ᒨᓯᓯ ᑕᓪᓕᒪᖏᑦ 4
4
ᒨᓯᓯᐅᑉ ᐃᓇᑦᓯᓂᖓ ᐃᓴᕆᐊᓕᒥᐅᓂᒃ ᓈᓚᑦᓯᐊᖁᔨᓪᓗᓂ
1ᑕᕝᕙ ᒨᓯᓯ ᐃᓄᖕᓄᑦ ᐅᖃᓕᕐᐳᖅ, “ᐃᓴᕆᐊᓕᒥᐅᖑᔪᓯ ᐱᖁᔭᓕᒫᑦ ᓈᓚᒃᑕᒃᓴᕆᕙᓯ ᐃᓕᑦᓯᓐᓄᑦ ᐃᓕᓮᑦᔪᑎᒋᓚᐅᕐᑕᒃᑲ, ᑕᕝᕙ ᐃᓅᓂᐊᕐᐳᓯ ᓄᓇᖃᓕᕐᓗᓯᓗ ᓄᓇᒥ ᐊᑕᓂᐅᑉ ᓯᕗᓕᕕᓂᑦᓯ ᒎᑎᖓᑦᑕ, ᑐᓂᓯᒪᔭᖓᓂᒃ ᐃᓕᑦᓯᓐᓄᑦ. 2#ᑕᑯᑎ 22:18,19.ᐃᓕᑦᓯᓐᓄᑦ ᐱᖁᓚᐅᕐᑕᒃᑲ ᐃᓚᔭᒃᓴᕆᓐᖏᓚᓯ, ᐃᓚᓐᖓᕐᑕᒃᓴᕆᓇᒋᓪᓗ. ᐊᑕᓂᐅᑉ ᒎᑎᑦᓯ ᐱᖁᔭᖏᑦ ᐃᓕᑦᓯᓐᓄᑦ ᓈᓚᒐᒃᓴᕆᕙᓯ ᐃᓕᑦᓯᓐᓄᑦ ᑐᓂᓚᐅᕐᑕᒃᑲ. 3#ᒨᓯᓯ ᓯᑕᒪᖏᑦ 25:1-9.ᐃᓕᑦᓯ ᓇᖕᒥᓂᖅ ᑕᑯᓯᒪᒐᑦᓯ ᐊᑕᓂᐅᑉ ᒎᑎᑦᓯ ᐱᓇᓱᐊᕐᓯᒪᓂᖓᓂᒃ ᖃᖅᑲᒥ ᐰᓕ-ᐱᐅᕆᒥ, ᑕᕝᕙᓂ ᒎᑎᓐᖑᐊᒧᑦ ᐰᓕᒧᑦ ᑐᒃᓯᐊᕐᑐᓂᒃ ᓄᖑᑕᐅᑎᑦᓯᓚᐅᕐᒪᑦ, 4ᐃᓕᑦᓯᓕ ᐊᑕᓂᕐᒥᑦ ᒎᑎᑦᓯᓐᓂᑦ ᓅᓚᐅᖏᑦᑐᓯᒍᑦ ᓱᓕ ᐅᓪᓗᒥ ᐃᓅᕗᓯ.
5“ᐱᖁᔭᓕᒫᓂᒃ ᐊᔪᕆᕐᑐᕐᓯᒪᕙᑦᓯ, ᐊᑕᓂᐅᑉ ᒎᑎᒪ ᐅᖃᐅᓯᐅᖁᓚᐅᕐᑕᓕᒫᖏᓐᓂᒃ. ᑖᒃᑯᐊ ᓈᓚᒐᒃᓴᕆᕙᓯ ᓄᓇᒥ ᓵᓚᒃᓴᕐᓂᒃᑯᑦ ᓄᓇᑖᕆᓂᐊᓕᕐᑕᑦᓯᓐᓂ ᓄᓇᖃᓕᕈᑦᓯ. 6ᑍᒪᓐᖓᑦ ᑲᔪᓯᑦᓯᐊᕐᓗᓯ ᓈᓚᒐᒃᓴᕆᕙᓯ, ᑕᒪᓐᓇ ᑍᒤᓕᐅᕐᓂᓯ ᐃᓅᖃᑎᒌᒡᔪᐊᓄᑦ ᐊᓯᑦᓯᓐᓄᑦ ᓇᓗᓁᕐᓯᓂᐊᕐᒪᑦ ᖃᓄᖅ ᓯᓚᑐᔫᓂᕆᔭᑦᓯᓐᓂᒃ. ᐱᖁᔭᓂᒃ ᑕᒪᒃᑯᓂᖓ ᑐᓴᓕᕈᑎᒃ, ᐅᖃᕐᓂᐊᕐᐳᑦ, ‘ᐅᑯᐊ ᐃᓅᖃᑎᒌᒡᔪᐊᑦ ᐊᔪᖏᑦᑐᕐᔪᐊᖑᓪᓗᑎᒡᓗ ᓯᓚᑐᔪᕐᔪᐊᖑᕗᑦ ᖃᐅᔨᒪᑦᓯᐊᕐᓗᑎᒡᓗ!’
7“ᐃᓅᖃᑎᒌᒡᔪᐊᓂᒃ ᐊᓯᖏᓐᓂᒃ, ᐊᔪᖏᑦᑐᕐᔪᐊᖑᒐᓗᐊᕐᐸᑕ, ᒎᑎᖃᕐᑐᖃᓐᖏᓚᖅ ᑭᓐᖒᒪᓇᓕᕐᑎᓪᓗᒍ ᑍᒫᒃ ᖃᓂᑦᑑᔪᓐᓇᕐᑎᒋᔪᒥᒃ ᐊᑕᓂᐅᑉ ᒎᑎᑦᑕ ᐅᕙᑦᑎᓐᓄᑦ ᑍᒫᒃ ᑲᒪᑦᓯᐊᕐᓂᕆᔭᖓᑎᑐᑦ. ᑐᒃᓯᐊᕐᕕᒋᔭᕌᖓᑦᑎᒍᓗ ᐃᑲᔪᕐᑕᐅᔪᒪᓪᓗᑕ ᑭᐅᖃᑦᑕᕐᓂᕆᔭᖓᑎᑐᑦ ᑍᒤᑦᑐᒥᒃ. 8ᐃᓅᖃᑎᒌᒡᔪᐊᖑᔪᓂᒃ ᐊᓯᖏᓐᓂᒃ, ᐊᔪᖏᑦᑐᕐᔪᐊᖑᒐᓗᐊᕐᐸᑕ, ᐱᖁᔭᖃᕐᑐᖃᓐᖏᓚᖅ ᐱᖁᔭᑦᑎᑐᑦ ᐋᖅᑭᑦᓯᐊᕐᓯᒪᑎᒋᔪᓂᒃ ᐅᓪᓗᒥ ᐃᓕᓯᓐᓄᒃ ᐊᔪᕆᕐᑐᐃᑦᔪᑎᒋᔭᑦᑐᑦ ᑍᒤᑦᑐᓂᒃ. 9ᐃᒃᐱᒍᓱᑦᓯᐊᕆᑦᓯ! ᑲᒪᑦᓯᐊᕐᓗᓯᓗ ᐳᐃᒍᖁᓇᓯ, ᐆᒻᒪᑎᑦᓯᓐᓂᓪᓗ ᑕᒪᒃᑯᐊ ᕿᒪᕉᑎᖁᓇᒋᑦ ᐃᓅᓂᓕᒫᑦᓯᓐᓂ, ᓇᖕᒥᓂᖅ ᑕᑯᓪᓚᕆᒃᓯᒪᔭᑦᓯ. ᓄᑕᖅᑲᓯ ᑕᒪᒃᑯᓂᖓ ᐃᓕᓴᕐᑎᖃᑦᑕᕐᓯᐅᒃ ᐃᕐᖑᑕᓯᓗ. 10ᑍᑦᓱᒪᓂ ᐊᑕᓂᐅᑉ ᒎᑎᑦᓯ ᓵᖓᓂ ᓇᖏᓚᐅᕐᓯᒪᒐᑦᓯ ᖃᖅᑲᒥ ᕼᐆᕆᑉᒥ, ᐅᕙᓐᓄᑦ ᐅᖃᕐᑎᓪᓗᒍ, ‘ᐃᓄᐃᑦ ᑲᑎᖁᓚᐅᒃᑭᑦ, ᐅᖃᐅᓯᕆᔪᒪᔭᓐᓂᒃ ᑐᓴᖁᒐᒃᑭᑦ, ᐅᕙᓐᓂᒃ ᓈᓚᒍᓐᓇᓯᖁᓪᓗᒋᑦ ᐃᓅᓯᖏᑦᑕ ᓈᓂᖓᓄᑦ ᑎᑭᓪᓗᑎᒃ, ᓄᑕᖅᑲᒥᖕᓄᓪᓗ ᑍᒫᒃ ᒪᓕᖁᔨᓗᑎᒃ ᐃᓕᓮᔪᓐᓇᕐᓯᖁᓪᓗᒋᑦ.’
