ᐂᓮᐊᓯᐅᑉ ᐊᒡᓚᖏᑦ 59
59
ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐃᓄᐃᑦ ᐊᔪᕐᑐᓕᓂᖏᓐᓂᒃ ᐅᖃᐅᓯᖃᕐᓂᖓ
1ᑕᑯᒋᑦ ᐊᑕᓂᐅᑉ ᑕᓕᖓ ᓁᓗᐊᓐᖏᓚᖅ ᐱᐅᓕᒃᓯᔭᕆᐊᒃᓴᖅ, ᓯᐅᑎᖏᒡᓗ ᑐᓵᑦᓯᐊᖏᑦᑑᓇᑎᒃ, ᑐᓴᕈᓐᓁᓪᓕᓐᖏᓚᖅ. 2ᐱᐅᖏᑦᑐᓂᒃ ᐱᓇᓱᐊᖃᑦᑕᕐᓂᑦᓯᓐᓄᑦ ᒎᑎᑦᓯᓐᓂᒃ ᐊᕕᑦᑎᓯᒪᒐᑦᓯ, ᐊᔪᕐᓂᑦᓯᓐᓄᑦ ᑮᓇᖓ ᐃᓕᑦᓯᓐᓄᑦ ᑕᕐᕆᓯᒪᓕᕐᒪᑦ ᑍᒫᒃ ᑐᓴᕈᓐᓁᓪᓕᕚᓯ. 3ᐊᒡᒐᓯ ᐊᐅᖕᒧᑦ ᓴᓗᒤᓕᓯᒪᖕᒪᑕ, ᐊᒡᒐᑦᓯᓗ ᐃᓄᒐᓐᖑᐊᖏᑦ ᐊᔪᕐᑐᓕᓂᕐᒧᑦ ᓴᓗᒤᓕᓯᒪᕗᑦ; ᖃᓂᓯ ᓱᓕᖏᑦᑐᓂᒃ ᐅᖃᐅᓯᖃᖃᑦᑕᕐᐳᑦ, ᐅᖃᓯᓗ ᐊᔪᕐᑐᓕᔪᒪᓂᕐᒥᒃ ᐅᖃᐅᓯᖃᕐᐸᒃᓗᓂ. 4ᓈᒻᒪᑦᓯᐊᕐᑐᒥᒃ ᐊᑐᕋᓱᐊᕐᑐᖃᓐᖏᓚᖅ ᐃᖅᑲᕐᑐᐃᕕᖕᒥ, ᐱᖁᔭᓕᕆᕕᖕᒥ ᓱᓕᖏᑦᑐᓂᒃ ᐅᖃᕐᐸᒃᐳᑦ; ᓱᓕᓂᖃᖏᑦᑐᓂᒃ ᓴᐳᓐᓂᐊᕈᑎᖃᕐᐸᒃᐳᑦ ᓴᒡᓗᕙᒃᓗᑎᒡᓗ; ᐱᐅᖏᑦᑐᒥᒃ ᓄᑕᕋᒃᓴᓕᐅᕋᒥᒃ ᐊᔪᕐᑐᓕᓂᕐᒥᒃ ᐃᕐᓂᐊᖃᕐᐸᒃᐳᑦ. 5ᖁᒡᓗᒋᐊᑦ ᑐᖁᓐᓇᕐᑐᓖᑦ ᒪᓐᓂᖏᓐᓂᒃ ᑐᑭᕐᑎᑦᓯᕙᒃᐳᑦ ᐋᓯᕙᐅᓪᓗ ᓄᓗᐊᖏᓐᓂᒃ ᑭᓪᓔᔧᕙᒃᓗᑎᒃ, ᖁᒡᓗᒋᐊᑦ ᒪᓐᓂᖏᓐᓂᒃ ᓂᕆᔪᖅ ᑐᖁᓂᐊᕐᐳᖅ, ᑐᓪᓖᔪᓪᓗ ᖁᒡᓗᒋᐊᓂᒃ ᑐᖁᓐᓇᕐᑐᓕᖕᓂᒃ ᓴᖅᑭᕝᕕᐅᕙᒃᐳᑦ. 