ᐂᓮᐊᓯᐅᑉ ᐊᒡᓚᖏᑦ 60
60
ᔨᕉᓴᓕᐅᑉ ᓂᕐᑐᕐᓇᕐᓯᑎᑕᐅᔪᒫᕐᓂᖓ
1“ᒪᑭᓪᓗᓯ ᖃᐅᒪᓕᕆᑦᓯ; ᖃᐅᒻᒪᖅᑯᑎᓯ ᑎᑭᒻᒪᑦ, ᐊᑕᓂᐅᑉ ᓂᕐᑐᕐᓇᕐᓂᕐᔪᐊᖓᑕ ᖃᐅᒻᒪᒡᕕᒋᖕᒪᓯ. 2ᑕᑯᒋᑦ, ᓄᓇᕐᔪᐊᖅ ᑖᕐᑐᒧᑦ ᐅᓕᒃᑕᐅᓯᒪᒐᓗᐊᕐᐳᖅ, ᐃᓄᐃᓪᓗ ᑖᕐᓯᐅᕐᑐᕐᔪᐊᖑᓗᑎᒃ, ᐊᑕᓂᐅᓪᓕ ᖁᓚᖏᐊᕐᓂᐊᕐᐹᑎᑦ, ᓂᕐᑐᕐᓇᕐᓂᕐᔪᐊᖓᓗ ᑕᑯᔭᐅᓂᐊᕐᐳᖅ ᐃᓕᑦᓯᓐᓂ. 3ᐃᓅᖃᑎᒌᒡᔪᐊᓪᓗ ᖃᐅᒪᓂᑦᓯᓐᓄᑦ ᐂᔪᒫᕐᐳᑦ, ᐊᖓᔪᖅᑳᕐᔪᐊᓪᓗ ᖃᐅᒻᒪᒃᐸᓪᓕᐊᓂᓯ ᖃᐅᒪᓂᖓᓄᑦ ᕾᓗᑎᒃ. 4ᐊᕙᒻᒧᑦ ᑕᑯᑦᓯᐊᕆᐊᓕᕆᑦᓯ, ᑕᑯᓗᓯᓗ; ᑲᑎᕙᓪᓕᐊᔪᓂᒃ ᕾᔪᓂᒡᓗ ᐃᓕᑦᓯᓐᓄᑦ; ᐃᕐᓂᓯ ᐅᖓᓯᒃᑐᒥᑦ ᕾᔪᒫᕐᐳᑦ, ᐸᓂᓯᓗ ᐊᒡᔭᕐᑕᐅᓗᑎᒃ ᐰᕆᔨᒥᖕᓄᑦ. 5ᑕᕝᕙ ᖃᐅᔨᓕᕈᒫᕐᐳᓯ ᑕᑯᒥᓇᕐᑐᒥᒃ ᖃᐅᒪᓂᖃᕐᓂᑦᓯᓐᓂᒃ, ᐆᒻᒪᑎᓯᓗ ᑕᑕᑦᓱᒫᕐᐳᑦ ᖁᕕᐊᓱᖕᓂᕐᒥᒃ, ᐃᒪᕐᔪᐊᑦ ᐊᔪᕐᓴᖏᑦᔪᑎᖏᑦ ᐃᓕᑦᓯᓐᓄᑦ ᑐᓂᔭᐅᔪᒫᕐᒪᑕ, ᐃᓅᖃᑎᒌᒡᔪᐊᑦ ᐊᒃᓗᐃᑦᔪᑎᖏᓐᓂᒃ ᕾᑦᓯᕕᐅᔪᒫᕋᑦᓯ. 6ᑳᒧᓕᖕᓂᒃ ᓇᖕᒪᒃᑐᓂᒃ ᓄᓇᓯ ᑕᑕᑦᓱᒫᕐᐳᖅ, ᐱᕈᕇᕋᑖᕐᓂᕐᓂᒡᓗ ᑳᒥᓕᖕᓂᒃ ᒥᑎᐊᓂᒥᑦ ᐄᐸᒥᓪᓗ ᑎᑭᑦᑐᓂᒃ; ᓰᐸᐅᑉ ᓄᓇᓕᒫᖓᓂᑦ ᐱᔪᓄᑦ ᐅᓄᕐᑐᓄᑦ ᑎᑭᐅᑦᔨᕕᒋᔪᒫᕐᐹᓯ, ᒎᓗᓂᒃ ᐳᔫᕐᑎᑕᒐᕐᓂᒡᓗ ᑎᐱᑦᓯᐊᕆᒃᓴᐅᑎᓂᒃ ᓇᒃᓴᕐᓗᑎᒃ, ᐅᖃᐅᓯᖃᕐᓗᑎᒡᓗ ᐊᑕᓂᐅᑉ ᓂᕐᑐᕐᑕᐅᔪᒃᓴᐅᓂᖓᓂᒃ. 