ᐂᓮᐊᓯᐅᑉ ᐊᒡᓚᖏᑦ 13
13
ᒎᑎᐅᑉ ᓱᒋᐊᕐᓯᔪᒫᕐᓂᖓ ᐹᐱᓘᓂᒥᒃ
1 #
ᐂᓮᐊᓯ 47:1-15; ᔨᕆᒤᐊ 50:1—51:64. ᐅᑯᐊ ᐅᖃᐅᓰᑦ ᐹᐱᓘᓂᒧᑦ ᑐᕌᖓᔪᑦ, ᐂᓮᐊᓯᐅᑉ ᐂᒨᓯᐅᑉ ᐃᕐᓂᖓᑕ ᑕᑯᓚᐅᕐᑕᖏᑦ.
2“ᖃᖅᑲᐅᑉ ᐳᕐᑐᔫᑉ ᐱᕈᕐᑐᖃᖏᑦᑑᑉ ᖄᖓᓂ ᓇᓗᓁᒃᑯᑦᓯᓕᕆᑦᓯ, ᓂᐱᖅᑯᕐᑐᓗᓯ ᓂᓪᓕᐊᕕᒋᓕᕐᓯᐅᒃ; ᑕᓕᑦᓯᓐᓄᓪᓗ ᓄᓗᕋᕐᓗᒋᑦ, ᐃᑎᕈᓐᓇᖁᓪᓗᒋᑦ ᐊᖓᔪᖅᑳᑦ ᐃᑎᕐᑕᕐᕕᖓᒍᑦ. 3ᐃᑦᔪᕐᓁᑎᑕᒃᑲ ᐱᖁᓯᒪᕙᒃᑲ; ᕾᖁᓪᓗᒋᓪᓗ ᐊᔪᖏᑦᑐᕐᔪᐊᖁᑎᒃᑲ ᓂᓐᖓᐅᑎᓯᒪᔭᓐᓂᒃ ᐱᓇᓱᐊᖁᓪᓗᒋᑦ, ᑖᒃᑯᐊ ᐊᖏᔪᕈᕐᑎᑕᐅᓂᓐᓂᒃ ᖁᕕᐊᓲᑎᖃᕐᑐᑦ.
4“ᐃᓄᒐᓴᒡᔪᐊᑦ ᖃᖅᑲᓃᑦᑐᑦ ᓂᐱᕐᔪᐊᖏᑦ ᑐᓴᕐᓴᐅᕗᑦ, ᓲᕐᓗ ᐃᓄᒋᐊᒃᑐᕐᔪᐊᓂᑦ ᐱᔪᑎᑐᑦ! ᓂᐱᕐᔪᐊᖃᕐᐳᖅ ᐊᖓᔪᖅᑳᕐᔪᐊᖃᕐᕕᖕᓂᑦ ᐱᔪᓂᒃ, ᐃᓅᖃᑎᒌᒡᔪᐊᑦ ᐊᖓᔪᖅᑲᐅᕕᖏᑦ ᑲᑎᒪᓕᕐᒪᑕ! ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᑲᔪᖏᕐᓮᓕᕐᒪᑦ ᐃᓄᒋᐊᒃᑐᕐᔪᐊᓂᒃ ᐅᓇᑕᕐᓂᕐᒧᑦ. 5ᑖᒃᑯᐊ ᓄᓇᒥᑦ ᐅᖓᓯᒃᑐᒥᑦ ᐱᕗᑦ, ᕿᓔᑦ ᐃᓱᐊᓂᑦ, ᐊᑕᓂᐅᑉ ᐅᓇᑕᐅᑏᓪᓗ ᓂᓐᖓᐅᑦᔨᓯᒪᓂᕐᒥᓄᑦ ᐱᓇᓱᐊᕐᓂᕆᕔᑦ, ᓄᓇᕐᔪᐊᖅ ᐃᓘᓐᓈᑦ ᐊᓯᕈᕈᒪᓪᓗᒍ.
6 #
ᔪᐃᓕ 1:15. “ᓂᐱᖅᑯᕐᑐᓗᓯ ᕿᐊᒋᑦᓯ, ᐊᑕᓂᐅᑉ ᐅᓪᓗᖓ ᖃᒡᓕᓕᕐᒪᑦ; ᐊᔪᒐᖃᖏᑦᑐᕐᔪᐊᑉ ᐊᓯᕈᐃᕕᒃᓴᖓ ᑎᑭᓕᕐᒪᑦ! 7ᑍᒤᒻᒪᑦ ᐊᒡᒐᓕᒫᑦ ᓄᑮᕈᑎᔪᒫᕐᐳᑦ, ᐃᓄᓕᒫᓪᓗ ᐆᒻᒪᑎᖏᑦ ᓴᐱᓕᕈᒫᕐᐳᑦ, 8ᑲᑉᐱᐊᓱᓕᕈᒫᕐᐳᓪᓗ. ᐋᓐᓂᕐᓇᕐᑐᕐᔪᐊᕐᒧᑦ ᓂᐹᓂᕐᒧᓪᓗ ᑎᑭᑕᐅᔪᒫᕐᐳᑦ; ᐋᓐᓂᐊᔪᐊᓘᔪᒫᕐᐳᑦ ᐊᕐᓇᑐᑦ ᐃᕐᓂᓱᒃᑐᑐᑦ; ᐃᕐᓯᓂᕐᒧᑦ ᐃᒻᒥᖕᓄᑦ ᑕᑯᓐᓇᖃᑦᑕᐅᑎᑐᐃᓐᓇᕈᒫᕐᐳᑦ; ᑮᓇᖏᓪᓗ ᑕᑯᒥᓁᓕᔪᒫᕐᐳᑦ ᐃᑯᒪᔪᑐᑦ. 9ᑕᑯᒋᑦ, ᐊᑕᓂᐅᑉ ᐅᓪᓗᖓ ᑎᑭᓕᕐᐳᖅ, ᓂᑲᓱᖏᓪᓗᓂ, ᓂᓐᖓᐅᒪᒻᒪᕆᒡᓗᓂ ᓂᓐᖓᐅᑦᔨᓯᒪᓗᓂᓗ, ᓄᓇ ᓱᓁᕈᑦᓯᐊᕈᒫᕐᐹ ᐊᔪᕐᑐᓕᔪᓪᓗ ᑕᕝᕙᓃᑦᑐᑦ ᓄᖑᓪᓗᒋᑦ. 10#ᐃᓯᑭᐊᓕ 32:7; ᒫᑎᐅᓯ 24:29; ᒫᑯᓯ 13:24,25; ᓘᑲᓯ 21:25; ᑕᑯᑎ 6:12,13; 8:12.ᐅᓪᓗᕆᐊᑦ ᕿᓚᖕᒦᑦᑐᑦ ᐋᖅᑭᒃᓯᒪᓂᖏᓪᓗ ᖃᐅᒪᔪᓐᓃᕈᒫᕐᐳᑦ, ᓯᕿᓂᖅ ᑖᕐᓯᔪᒫᕐᐳᖅ ᓄᐃᓕᕈᓂ, ᑕᖅᑭᕐᓗ ᖃᐅᒪᔪᓐᓃᕈᒫᕐᐳᖅ.
11“ᓄᓇᕐᔪᐊᖅ ᓱᒋᐊᕈᒫᕐᐸᕋ ᐊᔪᕐᑐᓕᓃᑦ ᐱᓪᓗᒋᑦ, ᐱᐅᖏᑦᑐᓕᔪᓪᓗ ᐱᐅᖏᑦᑐᓕᓂᖏᑦ ᐱᓪᓗᒋᑦ; ᐱᐅᔪᕆᔪᑦ ᑲᑉᐱᐊᒋᔭᐅᔪᒪᓂᖏᑦ ᐃᓱᓕᑎᑦᓱᒫᕐᐸᒃᑲ, ᒥᑭᒡᓕᑎᓪᓗᒋᓪᓗ ᐊᔪᖏᓐᓇᓱᒋᔪᑦ ᓂᑲᒍᓱᖃᖏᓐᓂᖏᑦ. 12ᐃᓄᐃᑦ ᐅᓄᖏᓐᓂᕐᓴᐅᓕᕐᑎᑦᓱᒫᕐᐸᒃᑲ ᒎᓗᑦᓯᐊᕙᖕᓂᑦ, ᐃᓄᒡᓗ ᐅᐱᕼᐃᒦᑦᑐᓂᑦ ᒎᓗᓕᕆᐅᑎᓂᑦ. 13ᑍᒤᒻᒪᑦ ᕿᓔᑦ ᓴᔪᒃᑎᑦᓱᒪᕙᒃᑲ, ᓄᓇᕐᔪᐊᕐᓗ ᐊᐅᓚᓂᕐᒥᓄᑦ ᐃᓂᒥᓂᑦ ᓅᑦᓱᒫᕐᐳᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᓂᓐᖓᐅᓯᖓᓂ ᐅᓪᓗᒥᓗ ᓂᓐᖓᐅᑦᔨᕕᖓᓂ.
14“ᕿᒫᔪᒫᕐᐳᑦ ᒐᔨᐊᓕᑎᑐᑦ ᐆᒪᔪᕐᓯᐅᕐᑐᒥᑦ ᕿᒫᔪᑎᑐᑦ, ᓰᐱᑎᑐᓪᓗ ᐰᕐᓯᔨᖃᖏᑦᑐᑎᑐᑦ; ᐃᓄᓕᒫᑦ ᓵᓐᖓᓕᕈᒫᕐᐳᑦ ᐃᓅᖃᑎᒥᖕᓄᑦ, ᐃᓄᓕᒫᓪᓗ ᓇᖕᒥᓂᖅ ᓄᓇᒥᖕᓄᑦ ᕿᒫᔪᒫᕐᐳᑦ. 15ᓇᓪᓕᐊᑦ ᓇᓂᔭᐅᔪᑦ ᑲᐱᔭᐅᓗᑎᒃ ᑐᖁᑕᐅᔪᒫᕐᐳᑦ, ᐊᖑᔭᐅᔪᓪᓗ ᓴᕕᒡᔪᐊᒧᑦ ᑐᖁᑕᐅᔪᒫᕐᐳᑦ. 16ᕿᑐᕐᖓᓛᖏᑦ ᐃᒋᑕᐅᓗᑎᒃ ᑐᖁᕋᕐᑕᐅᔪᒫᕐᐳᑦ ᑕᑯᓐᓈᕐᑎᓪᓗᒋᑦ; ᐃᒡᓗᖏᓪᓗ ᐃᓵᕐᓴᕐᑕᐅᓗᑎᒃ ᑎᒍᓚᕕᐅᔪᒫᕐᐳᑦ, ᓄᓕᐊᖏᓪᓗ ᖁᓄᔪᕐᓂᐊᕐᑕᐅᓗᑎᒃ ᐱᖃᑎᒋᔭᐅᔪᒫᕐᐳᑦ.
