᐃᓗᐊᕐᓮᔩᑦ ᐊᒡᓚᖏᑦ 4
4
ᑎᐴᕋ ᐊᒻᒪᓗ ᐸᕌᒃ
1ᐃᓴᕆᐊᓕᒥᐅᑦ ᐱᐅᖏᑦᑐᐊᓗᖕᓂᒃ ᐱᓂᐊᕐᓂᖃᓕᓚᐅᕆᕗᑦ ᐊᑕᓂᕐᒧᑦ. ᐃᕼᐅᑦ ᑐᖁᓂᖓᑕ ᑭᖑᓂᐊᒍᑦ. 2ᐊᑕᓂᐅᑉ ᓵᓚᐅᑎᓚᐅᕐᐰᑦ ᔮᐱᓂᒧᑦ, ᑬᓇᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐊᐅᓚᑦᓯᕕᖃᕐᑐᒧᑦ ᐃᒡᓗᒐᓴᒡᓂ ᕼᐂᔭᒥ. ᐅᓇᑕᕐᑐᒃᓴᖁᑎᖓᑕ ᐊᖓᔪᖅᑳᕆᓚᐅᕐᑕᖓ ᓯᓰᕋ, ᐊᖏᕐᕋᖃᓚᐅᕐᑐᖅ ᕼᐊᕈᓯᑎ-ᕼᐊᒍᔨᒻᒥ. 3ᐃᓴᕆᐊᓕᐅᑦ ᐃᓄᖏᑦ ᐃᓗᖏᕐᓱᓕᓚᐅᕐᐳᑦ ᓂᓪᓕᐊᓪᓗᑎᒃ ᐊᑕᓂᕐᒧᑦ ᐃᑲᔪᕐᑕᐅᔪᒪᓪᓗᑎᒃ; ᔮᐱᓐ ᐱᖃᓚᐅᕐᒪᑦ 900ᓂᒃ ᓴᕕᕋᔭᖕᓂᒃ ᕿᒧᒃᓯᐅᑎᓄᑦ ᐅᓂᐊᕐᑕᐅᓲᓂᒃ ᐊᒃᓴᓗᐊᓕᖕᓂᒃ, ᑲᑉᐱᐊᓱᒃᑎᑦᓯᓪᓗᓂᓗ ᐃᓴᕆᐊᓕᒥᐅᑦ ᐃᓄᖏᓐᓂᒃ ᐊᕐᕌᒍᓂᒃ 20ᓂᒃ ᓂᑲᒋᓇᒋᑦ.
4ᑎᐴᕋ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ, ᓚᐱᑑᑎᐅᑉ ᓄᓕᐊᖓ, ᑍᑦᓱᒪᓂ ᐃᓱᐊᕐᓮᔨᒋᔭᐅᓚᐅᕐᐳᖅ ᐃᓴᕆᐊᓕᒥᐅᓄᑦ. 5ᐃᒃᓯᕙᕙᓚᐅᕐᐳᕐᓗ ᓇᐹᕐᑑᑉ ᐹᒥᐅᑉ ᑎᐴᕋᐅᑉ ᐊᑖᓂ ᕌᒪᐅᑉ ᐱᑎᓕᐅᓪᓗ ᐊᑯᓐᓂᖓᓂ ᖃᖅᑲᓕᖕᒥ ᐃᕗᕅᒻ ᓄᓇᖓᓂ, ᐃᓴᕆᐊᓕᐅᓪᓗ ᐃᓄᖏᑦ ᐂᕙᓚᐅᕐᐳᑦ ᑖᑦᓱᒧᖓ ᐃᑲᔪᕐᑕᐅᔪᒪᓪᓗᑎᒃ ᐃᓱᐃᓪᓕᐅᕈᑎᒋᔭᒥᖕᓂᑦ. 