ᐂᓮᐊᓯᐅᑉ ᐊᒡᓚᖏᑦ 10
10
1ᑲᑉᐱᐊᓐᓇᒦᒃ ᐱᐅᖏᑦᑐᓕᓂᕐᓂᒃ ᐃᓕᖅᑯᓯᕐᓂᒃ ᐊᑐᖁᔨᔪᑦ,
ᑎᑎᕋᕐᐸᒃᑐᓪᓗ ᓵᓚᐅᓯᒪᓂᕐᒥᒃ ᑎᑎᕋᐅᓯᕾᓐᓇᕐᑐᑦ,
2ᐱᖃᖏᑦᑐᓂᒃ ᐱᑎᑦᓯᑦᑍᓕᕙᒃᑐᑦ ᐊᑦᔨᒌᒃᑎᑕᐅᓂᕐᒥᒃ
ᑎᒡᓕᒐᕐᕕᒋᓪᓗᒋᓪᓗ ᐊᔪᕐᓴᕐᑐᑦ ᐃᓄᖁᑎᒪ ᐱᔪᓐᓇᐅᑎᖏᓐᓂᒃ,
ᐅᐃᒡᒐᕐᓃᑦ ᐱᔭᒃᓴᖏᓐᓂᒃ ᐊᕐᓵᕐᓗᒋᑦ ᐱᑖᕐᐸᒃᑐᑦ,
ᐃᓕᐊᕐᔪᐃᓪᓗ ᓵᓚᒋᓇᓱᐊᕐᓗᒋᑦ.
3ᖃᓄᐃᓕᐅᕈᒫᕐᐱᓰ ᐅᓪᓗᒥ ᓱᒋᐊᕐᑕᐅᕕᖕᒥ?
ᐊᓯᕈᐃᔪᒧᑦ ᑎᑭᑕᐅᓕᕈᑦᓯ ᐅᖓᓯᒃᑐᒥᑦ ᐱᔪᒧᑦ?
ᑭᓇᒧᑦ ᕿᒫᓛᕐᐱᓰ ᐃᑲᔪᕐᑕᐅᔪᒪᓗᓯ?
ᐊᔪᕐᓴᖏᑦᔪᑎᓯ ᓇᒧᑦ ᕿᒪᓛᕐᐱᓯᒋᑦ?
4ᐊᒥᐊᒃᑯᑕᖃᕈᒫᓐᖏᓚᖅ ᐅᑯᔪᐃᓐᓇᐅᔪᒫᕐᒪᑕ ᑎᒍᔭᐅᓯᒪᔪᑦ ᐊᑯᕐᖓᓐᓂ,
ᐅᕐᕈᔪᒫᕐᐳᓪᓗ ᑐᖁᑕᐅᓯᒪᔪᑦ ᐊᑯᕐᖓᓐᓄᑦ.
ᑕᒪᑐᒧᖓ ᐊᑕᓂᐅᑉ ᓂᓐᖓᐅᓯᖓ ᓄᖅᑲᕐᑎᑕᐅᓐᖏᓚᖅ,
ᐊᒡᒐᖏᓪᓕ ᓱᓕ ᐅᕐᓕᕐᑐᕐᐳᑦ ᑖᒃᑯᓄᖓ.
ᐊᓯᕆᐊᒥᐅᑦ ᐊᖓᔪᖅᑳᕐᔪᐊᒻᒪᕆᖓᑕ ᒎᑎᒧᑦ ᐊᑐᕐᑕᐅᓂᖓ
5 #
ᐂᓮᐊᓯ 14:24-27; ᓇᕼᐅᒥ 1:1—3:19; ᔨᐸᓁᐊ 2:13-15. ᑲᑉᐱᐊᓐᓇᒦᒃ ᐊᓯᕆᐊ, ᓂᓐᖓᐅᓯᕐᒪ ᐊᓇᐅᓕᕈᑎᒋᔭᖓ,
ᐊᔭᐅᑉᐱᐊᓐᓂᒡᓗ ᑎᒍᒥᐊᕐᑎᑕᕋ ᓂᓐᖓᐅᒪᕕᒋᔭᓐᓄᑦ.
