ᐃᓗᐊᕐᓮᔩᑦ ᐊᒡᓚᖏᑦ 13
13
ᓵᒻᓲᓂᐅᑉ ᐃᕐᓂᐊᖑᓂᖓ
1ᓱᓕ ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᑦ ᐊᔪᕐᑐᓕᓚᐅᕐᐳᑦ ᐊᑕᓂᐅᑉ ᑕᒃᑯᐊᓂ, ᐊᑕᓂᐅᓪᓗ ᑐᓂᓚᐅᕐᐰᑦ ᐱᓕᔅᑍᓂᒥᐅᓄᑦ ᐊᕐᕌᒍᓄᑦ 40ᓄᑦ. 2ᐊᖑᑎᑕᖃᓚᐅᕐᐳᖅ ᔫᕋᒥᐅᑕᕐᒥᒃ, ᑖᓐ ᑭᖑᕚᖓᓂᒃ, ᒪᓄᐊᒥᒃ ᐊᑎᓕᖕᒥᒃ ᓄᓕᐊᖓᓗ ᕿᑐᕐᖏᓱᐃᑦᑑᓚᐅᕐᐳᖅ. 3ᐊᑕᓂᐅᑉ ᐂᖏᓕᖓ ᐊᕐᓇᒧᑦ ᓴᖅᑭᑉᐳᖅ ᐅᖃᐅᑎᓪᓗᒍᓗ, “ᒫᓐᓇ ᕿᑐᕐᖏᓱᐃᑦᑑᒐᓗᐊᕐᑐᑎᑦ ᕿᑐᕐᖓᖃᕋᑎᓪᓗ, ᓯᖎᓕᕐᓂᐊᕐᐳᑎᓪᓕ ᐃᕐᓂᕐᑖᕐᓗᑎᓪᓗ. 4ᒫᓐᓇᓕ, ᖃᐅᔨᓴᑦᓯᐊᕐᓂᐊᕐᐳᑎᑦ ᐃᒥᕐᑍᓕᓗᑎᑦ ᕔᓂᒥᒃ ᓴᓐᖏᓂᕐᓴᒥᒡᓘᓐᓃᑦ, ᓂᕆᔪᒃᓴᐅᓐᖏᓚᑎᓪᓗ ᓴᓗᒤᑦᑐᓂᒃ. 5#ᒨᓯᓯ ᓯᑕᒪᖏᑦ 6:1-5.ᑕᑯᒋᑦ ᐃᕐᓂᕐᒥᒃ ᐃᕐᓂᔪᒫᕐᐳᑎᑦ, ᑭᑦᔭᐅᑎᒧᓪᓘᓐᓃᑦ ᓂᐊᖁᐊ ᐊᒃᑐᕐᑕᐅᔪᒫᓐᖏᓚᖅ, ᓱᕈᓯᐅᓂᕐᒥᓂᑦ ᓈᓴᕅᑎᐅᓛᕐᒪᑦ ᒎᑎᒧᑦ ᐃᕐᓂᐊᖑᓂᕐᒥᓂᑦ ᐱᓗᓂ; ᑖᑦᓱᒪᓗ ᐃᓴᕆᐊᓕᒥᐅᑦ ᓴᐳᑎᔪᒫᕐᐰᑦ ᐱᓕᔅᑍᓂᒥᐅᓂᑦ.”
