ᐂᓮᐊᓯᐅᑉ ᐊᒡᓚᖏᑦ 9
9
ᓯᕗᓂᕐᒥ ᐊᖓᔪᖅᑳᕐᔪᐊᒃᓴᖅ
1 #
ᒫᑎᐅᓯ 4:15. ᑖᕐᑐᒦᑦᓱᒫᓐᖏᓚᑦ ᐃᓱᒪᔮᕐᓇᕐᑐᒦᓚᐅᕐᑐᑦ. ᓯᐳᓗᓂᐅᑉ ᓈᑉᑕᓕᐅᓪᓗ ᑭᖑᕚᖏᑕ ᓄᓇᖓᑦ ᓯᕗᓂᖓᓂ ᓇᕐᕈᓇᕐᓯᑎᑕᐅᓚᐅᕐᑐᖅ ᐅᓪᓗᓂᓕ ᑭᖑᓪᓕᕐᓂ ᐊᖅᑯᑦ ᐱᓐᓇᕐᓇᕐᓯᑎᑦᓱᒫᕐᐹ ᐃᒪᕐᕕᖕᒨᖓᔪᖅ, ᓄᓇ ᔪᐊᕐᑕᓂᐅᑉ ᐅᖓᑖᓃᑦᑐᖅ, ᒐᓕᓖᓪᓗ ᔫᑎᐅᖏᑦᑐᓂᒃ ᐃᓄᓕᒃ.
2 #
ᒫᑎᐅᓯ 4:16; ᓘᑲᓯ 1:79. ᐃᓄᐃᑦ ᑖᕐᑐᒥ ᐃᓅᔪᑦ ᖃᐅᒪᔪᕐᔪᐊᒥᒃ ᑕᑯᓯᒪᕗᑦ.
ᓄᓇᖃᕐᑐᓪᓗ ᑐᖂᑉ ᑕᕐᕋᓕᓂᖓᓂ,
ᒫᓐᓇᓕ ᖃᐅᒪᔪᒧᑦ ᖃᐅᒻᒪᒃᑎᑕᐅᕗᑦ.
3ᐃᓅᖃᑎᒌᒡᔪᐊᑦ ᐅᓄᕐᑐᕐᔪᐊᓐᖑᑎᑉᐸᑎᑦ;
ᖁᕕᐊᓱᖕᓂᖏᓪᓗ ᐊᖏᔪᕈᕐᑎᓪᓗᒋᑦ;
ᖁᕕᐊᓱᖃᑎᒌᒃᐳᑦ ᓵᖕᓂ,
ᓲᕐᓗ ᐃᓄᐃᑦ ᖁᕕᐊᓱᖃᑎᒌᒃᐸᖕᒪᑕ
ᐱᕈᕐᑐᓂᒃ ᑲᑎᕐᓯᕕᒃ ᓇᓪᓕᐅᑎᓯᒪᑎᓪᓗᒍ,
ᐅᕝᕙᓗ ᐅᓇᑕᕐᓂᒃᑯᑦ ᓵᓚᖃᕐᓗᑎᒃ ᓵᓚᒋᔭᒥ
ᐱᖁᑎᕕᓂᖏᓐᓂᒃ ᐂᑦᑐᕐᑐᐃᔪᖃᕐᑎᓪᓗᒍ.
4ᐃᓄᐃᑦ ᐅᖁᒤᒃᓴᕐᑎᑕᐅᓂᕐᒧᑦ ᓇᖕᒪᐅᑕᖏᑦ ᓱᕋᒃᐸᑎᑦ,
ᑐᐃᖏᓐᓄᓪᓗ ᐊᓇᐅᓕᐅᑎᒋᔭᐅᔪᑦ ᕿᔪᐃᑦ ᓯᖁᒥᑉᐸᑎᑦ.
ᐊᑭᕋᖏᑕᓗ ᐊᓇᐅᑕᖏᑦ ᓇᑲᑎᕐᐸᑎᑦ,
ᑍᑦᓱᒪᓂᑎᑐᑦ ᒥᑎᐊᓂᒥᐅᑦ ᓵᓚᒋᔭᐅᑎᓪᓗᒋᑦ.
5ᐅᓇᑕᕐᑐᒃᓮᑦ ᐱᓱᒃᑏᑦ ᐅᓇᑕᕐᕕᖕᒥ ᑲᒥᖏᑦ,
ᐊᓐᓄᕌᖏᓪᓗ ᐊᐅᖕᒥᒃ ᐃᑦᓴᒃᓯᒪᔪᑦ
ᑕᒪᕐᒥᒃ ᐃᑯᒪᒧᑦ ᐃᑯᐊᓪᓚᖅᑯᑕᐅᔪᒫᕐᐳᑦ.
6ᓄᑕᕋᑯᓗᒃ ᐃᕐᓂᐊᖑᖕᒪᑦ ᐅᕙᑦᑎᓐᓄᑦ!
ᐃᕐᓂᖅ ᑐᓂᔭᐅᖕᒪᑦ ᐅᕙᑦᑎᓐᓄᑦ!
ᒐᕙᒤᑦ ᑐᐃᖏᓐᓃᑦᓱᒫᕐᐳᑦ.
ᐊᑎᖓᓗ ᑍᔭᐅᔪᒫᕐᐳᖅ,
“ᐋᖅᑭᒃᓱᐃᔨᑦᓯᐊᒥᒃ,” “ᒎᑎᒥᒃ ᐊᔪᒐᖃᖏᑦᑐᒥᒃ,”
“ᐊᑖᑕᐅᔪᒥᒃ ᐃᓱᖃᖏᑦᑐᒥᑦ,”
“ᖃᓄᐃᖏᑦᓯᐊᕐᓂᐅᑉ ᐊᖓᔪᖅᑳᖓᓂᒃ.”
7 #
ᓘᑲᓯ 1:32,33. ᐊᖓᔪᖅᑳᖑᓂᖓᓗ ᐱᕈᕐᐸᓪᓕᐊᖏᓐᓇᕈᒫᕐᐳᖅ;
ᖃᓄᐃᖏᑦᓯᐊᕐᓇᕐᑐᖅ ᐃᓱᖃᕈᒫᓐᖏᓚᖅ.
ᑍᕕᑎᐅᑉ ᐃᒃᓯᕙᐅᑕᕐᔪᐊᖓᓂ, ᐊᖓᔪᖅᑳᕐᔪᐊᖑᕕᖓᓂᓗ,
ᐃᓂᑖᕐᑎᓪᓗᒍ ᑲᔪᓯᑎᓪᓗᒍᓗ
ᓈᒻᒪᓈᑦᓯᐊᕐᓂᕐᒥᒃ, ᐃᓱᐊᕐᓂᕐᒥᒡᓗ,
ᒫᓐᓇᒥᑦ ᐱᒋᐊᕐᓗᓂ ᐃᓱᖃᖏᑦᑐᒧᓪᓗ.
ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑕ ᐃᓗᖏᕐᑐᕐᓂᖓ ᑕᒪᑐᒥᖓ ᓇᖕᒥᓂᖅ ᐱᓇᓱᐊᕈᒪᖕᒪᑦ.
ᐊᑕᓂᐅᑉ ᓱᒋᐊᕐᓯᓂᐊᕐᓂᖓ ᐃᓴᕆᐊᓕᒃᑯᓐᓂᒃ
8ᐊᑕᓂᖅ ᐅᖃᕆᐊᕐᑐᕐᑎᑦᓯᕗᖅ ᔧᑰᑉ ᑭᖑᕚᖏᓐᓂᒃ ᓵᓐᖓᓪᓗᓂ,
ᐃᓴᕆᐊᓕᒥᐅᓄᓪᓗ ᑎᑭᐅᑎᓪᓗᓂ.
9ᐃᓄᓕᒫᑦ ᑐᑭᓯᔪᒫᕐᐳᑦ,
ᐃᕗᕅᒥᐅᑉ ᑭᖑᕚᖏᑦ ᓴᒥᐊᕆᐊᓪᓗ ᐃᓄᖏᑦ
ᐱᐅᔪᕆᓪᓗᑎᒃ ᐆᒻᒪᑎᒥᖕᓂᓗ ᐊᔪᖏᓐᓇᓱᒋᓪᓗᑎᒃ ᐅᖃᕐᐸᒃᑐᑦ:
10ᐅᔭᕋᓕᐊᕆᓯᒪᔪᑦ ᐃᒡᓗᓂᑦ ᑲᑕᒃᓯᒪᕗᑦ;
ᐅᔭᕋᑦᓯᐊᕙᖕᓂᒡᓕ ᓴᓇᓯᒪᔪᓂᒃ ᐃᓇᖏᕐᑕᐅᑎᓐᓂᐊᕐᐸᕗᑦ;
ᓇᐹᕐᑐᑦ ᓯᑲᒧᐊᑦ ᓇᑲᑎᕐᑕᐅᓯᒪᕗᑦ,
ᐃᓇᖏᕐᑕᐅᑎᓐᓂᐊᕐᐸᕗᓪᓕ ᓇᐹᕐᑐᓄᑦ ᓰᑕᕆᓄᑦ.
11ᑍᒤᒻᒪᑦ ᐊᑕᓂᖅ ᕆᔨᓐᑯᑦ ᐊᑭᕋᕐᑐᕐᑎᖏᓐᓂᒃ ᓴᖅᑭᑎᑦᓯᓕᕐᐳᖅ,
ᐊᑭᕋᕐᑐᕐᑎᖏᑦ ᑲᔪᖏᕐᓴᕐᓗᒋᑦ.
12ᓯᕆᐊᒥᐅᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᑦ
ᐱᓕᔅᑍᓂᒥᐅᓪᓗ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᑦ;
ᐃᓴᕆᐊᓕᒥᐅᓂᒃ ᐄᓯᔪᒫᕐᐳᑦ ᖃᓂᑎᒃ ᐂᑦᑕᕐᓗᒋᑦ.
ᑕᒪᒃᑯᐊᓕ ᑕᒪᕐᒥᒃ ᓂᓐᖓᐅᓯᖓᑕ ᓄᖅᑲᐅᑎᒋᔪᒫᓐᖏᓔᑦ,
ᓱᓕᓕ ᐊᒡᒐᖏᑦ ᐅᕐᓕᕐᑐᕐᐳᑦ ᑖᒃᑯᓄᖓ.
13ᐃᓄᖏᓪᓕ ᓱᒋᐊᕐᑎᒋᔭᒥᖕᓄᑦ ᓵᒋᐊᓚᐅᓐᖏᓚᑦ,
ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓂᒃ ᓱᓕ ᕿᓂᕋᑎᒃ.
14ᑍᒤᒻᒪᑦ ᐊᑕᓂᐅᑉ ᐃᓴᕆᐊᓕᒥᐅᑦ ᓂᐊᖁᐃᕈᒫᕐᐰᑦ ᐸᒥᐅᖏᕐᓗᒋᓪᓗ,
ᓇᐹᕐᑑᑉ ᐹᒥᐅᑉ ᐊᕙᓚᖓᔪᖏᑦ ᐃᕕᒡᔪᐊᓪᓗ ᓇᑲᑦᓱᒫᕐᐰᑦ ᐅᓪᓗᒥ ᐊᑕᐅᓯᕐᒥ.
15ᐃᓄᑐᖃᐅᔪᑦ ᐅᐱᒋᔭᐅᔪᓪᓗ ᑕᕝᕙ ᓂᐊᖂᕗᑦ,
ᓱᓕᖏᑦᑐᒥᒃ ᓇᓚᐅᑦᑍᕙᒃᑐᑦ ᐃᓕᓮᕙᒃᑐᓪᓗ ᑕᕝᕙ ᐸᒥᐅᖑᕗᑦ;
16ᓯᕗᓕᕐᑏᑦ ᑕᓯᐅᕐᓯᓚᐅᕐᐳᑦ ᑖᒃᑯᓂᖓ ᑕᒻᒪᕐᓇᕐᑐᒧᑦ,
ᑕᓯᐅᕐᑕᐅᔪᓪᓗ ᑖᒃᑯᓄᖓ ᐄᔭᐅᓪᓗᑎᒃ.
17ᑍᒤᒻᒪᑦ ᐊᑕᓂᐅᑉ ᖁᕕᐊᒋᔪᓐᓃᕐᐰᑦ ᐃᓅᓱᒃᑐᖁᑎᖏᑦ,
ᓇᒡᓕᒍᓱᒐᓂᓗ ᐃᓕᐊᕐᔪᖁᑎᖏᓐᓂᒃ ᐅᐃᒡᒐᕐᓂᖁᑎᖏᓐᓂᒡᓗ;
ᐃᓘᓐᓇᑎᒃ ᑕᒃᑯᕐᒨᕐᒪᑕ ᐱᐅᖏᑦᑐᓕᓪᓗᑎᒡᓗ,
ᐃᓘᓐᓇᑎᒡᓗ ᖃᓂᖏᑦ ᐱᐅᖏᑦᑐᐊᓗᖕᓂᒃ ᐅᖃᓪᓚᖃᑦᑕᕐᐳᑦ.
ᑕᒪᑐᒧᖓ ᐊᑕᓂᐅᑉ ᓂᓐᖓᐅᓯᖓ ᓄᖅᑲᕐᑎᑕᐅᓐᖏᓚᖅ,
ᐊᒡᒐᖏᓪᓕ ᓱᓕ ᐅᕐᓕᕐᑐᕐᐳᑦ ᑖᒃᑯᓄᖓ.
18ᐊᔪᕐᑐᓕᓃᑦ ᐃᑯᐊᓚᖕᒪᑕ ᐃᑯᒪᑎᑐᑦ,
ᓄᖒᑦᓯᓪᓗᓂ ᐅᕐᐱᒐᕐᓂᒃ ᑲᑭᓪᓚᕐᓇᕐᑐᓕᖕᓂᒡᓗ;
ᐃᑯᐊᓪᓔᓪᓗᑎᒡᓗ ᓇᐹᕐᑐᒐᓴᒡᔪᐊᓂᒃ ᐊᑯᓔᑦᑐᓂᒃ;
ᐃᓯᕐᓗᒡᔪᐊᕐᒥᒃ ᖁᒻᒧᐊᒃᑎᑦᓯᓪᓗᑎᒃ.
19ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᓂᓐᖓᐅᓯᖓᓄᑦ
ᓄᓇ ᐃᑯᐊᓪᓚᒃᑕᐅᕗᖅ,
ᐃᓄᐃᓪᓗ ᐃᑯᒪᒧᑦ ᐃᑯᐊᓪᓚᖅᑯᑎᒃᓴᑎᑐᑦ ᑍᒤᓪᓗᑎᒃ;
ᓇᓪᓕᐊᓪᓘᓐᓃᑦ ᖃᑕᓐᖑᑎᒥᓂᒃ ᓴᐳᑦᔨᔪᓐᓇᕐᓂᐊᓐᖏᓚᖅ.
20ᑕᓕᕐᐱᖕᒥᖕᓄᑦ ᓂᕿᒃᓴᓂᒃ ᐊᕐᓵᕐᓯᒐᓗᐊᕐᐳᑦ, ᓱᓕᓕ ᑳᒃᓗᑎᒃ;
ᓴᐅᒥᖕᒥᖕᓄᑦ ᓂᕆᓪᓗᑎᒃ ᓄᖒᑦᓯᖓᓗᐊᕐᐳᑦ, ᓱᓕᓕ ᐊᑭᐊᑦᑐᓐᖏᓚᑦ;
ᐃᓄᐃᓪᓗ ᐊᑐᓂᑦ ᐊᒡᓛᑦ ᐃᓅᖃᑎᒥ ᑎᒥᖏᓐᓂᒃ ᓂᕆᕗᑦ.
21ᒫᓇᓯᐅᑉ ᑭᖑᕚᖏᑕ ᐃᕗᕅᒥᐅᑉ ᑭᖑᕚᖏᑦ ᓂᕆᔪᒫᕐᐰᑦ,
ᐃᕗᕅᒥᐅᓪᓗ ᑭᖑᕚᖏᑦ ᒫᓇᓯᐅᑉ ᑭᖑᕚᖏᑦ ᓂᕆᖕᒥᓗᒋᑦ,
ᑖᒃᑯᐊᓗ ᑲᑐᑦᔨᓗᑎᒃ ᔫᑕᐅᑉ ᑭᖑᕚᖏᓐᓄᑦ ᓵᑦᓱᒫᕐᐳᑦ.
ᑕᒪᑐᒧᖓᓕ ᓱᓕ ᐊᑕᓂᐅᑉ ᓂᓐᖓᐅᓯᖓ ᓄᖅᑲᕐᑎᑕᐅᔪᒫᓐᖏᓚᖅ,
ᐊᒡᒐᖏᓪᓕ ᓱᓕ ᐅᕐᓕᕐᑐᕐᐳᑦ ᑖᒃᑯᓄᖓ.
Currently Selected:
ᐂᓮᐊᓯᐅᑉ ᐊᒡᓚᖏᑦ 9: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
