ᐃᓯᑭᐊᓕᐅᑉ ᐊᒡᓚᖏᑦ 48
48
ᓄᓇᐅᑉ ᐊᕕᒃᑐᕐᑕᐅᓂᖓ ᑭᖑᕚᖑᖃᑎᒌᓄᑦ
1ᐅᑯᐊ ᑕᕝᕙ ᑭᖑᕚᖑᖃᑎᒌᑦ ᐊᑎᖏᑦ ᐃᒤᓕᖓᕗᑦ: ᐱᒋᐊᕐᓗᒋᑦ ᓄᓇᐅᑉ ᐊᕕᒃᓯᒪᓂᖓᓂᑦ ᐅᓐᓄᐊᓪᓗᐊᑦ ᓇᓛᓃᑦᑐᒥᑦ, ᓯᕿᓂᐅᑉ ᓄᐃᕕᐊᑕ ᓇᓛᓄᐊᖓᔪᒥᑦ ᑕᕆᐅᕌᓗᖕᒥᑦ ᒥᑎᑎᕇᓂᐊᒥᑦ ᐱᒋᐊᕐᓗᓂ ᕼᐃᓴᓚᓐᒥᑦ ᕼᐊᒫᑎᐅᑉ ᐃᓚᖓᓄᑦ, ᕼᐊᔭ-ᐃᓇᓐᒧᓪᓗ ᑎᑭᓪᓗᒍ ᐅᓐᓄᐊᓪᓘᐊᑉ ᓇᓛᓃᑦᑐᒧᑦ ᑕᒫᓯᑰᓯᐅᑉ ᑭᒡᓕᖓᓄᑦ ᕼᐊᒫᑎᐅᑉ ᐃᓚᖓᓄᐊᖓᔪᒧᑦ, ᑕᒪᓐᓇ ᑖᓐ ᑭᖑᕚᖏᓐᓄᑦ ᓄᓇᒋᔭᐅᕗᖅ.
2ᑖᓐ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᐋᓱᕆᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᖅ.
3ᐋᓱᕆᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᓈᑉᑕᓕᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᖅ.
4ᓈᑉᑕᓕᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᒫᓇᓯᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᖅ.
5ᒫᓇᓯᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᐃᕗᕅᒥᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᖅ.
6ᐃᕗᕅᒥᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᕉᐱᓂᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᖅ.
7ᕉᐱᓂᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᔫᑕᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᖅ.
ᓄᓇᖁᑎᑖᕆᔭᐅᔪᑦ ᕿᑎᖓᓃᑦᑑᑉ ᐊᑦᔨᐅᖏᑦᑑᑎᑕᐅᓂᖓ
8ᔫᑕᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᓄᓇ ᓴᓂᕐᕙᒃᓯᒪᔭᖃᕆᐊᖃᕐᐳᖅ, ᐊᖏᓂᖃᕐᓗᓂ ᓴᓂᒧᑦ 10ᒤᓕᒥᒃ ᐅᓐᓄᐊᓪᓗᐊᒥᑦ ᐅᓪᓗᓪᓗᐊᒧᑦ, ᐊᒻᒪ ᑍᒫᓪᓗᐊᖅ ᓯᕕᑐᑎᒋᖕᒥᓗᓂ ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᑦ, ᑭᖑᕚᕇᓄᑦ ᐊᕕᒃᑐᕐᑕᐅᔪᑎᑐᑦ ᐊᖏᑎᒋᓗᓂ, ᑕᕝᕙᓂ ᕿᑎᖓᓂ ᑐᒃᓯᐊᕐᕕᒡᔪᐊᖅ ᐃᓂᖃᕐᑐᒃᓴᐅᕗᖅ.