6ᑍᒤᒻᒪᑦ ᐊᕐᓇᐅᑉ ᐅᐃᓂ ᐅᖃᐅᑎᔭᕐᑐᕐᐹ, ᐅᖃᕐᓗᓂᓗ, “ᐊᖑᑎᒥᒃ ᒎᑎᒥᑦ ᐱᔪᒥᒃ ᕾᔪᖃᓚᐅᕐᐳᖅ ᐅᕙᓐᓄᑦ, ᑕᐅᑦᑐᐊᓗ ᐂᖏᓕᑐᑦ ᒎᑎᒥᑦ ᐱᔪᑐᑦ ᑍᒤᓪᓗᓂ, ᑲᒪᓇᕐᑑᓪᓗᓂ; ᐊᐱᕆᓚᐅᓐᖏᓚᕋᓕ ᓇᑭᑦ ᐱᖕᒪᖔᑦ, ᐊᑎᕐᒥᓂᒡᓗ ᐅᖃᐅᑎᓚᐅᓐᖏᓛᖓ. 7ᐅᖃᐅᑎᓚᐅᕐᐹᖓᓕ, ‘ᑕᑯᒋᑦ, ᓯᖎᓕᕈᒫᕐᐳᑎᑦ ᐃᕐᓂᕐᑖᕐᓗᑎᓪᓗ, ᕔᓂᑐᖃᑦᑕᕐᓂᐊᓐᖏᓚᑎᑦ ᓴᓐᖏᓂᕐᓴᒥᒡᓘᓐᓃᑦ, ᓂᕆᓂᐊᕐᓇᒡᓗ ᓴᓗᒤᑦᑐᒥᒃ, ᑖᓐᓇ ᓱᕈᓯᖅ ᓈᓴᕅᑎᐅᓂᐊᕐᒪᑦ ᒎᑎᒧᑦ ᐃᓅᓕᕐᓂᕐᒥᓂᑦ ᑐᖁᓂᖓᑕ ᐅᓪᓗᖅ ᑎᑭᓪᓗᒍ.’” 8ᑭᖑᓂᖓᒍᑦ ᒪᓄᐊ ᑐᒃᓯᐊᓚᐅᕐᐳᖅ ᐊᑕᓂᕐᒧᑦ, ᐅᖃᕐᓗᓂ, “ᐊᑕᓃᖅ, ᐊᖑᑦ ᑍᓐᓇ ᒎᑎᒥᓐᖔᕐᑐᖅ ᑎᓕᓚᐅᕐᑍᑦ ᕾᑎᒃᑲᓐᓂᓚᐅᕈᒃ, ᐃᓕᓐᓂᐊᕐᑎᑦᓯᖁᓪᓗᒍ ᖃᓄᐃᓕᐅᕐᑐᒃᓴᐅᓂᑦᑎᓐᓂᒃ ᓱᕈᓯᕐᒧᑦ ᐃᓅᓂᐊᕐᑐᒧᑦ.” 9ᒎᑎᐅᓪᓗ ᒪᓄᐊᑉ ᓂᐱᖓ ᓈᓚᓚᐅᕐᐹ, ᒎᑎᐅᓪᓗ ᐂᖏᓕᖓ ᐊᕐᓇᒧᐊᓚᐅᕆᕗᖅ ᐃᒃᓯᕚᕐᑎᓪᓗᒍ ᐱᕈᕐᓰᕕᖕᒥ; ᒪᓄᐊᓕ ᐅᐃᓂ ᐱᖃᑎᒋᓚᐅᓐᖏᓛ. 10ᐊᕐᓇᕐᓕ ᑐᐊᕕᕐᓗᓂ ᐅᓪᓚᒃᓯᓚᐅᕐᐳᖅ ᐅᐃᒥᓄᑦ ᐅᖃᕆᐊᕐᑐᕐᓗᓂ, ᐅᖃᐅᑎᓪᓗᒍᓗ, “ᑕᑯᒋᑦ ᐊᖑᑦ ᑍᓐᓇ ᕾᓚᐅᕐᑐᖅ ᑍᑦᓱᒪᓂ ᒫᓐᓇ ᓴᖅᑭᒃᑭᕗᖅ ᐅᕙᓐᓄᑦ!” 11ᐊᓱᐃᓛᒃ ᒪᓄᐊ ᓂᑯᕕᓪᓗᓂ ᓄᓕᐊᒥᓂᒃ ᒪᓕᒃᐳᖅ, ᐊᖑᒻᒧᐊᕋᒥᒡᓗ ᐅᖃᐅᑎᕚ, “ᑖᓐᓇᐅᕖᑦ ᐊᖑᑦ ᐅᖃᓚᐅᕐᑐᖅ ᐊᕐᓇᒧᑦ ᐆᒧᖔ?” ᑖᓐᓇ ᐅᖃᕐᐳᖅ, “ᑖᓐᓇᐅᕗᖓ.” 