6ᓄᕕᕐᓴᕐᑕᖏᑦ ᐊᓐᓄᕌᒃᓴᓐᖑᕈᓐᓇᓐᖏᓚᑦ; ᐱᓇᓱᐊᕐᑕᖏᓪᓗ ᐅᓕᒃᓴᓐᖑᕈᓐᓇᕋᑎᒃ, ᐱᓂᐊᕐᓂᖏᑦ ᐊᔪᕐᑐᓕᓂᕐᓂᒃ ᐱᓇᓱᐊᕐᓂᐅᖕᒪᑕ, ᐊᒡᒐᖏᓪᓗ ᑲᑉᐱᐊᓱᐊᑎᑦᓯᓂᕐᒥᒃ ᐱᓇᓱᐊᕐᓂᖃᕐᐳᑦ. 7#ᕉᒪᒥᐅᓄᑦ 3:15-17.ᐃᑎᒐᖏᑦ ᐱᐅᖏᑦᑐᓕᔪᒪᓂᕐᒧᑦ ᐅᓪᓚᖃᑦᑕᕐᐳᑦ, ᑐᐊᕕᖃᑦᑕᕐᐳᑦ ᐸᓯᔭᒃᓴᐅᖏᑦᑐᓂᒃ ᐃᓄᐊᕈᒪᓪᓗᑎᒃ, ᐃᓱᒪᒃᓴᕐᓯᐅᕐᐳᓪᓗ ᐊᔪᕐᑐᓕᔪᒪᓪᓗᑎᒃ; ᐊᖅᑯᑏᑦ ᐊᑐᕐᑕᕕᓂᖏᑦ ᐃᓄᐃᕈᑎᓯᒪᓪᓗᑎᒃ ᐊᓯᕈᕐᑕᐅᓯᒪᕗᑦ. 8ᐊᖅᑯᒻᒥᒃ ᓮᒪᓇᕐᑐᒥᒃ ᖃᐅᔨᒪᓐᖏᓚᑦ, ᐊᑦᔨᒌᒃᑎᑦᓯᓂᕐᒥᒃ ᐊᖅᑯᑏᑦ ᐊᑐᕐᑕᖏᑦ ᑕᑯᔭᒃᓴᕐᑕᖃᓐᖏᓚᑦ; ᐊᖅᑯᑎᓂᒃ ᓴᖑᐃᕐᑎᑦᓯᕗᑦ, ᓇᓪᓕᐊᑦ ᐊᖅᑯᑎᖏᑎᒎᕐᑐᖅ ᓮᒪᓇᕐᑐᒥᒃ ᖃᐅᔨᓂᐊᓐᖏᓚᖅ. 9ᑍᒤᒻᒪᑦ ᐊᑦᔨᒌᒃᑎᑦᓯᓂᕐᒥᒃ ᐱᓇᓱᐊᕐᓂᖅ ᐅᓇᖕᒥᓇᕈᓐᓃᕐᐳᖅ ᐅᕙᑦᑎᓐᓄᑦ, ᓇᓛᒎᕐᓂᕐᓗ ᐅᕙᑦᑎᓐᓄᑦ ᑎᑭᐅᑎᔪᓐᓁᓪᓕᕗᖅ; ᖃᐅᒪᔪᒥᒃ ᐅᑕᖅᑭᒐᓗᐊᕋᑦᑕ, ᑖᕐᑐᒥᒃ ᑕᑯᓐᓇᕐᐳᒍᑦ, ᖃᐅᒪᑦᓯᐊᕐᑐᒥᒃ ᑕᑯᔪᒪᒐᓗᐊᕐᓗᑕ ᑖᕐᓯᐅᑐᐃᓐᓇᕐᐳᒍᑦ. 10ᑕᐅᑐᖏᑦᑐᑎᑐᑦ ᐃᒡᓘᑉ ᐊᑭᓐᓇᖓᓂᒃ ᑕᑦᓯᑲᓗᒃᐳᒍᑦ, ᐊᑐᕐᓂᐊᕐᑕᕗᑦ ᑕᑦᓯᑲᒡᓗᒍ ᐃᔨᖃᖏᑦᑐᑎᑐᑦ, ᐅᓪᓗᓪᓗᐊᒃᑯᑦ ᑐᑦᔭᐱᖃᑦᑕᕐᐳᒍᑦ ᑖᕐᓯᑦᔪᑦᔭᐅᔪᑎᑐᑦ; ᐱᔪᓐᓇᑦᓯᐊᕐᑐᑦ ᐊᑯᓐᓂᖓᓐᓂ ᑐᖁᖓᔪᑎᑐᑦ ᑍᒤᑉᐳᒍᑦ. 