11 #
ᒨᓯᓯ ᐂᑉᐸᖏᑦ 19:16-18; ᐄᑉᕈᐃᓄᑦ 12:18,19. “ᑕᒪᓐᓇ ᓄᑕᖅᑲᑦᓯᓐᓄᑦ ᐅᖃᐅᓯᕆᔭᒃᓴᕆᕙᓯ ᖃᓄᖅ ᐅᐸᒍᑎᓚᐅᕐᒪᖔᑦᓯ ᓇᖏᓚᐅᕐᒪᖔᑦᓯᓗ ᖃᖅᑲᐅᑉ ᑭᒡᓕᖓᓂ ᑍᑦᓱᒪᓂ ᖃᖅᑲᖅ ᓄᕗᑦᑕᕆᒃᑐᒧᑦ ᐳᔪᕐᒧᓪᓗ ᕿᕐᓂᕐᑕᒧᓪᓗ ᐅᓕᒃᑕᐅᓯᒪᑎᓪᓗᒍ ᕿᓚᖕᒥᓪᓗ ᐃᑯᒪᒥᒃ ᓴᖅᑭᑦᑐᖃᖃᑦᑕᕐᑎᓪᓗᒍ. 12ᐅᖃᐅᑎᔭᒃᓴᕆᕙᓯᑦᑕᐅᖅ ᖃᓄᖅ ᐊᑕᓂᕐᒧᑦ ᐅᖃᓪᓚᒡᕕᒋᔭᐅᖃᑦᑕᓚᐅᕐᒪᖔᑦᓯ ᐃᑯᒪᒥᑦ, ᖃᓄᕐᓗ ᑐᓵᓚᐅᕐᒪᖔᑦᓯ ᐅᖃᓪᓚᒃᑎᓪᓗᒍ ᑖᑦᓱᒥᖓ ᓱᓇᒐᓛᖕᒥᒡᓘᓐᓃᑦ ᑕᑯᓐᓇᕐᓇᓯ. 13#ᒨᓯᓯ ᐂᑉᐸᖏᑦ 31:18; 34:28; ᒨᓯᓯ ᑕᓪᓕᒪᖏᑦ 9:10.ᐅᖃᐅᑎᓯᒪᕚᓯ ᖃᓄᐃᓕᐅᕐᑐᒃᓴᐅᖕᒪᖔᑦᓯ ᐊᖏᖃᑎᒌᒍᑎᒋᓯᒪᔭᖓᓂᒃ ᑲᔪᓯᑎᑦᓯᔪᓐᓇᖁᓪᓗᓯ, ᐱᖁᔭᑦ ᖁᓕᑦ ᓈᓚᒐᒃᓴᕆᕙᓯ, ᑖᑦᓱᒪ ᑎᑎᕋᓚᐅᕐᑕᖏᑦ ᐅᔭᕋᒃᑎᒍᑦ ᒪᕐᕉᒃᑎᒍᑦ. 14#ᒨᓯᓯ ᐂᑉᐸᖏᑦ 21:1.ᐊᑕᓂᐅᑉ ᐅᖃᐅᑎᓚᐅᕐᐹᖓ ᐊᔪᕆᕐᑐᐃᖁᓪᓗᖓ ᐃᓕᑦᓯᓐᓂᒃ ᐱᖁᔭᓕᒫᓐᓂᒃ ᓈᓚᖁᓪᓗᓯ ᓄᓇᒥ ᓵᓚᒃᓴᕐᓂᒃᑯᑦ ᓄᓇᑖᕆᓂᐊᓕᕐᑕᑦᓯᓐᓂ ᓄᓇᖃᓕᕐᑎᓪᓗᓯ.”