12ᒪᓄᐊ ᐅᖃᓕᕐᐳᖅ, “ᒪᓐᓇ ᐅᖃᐅᓯᕐᑎᑦ ᓱᓕᓕᕐᓕᑦ! ᓄᑲᑉᐱᐊᑉ ᐃᓅᓯᖓ ᖃᓄᐃᑦᑑᔪᒫᕐᐹ, ᓱᓇᒥᒡᓗ ᐱᓇᓱᐊᒐᖃᕈᒫᕐᐹ?” 13ᐊᑕᓂᐅᓪᓗ ᐂᖏᓕᖓ ᐅᖃᕐᐳᖅ ᒪᓄᐊᒧᑦ, “ᐅᖃᐅᓯᕆᓚᐅᕐᑕᓕᒫᓐᓂᒃ ᑖᓐᓇ ᐊᕐᓇᖅ ᐃᒃᐱᒍᓱᑦᓯᐊᕐᓕ. 14ᓂᕆᔪᒃᓴᐅᓐᖏᓚᖅ ᓇᐹᕐᑐᒥᑦ ᕔᓂᒃᓴᒥᑦ ᐱᔪᓂᒃ, ᐃᒥᕐᑐᒃᓴᐅᓇᓂᓗ ᕔᓂᒥᒃ ᓴᓐᖏᔪᒥᒃ, ᓂᕆᔪᒃᓴᐅᓐᖏᓚᕐᓗ ᓴᓗᒤᑦᑐᒥᒃ ᐱᖁᓯᒪᔭᓕᒫᓐᓂᒃ ᒪᓕᑦᓯᐊᕐᑐᒃᓴᐅᕗᖅ.”
15ᒪᓄᐊ ᐅᖃᕐᐳᖅ ᐊᑕᓂᐅᑉ ᐂᖏᓕᖓᓄᑦ, “ᐅᕙᑦᑎᓐᓂᒃ ᐅᑕᖅᑭᑬᓐᓇᕆᑦ, ᓂᕿᓕᐅᕐᓂᐊᕋᑦᑕ ᒎᑦᓯᐅᑉ ᓄᕐᕋᖓᓂᒃ ᐃᓕᖕᓄᑦ.” 16ᐊᑕᓂᐅᑉ ᐂᖏᓕᖓ ᒪᓄᐊᒧᑦ ᐅᖃᕐᐳᖅ, “ᐅᑕᖅᑭᑎᒃᑲᓗᐊᕈᕕᖓ ᓂᕿᖕᓂᒃ ᓂᕆᓂᐊᓐᖏᓚᖓ. ᑐᓂᕐᕈᓯᕈᕕᓪᓕ ᐃᑯᐊᓪᓚᒋᐊᓕᖕᒥᒃ ᐊᑕᓂᕐᒧᑦ ᑐᓂᕐᕈᓯᕐᑐᒃᓴᐅᕗᑎᑦ.” (ᒪᓄᐊ ᖃᐅᔨᒪᓚᐅᖏᒻᒪᑦ ᐊᑕᓂᕐᒧᑦ ᐂᖏᓕᒋᔭᐅᓂᖓᓂᒃ.) 17ᒪᓄᐊ ᐅᖃᓕᕐᐳᖅ ᐊᑕᓂᐅᑉ ᐂᖏᓕᖓᓄᑦ, “ᑭᓇᐅᒐᕖᑦ? ᐅᖃᐅᓯᕐᑎᑦ ᓱᓕᓕᕐᐸᑕ ᐅᐱᒋᓛᕋᑦᑎᒋᑦ.” 18ᐊᑕᓂᐅᓪᓗ ᐂᖏᓕᖓᑕ ᐅᖃᐅᑎᕚ, “ᖃᓄᐃᒻᒪᑦ ᐊᑎᓐᓂᒃ ᐊᐱᕐᓱᕐᐲᑦ, ᑕᑯᔧᑦ ᐱᐅᔪᐊᓘᑎᓪᓗᒎ?” 