7ᑭᑕᕆᒥᐅᑦ ᓰᐱᖁᑎᓕᒫᖏᑦ ᐃᓕᑦᓯᓐᓄᑦ ᑲᑎᑕᐅᔪᒫᕐᐳᑦ, ᓂᐰᐅᑎᐅᑉ ᓰᐱᖁᑎᖏᑕ ᐊᖑᓴᓪᓗᖏᑦ ᐱᓇᓲᑎᒋᓕᕈᒫᕐᐸᓯ; ᑐᓂᕐᕈᓯᐅᑎᒃᓴᐅᔪᓐᓇᕐᓗᑎᒡᓗ ᑐᓂᕐᕈᓯᕐᕕᖁᑎᓐᓂ ᐃᓚᓕᐅᕈᒫᕐᐸᒃᑲ, ᑐᒃᓯᐊᕐᕕᒡᔪᐊᖁᑎᒐᓗ ᐱᐅᔪᕐᔪᐊᖅ ᐱᓐᓇᕐᓇᕐᓯᑎᑦᓱᒫᕐᐸᕋ. 8ᑭᓇᑯᑦ ᒪᑯᐊ ᖃᖓᑕᕙᑦ ᓄᕗᔭᑎᑐᑦ, ᑎᖕᒥᐊᑎᑐᑦ ᐃᕙᕕᖕᒥᖕᓄᑦ ᐅᑎᓕᕐᑐᑎᑐᑦ? 9ᐃᒪᐅᑉ ᓯᓇᓂᒥᐅᑦ ᐅᑕᖅᑭᔪᒫᕐᐳᑦ ᐅᕙᓐᓂᒃ, ᐅᒥᐊᕐᔪᐊᑦ ᑖᕐᓯᓯᒥᑦ ᐱᔪᑦ ᑎᑭᖅᑳᕈᒫᕐᐳᑦ, ᐃᕐᓂᑦᓯᓐᓂᒃ ᓇᒃᓴᕐᓗᑎᒃ ᐅᖓᓯᒃᑐᒥᑦ, ᓯᐅᓪᕕᕆᖁᑎᒥᖕᓂᒃ ᒎᓗᖁᑎᒥᖕᓂᒡᓗ ᐱᖃᓯᐅᑦᔨᓗᑎᒃ, ᐊᑕᓂᐅᑉ ᒎᑎᑦᓯ ᐊᑎᖓᓄᑦ, ᐃᓴᕆᐊᓕᑏᓪᓗ ᐃᑦᔪᕐᓁᑦᑐᖁᑎᖓᓐᓄᑦ, ᑖᑦᓱᒪ ᐅᐱᓐᓇᕐᓯᑎᓯᒪᖕᒪᓯ. 10ᔫᑎᐅᖏᑦᑐᑦ ᐊᕙᓗᕐᔪᐊᖁᑎᑦᓯᓐᓂᒃ ᓴᓇᔪᒫᕐᐳᑦ, ᐊᖓᔪᖅᑳᕐᔪᐊᖏᑕ ᐱᔨᑦᓯᕋᕈᒫᕐᐹᓯ; ᐃᓕᑦᓯᓐᓂᒃ ᓂᓐᖓᒃᕕᖃᕐᓂᓐᓄᑦ ᓱᒋᐊᓚᐅᕋᑦᓯ, ᐱᑦᓯᐊᕐᓂᓐᓄᓪᓕ ᓈᒃᑭᒋᓚᐅᕐᐸᑦᓯ. 11#ᑕᑯᑎ 21:25,26.ᑍᒤᒻᒪᑦ ᐃᑎᕐᑕᕐᕕᖁᑎᓯ ᐅᒃᑯᐃᓐᖔᖏᓐᓇᓕᕈᒫᕐᐳᑦ; ᐅᒃᑯᐊᕐᑕᐅᕙᒍᓐᓃᕐᓗᑎᒃ ᐅᓪᓗᒃᑯᑦ ᐅᓐᓄᐊᒃᑯᓪᓗ; ᐃᓅᖃᑎᒌᒡᔪᐊᑦ ᐊᒡᓗᐃᑦᔪᑎᒥᖕᓂᒃ ᕾᑦᓯᖃᑦᑕᖁᓪᓗᒋᑦ ᐃᓕᑦᓯᓐᓄᑦ, ᐊᖓᔪᖅᑳᕐᔪᐊᖏᓪᓗ ᑭᖑᓕᕇᒡᓗᑎᒃ ᕾᔪᒫᕐᐳᑦ. 12ᐃᓅᖃᑎᒌᒡᔪᐊᑦ ᐊᖓᔪᖅᑲᐅᕖᓪᓗ ᐃᓕᑦᓯᓐᓂᒃ ᐱᔨᑦᓯᕈᒪᖏᑦᑐᑦ ᐊᓯᕈᕈᒫᕐᐳᑦ; ᓄᓇᒥᓗ ᐃᓅᖃᑎᒌᒡᔪᐊᑦ ᑐᖁᖓᐅᓕᕐᓗᑎᒃ. 