ᐂᓮᐊᓯᐅᑉ ᐊᒡᓚᖏᑦ 56
56
ᒎᑎᐅᑉ ᐃᓄᖁᑎᖏᑦ ᐃᓚᒋᓕᐅᑦᔨᔪᒫᕐᐳᑦ ᐃᓅᖃᑎᒌᒡᔪᐊᓕᒫᓂᒃ
1ᐃᒫᒃ ᐊᑕᓂᖅ ᐅᖃᕐᐳᖅ: “ᐊᑦᔨᒌᒃᑎᑦᓯᓂᖅ ᐊᑐᕐᑕᐅᓕ, ᓇᓛᒎᕐᑐᒥᒡᓗ ᐱᓇᓱᐊᕐᓗᓯ, ᐱᐅᓕᒃᓯᓂᒃᓴᕋ ᖃᓂᑦᑑᓕᕐᒪᑦ, ᓴᐳᑦᔨᓂᕋᓗ ᓴᖅᑭᑎᓐᓂᐊᓕᕋᒃᑯ. 2ᖁᕕᐊᓱᒃᐳᖅ ᐃᓄᒃ ᑍᒤᓕᐅᕐᑐᖅ, ᐃᓅᓪᓗ ᐃᕐᓂᖓ ᑕᒪᑐᒥᖓ ᑎᒍᒥᐊᑦᓯᐊᕋᓱᐊᕐᑐᖅ; ᓴᐸᑎᒥᒡᓗ ᑲᒪᑦᓯᐊᕐᑐᖅ ᓇᕐᕈᓇᕐᓯᑎᓐᓇᒍᓗ, ᐱᐅᖏᑦᑐᒥᒡᓗ ᐱᓇᓱᐊᕐᑍᓕᔪᖅ.” 3ᔫᑎᐅᖏᑦᑐᖅ ᐊᑕᓂᕐᒥᒃ ᐃᓚᓕᐅᕐᓯᒍᓂ ᐃᓱᒪᑦᑍᓕᓕ, “ᐊᑕᓂᐅᑉ ᐃᓄᖁᑎᒥᓄᑦ ᐃᓚᒋᔭᐅᑎᑦᓱᓐᓇᓐᖏᓛᖓ.” ᐃᒡᔪᐃᕐᑕᐅᓯᒪᔪᖅ ᐊᖑᑦ ᐅᖃᕐᓂᐊᕋᓂ, “ᓇᐹᕐᑐᑐᑦ ᐸᓪᓕᕐᑎᑐᑦ ᑍᒤᑉᐳᖓ.” 4ᐃᒫᒃ ᐊᑕᓂᖅ ᐅᖃᕐᒪᑦ; ᕿᑐᕐᖏᑦᔧᕐᑎᑕᐅᓯᒪᔪᓄᑦ ᐊᖑᑎᓄᑦ ᑲᒪᑦᓯᐊᕐᐸᒃᑐᓄᑦ ᓴᐸᑎᒥᒃ, ᒪᓕᒍᒪᔭᖃᓕᕐᑐᓪᓗ ᖁᕕᐊᒋᔭᓐᓂᒃ ᐊᖏᖃᑎᒌᒍᑎᒋᓯᒪᔭᓐᓂᒡᓗ ᑲᒪᑦᓯᐊᕐᑐᑦ. 5ᑖᒃᑯᓄᖓ ᑐᓂᓯᔪᒫᕐᐳᖓ ᐃᒡᓗᒪ ᐃᓗᐊᓂ, ᐃᒡᓗᒪᓗ ᐊᑭᓐᓇᖓᓂ, ᐃᖅᑲᐅᒪᑦᔭᐅᔪᑎᒃᓴᖏᓐᓂᒃ ᐊᑎᓕᐅᕐᓗᒋᓪᓗ ᐃᕐᓂᐅᔪᑦ ᐸᓂᐅᔪᓪᓗ ᐊᑎᖏᑕ ᐱᐅᖅᑭᔭᖏᓐᓂᒃ; ᐊᑦᓯᕈᒫᕐᐸᒃᑲ ᐊᑎᕐᒥᒃ ᐃᓱᖃᖏᑦᑐᒧᑦ ᐲᕐᑕᐅᓂᐊᖏᑦᑐᒥᒃ. 6ᔫᑎᐅᖏᑦᑐᓪᓗ ᐊᑕᓂᕐᒧᑦ ᐃᒻᒥᖕᓂᒃ ᐃᓚᓕᐅᑎᔪᓄᑦ ᐱᔨᑦᓯᕈᒪᓪᓗᒍ, ᐊᑕᓂᐅᓪᓗ ᐊᑎᖓᓂᒃ ᐅᖓᒋᔭᖃᕐᑐᑦ, ᐱᔨᐅᔪᒪᓪᓗᑎᒡᓗ ᑖᑦᓱᒧᖓ, ᓴᐸᑎᒥᒡᓗ ᑲᒪᑦᓯᐊᕐᑐᑦ ᓇᕐᕈᓇᕐᓯᑎᓐᓇᒍ, ᐊᖏᖃᑎᒌᒃᓯᒪᓂᑦᑎᓐᓂᒡᓗ ᑎᒍᒥᐊᕐᑐᑦ ᓴᒃᑯᐃᓇᒍᓗ. 7#ᒫᑎᐅᓯ 21:13; ᒫᑯᓯ 11:17; ᓘᑲᓯ 19:46.