11ᖃᓕᖑᐊᕐᐸᒡᓗᑕᓗ ᑕᒪᑦᑕ ᓇᓄᕐᑎᑐᑦ; ᓂᐹᕗᒍᑦ ᑎᖕᒥᐊᑎᑐᑦ ᑑᕕᑎᑐᑦ ᓂᓪᓕᐊᕌᕐᔪᑐᐃᓐᓇᕐᓗᑕ; ᐊᑦᔨᒌᒃᑎᑦᓯᓂᖅ ᕿᓂᕋᓗᐊᕋᑦᑎᒍ ᐱᑕᖃᓐᖏᓚᖅ; ᐱᐅᓕᔭᐅᓂᖅ ᐅᕙᑦᑎᓐᓂᑦ ᐅᖓᓯᒃᑑᕗᖅ. 12ᐊᔪᕐᑐᓕᓂᕗᑦ ᐅᓄᓗᐊᓕᕐᒪᑕ ᓵᖕᓂ, ᐊᔪᕐᓂᑦᑕᓗ ᐸᓯᔭᒃᓴᐅᓂᖏᓐᓄᑦ ᐃᖅᑲᕐᑐᕐᑕᐅᓪᓗᑕ; ᐊᔪᕐᑐᓕᓂᑦᑕ ᓇᔪᕐᒪᑎᒍᑦ, ᐊᔪᕐᑐᓕᓂᕗᓪᓗ ᖃᐅᔨᒪᓪᓗᒋᑦ. 13ᐊᔪᕐᑐᓕᓂᖅ ᐊᑕᓂᕐᒧᓪᓗ ᓴᒡᓗᕿᑦᑎᓯᒪᓂᖅ, ᒎᑎᑦᑎᓐᓂᒡᓗ ᑐᓄᑦᓯᓯᒪᓂᖅ, ᐅᖁᒤᒃᓴᕐᑎᑦᓯᓂᕐᒥᒃ ᐅᖃᐅᓯᖃᕐᓂᖅ ᓂᓐᖓᐅᒪᓂᕐᒧᓪᓗ ᐊᑭᓂᐊᕐᓂᖅ, ᐆᒻᒪᑎᒥᓪᓗ ᐱᔪᓂᒃ ᐋᓐᓂᕐᓇᕐᑐᓂᒃ ᐅᖃᐅᓯᖃᕐᓂᖅ ᓱᓕᖏᑦᑐᓂᒃ. 14ᐊᑦᔨᒌᒃᑎᑦᓯᓂᖅ ᐅᑎᕆᐊᕐᓯᒪᖕᒪᑦ, ᓇᓛᒎᕐᓂᕐᓗ ᓇᖏᕐᐳᖅ ᐅᖓᓯᒋᔭᑦᑎᓐᓂ; ᓱᓕᑦᓯᐊᕐᓂᖅ ᐅᕐᕈᖓᕗᖅ ᐊᖅᑯᑎᓂ ᐃᓄᒋᐊᒡᕕᐅᕙᒃᑐᓂ, ᐃᓅᓯᖃᑦᓯᐊᕐᓂᕐᓗ ᐃᑎᕈᓐᓇᕋᓂ. 15ᓱᓕᑦᓯᐊᕐᓂᖅ ᐊᓯᐅᓯᒪᕗᖅ, ᐱᐅᖏᑦᑐᒥᒡᓗ ᐊᑐᕈᒪᔪᓐᓃᕐᑐᖅ ᐃᒻᒥᓂᒃ ᒪᓂᑐᐃᓐᓇᓕᕐᐸᒃᐳᖅ ᐅᒋᐊᓐᖑᔪᓄᑦ. ᐊᑕᓂᐅᑉ ᑕᒪᒃᑯᐊ ᑕᑯᓪᓗᒋᑦ ᖁᕕᐊᓲᑎᒋᓐᖏᓔᑦ, ᐊᑦᔨᒌᒃᑎᑦᓯᓂᕐᒥᒃ ᐱᓇᓱᐊᕐᑐᖃᕈᓐᓃᕐᒪᑦ.