13ᓕᐸᓇᓂᐅᑉ ᑕᑯᒥᓇᕐᓂᖏᓐᓄᑦ ᑎᑭᑕᐅᔪᒫᕐᐳᓯ, ᓇᐹᕐᑐᖏᑕ ᓮᐳᕋᓯᒥᒃ ᑍᔭᐅᔪᑦ, ᓇᐹᕐᑐᑐᐃᓐᓁᓪᓗ, ᓇᐹᕐᑐᓪᓗ ᐰᓂᓂᒃ ᑍᔭᐅᔪᑦ, ᐃᑦᔪᕐᓁᑦᑐᕕᖁᑎᒪ ᐃᓂᖓ ᑕᑯᒥᓇᕐᓯᖁᓪᓗᒍ; ᐃᑎᒐᖕᒪ ᐃᓂᖓ ᐱᓐᓇᕐᓇᕐᓯᑎᑦᓱᒪᒐᒃᑯ. 14#ᑕᑯᑎ 3:9.ᐃᓕᑦᓯᓐᓂᒃ ᐅᖁᒤᒃᓴᕐᑎᑦᓯᕙᓚᐅᕐᑐᑦ ᐃᕐᓂᖏᓐᓄᑦ ᐹᒻᒪᒃᑎᕐᕕᐅᔭᕐᑐᕈᒫᕐᐳᓯ; ᐆᒥᓱᒃᑎᒋᓚᐅᕐᑕᓕᒫᓯᓗ ᒥᑭᒡᓕᑎᕐᓗᑎᒃ ᐃᑎᒐᑦᓯᓐᓄᑦ ᐹᒻᒪᒋᐊᕐᑐᕈᒫᕐᐳᑦ; ᑍᔭᐅᓕᕐᓗᓯᓗ ᐊᑕᓂᐅᑉ ᐃᒡᓗᒐᓴᒡᔪᐊᖁᑎᖏᓐᓂᒃ, ᓮᐅᓂᒥᒃ ᐃᓴᕆᐊᓕᐅᑉ ᐃᑦᔪᕐᓁᑦᑐᖁᑎᖓᓂᒃ. 15ᖁᔭᓈᕐᑕᐅᓯᒪᓚᐅᕋᓗᐊᕐᑎᓪᓗᓯ ᐆᒥᒋᔭᐅᓪᓗᓯᓗ, ᐊᖅᑯᓵᕐᑕᐅᕙᒍᓐᓃᕐᓗᓯᓘᓐᓃᑦ, ᐅᐱᓐᓇᕐᓯᑎᑦᓱᒫᕐᐸᑦᓯ ᐃᓱᖃᖏᑦᑐᒧᑦ, ᑭᖑᕚᕇᓄᓪᓗ ᐅᓄᕐᑐᓄᑦ ᖁᕕᐊᒋᔭᐅᓕᕐᓗᓯ. 16ᐃᓅᖃᑎᒌᒡᔪᐊᑦ ᐃᒻᒧᖏᓐᓂᒃ ᐃᒥᕈᒫᕐᐳᓯ, ᐊᖓᔪᖅᑳᕐᔪᐊᓪᓗ ᐊᒫᒪᖏᓐᓂᑦ ᐊᒫᒪᒡᓗᓯ; ᖃᐅᔨᓕᖁᓪᓗᓯ ᐅᕙᖓ ᐊᑕᓂᖅ ᐱᐅᓕᔨᐅᒐᒪ ᐃᓕᑦᓯᓐᓄᑦ ᐅᑎᕐᑎᑦᓯᔨᓯ, ᔧᑰᑉ ᑭᖑᕚᖏᑕ ᐊᔪᒐᖃᖏᑦᑐᖁᑎᖓ. 17ᑲᓐᓄᔭᖁᑎᓯ ᐊᓯᑦᔨᕈᒫᕐᐸᒃᑲ ᒎᓗᓂᒃ ᐱᑎᖔᕐᓗᓯ, ᓴᕕᕋᔭᑐᐃᓐᓁᑦ ᐊᓯᑦᔨᕐᓗᒋᑦ ᓯᐅᓪᕕᕆᓂᒃ; ᕿᔪᖁᑎᓯᓗ ᑭᖑᕝᕕᕐᓗᒋᑦ ᑲᓐᓄᔭᓂᒃ, ᐅᔭᕋᖁᑎᓯᓗ ᓴᕕᕋᔭᒃᓴᓂᒃ ᑭᖑᕝᕕᕐᓗᒋᑦ, ᓮᓕᑎᑦᓯᔪᓂᒃ ᐊᐅᓚᑦᓯᔨᑖᕐᑎᑦᓱᒫᕐᐸᑦᓯ ᓇᓛᒎᕐᑐᓂᒡᓗ ᐊᖓᔪᖅᑳᖃᓕᕐᓗᓯ. 