6ᐃᓅᖃᑎᒌᒡᔪᐊᓄᑦ ᑎᓕᕙᕋ ᒎᑎᖃᖏᑦᑐᓄᑦ,
ᐂᖁᓪᓗᒍ ᐃᓅᖃᑎᒌᓄᑦ ᓂᓐᖓᐅᒪᕕᒋᔭᓐᓄᑦ.
ᓵᓚᒋᔭᒥ ᐱᖏᓐᓂᒃ ᐱᑖᖁᓪᓗᒍ, ᐊᕐᓵᕐᓯᖁᓪᓗᒍᓗ ᓵᓚᒋᔭᒥᓂᒃ,
ᑐᓪᓕᕋᖁᓪᓗᒍᓗ ᑖᒃᑯᓂᖓ ᓴᓂᕐᓗᑯᑎᑐᑦ ᐊᖅᑯᑎᒦᑦᑐᑎᑐᑦ.
7ᐊᓯᕆᐊᓕ ᑍᒫᒃ ᐱᔪᒪᓚᐅᓐᖏᓚᖅ, ᑍᒫᒡᓗ ᐃᓱᒪᖃᓚᐅᕋᓂ;
ᐃᓱᒪᒥᒍᓪᓕ ᐊᓯᕈᐃᔪᒪᕗᖅ, ᐃᓅᖃᑎᒌᒡᔪᐊᓪᓗ ᖃᑦᓰᓐᓇᐅᖏᑦᑐᑦ ᓄᖑᑦᓱᒪᕔᑦ;
8ᐃᒫᒃ ᐅᖃᓚᐅᕐᐳᖅ,
“ᐊᖓᔪᖅᑳᖁᑎᓕᒫᒃᑲ ᐊᖓᔪᖅᑳᕐᔪᐊᖑᓐᖏᓛᑦ?
9ᑳᓪᓄ ᑳᕐᓯᒥᓯᑐᑦ ᑍᒤᓐᖏᓛᖅ?
ᕼᐊᒫᑎ ᐋᕐᐹᑎᑐᑦ ᑍᒤᓐᖏᓛᖅ?
ᓴᒥᐊᕆᐊ ᑕᒫᓯᑰᓯᑐᑦ ᑍᒤᓐᖏᓛᖅ?
10ᐊᒡᒐᓐᓄᑦ ᓇᓂᓯᓚᐅᕐᐳᖓ ᐊᖓᔪᖅᑳᕐᔪᐊᖃᕐᕕᐅᔪᑦ ᒎᑎᖏᓐᓂᒃ,
ᓴᓇᓐᖑᐊᕐᓯᒪᔪᑦ ᒎᑎᓐᖑᐊᑦ ᐅᓄᕐᓂᕐᓴᐅᓚᐅᕋᓗᐊᕐᐳᑦ
ᔨᕉᓴᓕᒦᑦᑐᓂᑦ ᓴᒥᐊᕆᐊᒦᑦᑐᓂᓪᓗ,
11ᓴᒥᐊᕆᐊᒥᐅᑦ ᒎᑎᓐᖑᐊᖏᓐᓄᑦ ᐱᓇᓱᐊᕐᕕᖃᓚᐅᕐᓂᑦᑐᑦ?
ᑍᒫᒃ ᔨᕉᓴᓕᒥᐅᑦ ᒎᑎᓐᖑᐊᖏᓐᓄᑦ ᐱᓇᓱᐊᕐᑐᒃᓴᐅᓐᖏᓚᖔ?”
12ᑍᒤᒻᒪᑦ ᑕᕝᕙ ᐃᒤᑦᓱᒫᕐᐳᖅ, ᐊᑕᓂᐅᑉ ᐱᓇᓱᐊᕈᒪᔭᓕᒫᓂ
ᐱᔭᕇᕈᓂᒋᑦ ᓮᐅᓂᐅᑉ ᖃᖅᑲᖓᓂ ᔨᕉᓴᓕᒥᓗ, ᑕᕝᕙ ᐅᖃᕈᒫᕐᐳᖅ,
“ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑕ ᐱᐅᔪᕆᓪᓗᓂ ᐅᖃᓪᓚᖃᑦᑕᕐᓂᖓ
ᓱᒋᐊᕈᒪᕙᕋ, ᓂᕐᑐᕐᓇᕐᑑᔪᕆᓂᖓᓗ ᐃᒻᒥᓂᒡᓗ ᖁᕝᕙᕐᑎᖃᑦᑕᕐᓂᖓ.”