9ᓄᓇ ᓴᓂᕐᕙᒃᓯᒪᔭᓯ ᐊᑕᓂᕐᒧᑦ ᐊᑐᕐᑐᒃᓴᐅᖁᓪᓗᒍ 10ᒤᓕᒥᒃ ᑐᑭᒧᖃᕐᑐᒃᓴᐅᕗᖅ, ᓴᓂᒧᖃᕐᓗᓂᓗ 8ᒤᓕᒥᒃ. 10ᑕᒪᓐᓇ ᓄᓇ ᐃᑦᔪᕐᓁᑎᑕᐅᓯᒪᔪᒃᓴᐅᕗᖅ: ᑐᓂᕐᕈᓯᕐᑎᑦᓯᔩᑦ ᑕᒪᑐᒥᖓ ᓄᓇᖁᑎᖃᕐᑐᒃᓴᐅᕗᑦ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᓂᐱᕕᐊᑕ ᓇᓛᓄᑦ ᐊᖏᓂᖃᕐᑐᒥᒃ 10ᒤᓕᒥᒃ, ᐅᓐᓄᐊᓪᓗᐊᓪᓗ ᓇᓛᓂᑦ ᐅᓪᓗᓪᓗᐊᑉ ᓇᓛᓄᑦ ᐊᖏᓂᖃᕐᓗᓂ 4ᒤᓕᒥᒃ, ᑖᑦᓱᒪ ᓄᓇᐅᑉ ᕿᑎᖓᓂ ᐊᑕᓂᐅᑉ ᑐᒃᓯᐊᕐᕕᒡᔪᐊᖁᑎᖓ ᐃᓂᖃᕐᑐᒃᓴᐅᕗᖅ. 11ᑖᓐᓇ ᓄᓇ ᐃᑦᔪᕐᓁᑎᑕᐅᓯᒪᔪᖅ ᑐᓂᕐᕈᓯᕐᑎᑦᓯᔨᓄᑦ ᑐᕌᖓᔪᒃᓴᐅᕗᖅ ᔭᑑᑭᐅᑉ ᑭᖑᕚᖏᓐᓄᑦ, ᑖᒃᑯᐊ ᓱᕐᕋᔪᐃᑦᑑᓪᓗᑎᒃ ᐅᕙᓐᓂᒃ ᐱᔨᑦᓯᓚᐅᕐᒪᑕ, ᐃᓴᕆᐊᓕᒥᐅᓄᑦ ᑕᒻᒪᕐᑐᓄᑦ ᐃᓚᐅᓇᑎᒃ, ᓕᕔᑎᑦ ᑭᖑᕚᖏᑕ ᐃᓚᖏᑎᑐᑦ. 12ᑕᒪᑐᒥᖓ ᓄᓇᖁᑎᑖᕐᑐᒃᓴᐅᕗᑦ ᐊᑦᔨᐅᖏᑦᑑᑎᑕᐅᔪᒥᒃ ᓄᓇᒥᑦ ᐃᑦᔪᕐᓁᑦᑐᒥᑦ, ᑕᒪᓐᓇᓗ ᐃᑦᔪᕐᓁᓐᓂᕐᐸᐅᑎᑕᐅᔪᒃᓴᐅᕗᖅ, ᓕᕔᑎᑦ ᓄᓇᖁᑎᖏᑕ ᓴᓂᐊᓃᓪᓗᓂ. 13ᑐᓂᕐᕈᓯᕐᑎᑦᓯᔩᑦ ᓄᓇᖁᑎᖏᑕ ᓴᓂᐊᓃᑦᑐᒥᒃ, ᓕᕔᑎᑦ ᓄᓇᖁᑎᑖᕐᑎᑕᐅᔪᒃᓴᐅᕗᑦ 10ᒤᓕᒥᒃ ᑐᑭᒧᖃᕐᑐᒥᒃ, 4ᒤᓕᒥᒡᓗ ᓴᓂᒧᖃᕐᑐᒥᒃ. 14ᑖᒃᑯᐊ ᓂᐅᕐᕈᑎᖃᕐᑐᒃᓴᐅᓐᖏᓚᑦ ᑕᐅᕐᓯᐅᑦᔨᔪᒃᓴᐅᓐᖏᓚᓪᓘᓐᓃᑦ ᓄᓇᖁᑎᒥᖕᓂᒃ; ᑕᒪᓐᓇ ᐃᒃᐱᒋᔭᐅᑦᓯᐊᕐᑐᒃᓴᐅᕗᖅ ᓄᓇᐅᑉ ᐱᐅᓂᕐᐹᕆᖕᒪᒍ, ᐊᑕᓂᕐᒧᑦ ᐃᑦᔪᕐᓁᑦᑑᒪᑦ.
15ᓴᓂᕐᕙᒃᑕᐅᓯᒪᔪᒥ ᐊᒥᐊᒃᑰᔪᖅ 10ᒤᓕᓂᒃ ᑕᑭᓂᓕᒃ, 2ᒤᓕᒥᒃ ᓴᓂᒧᑐᓂᓕᒃ, ᐃᓄᖕᓄᑦ ᐃᒡᓗᒐᓴᖕᒥᐅᑐᐃᓐᓇᕐᓄᑦ ᐊᑐᒐᒃᓴᐅᔪᒃᓴᐅᕗᖅ, ᑕᕝᕙᓂ ᐃᒡᓗᖃᕈᓐᓇᕐᐳᑦ ᖃᓄᑐᐃᓐᓇᕐᓗ ᐊᑐᕈᒪᔭᒥᖕᓄᑦ ᐊᑐᕐᓗᒍ. ᑖᑦᓱᒪ ᓄᓇᐅᑉ ᕿᑎᖓᓂ ᐃᒡᓗᒐᓴᒡᔪᐊᖃᕐᑐᒃᓴᐅᕗᑦ. 16ᑭᒃᐹᕆᓪᓗᐊᕐᑐᒃᓴᐅᕗᖅ ᐊᕙᑎᖏᒃ ᐊᑦᔨᒌᒥᒃ ᐊᖏᓂᖃᕐᓗᑎᒃ: ᐅᓐᓄᐊᓪᓗᐊᑉ ᓇᓛᓃᑦᑐᖅ 2,520ᓂᒃ ᐆᒃᑑᑎᓂᒃ ᓯᕕᑐᓂᖃᕐᓗᓂ ᐅᓪᓗᓪᓗᐊᓪᓗ ᓇᓛᓃᑦᑐᖅ ᑍᒤᓪᓗᐊᕐᓗᓂ, ᐊᕙᒻᒧᓪᓗ ᓯᑭᓂᐅᑉ ᓄᐃᕕᐊᓂᑦ ᓂᐱᕕᐊᓄᑦ ᑍᒤᓪᓗᐊᕐᒥᓗᓂ. 17ᐃᒡᓗᒐᓴᒡᔪᐊᑦ ᓯᓚᑖᒍᑦ ᓄᓇᒥ ᐊᑐᐃᓐᓇᖃᒃᑲᓐᓂᕐᑐᒃᓴᐅᕗᖅ; ᐊᕙᒻᒧᑦ ᐊᑐᓂᑦ ᓴᓂᒧᓪᓗ 140ᓂᒃ ᐆᒃᑑᑎᓂᒃ ᐊᖏᓂᖃᕐᑐᒥᒃ. 18ᐃᒡᓗᒐᓴᒡᔪᐊᑦ ᓱᓇᖃᖏᓐᓂᖓᑕ ᐊᒥᐊᒃᑯᖓ ᐃᑦᔪᕐᓁᑦᑐᒦᑦᑐᖅ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᐊᖏᓂᖃᕐᑐᒃᓴᐅᕗᖅ 4ᒤᓕᒥᒃ ᑐᑭᒧᖃᕐᓗᓂ 2ᒤᓕᒥᒡᓗ ᓴᓂᒧᑐᓂᖃᕐᓗᓂ, ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᖅ 4ᒤᓕᒥᒃ ᑕᑭᓂᖃᕐᓗᓂ 2ᒤᓕᒥᒃ ᓴᓂᒧᑐᓂᖃᕐᓗᓂ, ᐃᑦᔪᕐᓁᑎᑕᐅᓯᒪᔫᑉ ᓴᓂᐊᒎᖓᓗᓂ. ᑕᒪᑐᒪᓗ ᓄᓇᐅᑉ ᐱᕈᕐᑎᑕᖏᑦ ᐱᓇᓱᐊᕐᑎᓄᑦ ᓂᕿᒃᓴᐅᔪᒃᓴᐅᕗᖅ. 19ᐃᒡᓗᒐᓴᒡᔪᐊᕐᒥᐅᑦ ᐱᓇᓱᐊᕐᑏᑦ, ᑭᖑᕚᕇᓂᑦ ᓇᓪᓕᐊᓐᓂᑐᐃᓐᓇᖅ ᐃᓴᕆᐊᓕᒥᐅᓂᑦ ᐱᓯᒪᒐᓗᐊᕈᑎᒃ, ᑕᒫᓂ ᐱᕈᕐᓰᕕᖃᕈᓐᓇᕐᐳᖅ.
20ᓴᓂᕐᕙᒃᑕᐅᓯᒪᔫᑉ ᐊᖏᓂᖓ ᐊᑕᖏᕐᓗᒍ ᐆᒃᑐᕋᕐᓯᒪᔪᒃᓴᐅᕗᖅ 10ᒤᓕᒥᒃ ᐊᑦᔨᒌᒥᒃ ᐊᖏᓂᖃᕐᓗᓂ ᑐᑭᒧᑦ ᓴᓂᒧᓪᓗ, ᑕᒪᓐᓇ ᐃᑦᔪᕐᓁᑦᑐᒃᑯᕕᐅᓗᓂ ᐃᓚᖓᓗ ᐃᒡᓗᒐᓴᒡᔪᐊᖃᕐᕕᐅᓗᓂ.
21ᑖᑦᓱᒪ ᐃᑦᔪᕐᓁᑦᑐᒃᑯᕕᐅᑉ ᐊᕙᑎᖏᒃ ᐃᒡᓗᒐᓴᖃᕐᕕᐅᔪᕐᓗ ᐊᖓᔪᖅᑳᒧᑦ ᓄᓇᖁᑎᒋᔭᐅᔪᒃᓴᐅᕗᖅ. ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒥᑦ, ᓂᐱᕕᐊᑕ ᓇᓛᓄᐊᖓᔪᒧᑦ ᐊᖏᓂᖃᕐᓗᓂ 10ᒤᓕᒥᒃ ᐊᕙᒻᒧᑦ, ᑭᖑᕚᕇᑦ ᓄᓇᖁᑎᖏᓐᓄᑦ ᐋᖅᑭᒃᓯᒪᓂᖓ ᐊᑦᔨᒋᔭᐅᒐᓚᒡᓗᓂ, ᐊᖓᔪᖅᑳᑉ ᑕᒪᓐᓇ ᐱᒋᔭᒃᓴᕆᕚ. ᐃᑦᔪᕐᓁᑦᑐᒃᑯᕕᐅᓗᓂ ᕿᑎᖓᓂᓗ ᑐᒃᓯᐊᕐᕕᒡᔪᐊᖅ ᐃᓂᖃᕐᓗᓂ, 22ᓕᕔᑎᓄᑦ ᓄᓇᖁᑎᒋᔭᐅᔫᑉ ᐃᒡᓗᒐᓴᒡᔪᐊᓄᓪᓗ ᐃᓂᒋᔭᐅᔫᑉ ᐊᒥᐊᒃᑯᖓ ᕿᑎᖓᓃᑦᑐᖅ ᐊᖓᔪᖅᑳᑉ ᓄᓇᖁᑎᒋᔭᒃᓴᕆᕚ. ᔫᑕᐅᑉ ᓄᓇᖁᑎᖓᑕ ᐱᓐᔭᒥᓂᐅᓪᓗ ᓄᓇᖁᑎᖓᑕ ᐊᑯᓐᓂᖓᓃᓪᓗᓂ.
ᓄᓇᒋᔭᐅᔪᒃᓴᑦ ᑭᖑᕚᖑᖃᑎᒌᑦ ᐃᓚᖏᓐᓄᑦ
23ᑭᖑᕚᖑᖃᑎᒌᑦ ᐃᓚᖏᑦ: ᓄᓇᖁᑎᑖᕆᐊᖃᕐᑐᑦ ᐊᕕᒃᑐᕈᓐᓇᕐᐳᑦ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᓯᕿᓂᐅᑉ ᓂᐱᕕᐊᑕ ᓇᓛᓄᑦ, ᐱᓐᔭᒥᓂᒃᑯᑦ ᑭᖑᕚᖏᓐᓄᑦ ᓄᓇᒋᔭᐅᕗᑦ.
24ᐱᓐᔭᒥᓂᒃᑯᑦ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᓯᒥᐅᓂᒃᑯᑦ ᑭᖑᕚᖏᓐᓄᑦ ᓄᓇᒋᔭᐅᕗᖅ.
25ᓯᒥᐅᓂᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᐃᓴᑳᕆᒃᑯᑦ ᑭᖑᕚᖏᓐᓄᑦ ᓄᓇᒋᔭᐅᕗᖅ.
26ᐃᓴᑳᕆᒃᑯᑦ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᓯᐳᓗᓂᒃᑯᑦ ᑭᖑᕚᖏᓐᓄᑦ ᓄᓇᒋᔭᐅᕗᖅ.
27ᓯᐳᓗᓂᒃᑯᑦ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᒑᑦᑯᑦ ᑭᖑᕚᖏᓐᓄᑦ ᓄᓇᒋᔭᐅᕗᖅ.
28ᒑᑦᑯᑦ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᐅᓪᓗᓪᓗᐊᑉ ᓇᓛᓄᐊᖓᓗᓂ, ᑕᒫᕆᐅᑉ ᓄᓇᖓᑕ ᑭᒡᓕᖓᓂᑦ ᒥᕆᐸ-ᑲᑎᓯᒧᐊᖓᓗᓂ, ᐅᓐᓄᐊᓪᓗᐊᑉ ᓇᓛᓄᐊᖓᓗᓂ ᐄᑦᔨᑉᑎᒥᐅᑦ ᓄᓇᖓᑕ ᑭᒡᓕᖓᒎᕐᓗᓂ ᑕᕆᐅᕐᔪᐊᖅ ᒥᑎᑎᕇᓂᐊ ᑎᑭᓪᓗᒍ.
29ᑕᒪᓐᓇ ᓄᓇ ᑍᒫᒃ ᐊᕕᒃᑐᕐᑕᒃᓴᕆᕙᓯ ᓇᓚᐅᑦᓵᕈᑎᒧᑦ ᑭᖑᕚᕇᑦ ᓄᓇᒥᒃ ᑭᖑᕐᖑᑎᔭᒃᓴᖏᓐᓂᒃ ᓄᓇᑖᖁᓪᓗᒋᑦ ᐃᓴᕆᐊᓕᐅᑉ ᑭᖑᕚᖏᑦ, “ᑍᒫᒃ ᑕᕝᕙ ᓄᓇ ᐊᕕᒃᑐᕐᑕᐅᓯᒪᔪᒃᓴᐅᕗᖅ, ᐊᑕᓂᖅ ᒎᑎ ᐅᖃᕐᐳᖅ.”
ᔨᕉᓴᓕᐅᑉ ᐃᑎᕐᑕᕐᕕᖏᑦ
30 #
ᑕᑯᑎ 21:12,13. “ᐃᒡᓗᒐᓮᑦ ᐃᑎᕐᑕᕐᕕᖏᑦ ᐃᒤᓕᖓᔪᒃᓴᐅᕗᑦ: ᐃᑎᕐᑕᕐᕕᒃ ᐅᓐᓄᐊᓪᓗᐊᒦᑦᑐᖅ ᐊᖏᓂᖃᕐᑐᒃᓴᐅᕗᖅ 2,520ᓂᒃ ᐆᒃᑑᑎᓂᒃ, 31ᐃᑎᕐᑕᕐᕖᑦ ᐱᖓᓱᑦ ᐅᓐᓄᐊᓪᓗᐊᑉ ᓇᓛᓃᑦᑐᑦ ᐊᑎᖃᕐᑐᒃᓴᐅᕗᑦ ᑭᖑᕚᕇᑦ ᐃᓴᕆᐊᓕᒥᐅᑦ ᐱᖓᓱᑦ ᐊᑎᖏᓐᓂᒃ: ᐃᑎᕐᑕᕐᕕᒃ ᕉᐱᓂ, ᐃᑎᕐᑕᕐᕕᒃ ᔫᑕ, ᐃᑎᕐᑕᕐᕕᒃ ᓕᕔ; 32ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᑦ ᐃᑎᕐᑕᕐᕖᑦ ᐱᖓᓱᑦ ᐊᖏᓂᖃᕐᑐᒃᓴᐅᕗᑦ 2,520ᓂᒃ ᐆᒃᑑᑎᓂᒃ: ᐊᑎᖃᕐᑐᒃᓴᐅᕗᑦ, ᐃᑎᕐᑕᕐᕕᒃ ᔫᓯᐱ, ᐃᑎᕐᑕᕐᕕᒃ ᐱᓐᔭᒥᓂ, ᐃᑎᕐᑕᕐᕕᒃ ᑖᓐ; 33ᐅᓪᓗᓪᓗᐊᑉ ᓇᓛᓃᑦᑐᑦ, ᐃᑎᕐᑕᕐᕖᑦ ᐱᖓᓱᑦ ᐊᖏᓂᖃᕐᑐᒃᓴᐅᕗᑦ 2,520ᓂᒃ ᐆᒃᑑᑎᓂᒃ: ᐊᑎᖃᕐᑐᒃᓴᐅᕗᑦ, ᐃᑎᕐᑕᕐᕕᒃ ᓯᒥᐅᓂ, ᐃᑎᕐᑕᕐᕕᒃ ᐃᓴᑳᕆ, ᐃᑎᕐᑕᕐᕕᒃ ᓯᐳᓗᓂ; 34ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᑦ ᐃᑎᕐᑕᕖᑦ ᐱᖓᓱᑦ ᐊᖏᓂᖃᕐᑐᒃᓴᐅᕗᑦ 2,520ᓂᒃ ᐆᒃᑑᑎᓂᒃ: ᐊᑎᖃᕐᑐᒃᓴᐅᕗᑦ; ᐃᑎᕐᑕᕐᕕᒃ ᒑᑦ, ᐃᑎᕐᑕᕐᕕᒃ ᐋᓱᕆ, ᐃᑎᕐᑕᕐᕕᒃ ᓈᑉᑕᓕ. 35ᐊᕙᓗᕐᔪᐊᑉ ᐊᖏᓂᖓ ᑐᑭᒧᑦ ᓴᓂᒧᓪᓗ 10,080ᓂᒃ ᐆᒃᑑᑎᓂᒃ ᐊᖏᓂᖃᕐᑐᒃᓴᐅᕗᖅ; ᒫᓐᓇᒥᑦ ᐱᒋᐊᕐᓗᒍ ᐃᒡᓗᒐᓴᒡᔪᐊᑦ ᑖᒃᑯᐊ ᐊᑎᖃᕐᑐᒃᓴᐅᕗᑦ, ᐊᑕᓂᖅ ᑕᕝᕙᓃᑉᐳᖅ.”
Currently Selected:
ᐃᓯᑭᐊᓕᐅᑉ ᐊᒡᓚᖏᑦ 48: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