18ᑲᑉᐱᐊᓵᕆᔪᓂᒃ ᓄᓇᑦᓯᓐᓂ ᑐᓴᕐᓇᕐᑐᖃᕈᓐᓃᕈᒫᕐᐳᖅ, ᖃᓄᐃᓕᔭᐅᔪᓂᒃ ᑲᑉᐱᐊᓇᕐᑐᓂᒡᓗ ᓄᓇᒋᔭᑦᓯ ᑭᒡᓕᖓ ᑎᑭᓪᓗᒍ ᑐᓴᒐᒃᓴᕐᑕᖃᕈᒫᓐᖏᓚᖅ; ᐊᑭᓐᓇᖁᑎᓯ ᑍᔪᒫᕐᐸᓯ ᐱᐅᓕᔭᐅᕕᖕᒥᒃ, ᐃᑎᕐᑕᕐᕕᖁᑎᓯᓗ ᓂᕐᑐᐃᓂᕐᒥᒃ. 19#ᑕᑯᑎ 21:23; 22:5.ᓯᕿᓂᖅ ᐅᓪᓘᒐᓗᐊᒃᑯᑦ ᖃᐅᒪᑦᔪᑎᒋᔭᕆᐊᖃᕈᒫᓐᖏᓚᓯ, ᑕᖅᑭᐅᓪᓗ ᖃᐅᒪᓂᖓ ᐅᓐᓄᐊᒥ ᖃᐅᒪᑦᔪᑎᒋᔭᕆᐊᖃᕈᒫᓐᖏᓐᓂᕙᓯ; ᐊᑕᓂᐅᑉ ᖃᐅᒪᓂᖓᓄᑦ ᖃᐅᒪᑎᑕᐅᓕᕈᒫᕋᑦᓯ ᑍᒫᓐᖓᓕᒫᖅ, ᒎᑎᓯᓗ ᐱᓐᓇᕐᓇᕐᓂᕆᔪᒫᕐᐸᓯ. 20ᓯᕿᓂᓯ ᓂᐱᔪᐃᑦᑑᓕᕈᒫᕐᐳᖅ, ᑕᖅᑭᕐᓗ ᑕᕐᕆᑉᐸᒍᓐᓃᕐᓗᓂ; ᐊᑕᓂᐅᑉ ᖃᐅᒪᓂᖓᑕ ᐃᓱᖃᖏᑦᑐᒧᑦ ᖃᐅᒪᑎᑦᓱᒫᕐᐹᓯ, ᐅᓪᓗᐃᑦ ᕿᒃᓵᒡᕕᒋᓚᐅᕐᑕᓯ ᐃᓱᓕᑦᓱᒫᕐᒪᑕ. 21ᐃᓄᖁᑎᓕᒫᓯ ᓇᓛᒎᑦᓯᐊᓕᕈᒫᕐᒪᑕ; ᓄᓇᓗ ᐱᒋᓕᕐᓗᒍ ᐃᓱᖃᖏᑦᑐᒧᑦ, ᐱᕈᕐᓯᐊᒃᓴᓐᖑᕐᑎᓚᐅᕋᒃᑭᑦ ᐱᕈᕐᓰᕕᓐᓂ ᐊᒡᒐᓐᓄᑦ ᐋᖅᑭᒃᓱᕐᓗᒋᑦ, ᐱᓐᓇᕐᓇᕐᑎᑕᐅᖁᓪᓗᖓ ᑖᒃᑯᑎᒎᓇᖅ. 22ᐅᓄᖏᓐᓂᕐᐹᑦ ᐃᓅᖃᑎᒌᒡᔪᐊᓐᖑᕈᒫᕐᐳᑦ, ᐃᓄᑭᓐᓂᕐᐹᓪᓗ ᐅᓄᕐᓂᕐᐹᓐᖑᕈᒫᕐᐳᑦ ᐱᔪᓐᓇᕐᑐᕐᔪᐊᓐᖑᕐᓗᑎᒃ, ᐅᕙᖓ ᐊᑕᓂᐅᒐᒪ; ᑕᒪᑐᒪ ᓇᓪᓕᐅᑎᓂᒃᓴᖓ ᐊᑯᓂᐅᑎᓐᓂᐊᕈᓐᓃᕐᐸᕋ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 60: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