13ᐃᒫᒃ ᐅᖃᓚᐅᕐᒪᑦ, “ᓇᖕᒥᓂᖅ ᐱᔪᓐᓇᕐᓂᓐᓄᑦ ᐱᓇᓱᐊᓚᐅᕐᐳᖓ,
ᓯᓚᑐᓂᓐᓄᓪᓗ ᑐᑭᓯᑦᓯᐊᕈᓐᓇᕋᒪ;
ᐃᓄᐃᓪᓗ ᓄᓇᖏᑕ ᑭᒡᓕᒋᔭᖏᑦ ᐲᔭᓚᐅᕐᐸᒃᑲ,
ᐊᑭᑐᔪᖁᑎᖏᓐᓂᒡᓗ ᐊᕐᓵᓚᐅᕐᐸᒃᑲ;
ᐃᒻᒧᒃᓯᐅᒐᐅᓪᓗ ᐸᖕᓂᖏᑎᑐᑦ ᐃᒃᓯᕙᐅᑕᕐᔪᐊᕐᒦᑦᑐᑦ ᐅᕐᕈᑎᓚᐅᕐᐸᒃᑲ.
14ᐊᖑᑎᑐᑦ ᒪᓐᓂᖕᓂᒃ ᓇᓂᓯᔪᑎᑐᑦ ᕿᒪᒃᑕᐅᓂᑯᓂᒃ,
ᓄᓇᕐᔪᐊᕐᒦᑦᑐᓕᒫᑦ ᑲᑎᕐᓱᓚᐅᕐᐸᒃᑲ;
ᓇᓪᓕᐊᓐᓂᒡᓘᓐᓃᑦ ᐃᓴᕈᖏᓐᓂᒃ ᐊᐅᓚᑦᔭᒃᑐᖃᓚᐅᓐᖏᓚᖅ,
ᐂᑦᑕᕐᑐᖃᓚᐅᕋᓂᓗ ᐃᕐᓯᓵᕐᑐᒥᒃ ᓂᑦᔭᒃᑐᖃᓚᐅᓐᖏᓚᖅ.”
15ᐅᓕᒪᐅᑦ ᐱᔪᓐᓇᕐᓂᕐᓴᐅᓂᕋᕈᓐᓇᕐᐹ ᐅᓕᒪᕐᑐᒥᑦ?
ᐅᕝᕙᓗ ᑭᓪᓘᑦ ᐊᖏᓂᕐᓴᐅᑎᑦᓱᓐᓇᕐᐹ ᑭᓪᓗᕐᑐᒥᑦ?
ᐊᓇᐅᑕᖅ ᐃᓄᖕᒥᒃ ᐊᐅᓚᑦᓯᔪᓐᓇᕐᐹ ᑎᒍᒥᐊᕐᑎᒋᔭᒥᓂᒃ?
ᐊᔭᐅᑉᐱᐊᖅ ᑭᕕᒃᓯᔪᓐᓇᕐᐹ ᐃᓄᖕᒥᒃ ᕿᔫᖏᑦᑐᒥᒃ?
16ᑍᒤᒻᒪᑦ ᐊᑕᓂᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ,
ᖃᓂᒻᒪᓯᕐᒥᒃ ᓴᓗᒃᑎᓐᓇᕐᑐᒥᒃ ᑎᑭᑎᑦᓯᔪᒫᕐᐳᖅ ᐅᓇᑕᕐᑐᒃᓴᓄᑦ ᖁᐃᓂᔪᓄᑦ,
ᑖᑦᓱᒪᓗ ᐱᓐᓇᕐᓇᕐᓂᖓᑕ ᐊᐅᓚᑕᖓᓂ ᐃᑯᐊᓪᓚᒃᑐᖃᕈᒫᕐᐳᖅ,
ᐃᑯᒪᐅᑉ ᐃᑯᐊᓚᓂᖓᑐᑦ ᑍᒤᑦᑐᒥᒃ.
17ᐃᓴᕆᐊᓕᒥᐅᑦ ᖃᐅᒪᓂᖓ ᐃᑯᒪᓐᖑᕈᒫᕐᐳᖅ,
ᐃᑦᔪᕐᓁᑦᑐᖁᑎᖓᓗ ᐃᑯᐊᓚᔪᒫᕐᓗᓂ;
ᐃᑯᐊᓪᓔᓗᓂ ᓄᖒᑦᓯᓗᓂᓗ.
ᑲᑭᓪᓚᕐᓇᕐᑐᖁᑎᒥᓂᒃ ᐅᕐᐱᒐᖁᑎᒥᓂᒡᓗ ᐅᓪᓗᒥ ᐊᑕᐅᓯᕐᒥ.
18ᓇᐹᕐᑐᓕᒡᔪᐊᖁᑎᖓ ᑕᑯᒥᓇᕐᑐᖅ ᓄᓇᖁᑎᖓᓗ ᐱᕈᕐᕕᐅᑦᓯᐊᕐᐸᒃᑐᖅ ᓄᖑᑕᐅᔪᒫᕐᐳᖅ,
ᐊᑕᓂᐅᑉ ᐊᓯᕈᕈᒫᕐᐰᑦ ᑕᒪᕐᒥᒃ ᑕᕐᓂᖅ ᑎᒥᓗ,
ᓲᕐᓗ ᖃᓂᒻᒪᓯᐅᑉ ᐃᓄᖕᒥᒃ ᓄᑮᕈᑎᕙᓪᓕᐊᑎᑦᓯᓂᖓᑐᑦ.
19ᑕᕝᕙ ᓇᐹᕐᑐᑦ ᐊᒥᐊᒃᑯᑦ ᓇᐹᕐᑐᒐᓴᒡᔪᐊᖁᑎᖓᓃᑦᑐᑦ
ᐅᓄᕈᓐᓃᕈᒫᕐᐳᑦ ᐊᒡᓛᑦ ᓄᑕᕋᕐᒧᑦ ᓈᓴᕐᑕᐅᔪᓐᓇᕐᓯᓗᑎᒃ.
ᐃᓔᓐᓇᖏᑦ ᐅᑎᕈᒫᕐᐳᑦ
20ᐅᓪᓗᖅ ᓇᓪᓕᐅᑎᔪᒫᕐᐳᖅ ᐃᓴᕆᐊᓕᒃᑯᓐᓂ ᐊᒥᐊᒃᑰᔪᑦ ᐊᓐᓇᒃᓯᒪᔪᓪᓗ
ᔧᑰᑉ ᑭᖑᕚᖏᓐᓂᑦ, ᓵᓚᒋᔨᒋᓚᐅᕐᑕᒥᖕᓂᒃ ᑕᑎᖃᕈᓐᓃᕐᕕᒃᓴᖓᑦ,
ᐊᑕᓂᕐᒥᒡᓕ ᑕᑎᖃᓕᕈᒫᕐᐳᑦ, ᐃᓴᕆᐊᓕᒃᑯᑦ ᐃᑦᔪᕐᓁᑦᑐᖁᑎᖓᓂᒃ, ᓱᓕᑦᓯᐊᕐᓂᒃᑯᑦ.
21ᐊᒥᐊᒃᑰᔪᑦ ᐅᑎᕈᒫᕐᐳᑦ, ᔧᑰᑉ ᑭᖑᕚᖏᓐᓂ ᐊᒥᐊᒃᑰᓯᒪᔪᑦ,
ᒎᑎᒧᑦ ᐊᔪᒐᖃᖏᑦᑐᒧᑦ.
22 #
ᕉᒪᒥᐅᓄᑦ 9:27. ᐃᓴᕆᐊᓕᒥᐅᓪᓕ ᐃᓄᖁᑎᑎᑦ ᐃᒪᐅᑉ ᓯᓈᓂ ᓯᐅᕋᕐᑎᑐᑦ ᐅᓄᕐᑎᒋᒐᓗᐊᕐᐸᑕ,
ᑖᒃᑯᐊ ᐊᒥᐊᒃᑯᖏᑦ ᐅᓄᖏᑦᑐᑦ ᐅᑎᕈᒫᕐᐳᑦ;
ᓄᖑᑕᐅᓂᒃᓴᖓᑦ ᐱᖁᔭᐅᓯᒪᓕᕐᐳᖅ ᐃᓱᐊᕐᑐᓕᓂᕐᒥᒃ ᑕᑕᓯᒪᓪᓗᓂ.
23ᐊᑕᓂᕐᓕ, ᕿᓚᖕᒥᐅᒐᓴᒡᔪᐃᑦ ᒎᑎᖓᑦ,
ᐃᓱᓕᑎᑦᓯᑦᓯᐊᕐᓂᕐᒥᒃ ᐱᑎᑦᓯᔪᒫᕐᐳᖅ, ᑍᒫᒃ ᐱᖁᔨᓯᒪᒐᒥ,
ᓄᓇᕐᔪᐊᕐᒥ ᐃᓘᓐᓈᓐᓂ.
ᐊᑕᓂᐅᑉ ᐊᓯᕆᐊᒥᐅᑦ ᓱᒋᐊᕈᒫᕐᐰᑦ
24ᑍᒤᒻᒪᑦ ᐊᑕᓂᖅ ᒎᑎ ᐅᖃᕐᐳᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ:
“ᐃᓄᖁᑎᒃᑲ, ᓮᐅᓂᒥ ᓄᓇᖃᕐᑐᓯ, ᓯᕘᕋᓂᐊᕋᓯ ᐊᓯᕆᐊᒥᐅᓂᒃ,
ᐊᓇᐅᑕᕐᒧᑦ ᐊᓇᐅᓕᓕᕐᐹᓯ ᐊᔭᐅᑉᐱᐊᒧᓪᓗ ᐅᕐᓕᕐᓵᓕᕐᐹᓯ,
ᓲᕐᓗ ᐄᑦᔨᑉᑎᒥᐅᑎᑐᑦ.
25ᐊᑯᓂᐅᖏᑦᑐᖅ ᓂᓐᖓᐅᒪᓂᕋ ᐃᓱᓕᑦᓱᒫᕐᒪᑦ,
ᑕᕝᕙ ᓂᓐᖓᐅᒪᓂᕋ ᑐᕌᖔᓕᕈᒫᕐᐳᖅ ᑍᒃᑯᓄᖓ ᐊᓯᕈᕐᑕᐅᓂᒃᓴᖏᓐᓄᑦ.”
26ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᓱᒋᐊᕐᓯᑦᔪᑎᓂ ᐊᑐᓕᕈᒫᕐᐹ ᑖᒃᑯᓄᖓ,
ᑐᖁᕅᓚᐅᕐᓂᕐᒥᑐᑦ ᒥᑎᐊᓂᒥᐅᓂᒃ ᕾᕐᓱᒥ ᐅᕆᐱᒥ;
ᑖᑦᓱᒪᓗ ᐊᓇᐅᑕᓂ ᐃᒪᐅᑉ ᓇᓛᓄᐊᕐᑎᑦᓱᒫᕐᐹ,
ᑭᕕᒡᓗᒍᓗ ᓲᕐᓗ ᐄᑦᔨᑉᑎᒥᐅᓄᑦ ᐱᓇᓱᐊᓚᐅᕐᓂᕐᒥᑐᑦ.
27ᐅᓪᓗᒥ ᑍᑦᓱᒪᓂ ᓇᓪᓕᐅᑎᔪᒫᕐᐳᖅ
ᓇᖕᒪᒃᑎᑦᓯᓂᖏᑕ ᐲᕐᑕᐅᕕᒃᓴᖓ ᑐᐃᑦᓯᓐᓂᑦ,
ᓇᖕᒪᐅᑕᖏᑕᓗ ᓯᖁᒥᑕᐅᓂᖏᑦ ᖁᖓᓯᑦᓯᓐᓂᑦ,
ᓇᖕᒪᐅᑍᑦ ᓄᖑᑎᑕᐅᔪᒫᕐᐳᑦ ᐅᕐᓱᖅ ᒥᖑᐊᕈᑕᐅᔪᖅ ᐱᑦᔪᑎᒋᓗᒍ.
ᓄᓇᓕᖕᓂᒃ ᓄᖒᑦᓯᔨᐅᑉ ᐅᓇᑕᕆᐊᕐᓂᖓ
28ᑎᑭᑉᐳᖅ ᓄᓇᒧᑦ ᐂ-ᐊᑕᒧᑦ,
ᓄᓇ ᒥᒡᒍᕋᓐ ᐊᖅᑯᓵᕐᓗᒍ;
ᓄᓇᒧᑦ ᒥᒃᒫᔅᒧᑦ ᐱᖁᑎᓂᒃ ᕿᒪᒃᐰᑦ.
29ᑰᒐᓛᓕᒃ ᓇᕐᓴᖅ ᐃᑳᕐᓗᒍ, ᒋᐸᒧᑦ ᑕᖕᒫᕐᐳᖅ.
ᕌᒪᒥᐅᑦ ᑲᑉᐱᐊᓱᖕᓂᕐᒧᑦ ᓴᔪᓕᕐᐳᑦ,
ᒋᐱᐊᒥᐅᓪᓗ ᓴᐅᓕᐅᑉ ᓄᓇᖓᓂᒥᐅᑦ ᕿᒪᒃᓯᕗᑦ.
30ᒐᓕᒻᒥᐅᑦ ᐸᓂᖏᑦ ᓂᐱᖅᑯᕐᑐᓗᓯ ᕾᒐᓛᓕᕆᑦᓯ!
ᓔᓴᒥᐅᑦ ᓈᓚᓕᕆᑦᓯ!
ᐊᓇᑑᑎᒥᐅᖑᔪᓯ ᑭᐅᓕᕐᓯᐅᒃ!
31ᒪᑦᒥᓐᓇᒥᐅᑦ ᕿᒫᕗᑦ,
ᒋᐱᒻᒥᐅᓪᓗ ᕿᒫᓪᓗᑎᒃ ᐃᔨᕐᕕᒃᓴᕐᓯᐅᕐᓗᑎᒃ.
32ᐅᓪᓗᒥ ᑕᕝᕙᓂ ᓄᓇᒥ ᓅᐱᒥ ᓄᖅᑲᕐᐳᖅ,
ᐊᒡᒐᒥᓄᑦ ᑎᒍᒻᒥᔪᓄᑦ ᐅᓗᕆᐊᕐᓵᕐᓗᒋᑦ
ᖃᖅᑲᒥᑦ ᓮᐅᓂᐅᑉ ᐸᓂᖏᓐᓂᑦ, ᔨᕉᓴᓕᐅᑉ ᐱᖑᐊᓃᑦᑐᒧᑦ.
33ᑕᑯᒋᑦ ᐊᑕᓂᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑕ ᓇᐹᕐᑐᐃᑦ
ᐊᕙᓚᖓᔪᖏᑦ ᓇᑲᑎᕈᒫᕐᐰᑦ ᐱᔪᓐᓇᕐᓂᕐᔪᐊᕐᒧᑦ ᑲᑉᐱᐊᓇᕐᑐᒧᑦ;
ᓇᐹᕐᑐᐃᓪᓗ ᑕᑭᔫᑎᐊᓗᐃᑦ ᑭᐱᒃᐸᒋᑦ ᐅᕐᕉᕋᕐᓗᑎᒃ,
ᐱᔪᓐᓇᕋᓱᒋᔪᓪᓗ ᐱᐅᔪᕆᔪᓐᓃᕈᒫᕐᐳᑦ.
34ᓇᐹᕐᑐᒐᓴᒡᔪᐊᓪᓗ ᐊᑯᓔᑦᑐᑦ ᓇᑲᑎᕈᒫᕐᐰᑦ ᐅᓕᒪᐅᒻᒧᑦ,
ᓕᐸᓇᓂᓗ ᓇᐹᕐᑐᖁᑎᑦᓯᐊᓕᒃ ᑕᑯᒥᓇᕐᑐᓂᒃ ᐅᕐᕈᑎᑕᐅᔪᒫᕐᐳᖅ.
Currently Selected:
ᐂᓮᐊᓯᐅᑉ ᐊᒡᓚᖏᑦ 10: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