6ᑖᓐᓇ ᑎᓕᓯᕗᖅ ᕾᖁᔭᐅᖁᓪᓗᒍ ᐸᕌᒃ ᐊᐱᓄᐊᒥᐅᑉ ᐃᕐᓂᖓ ᑭᑎᓯᒥᐅᑕᖅ ᓈᑉᑕᓕᒥᑦ, ᐅᖃᐅᑎᔭᐅᖁᓪᓗᒍ, “ᐊᑕᓂᐅᑉ ᐃᓴᕆᐊᓕᒥᐅᑦ ᒎᑎᖓᑦᑕ ᐱᖁᖕᒪᑎᑦ, ‘ᐅᓇᑕᕐᑐᒃᓴᖁᑎᖕᓂᒃ ᖃᖅᑲᒥ ᑍᐸᕆᒥ ᑲᑎᑎᑦᓯᖁᓪᓗᑎᑦ, ᐅᓇᑕᕐᑐᒃᓴᓂᒃ 10,000ᓂᒃ ᓇᒃᓴᕐᓗᑎᑦ ᓇᑉᑖᓕᐅᑉ ᑭᖑᕚᖏᓐᓂᑦ ᓯᐳᓗᓂᐅᓪᓗ ᑭᖑᕚᖏᓐᓂᑦ; 7ᓯᓰᕋ ᐊᓂᑎᓐᓂᐊᕋᒃᑯ, ᔮᐱᓂᐅᑉ ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖓᑦ, ᑭᓲᓂ ᑰᖓᓂ ᑲᑎᓂᐊᕋᕕᐅᒃ ᐊᒃᓴᓗᐊᓕᖁᑎᖏᑦ ᕿᒧᒃᓯᐅᑎᓖᑦ ᐅᓇᑕᕐᑐᒃᓴᕐᔪᐊᖁᑎᖏᓪᓗ ᐃᓚᒋᓗᒋᑦ; ᑖᓐᓇᓗ ᐃᓕᖕᓄᑦ ᑐᓂᓂᐊᕐᐸᕋ.’” 8ᐸᕌᐅᓪᓗ ᐅᖃᐅᑎᓚᐅᕐᐹ, “ᐂᓂᐊᕐᐳᖓ ᐱᖃᑎᒋᓂᐊᕈᕕᖓ; ᐱᖃᑎᒋᓂᐊᖏᒃᑯᕕᖓᓕ ᐂᓂᐊᓐᖏᓚᖓ!” 9ᐊᕐᓇᐅᑉ ᐅᖃᐅᑎᕚ, “ᓱᓕᓗᖓ ᐂᖃᑎᒋᓂᐊᕐᐸᒋᑦ; ᑭᓯᐊᓂ ᐃᕝᕕᑦ ᓂᕐᑐᕐᑕᐅᑦᔪᑎᒃᓴᕐᓯᓂᐊᓐᖏᓚᑎᑦ ᐂᕕᒋᔭᕐᓄᑦ, ᐊᑕᓂᐅᑉ ᓯᓰᕋ ᑐᓂᓂᐊᕐᒪᒍ ᐊᕐᓇᐅᑉ ᐊᒡᒐᖏᓐᓄᑦ.” ᑕᕝᕙ ᑎᐴᕋ ᓂᑯᕕᑉᐳᖅ ᐸᕌᒡᓗ ᐂᖃᑎᒋᓕᕐᐹ ᑭᑎᓯᒧᑦ. 10ᐸᕌᑭᐅᓪᓗ ᕾᖁᕔᑦ ᓯᐳᓗᓂᐅᑉ ᑭᖑᕚᖏᑦ ᐊᒻᒪᓗ ᓈᑉᑕᓕᐅᑉ ᑭᖑᕚᖏᑦ ᑭᑎᓯᒧᑦ; ᐊᖑᑎᓪᓗ 10,000ᐃᑦ ᒪᓕᒡᓗᑎᒃ ᑭᖑᓂᖓᓂ, ᑎᐴᕋᐅᑦᑕᐅᖅ ᐂᑉᐸᕆᕚ. 11ᑖᓐᓇᓕ ᕼᐃᐸᕐ ᑭᓁᑎ ᑭᓁᑎᓂᑦ ᐊᕝᕗᑎᓪᓗᓂ ᓯᓚᑖᓃᓚᐅᕐᐳᖅ, ᑭᓁᑎᑦ ᑖᒃᑯᐊ ᕼᐅᐹᐱᐅᑉ ᑭᖑᕚᖏᑦ, ᒨᓯᓯᐅᑉ ᓴᑭᒋᓚᐅᕐᑕᖓᑕ, ᑖᓐᓇ ᑐᐱᖃᕐᐳᖅ ᐅᖓᓯᒋᔭᖓᓐᓂ ᓇᐹᕐᑑᑉ ᐆᒃᒥᒃ ᐊᑎᓕᐅᑉ ᓴᓂᐊᓂ ᔮ-ᐊᓇᓂᒦᑦᑐᒥ, ᑭᑎᓯᐅᑉ ᓴᓂᐊᓂ. 12ᓯᓰᕋ ᐅᖃᐅᑎᔭᐅᒐᒥ ᐸᕌᒃ ᐊᐱᓄᐊᒻ ᐃᕐᓂᖓ ᖃᖅᑲᒧᑦ ᑍᐸᕆᒧᐊᕐᓂᕋᕐᑕᐅᖕᒪᑦ. 