ᒎᑎᓐᖑᐊᖃᕐᓂᐅᑉ ᐅᓗᕆᐊᓇᕐᓂᖓᓂᒃ ᐅᖃᐅᓯᖃᕐᑐᑦ
15“ᑍᑦᓱᒪᓂ ᐊᑕᓂᕐᒧᑦ ᐅᖃᓪᓚᒡᕕᐅᑎᓪᓗᓯ ᐃᑯᒪᒥᑦ ᖃᖅᑲᒥ ᕼᐆᕆᑉᒥ, ᓱᓇᒥᒡᓘᓐᓃᑦ ᑕᑯᓚᐅᓐᖏᓚᓯ. ᑍᒤᒻᒪᑦ ᐃᓕᑦᓯᓐᓄᑦ ᐱᕙᓪᓕᕐᓇᖁᓪᓗᒍ, ᑲᔪᓯᑦᓯᐊᓕᕆᑦᓯ ᒫᓐᓇᒥᑦ ᐱᒋᐊᕐᓗᒍ, 16#ᒨᓯᓯ ᐂᑉᐸᖏᑦ 20:4; ᒨᓯᓯ ᐱᖓᔪᖏᑦ 26:1; ᒨᓯᓯ ᑕᓪᓕᒪᖏᑦ 5:8; 27:15.ᐊᔪᕐᑐᓕᖁᓇᓯ ᓇᖕᒥᓂᒃᓴᑦᓯᓐᓂᒃ ᒎᑎᓐᖑᐊᓕᐅᖁᓇᓯ ᖃᓄᐃᑦᑐᑐᐃᓐᓇᐅᒐᓗᐊᕐᐸᑦ, ᐊᖑᑎᓐᖑᐊᖑᒐᓗᐊᕐᐸᑦ ᐊᕐᓇᓐᖑᐊᖑᒃᐸᓪᓘᓐᓃᑦ, 17#ᕉᒪᒥᐅᓄᑦ 1:23.ᐆᒪᔪᓐᖑᐊᖑᒐᓗᐊᕐᐸᑦ ᑎᖕᒥᐊᓐᖑᐊᖑᒐᓗᐊᕐᐸᓪᓘᓐᓃᑦ, 18ᐹᕐᖑᕐᑐᓐᖑᐊᖑᒃᐸᑦ ᐃᖃᓗᓐᖑᐊᖑᒃᐸᓪᓘᓐᓃᑦ. 19ᑐᒃᓯᐊᕐᕕᖃᕈᒪᓗᓯ ᐱᔨᑦᓯᕈᒪᓗᓯᓗ ᐃᓱᒪᑦᑍᓕᒋᑦᓯ ᕿᓚᖕᒥ ᑕᑯᕙᒃᑕᑦᓯᓐᓂᒃ, ᓯᕿᓂᕐᒥᒃ, ᑕᖅᑭᕐᒥᒃ, ᐅᓪᓗᕆᐊᓂᒡᓗ, ᐊᑕᓂᐅᑉ ᒎᑎᑦᓯ ᑕᒪᒃᑯᐊ ᑐᓂᓯᒪᖕᒪᒋᑦ ᐃᓅᖃᑎᒌᓄᑦ ᐊᓯᑦᓯᓐᓄᑦ ᑐᒃᓯᐊᕐᕕᒋᔭᐅᖁᓪᓗᒋᑦ. 20#ᒨᓯᓯ ᐂᑉᐸᖏᑦ 19:5; ᒨᓯᓯ ᑕᓪᓕᒪᖏᑦ 7:6; 14:2; 26:18; ᑍᑑᓯᑦ 2:14; 1 ᐲᑦᑐᕉᓯ 2:9.ᐃᓕᑦᓯᓕ ᑖᑦᓱᒪ ᐄᑦᔨᑉᑎᒥᑦ ᐱᐅᓕᓚᐅᕐᐹᓯ, ᑕᕝᕙᓐᖓᑦ ᐅᖅᑰᓯᓴᐅᑎᐊᓗᒃᑎᑐᑦ ᐃᑯᒪᔪᑎᑐᑦ ᑍᒤᑦᑐᒥᑦ. ᑕᕝᕙᓐᖓᑦ ᐊᓂᑎᓚᐅᕐᐹᓯ ᓇᖕᒥᓂᕆᓗᓂᓯ ᐃᓄᖁᑎᑖᕆᔪᒪᓪᓗᓂᓯ, ᓲᕐᓗ ᐅᓪᓗᒥ ᐃᓄᖁᑎᒋᔭᐅᒐᑦᓯ ᑖᑦᓱᒧᖓ. 21#ᒨᓯᓯ ᓯᑕᒪᖏᑦ 20:12.ᐃᓕᑦᓯ ᐱᑦᔪᑎᒋᓪᓗᓯ ᐊᑕᓂᐅᑉ ᒎᑎᑦᓯ ᓂᓐᖓᐅᑎᓚᐅᕐᐹᖓ ᓱᓕᓪᓚᕆᒃᓱᓂᓗ ᓇᓗᓁᕐᓯᓚᐅᕐᐳᖅ ᔪᐊᕐᑕᓂᐅᑉ ᑰᖓᓂᒃ ᐃᑳᖃᑕᐅᓂᐊᖏᓐᓂᓐᓂᒃ ᓄᓇᒧᑦ ᐱᕈᕐᑐᖃᑦᓯᐊᕐᑐᒧᑦ ᐃᓕᑦᓯᓐᓄᑦ ᑐᓂᓯᒪᔭᖓᓄᑦ. 22ᑕᒫᓂᓕ ᓇᔪᕐᑕᓂ ᓄᓇᒥ ᑐᖁᔪᒫᕐᐳᖓ ᑰᖕᒥᒃ ᔪᐊᕐᑕᓂᒥᒃ ᐃᑳᖃᑕᐅᓚᐅᖏᓪᓗᖓ, ᐃᓕᑦᓯᓕ ᐃᑳᕆᐊᕕᓕᕐᐳᓯ ᓄᓇᑖᕆᐊᕐᑐᕐᓗᓯ ᑕᕝᕗᖓ ᓄᓇᒧᑦ ᐱᕈᕐᑐᖃᑦᓯᐊᕐᑐᒧᑦ. 23ᑲᒪᑦᓯᐊᕐᓂᐊᕐᐳᓯᓕ ᐳᐃᒍᖁᓇᓯ ᐊᖏᖃᑎᒌᒍᑎᐅᓯᒪᔪᒥᒃ ᐊᑕᓂᐅᑉ ᒎᑎᑦᓯ ᐃᓕᑦᓯᓐᓄᑦ ᐊᖏᕈᑎᒋᓚᐅᕐᑕᖓᓂᒃ. ᑖᑦᓱᒪᓗ ᐱᖁᔨᓂᖓ ᓈᓚᒡᓗᒍ ᒎᑎᓐᖑᐊᒥᒃ ᖃᓄᐃᑦᑐᑐᐃᓐᓇᕐᒥᒃ ᓴᓇᔪᒃᓴᐅᓐᖏᓚᓯ. 24#ᐄᑉᕈᐃᓄᑦ 12:29.ᐊᑕᓂᖅ ᒎᑎᓯ ᐃᑯᒪᑎᑐᑦ ᐃᑯᐊᓚᔪᑎᑐᑦ ᑍᒤᒻᒪᑦ; ᐊᓯᒥᓂᒃ ᒎᑎᖃᖁᔨᖏᒻᒪᕆᒃᑐᖅ.
25“ᐊᑯᓂ ᓄᓇᒥ ᐃᓅᓯᒪᓕᕋᓗᐊᕐᑐᓯ ᓄᑕᕋᖃᕐᑐᓯ ᐃᕐᖑᑕᖃᐅᕐᓗᓯᓗ, ᑭᓯᐊᓂᓕ ᐊᔪᕐᑐᓕᓂᐊᕋᓯ ᒎᑎᓐᖑᐊᒃᓴᑦᓯᓐᓂᒃ ᓴᓇᓂᕐᒧᑦ ᖃᓄᐃᑦᑐᑐᐃᓐᓇᐅᒐᓗᐊᕐᐸᑦ. ᑕᒪᓐᓇ ᐊᑕᓂᐅᑉ ᒎᑎᑦᓯ ᓵᖓᓂ ᐱᐅᖏᑦᑐᐊᓘᖕᒪᑦ, ᓂᓐᖓᒍᑎᒋᔪᓐᓇᕐᓗᓂᐅᒡᓗ ᑕᒪᓐᓇ. 26ᕿᓚᒡᓗ ᓄᓇᓗ ᐃᑲᔪᕐᑎᒋᓗᒋᒃ ᐃᓕᑦᓯᓐᓂᒃ ᓈᒻᒪᒃᓴᖏᓐᓂᕋ ᐅᓪᓗᒥ ᓴᖅᑭᑉᐸᕋ, ᓈᓚᓐᖏᑐᐊᕈᑦᓯᓐᖓ, ᐊᑯᓂᐅᖏᑦᑐᖅ ᓄᓇᒥ ᑕᒫᓃᑦᓱᓐᓁᕐᓂᐊᕐᐳᓯ. ᐊᑯᓂᐅᖏᑦᑐᕐᓗ ᐃᓅᓂᐊᕐᐳᓯ ᑕᒫᓂ ᔪᐊᕐᑕᓂᐅᑉ ᐊᑭᐊᓂ ᓄᓇᑖᕆᓂᐊᕐᑕᑦᓯᓐᓂ, ᓄᖑᑕᐅᑦᓯᐊᕐᓂᐊᕐᐳᓯᓗ. 27#ᒨᓯᓯ ᑕᓪᓕᒪᖏᑦ 28:36.ᐊᑕᓂᐅᑉ ᓯᐊᒻᒪᕐᑎᓐᓂᐊᕐᐹᓯ ᐃᓅᖃᑎᒌᒡᔪᐊᓄᑦ ᐊᓯᑦᓯᓐᓄᑦ, ᐅᓄᖏᑦᑐᓯᒍᓪᓕ ᐊᒥᐊᒃᑰᓂᐊᕐᐳᓯ. 28ᑕᒪᒃᑯᓇᓂᓕ ᓇᔪᓕᕐᑕᑦᓯᓐᓂ ᒎᑎᖃᕈᒫᕐᐳᓯ ᐃᓄᐃᑦ ᐊᒡᒐᖏᓐᓄᑦ ᓴᓇᔭᐅᓯᒪᔪᓂᒃ, ᕿᔪᖕᓄᑦ ᐅᔭᖅᑲᓄᓪᓗ ᒎᑎᐅᔪᓄᑦ, ᒎᑎᒋᔭᐅᔪᑦ ᑕᑯᔪᓐᓇᖏᑦᑐᑦ ᑐᓴᕈᓐᓇᖏᑦᑐᓪᓗ, ᓂᕆᔪᓐᓇᖏᑦᑐᑦ ᓁᒪᔪᓐᓇᖏᑦᑐᓪᓗ. 29#ᔨᕆᒤᐊ 29:13.ᑕᕝᕙᓂ ᐊᑕᓂᖅ ᒎᑎᓯ ᕿᓂᕈᒫᕐᐸᓯ, ᐆᒻᒪᑎᒧᓪᓕ ᐊᒃᓱᕈᓪᓚᕆᒃᑐᒧᑦ ᕿᓂᕐᓂᐊᕈᑦᓯᐅᒃ, ᑕᕝᕙ ᓇᓂᓂᐊᕐᐸᓯ. 30ᐊᑲᐅᖏᑦᔪᑎᒃᓴᖃᕐᓂᕐᒧᓪᓕ ᑎᑭᐅᑎᒍᑦᓯ ᑕᒪᒃᑯᐊᓗ ᐃᓕᑦᓯᓐᓄᑦ ᑎᑭᐅᑎᒃᐸᑕ, ᑕᕝᕙ ᐊᑕᓂᕐᒧᑦ ᒎᑎᑦᓯᓐᓄᑦ ᓵᓕᑍᓐᓇᕈᒫᕐᐳᓯ ᓈᓚᓕᕐᓗᒍᓗ. 31ᑖᓐᓇ ᒎᑎ ᓂᑲᒍᓱᒃᑑᐊᓘᖕᒪᑦ. ᑖᑦᓱᒪ ᖁᔭᓈᕐᓂᐊᖏᒻᒪᓯ ᓄᖑᑕᐅᑎᓐᓂᐊᕐᓇᓯᓗ, ᐳᐃᒍᕐᓂᐊᓐᖏᓛᓗ ᐊᖏᖃᑎᒌᒍᑎᒋᓯᒪᔭᓂ ᓇᖕᒥᓂᖅ ᓯᕗᓕᕕᓂᑦᓯᓐᓄᑦ.
32“ᐅᓪᓗᐃᑦ ᐊᓂᒍᕐᓯᒪᔪᑦ ᕿᒥᕐᕈᓚᐅᕐᓯᐅᒃ, ᐃᓅᓚᐅᕐᑎᓐᓇᓯ ᐱᓂᐊᕐᓂᐅᓚᐅᕐᑐᑦ, ᑕᐅᕗᖓᓕᒫᖅ ᒎᑎᐅᑉ ᐃᓄᖕᓂᒃ ᐱᓐᖑᕐᑎᑦᓯᒋᐊᕐᓂᖓᓄᑦ ᑎᑭᓪᓗᒍ ᑕᕝᕙᓂ ᓄᓇᕐᔪᐊᕐᒥ. ᓄᓇᕐᔪᐊᓕᒫᖅ ᐊᑕᖏᕐᓗᒍ ᕿᒥᕐᕈᐊᓚᐅᕐᓯᐅᒃ. ᑕᒪᑐᒪ ᓯᕗᓂᖓᒍᑦ ᑍᒫᒃ ᐱᕕᒃᔪᐊᖑᑎᒋᔪᒥᒃ ᐱᔪᖃᓚᐅᕐᓯᒪᕚ? ᓇᓪᓕᐊᓐᓂᒡᓘᓐᓃᑦ ᑍᒫᓪᓗᐊᖅ ᐱᓯᒪᑎᒋᔪᒥᒃ ᑐᓴᐅᒪᔪᖅᑲᕐᓯᒪᕚ? 33ᐃᓄᖕᓂᒃ ᐆᒪᔪᓐᓇᕐᑐᖃᕐᓯᒪᕚ ᒎᑎᐅᑉ ᓂᐱᖓᓂᒃ ᐃᑯᒪᒥᓐᖔᕐᑐᒥᒃ ᐅᖃᓪᓚᒃᑐᖃᕐᑎᓪᓗᒍ ᑐᓵᓯᒪᔪᓂᒃ, ᐃᓕᑦᓯᑎᑐᑦ? 34ᒎᑏᑦ ᓇᓪᓕᐊᓐᓂᒃ ᐃᓅᖃᑎᒌᒡᔪᐊᓂᒃ ᓴᓂᕐᕙᒃᑎᑦᓯᔪᖃᕐᓗᓂ ᓇᖕᒥᓂᖅ ᐃᓄᖁᑎᑖᕆᓗᒋᑦ ᐱᔪᖃᓚᐅᕐᓯᒪᕚ? ᐊᑕᓂᐅᑉ ᒎᑎᑦᓯ ᐄᑦᔨᑉᑎᒥ ᐱᓇᓱᐊᕐᓂᕆᓚᐅᕐᑕᖓᑐᑦ ᑍᒤᑦᑐᒥᒃ? ᓇᖕᒥᓂᓪᓚᕆᒃ ᑕᑯᓐᓇᕐᑎᓪᓗᓯ ᐱᔪᓐᓇᕐᓂᕐᔪᐊᓂ ᓲᖑᓂᓂᓗ ᐊᑐᕐᓗᒋᒃ ᐱᓇᓱᐊᓚᐅᕐᐳᖅ; ᖃᓂᒪᓐᓇᕐᑐᓂᒃ ᑎᑭᑎᑦᓯᓚᐅᕐᐳᖅ ᐅᓇᑕᕐᓂᕐᒥᒡᓗ, ᓇᓗᓁᒃᑯᑕᕐᓂᒡᓗ ᐱᓕᕆᓪᓗᓂ ᑲᒪᓇᕐᑐᑎᒍᓪᓗ, ᑕᑕᒥᓐᓇᕐᑐᓂᓗ ᐱᔪᒫᕐᑐᒃᓮᑦ ᐱᑦᔪᑎᒋᓪᓗᒋᑦ. 35#ᒫᑯᓯ 12:32.ᐊᑕᓂᐅᑉ ᑕᒪᑐᒥᖓ ᑕᑯᑎᓚᐅᕐᐹᓯ, ᐃᓕᑦᓯᓐᓄᑦ ᖁᓚᕐᓇᖏᑦᑐᒥᒃ ᓴᖅᑭᑎᑦᓯᔪᒪᓪᓗᓂ ᐊᑕᓂᖅ ᒎᑎᐅᖕᒪᑦ ᐊᓯᐊᓂᒡᓗ ᒎᑎᑕᖃᕋᓂ. 36ᓂᐱᒥᓂᒡᓗ ᕿᓚᖕᒥᑦ ᑐᓴᕈᓐᓇᕐᑎᓚᐅᕐᐹᓯ ᒪᓕᒐᒃᓴᑦᓯᓐᓂᒃ ᐅᖃᐅᑎᔪᒪᓪᓗᓂᓯ; ᑕᕝᕙᓂᓗ ᓄᓇᕐᔪᐊᕐᒥ ᐃᑯᒪᖁᑎᒥᓂᒃ ᐃᑦᔪᕐᓁᑦᑐᒥᒃ ᑕᑯᑎᓚᐅᕐᐹᓯ, ᑕᕝᕙᓐᖓᓪᓗ ᐅᖃᓪᓚᒡᕕᒋᓪᓗᓂᓯ. 37ᓯᕗᓕᕕᓂᕐᓯ ᓇᒡᓕᒋᒐᒥᒋᑦ, ᑕᕝᕙ ᓂᕈᐊᓚᐅᕐᐹᓯ, ᐱᔪᓐᓇᕐᓂᕐᔪᐊᕐᒥᓄᑦ ᓇᖕᒥᓂᖅ ᐊᓂᑎᓚᐅᕐᐹᓯ ᐄᑦᔨᑉᑎᒥᑦ. 38ᐃᓕᑦᓯ ᐱᑦᔪᑎᒋᓪᓗᓯ ᐃᓅᖃᑎᒌᒡᔪᐊᑦ ᐃᓕᑦᓯᓐᓂᑦ ᐃᓄᒋᐊᖕᓂᕐᓴᐅᔪᑦ ᓴᓐᖏᓂᕐᓴᐅᔪᓪᓗ ᓄᓇᖏᓐᓂᑦ ᐊᓂᑎᓚᐅᕐᐰᑦ, ᓄᓇᒋᔭᖏᓐᓂ ᓄᓇᑖᖔᕈᓐᓇᖁᓪᓗᓯ, ᒫᓐᓇ ᓱᓕ ᓄᓇᒋᔭᑦᓯᓐᓄᑦ. 39ᑍᒤᒻᒪᑦ ᐅᓪᓗᒥ ᐃᖅᑲᐅᒪᓕᕐᓯᐅᒃ ᐳᐃᒍᕐᓂᐊᕐᓇᒍᓗ: ᐊᑕᓂᖅ ᒎᑎᐅᖕᒪᑦ ᕿᓚᖕᒥᓗ ᓄᓇᒥᓗ. ᐊᓯᐊᓂᒡᓗ ᒎᑎᑕᖃᓐᖏᓚᖅ. 40ᐱᖁᔭᖏᑦ ᓈᓚᒃᑕᒃᓴᕆᕙᓯ ᐅᓪᓗᒥ ᐃᓕᑦᓯᓐᓄᑦ ᐅᖃᐅᓯᕆᖅᑲᐅᔭᒃᑲ, ᑕᕝᕙ ᑕᒤᑎᒍᓕᒫᖅ ᖃᓄᐃᖏᑦᓯᐊᕐᓂᐊᕐᐳᓯ ᑭᖑᕚᒃᓴᓯᓗ. ᓄᓇᒥᓗ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓᓂ ᐃᓕᑦᓯᓐᓄᑦ ᓄᓇᕾᓐᓇᕈᓐᓇᕐᓂᐊᕐᐳᓯ ᐃᓱᖃᖏᑦᑐᒧᑦ.”
ᐃᒡᓗᒐᓮᑦ ᕿᒫᕕᐅᓯᒪᔪᑦ ᔪᐊᕐᑕᓂᐅᑉ ᑕᓕᕐᐱᐊᓃᑦᑐᑦ ᓯᕿᓂᐅᑉ ᓄᐃᕕᐊᓂ
41 #
ᔮᓱᐊ 20:8,9. ