ᒐᓔᑎᐊᒥᐅᓄᑦ 5
5
ᕿᓚᕈᑦᔮᕐᑕᐅᓯᒪᓂᓯ ᐃᒃᐱᒋᑦᓯᐊᕐᓯᐅᒃ
1ᐊᔪᕐᓂᕐᒥᑦ ᕿᓚᕈᑦᔮᕐᑕᐅᓯᒪᕗᒍᑦ ᙭ᔅᑑᓯᐅᑉ ᕿᓚᕈᑦᔮᓚᐅᕐᒪᑎᒍᑦ; ᑍᒤᒻᒪᑦ ᓂᑯᕕᖓᑦᓯᐊᕐᓗᓯ ᐃᓅᓕᕆᑦᓯ, ᐃᓕᑦᓯᓐᓂᒡᓗ ᓯᐊᓛᕆᔭᐅᓂᕐᒧᑦ ᑐᓂᒃᑲᓐᓂᕐᑍᓕᓕᕆᑦᓯ.
2ᓇᖕᒥᓂᖅ ᐅᕙᖓ ᐸᐅᓗᓯ ᐅᖃᐅᑎᕙᑦᓯ ᓇᖕᒥᓂᖅ ᑭᐱᔭᐅᑎᒃᑯᑦᓯ ᐃᓕᑦᓯᓐᓂᒃ, ᑕᕝᕙ ᓴᖅᑭᑎᑦᓯᕗᓯ ᙭ᔅᑑᓯᐅᑉ ᐊᑑᑎᖃᖏᓐᓂᖓᓂᒃ ᐃᓕᑦᓯᓐᓄᑦ. 3ᖃᐅᔨᒪᑦᔪᑎᒃᓴᑦᓯᓐᓂᒃ ᐅᖃᐅᑎᕙᑦᓯ ᑭᐱᔭᐅᔪᖃᕐᐸᑦ ᑖᓐᓇ ᐱᖁᔭᓕᒫᓂᒃ ᒪᓕᒡᓗᓂ ᑭᓯᐊᓂᐅᓂᐊᕐᐳᖅ. 4ᐱᖁᔭᓂᒃ ᒪᓕᑦᓯᐊᕐᓂᒃᑯᑦ ᒎᑎᒧᑦ ᐸᓯᔭᒃᓴᐅᔪᓐᓃᕋᓱᖕᓂᐊᕈᑦᓯ; ᑕᕝᕙ ᙭ᔅᑑᓯᒥᒃ ᐊᕕᑦᑎᕗᓯ, ᒎᑎᐅᓪᓗ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᓯᓚᑖᓃᓕᕐᐳᓯ. 5ᐊᓂᕐᓂᒃᑯᑦ ᐅᑕᖅᑭᕗᒍᑦ ᐅᒃᐱᕐᓂᑦᑎᒍᑦ, ᓂᕆᐅᒃᓗᑕ ᐃᓗᐊᕐᓯᑎᑕᐅᓂᒃᓴᑦᑎᓐᓂᒃ. 6᙭ᔅᑑᓯ ᔩᓱᓯᒥ ᑭᐱᓯᒪᓂᖅ ᑭᐱᓯᒪᖏᓐᓂᕐᓗ ᐊᑐᖏᒻᒪᑎᒃ, ᐅᒃᐱᕐᓂᒃᑯᓪᓕ ᐱᓇᓱᐊᕐᓂᖅ ᓇᒡᓕᖕᓂᒃᑯᑦ ᐊᑐᕐᑐᑑᕗᖅ.
7ᐅᓪᓚᑦᓯᐊᓕᓚᐅᕐᑐᓯ; ᑭᐊ ᓄᖅᑲᕐᑎᓚᐅᕐᐹᓯ ᓱᓕᓂᕐᒥᒃ ᓈᓚᒍᓐᓁᕐᑎᓪᓗᓯ? 8ᓇᓗᓇᓐᖏᓚᕐᓕ ᐃᓕᑦᓯᓐᓂᒃ ᕾᖁᔨᓚᐅᕐᑑᑉ ᑕᒪᓐᓇ ᑍᒤᑎᖏᒻᒪᒍ. 9#1 ᑯᕆᓐᑎ 5:6.“ᐳᕙᓪᓚᕐᓯᐊᒃᓴᒧᑦ ᒥᑭᔪᒧᑦ ᓂᐊᖂᔭᒃᓴᓕᒫᖅ ᐳᕙᓪᓚᕐᑎᑕᐅᕗᖅ.” 10ᓱᓕ ᐃᓕᑦᓯᓐᓂᒃ ᖁᓚᓐᖏᓚᖓ ᐊᑕᓂᕐᒥ ᐃᓱᒪᒋᔭᒪ ᐊᓯᐊᓂᒃ ᐃᓱᒪᑖᕐᓂᐊᖏᓐᓇᑦᓯ; ᑍᓐᓇᓗ ᐃᓕᑦᓯᓐᓂᒃ ᐊᑲᐅᓐᖏᓕᐅᕐᑎᑦᓯᓚᐅᕐᑐᖅ ᓱᒋᐊᕐᑕᐅᔪᒫᕐᐳᖅ, ᑭᓇᐅᒐᓗᐊᕐᐸᑦ.
11ᐅᕙᖓᓕ ᐅᒃᐱᕐᑑᖃᑎᒃᑲ, ᓱᓕ ᐊᔪᕆᕐᑐᐃᖃᑦᑕᕈᒪ ᑭᐱᔭᐅᓂᖅ ᐊᑐᕐᑕᐅᔭᕆᐊᖃᕐᓂᕋᕐᓗᒍ, ᓱᖕᒪᓕ ᓱᓕ ᐊᑭᕋᕐᑐᕐᑕᐅᕗᖔ? ᑕᒪᓐᓇ ᓱᓕᒃᐸᑦ ᐊᔪᕆᕐᑐᐃᓂᕋ ᓴᓐᓂᖓᔪᓕᖕᒥᒃ ᐊᒡᕕᐊᕈᑕᐅᔪᓐᓃᕋᔭᕐᐳᖅ. 12ᐱᐅᒃᓴᕐᓂᕐᓴᐅᒐᔭᕐᐳᖓ ᐃᓕᑦᓯᓐᓂᒃ ᑭᐱᔭᐅᖁᔨᖃᑦᑕᕐᑐᑦ ᐃᒻᒥᖕᓂᒃ ᐃᒡᔪᐃᔭᑦᑎᐊᒻᒪᕆᒃᐸᑕ!
13ᐃᓕᑦᓯᓕ ᐅᒃᐱᕐᑑᖃᑎᒃᑲ, ᕿᓚᕈᑦᔮᕐᑕᐅᖁᓪᓗᓯ ᕾᖁᔭᐅᓯᒪᕗᓯ; ᕿᓚᕈᑦᔮᕐᑕᐅᓯᒪᓂᓯᓕ ᑎᒥᐅᑉ ᐱᔪᒪᔭᖓᓄᑦ ᐊᐅᓚᑕᐅᑦᔪᑎᒋᓕᕐᑍᓕᓯᐅᒃ, ᓇᒡᓕᖕᓂᒃᑯᓪᓕ ᐊᑐᓂᑦ ᐱᔨᑦᓯᖃᑦᑕᐅᑎᓕᕆᑦᓯ. 14#ᒨᓯᓯ ᐱᖓᔪᖏᑦ 19:18.ᐱᖁᔭᓕᒫᑦ ᓈᒻᒪᒃᓯᑎᑕᐅᖕᒪᑕ ᐅᖃᐅᓯᕐᒧᑦ ᐊᑕᐅᓯᕐᒧᑦ ᐃᒤᓕᔪᒧᑦ: “ᐃᓅᖃᑎᖕᓂᒃ ᓇᖕᒥᓂᕐᑐᑦ ᓇᒡᓕᒍᓱᒃᑐᒃᓴᐅᕗᑎᑦ.” 15ᐃᓕᑦᓯᓐᓄᓪᓕ ᐆᒪᔪᑎᑐᑦ ᐹᑐᐃᓐᓇᖃᑦᑕᕈᑦᓯ ᐋᓂᕐᓯᖃᑕᐅᑎᓗᓯ ᐱᓂᕐᓕᖃᑕᐅᑎᓗᓯᓗ ᖃᐅᔨᒪᓕᕆᑦᓯ ᐃᓅᖃᑎᒌᖕᓂᓯ ᓱᕋᓛᐳᖅ.
ᐊᓂᕐᓂᐅᑉ ᐱᓇᓱᐊᕐᓂᖓ ᐃᓅᓪᓗ ᐱᓇᓱᐊᕐᓂᖓ
16ᐅᖃᕐᐳᖓᓕ, ᐊᓂᕐᓂᒃᑯᑦ ᐃᓅᓚᐅᕆᑦᓯ, ᑕᕝᕙ ᑎᒥᐅᑉ ᐱᔪᒪᔭᖓᓄᑦ ᐊᐅᓚᑕᐅᓂᐊᓐᖏᓚᓯ. 17#ᕉᒪᒥᐅᓄᑦ 7:15-23.ᑎᒥᐅᑉ ᐱᔪᒪᔭᖓ ᐊᓂᕐᓂᕐᒥᒃ ᐊᖏᖃᑎᖃᖏᒻᒪᑦ, ᐊᓂᕐᓂᐅᓪᓗ ᐱᔪᒪᔭᖓ ᐊᖏᖃᑎᖃᕐᒥᓇᓂ ᑎᒥᒥᒃ; ᑖᒃᑯᐊᒃ ᐃᒻᒥᖕᓄᑦ ᐊᖏᖃᑎᒌᖏᒻᒪᑎᒃ, ᑍᒤᒻᒪᑦ ᐱᔪᒪᔭᕋᓗᐊᑦᓯᓐᓂᒃ ᐱᓇᓱᐊᕈᓐᓇᓐᖏᓚᓯ. 18ᐊᓂᕐᓂᕐᒧᓪᓕ ᑕᓯᐅᕐᑕᐅᒍᑦᓯ ᐱᖁᔭᓄᑦ ᑕᑉᕙ ᐊᐅᓚᑕᐅᑐᐃᓐᓇᕐᓂᐊᖏᓚᓯ.
19ᑎᒥᐅᑉ ᐱᓇᓱᐊᕐᓂᖏᑦ ᓇᓗᓇᓐᖏᓚᑦ ᐃᒤᑦᑐᑦ; ᐊᕐᓇᕐᓂᐊᕐᓂᖅ ᐊᖑᓐᓂᐊᕐᓂᕐᓗ, ᑲᓐᖑᓇᕐᑐᓕᓂᖅ, ᓄᓕᐊᕐᓂᕐᒥᒃ ᐊᑐᕐᓂᕐᓗᖕᓂᖅ; 20ᒎᑎᓐᖑᐊᖃᕐᓂᖅ, ᐊᖓᒃᑰᓇᓱᐊᕐᓂᖅ, ᐊᑭᕋᕐᑐᕐᑎᒌᖕᓂᖅ, ᐂᕙᖃᑦᑕᐅᑎᓂᖅ, ᐱᔪᑑᔪᒪᓂᖅ,#5:20 ᓯᒡᒐᑦᔨᓂᖅ ᐅᕝᕙᓗ ᐱᔨᓗᒃᓴᕐᓂᖅ ᓂᓐᖓᐅᒪᓂᖅ, ᐊᖏᖃᑎᒌᒍᓐᓇᖏᓐᓂᖅ, ᑕᐱᕇᓕᓪᓗᑎᒃ ᐊᕕᒃᑐᕐᓂᖅ; 21ᐃᒃᓯᒍᖕᓂᖅ, ᐋᖓᔮᕐᓂᖅ, ᑲᑎᓐᖓᓪᓗᑎᒃ ᓄᓕᐊᖃᑦᑕᕐᓃᑦ, ᐊᓯᖏᓐᓂᒡᓗ ᐊᑐᕐᓂᕐᓗᖃᑦᑕᕐᓃᑦ. ᓯᕘᕋᒋᔭᒃᓴᑦᓯᓐᓂᒃ ᐅᖃᐅᑎᕙᑦᓯ ᐅᖃᐅᑎᓚᐅᕐᓯᒪᒐᓗᐊᕆᓪᓗᓯ, ᑕᒪᒃᑯᐊ ᑍᒤᓕᐅᖃᑦᑕᕐᑐᑦ ᒎᑎᐅᑉ ᐊᑕᓂᐅᕕᖓᓂᒃ ᑭᖑᕐᖑᑦᔨᓂᐊᓐᖏᓚᑦ.
ᐊᓂᕐᓂᐅᑉ ᐱᖁᕐᑎᑕᖏᑦ
22ᐊᓂᕐᓂᐅᓪᓕ ᐱᕈᕐᑎᑕᖏᑦ ᑕᕝᕙ ᓇᒡᓕᖕᓂᖅ, ᖁᕕᐊᓱᖕᓂᖅ, ᖃᓄᐃᖏᑦᓯᐊᕐᓂᖅ, ᕿᓄᐃᓵᕐᓂᖅ, ᐱᑦᓯᐊᕐᓂᖅ, ᐃᓄᑦᓯᐊᕙᐅᓂᖅ, ᓱᖁᓯᕈᓐᓇᖏᓐᓂᖅ, 23ᐃᓅᖃᑎᒋᔭᕐᓂᕐᑑᓂᖅ, ᓇᖕᒥᓂᕆᔭᒥᒃ ᐱᓯᒪᑦᓯᐊᕈᓐᓇᕐᓂᖅ; ᑕᒪᒃᑯᓂᖓ ᐊᑐᕐᑍᓕᖁᔨᔪᓂᒃ ᐱᖁᔭᕐᑕᖃᓐᖏᓚᖅ. 24᙭ᔅᑑᓯ ᔩᓱᓯᒧᓪᓕ ᐱᒋᔭᐅᔪᑦ ᑭᑭᐊᒃᑐᕐᑕᐅᑎᑦᓯᓯᒪᕗᑦ ᑎᒥᐅᑉ ᐱᔪᒪᓗᐊᕐᓂᕆᕙᒃᑕᖏᓐᓂᒃ ᐃᒃᖠᒍᓂᖏᓐᓂᒃᓗ. 25ᐊᓂᕐᓂᕐᒥ ᐃᓅᒍᑦᑕ, ᐊᐅᓚᑕᐅᓚᐅᕐᒥᑕᑦᑕᐅᖅ ᐊᓂᕐᓂᕐᒧᑦ. 26ᑕᑯᖅᑯᑎᓗᐊᕐᑐᒃᓴᐅᓐᖏᓚᒍᑦ, ᓂᓐᖓᒃᓴᖃᑦᑕᐅᑎᓇᑕᓗ, ᐱᔪᑑᔪᒪᓂᕐᒧᓪᓗ ᐊᓐᓂᕈᑦᔨᖃᑦᑕᐅᑎᓇᑕ.
Currently Selected:
ᒐᓔᑎᐊᒥᐅᓄᑦ 5: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