13ᑍᒤᒻᒪᑦ ᓯᓰᕋ ᑲᑎᖁᔨᓚᐅᕐᐳᖅ ᐊᒃᓴᓗᐊᓕᓕᒫᓂᒃ ᕿᒧᒃᓯᐅᑎᓕᖕᓂᒃ, 900ᓂᒃ ᓴᕕᕋᔭᖕᓂᒃ ᐊᒃᓴᓗᐊᓕᖕᓂᒃ, ᐊᖑᑎᓕᒫᓪᓗ ᐱᖃᑎᒋᔭᓂ, ᐂᖃᑎᒋᔪᒪᓪᓗᒋᑦ ᕼᐊᕈᓯᑎ-ᕼᐊᒍᔨᒻᒥᑦ ᑭᓲᓂᐅᑉ ᑰᖓᓄᑦ. 14ᑎᐴᕋᐅᑉ ᐸᕌᒃ ᐅᖃᐅᑎᕚ, “ᒪᑭᓕᕆᑦ! ᐅᓪᓗᖅ ᑖᓐᓇ ᓇᓪᓕᐅᑎᖕᒪᑦ ᐊᑕᓂᐅᑉ ᑐᓂᖕᒪᑎᑦ ᓯᓰᕋᒥᒃ ᐱᔪᓐᓇᕐᓂᕐᓄᑦ. ᐊᑕᓂᖅ ᐃᕝᕕᑦ ᓯᕗᓂᖓᓃᓐᖏᓛᖅ?” ᑕᕝᕙ ᐸᕌᒃ ᐊᖅᑲᕐᑎᓚᐅᕐᐳᖅ ᖃᖅᑲᒥᑦ ᑍᐸᕆᒥᑦ 10,000ᓂᑦ ᐊᖑᑎᓂᑦ ᒪᓕᒃᑕᐅᓪᓗᓂ. 15ᐊᑕᓂᐅᑉ ᓴᖑᑎᓚᐅᕐᐹ ᓯᓰᕋ ᐊᒃᓴᓗᐊᓕᓕᒫᖏᓪᓗ ᐅᓇᑕᕐᑐᒃᓴᖁᑎᖏᓪᓗ ᐸᕌᒃᒧᑦ ᑖᑦᓱᒪᓗ ᓵᓚᒋᓚᐅᕐᐰᑦ ᓴᕕᒡᔪᐊᒧᑦ; ᓯᓰᕋ ᐊᒃᓴᓗᐊᓕᖕᒥᓂᑦ ᓂᐅᓪᓗᓂ ᕿᒫᓚᐅᕐᐳᖅ ᐊᕐᐸᖏᕐᓗᓂ. 16ᐸᕌᒃᓕ ᐊᒃᓴᓗᐊᓖᑦ ᐅᓇᑕᕐᑐᒃᓮᓪᓗ ᒪᓕᓚᐅᕐᐰᑦ ᕼᐊᕈᓯᑎ-ᕼᐊᒍᔨᒻ ᑎᑭᓪᓗᒍ, ᓯᓰᕋᐅᑉ ᐅᓇᑕᕐᑐᒃᓴᖁᑎᖏᑦ ᑐᖁᑕᐅᓚᐅᕐᐳᑦ ᓴᕕᒡᔪᐊᒧᑦ, ᐊᑕᐅᓯᕐᒥᒡᓘᓐᓃᑦ ᐊᒥᐊᒃᑯᔭᐅᓚᐅᓐᖏᓚᑦ. 17ᑭᓯᐊᓂᓕ, ᓯᓰᕋ ᕿᒫᓚᐅᕐᐳᖅ ᐊᕐᐸᖏᕐᓗᓂ ᔧᓕᐅᑉ ᑐᐱᖓᓄᑦ, ᕼᐃᐸᕆᐅᑉ ᑭᓁᑎᐅᑉ ᓄᓕᐊᖓᓄᑦ; ᑖᒃᑯᐊᒃ ᓮᒻᒪᖃᑎᒌᑦᓯᐊᓚᐅᕐᒪᑎᒃ ᔮᐱᓂᒃᑯᒃ ᕼᐂᔭᒥᐅᑦ ᐊᖓᔪᖅᑳᕐᔪᐊᖓᑦ ᕼᐃᐳᕆᑯᓪᓗ ᐃᓚᖏᑦ. 18ᔧᓕᐅᑉ ᐸᕐᕆᐊᕐᐹ ᓯᓰᕋ ᐅᖃᐅᑎᓪᓗᒍᓗ, “ᕾᒋᑦ, ᐊᖓᔪᖅᑳᖅ, ᕾᒋᑦ ᐅᕙᓐᓄᑦ; ᑲᑉᐱᐊᓱᖏᓪᓗᑎᑦ.” ᑐᐱᕐᒧᓪᓗ ᐃᑎᖃᑎᒋᖕᒪᒍ ᐊᕐᓇᐅᑉ ᐅᓕᒃᐹ ᐊᓗᕐᓗᐃᔭᐅᒻᒥᒃ. 19ᐊᖑᑎᐅᓪᓗ ᐅᖃᐅᑎᕚ, “ᒥᑭᔪᒥᒃ ᐃᒥᕐᑎᓚᐅᓐᖓ; ᐃᒥᕈᒃᑲᒪ.” ᐃᒪᖃᐅᑎᒥᒃ ᑕᕝᕙ ᒪᑐᐃᕐᓯᕗᖅ ᐃᒻᒧᖕᒥᒃ ᐃᒪᓕᖕᒥᒃ, ᐃᒥᕐᑎᓪᓗᒍᓗ, ᐱᔭᕇᕋᒥᓗ ᐅᓕᒃᑭᕚ. 20ᐅᖃᐅᑎᒃᑲᓐᓂᕐᐹᓗ, “ᑐᐱᐅᑉ ᐅᒃᑯᐊᖓᑕ ᓯᓚᑖᓂ ᓇᖏᓚᐅᕆᑦ, ᐊᖑᒻᒥᒃ ᕾᔪᖃᕐᐸᑦ ᐊᐱᕐᓱᕐᑐᒥᒃ, ‘ᐊᖑᑎᑕᖃᕐᐹ ᑕᕝᕙᓃ?’ ᐅᖃᐅᑎᔪᒫᕐᐸᑦ, ‘ᐋᒃᑲ.’” 21ᑖᓐᓇᓕ ᔧᓕ, ᕼᐃᐸᕆᐅᑉ ᓄᓕᐊᖓ, ᑐᐱᐅᑉ ᐸᐅᒍᐊᖓᓂᒃ ᑲᐅᑕᕐᒥᒡᓗ ᑎᒍᓯᕗᖅ, ᑎᕐᓕᐊᕐᓗᒍᓗ ᐅᐸᒃᐹ ᐸᐅᒍᐊᕐᓗ ᑲᑉᐳᑎᕚ ᐃᕐᓴᖓᓄᑦ, ᐊᒡᓛᑦ ᒪᓂᖅᑲᒧᑦ ᐸᐅᒍᐊᕐᓗᓂ; ᖃᐅᔨᓚᐅᓐᖏᓚᖅ ᓯᓂᒃᑲᒥ ᑕᖃᓯᒪᒐᒥᓗ. ᑍᒫᒡᓗ ᑐᖁᕗᖅ. 22ᑭᖑᓂᐊᒍᓪᓕ, ᐸᕌᒃ ᒪᓕᒃᑲᒥ ᓯᓰᕋᒥᒃ, ᔧᓕᐅᑉ ᐸᕐᕆᐊᕐᐹ ᐅᖃᐅᑎᓪᓗᒍᓗ, “ᕾᒋᖅ, ᐊᖑᒻᒥᒃ ᕿᓂᕐᑕᕐᓂᒃ ᑕᑯᑎᓐᓂᐊᕋᒃᑭᑦ.” ᑐᐱᖓᓄᓪᓗ ᐃᑎᕋᒥ ᑕᑯᕗᖅ ᓯᓰᕋᒥᒃ ᓇᓚᓪᓗᓂ, ᑐᖁᖓᔪᒥᒃ ᑐᐱᐅᑉ ᐸᐅᒍᐊᖓᓄᑦ ᐃᕐᓴᒥᒍᑦ ᐸᐅᒍᐊᕐᓯᒪᔪᒥᒃ. 23ᑍᑦᓱᒪᓂ ᐅᓪᓗᒥ ᒎᑎᐅᑉ ᔮᐱᓂ ᑬᓇᓂᒥᐅᑦ ᐊᖓᔪᖅᑳᕐᔪᐊᖓ ᓵᓚᐅᑎᓚᐅᕐᐹ ᐃᓴᕆᐊᓕᒥᐅᑦ ᐃᓄᖏᓐᓄᑦ. 24ᐃᓴᕆᐊᓕᒥᐅᓪᓗ ᐃᓄᖏᑕ ᐱᔪᓐᓇᕐᓂᖏᑦ ᓴᓐᖏᔫᓕᕐᐸᓪᓕᐊᓚᐅᕐᐳᑦ ᐊᖓᔪᖅᑳᕐᔪᐊᕐᒧᑦ ᔮᐱᓂᒧᑦ ᑬᓇᓂᒥᐅᑕᕐᒧᑦ, ᐊᓯᕈᕐᑕᐅᓪᓗᓂᓗ ᐊᖓᔪᖅᑳᕐᔪᐊᖅ ᔮᐱᓂ ᑬᓇᓂᒥᐅᑕᖅ ᑭᖑᓂᖓᓂ.
Currently Selected:
ᐃᓗᐊᕐᓮᔩᑦ ᐊᒡᓚᖏᑦ 4: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.