17“ᑕᑯᒋᑦ, ᒥᑏᔅᒥᐅᓂᒃ ᑲᔪᖏᕐᓮᓕᕐᐳᖓ ᑖᒃᑯᓂᖓ ᐅᓇᑕᕆᐊᕈᒪᓕᖁᓪᓗᒋᑦ. ᓯᐅᓪᕕᕆᒥᒃ ᓱᓇᐅᔪᕆᒃᓯᖏᑦᑐᓂᒃ ᒎᓗᒥᒡᓗ ᖁᕕᐊᒋᔭᖃᕋᑎᒃ. 18ᐱᑎᒃᓯᒥᖕᓄᑦ ᑐᖁᕅᔪᒫᕐᐳᑦ ᐃᓅᓱᒃᑐᓂᒃ; ᓂᑲᒍᓱᖃᓐᖏᓚᑦ ᐃᒡᓕᐊᕐᒥᑦ ᐊᓂᓯᒪᔪᓂᒃ; ᓄᑕᖅᑲᓂᒡᓗ ᓇᒡᓕᒍᓱᒐᑎᒃ. 19#ᒨᓯᓯ ᓯᕗᓪᓖᑦ 19:24.ᐹᐱᓘᓂ ᐊᖓᔪᖅᑲᐅᕕᓕᒫᓂᑦ ᑕᑯᒥᓇᕐᓂᕐᐹᖑᔪᖅ, ᐅᐱᓐᓇᕐᓗᓂᓗ ᐃᓄᖏᓐᓄᑦ ᑲᐅᓪᑎᐊᒥᐅᓄᑦ, ᐊᑦᔨᖃᕈᒫᕐᐳᖅ ᓱᑑᒪᒥᒃ ᒍᒨᕋᒥᒡᓗ. 20ᐃᓄᖃᓚᐅᕐᓯᒪᔪᓐᓃᕈᒫᕐᐳᖅ ᓄᓇᒋᔭᐅᕙᒍᓐᓃᕐᓗᓂᓗ ᑭᖑᕚᕇᓕᒫᓄᑦ, ᐋᕋᑉᒥᐅᓄᑦ ᑐᐱᖃᕐᕕᐅᔪᓐᓇᕈᒫᓐᖏᓚᖅ, ᓰᐱᓕᕆᔩᓪᓗ ᓰᐱᖁᑎᑎᒃ ᑕᒫᓃᑎᑦᓱᓐᓇᕈᒫᓐᖏᓔᑦ. 21#ᐂᓮᐊᓯ 34:14; ᔨᐸᓁᐊ 2:14; ᑕᑯᑎ 18:2.ᐆᒪᔪᓄᓪᓕ ᓄᔪᐊᕐᑐᓄᑦ ᐃᓂᒋᔭᐅᔪᒫᕐᐳᖅ, ᐃᒡᓗᕕᓂᖏᑦ ᑕᑕᑦᓱᒫᕐᐳᑦ ᐆᒪᔪᓂᒃ ᓂᓪᓕᐊᔪᓂᒃ; ᑎᖕᒥᐊᕐᔪᐊᓄᓪᓗ ᐋᔅᑐᕆᑦᓯᓄᑦ ᖃᖓᑕᔪᓐᓇᖏᑦᑐᓄᑦ ᓇᔪᒐᐅᓗᓂ, ᑕᕝᕙᓂᓗ ᓴᑍᕇᑦ ᑖᓂᓯᖃᑦᑕᕈᒫᕐᐳᑦ. 22ᕿᒻᒥᖓᔪᑦ ᕼᐋᐄᓁᑦ ᒥᐊᒡᒎᕈᒫᕐᐳᑦ ᓄᕗᒐᓴᒡᔪᐊᕕᓂᕐᓂ ᑎᕆᒐᓂᐊᖓᔪᓪᓗ ᔮᑯᐃᑦ ᐊᖓᔪᖅᑳᕐᔪᐊᑦ ᐃᒡᓗᕐᔪᐊᕕᓂᖏᓐᓂ ᑕᑯᒥᓇᕐᑐᒦᓪᓗᑎᒃ; ᐃᓱᓕᕝᕕᒃᓴᖓᑦ ᖃᒡᓕᕗᖅ, ᐅᓪᓗᐃᓪᓗ ᐊᑯᓂᐅᓂᐊᕈᓐᓃᕐᓗᑎᒃ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 13: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