ᐊᑕᓂᐅᑉ ᓴᐳᑦᔨᒋᐊᕈᒪᓕᕐᓂᖓ ᐃᓄᖁᑎᒥᓂᒃ
16 #
ᐂᓮᐊᓯ 63:5. ᑕᑯᒐᒥ ᐃᓄᒃᑕᖃᕈᓐᓃᕐᑐᖅ ᐊᑕᐅᓯᕐᒥᒡᓘᓐᓃᑦ; ᑲᒪᓂᐊᕐᐳᕐᓗ ᑐᒃᓯᐅᑦᔨᔨᒃᓴᕐᑕᖃᕈᓐᓃᕐᒪᑦ; ᑍᒤᒻᒪᑦ ᓇᖕᒥᓂᖅ ᐱᔪᓐᓇᕐᓂᕐᒥᒍᑦ ᐱᐅᓕᔭᐅᕕᒃᓴᖅ ᑖᑦᓱᒧᖓ ᕾᑎᑉᐹ; ᓇᓛᒎᕐᓂᖓᑕᓗ ᑲᔪᓯᑎᓚᐅᕐᐹ. 17#ᐃᐱᓯ 6:14,17; 1 ᑎᓴᓗᓁ 5:8.ᓇᓛᒎᕐᓂᖅ ᓴᒡᕕᖕᒥᐅᑕᕐᑖᕆᕚ, ᐱᐅᓕᔭᐅᓂᕐᓗ ᓇᓴᕐᑖᕆᓪᓗᒍ, ᐊᓐᓄᕌᕐᓗᓂᓗ ᐊᑭᓂᐊᕐᓂᕐᒥᒃ, ᓂᓐᖓᐅᒪᓂᕐᔪᐊᕐᓗ ᐊᑎᕚ ᐅᓕᒡᔪᐊᓕᐅᑎᓪᓗᒍ. 18ᐱᓂᐊᕐᓂᕆᓯᒪᔭᖏᑦ ᒪᓕᒡᓗᒋᑦ ᐊᑭᓕᕈᒫᕐᐰᑦ, ᐊᑭᕋᕐᑐᕐᑎᓂ ᓂᓐᖓᐅᒪᓂᕐᒥᓄᑦ ᐱᓇᓱᐊᕐᕕᒋᔪᒫᕐᐰᑦ; ᐊᑭᕋᕐᑐᕐᑎᓂ ᑍᒫᓪᓗᐊᖅ ᐱᓂᐊᕐᕕᒋᓗᒋᑦ; ᐃᒪᐅᓪᓗ ᓯᓈᓂᒥᐅᑦ ᐱᓂᐊᕐᓂᖏᑦ ᒪᓕᒡᓗᒋᑦ ᐱᓇᓱᐊᕐᕕᒋᔪᒫᕐᐰᑦ. 19ᓯᕿᓂᐅᑉ ᓂᐱᕕᐊᑕ ᓇᓛᓂᒥᐅᑦ ᐃᓄᖏᑦᑕ ᐊᑕᓂᐅᑉ ᐊᑎᖓ ᓯᕘᕋᒋᔪᒫᕐᐹᑦ, ᓯᕿᓂᐅᓪᓗ ᓄᐃᕕᐊᑕ ᓇᓛᓂᒥᐅᑦ ᐃᓄᖏᑦᑕ ᓂᕐᑐᕐᓇᕐᓂᖓ ᐃᓕᕋᒋᔪᒫᕐᐸᑦ; ᐊᑭᕋᕐᑐᕐᑎᖓ ᑎᑭᑉᐸᑦ ᓱᑲᑦᑐᒥᒃ ᑰᒃᑐᑎᑐᑦ, ᐊᑕᓂᐅᑉ ᐊᓂᕐᓂᖓ ᒪᑭᓪᓗᓂ ᓵᑦᓯᔪᒫᕐᐳᖅ ᑖᑦᓱᒥᖓ. 20#ᕉᒪᒥᐅᓄᑦ 11:26.“ᐱᐅᓕᔨᒃᓴᖅ ᓮᐅᓂᒧᑦ ᑎᑭᑦᓱᒫᕐᒪᑦ ᐱᐅᓕᓯᔭᕐᑐᕐᓗᓂ, ᔧᑰᑉ ᑭᖑᕚᖏᓐᓄᑦ ᐊᔪᕐᓂᕐᒥᑦ ᕿᒤᓯᒪᔪᓄᑦ,” ᐊᑕᓂᖅ ᐅᖃᕐᐳᖅ. 21“ᐅᕙᖓᓕ,” ᐊᑕᓂᖅ ᐅᖃᕐᐳᖅ: “ᐃᒫᒃ ᐊᖏᖃᑎᒌᒍᑎᒥᒃ ᓇᓗᓁᕐᓯᕕᒋᔪᒪᕙᒃᑲ; ᐊᓂᕐᓂᕋ ᐃᓕᖕᓃᑦᑐᖅ, ᐅᖃᐅᓯᒃᑲᓗ ᖃᓂᕐᓄᑦ ᐃᓕᓯᒪᔭᒃᑲ, ᖃᓂᕐᓂᒃ ᕿᒤᓂᐊᓐᖏᓚᑦ, ᑭᖑᕚᕐᓂᓪᓗ ᑭᖑᕚᕆᔪᒫᕐᑕᖏᑕᓗ ᖃᓂᖏᓐᓂᒃ, ᐊᑕᓂᖅ ᑍᒪᒃ ᐅᖃᕐᐳᖅ, ᒫᓐᓇᒥᑦ ᐱᒋᐊᕐᓗᒍ ᐃᓱᖃᖏᑦᑐᒧᓪᓗ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 59: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