ᑖᒃᑯᐊ ᖃᖅᑲᖁᑎᓐᓄᑦ ᐃᑦᔪᕐᓁᑦᑐᒧᑦ ᐂᑎᑦᓱᒫᕐᐸᒃᑲ, ᖁᕕᐊᓱᒃᑎᓪᓗᒋᓪᓗ ᐃᒡᓗᓐᓂ ᑐᒃᓯᐊᕐᕕᖁᑎᓐᓂ. ᐃᑯᐊᓚᑦᓯᓂᒃᑯᑦ ᑐᓂᕐᕈᑎᖏᑦ ᑐᓂᕐᕈᑎᑐᐃᓐᓇᖏᓪᓗ ᓈᒻᒪᒋᔭᐅᔪᒫᕐᐳᑦ ᑐᓂᕐᕈᓯᕐᕕᖁᑎᓐᓂ; ᐃᒡᓗᒐ ᑍᔭᐅᔪᒫᕐᒪᑦ ᑐᒃᓯᐊᕐᕕᖕᒥᒃ ᐃᓅᖃᑎᒌᒡᔪᐊᓕᒫᓄᑦ. 8ᐃᒫᒃ ᐊᑕᓂᖅ ᒎᑎ ᐅᖃᕐᒪᑦ, ᑖᓐᓇ ᑲᑎᕐᓱᐃᔪᖅ ᐃᓴᕆᐊᓕᒥᐅᑦ ᐊᓂᑎᓯᒪᔭᖏᓐᓂᒃ, “ᑲᑎᕐᓱᐃᕕᒋᔪᒫᕆᕙᒃᑲ ᑲᑎᕐᓱᕐᑕᐅᓯᒪᓕᕇᕐᑐᑦ ᐊᓯᖏᓐᓂᒃ.”
ᐃᓴᕆᐊᓕᒥᐅᑦ ᓯᕗᓕᕐᑎᖏᑕ ᐃᖅᑲᕐᑐᕐᑕᐅᓂᖏᑦ
9“ᐆᒪᔪᓕᒫᑦ ᓄᔪᐊᕐᑐᑦ ᓇᑎᕐᓇᒥᐅᑦ, ᓂᕆᔭᕐᑐᓕᕆᑦᓯ, ᐆᒪᔪᓕᒫᓪᓗ ᓇᐹᕐᑐᓕᖕᒥᐅᑦ. 10ᐃᓴᕆᐊᓕᒥᐅᑦ ᖃᐅᔨᓴᕐᑎᖏᑦ ᑕᐅᑐᖏᒻᒪᑕ, ᐃᓕᓯᒪᓂᖃᕋᑎᒡᓗ; ᕿᒻᒥᑎᑐᑦ ᐅᖃᕈᓐᓇᖏᑦᑐᑎᑐᑦ ᑍᒤᑉᐳᑦ, ᕿᓗᒍᓐᓇᖏᒻᒪᑕᓘᓐᓃᑦ, ᓇᓚᕋᑐᐃᓐᓇᕐᐳᑦ ᓯᓐᓇᒃᑑᒪᑐᐃᓐᓇᕐᓗᑎᒃ ᓯᓂᒍᒪᑐᐃᓐᓇᕋᒥᒃ. 11ᕿᒻᒥᑎᑐᑦ ᐊᕿᐊᕈᖅᑯᕐᑐᔪᑎᑐᑦ ᑍᒤᑉᐳᑦ; ᐊᕿᐊᑦᑐᕈᓐᓇᕋᑎᒃ ᓈᒻᒪᒃᓯᔪᓐᓇᓐᖏᓚᑦ. ᐰᕐᓯᔨᐅᕗᓪᓗ ᑐᑭᓯᓂᖃᖏᑦᑐᑦ; ᓇᖕᒥᓂᖅ ᐊᑐᕈᒪᔭᑐᐃᓐᓇᕐᒥᖕᓄᑦ ᓴᖑᔭᑦᑐᑦ; ᓇᖕᒥᓂᕐᓗ ᐱᔪᓐᓇᕐᓯᑦᔪᑎᒃᓴᒥᖕᓂᒃ ᐃᓱᒪᒋᔭᑐᐊᖃᕐᐳᑦ, ᐃᓘᓐᓇᑦᓯᐊᑎᒃ. 12ᐅᖃᕐᐸᒃᐳᑦ, ‘ᕾᒋᑦᓯ ᕔᓂᒥᒃ ᐃᒥᕐᓂᐊᕐᑕᑦᓯᓐᓂᒃ ᐱᓂᐊᕋᒪ, ᐃᒥᕈᐃᑦᓯᐊᕐᓗᑕ ᓲᖑᔪᒥᒃ ᐃᒥᓚᐅᕐᑕ; ᖃᐅᒃᐸᑦ ᓱᓕ ᐅᓪᓗᒥᑐᑦ ᐱᓂᐊᕐᒥᒐᑦᑕ, ᐅᕝᕙᓘᓐᓃᑦ ᐱᐅᓂᕐᓴᒃᑲᓐᓂᕐᒥᒃ ᐱᓛᕐᐳᒍᑦ.’”
Currently Selected:
ᐂᓮᐊᓯᐅᑉ ᐊᒡᓚᖏᑦ 56: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