19ᑍᒤᒻᒪᑦ ᒪᓄᐊ ᒎᑦᓯᐅᑉ ᓄᕐᕋᖓᓂᒃ ᓂᐊᖂᔭᒃᓴᒥᒡᓗ ᑐᓂᕐᕈᓯᓚᐅᕐᐳᖅ ᐊᑕᓂᕐᒧᑦ ᐅᔭᕋᐅᑉ ᖄᖓᓂ, ᑲᒪᓇᕐᑐᓕᓚᐅᕐᐳᕐᓗ ᒪᓄᐊᒃᑯᑦ ᓄᓕᐊᕇᒃ ᑕᑯᓐᓇᕐᑎᓪᓗᒋᒃ. 20ᐃᑯᒪ ᖁᒻᒧᐊᒃᑎᓪᓗᒍ ᕿᓚᖕᒧᑦ ᑐᓂᕐᕈᓯᕐᕕᖕᒥᑦ ᐊᑕᓂᐅᑉ ᐂᖏᓕᖓ ᐃᑯᒪᒧᑦ ᖁᒻᒧᐊᖃᑕᐅᕗᖅ ᑐᓂᕐᕈᓯᕐᕕᐅᑉ ᐃᑯᒪᖓᒍᑦ! ᒪᓄᐊᒃᑯᒃ ᓄᓕᐊᕇᒃ ᑕᒪᑐᒥᖓ ᑕᑯᒐᒥᒃ, ᐹᒻᒪᒃᐴᒃ ᑮᓇᑎᒃ ᒪᓂᖅᑲᒨᑦ ᐊᒃᑐᕐᑎᓪᓗᒋᒃ. 21ᐊᑕᓂᐅᓪᓗ ᐂᖏᓕᖓ ᓴᖅᑭᒃᑲᓐᓂᕈᓐᓃᕐᒪᑦ ᒪᓄᐊᒃᑯᒃ ᓄᓕᐊᕇᒃ, ᖃᐅᔨᓕᕐᐴᒃ ᐊᑕᓂᐅᑉ ᐂᖏᓕᒋᖕᒪᒍ. 22ᒪᓄᐊᓗ ᓄᓕᐊᒥᓄᑦ ᐅᖃᕐᐳᖅ, “ᑐᖁᓂᐊᓕᕐᐳᒍᒃ, ᒎᑎᒥᒃ ᑕᑯᓚᐅᕋᓐᓄᒃ!” 23ᓄᓕᐊᖓᑕᓕ ᐅᖃᐅᑎᕚ, “ᐊᑕᓂᐅᑉ ᑐᖁᑦᓱᒪᒃᐸᑎᒍᒃ, ᐃᑯᒪᒧᑦ ᑐᓂᕐᕈᑎᑦ ᓂᐊᖂᔭᕐᓗ ᓈᒻᒪᒋᒐᔭᕐᓂᓐᖏᓔᑦ ᑐᓂᕐᕈᑎᕗᒃ, ᐅᕝᕙᓘᓐᓃᑦ ᑕᑯᑎᒃᑲᔭᓚᐅᓐᖏᓛᑎᒍᒃ ᑕᒪᒃᑯᓂᖓ, ᐅᕝᕙᓘᓐᓃᑦ ᐅᖃᐅᑎᒐᔭᓚᐅᓐᖏᓛᑎᒍᒃ ᑕᒪᒃᑯᓂᖓ ᒫᓐᓇ.”
24ᐊᕐᓇᕐᓗ ᐃᕐᓂᑖᓚᐅᕐᐳᖅ ᐊᑦᓯᕐᓗᒍᓗ ᓵᒻᓲᓂᒥᒃ, ᓱᕈᓯᕐᓗ ᐱᕈᕐᐸᓪᓕᐊᓚᐅᕐᐳᖅ, ᐊᑕᓂᐅᓪᓗ ᓮᒻᒪᕐᑎᓚᐅᕐᐹ. 25ᐊᑕᓂᐅᓪᓗ ᐊᓂᕐᓂᖓᑕ ᐱᓇᓱᐊᕐᕕᒋᕙᓪᓕᐊᓚᐅᕐᐹ ᒪᕼᐊᓂ ᑖᓐᒥ ᔫᕋᐅᓪᓗ ᐃᔅᑕᐅᓪᓗ ᐊᑯᓐᓂᖓᓂ.
Currently Selected:
ᐃᓗᐊᕐᓮᔩᑦ ᐊᒡᓚᖏᑦ 13: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
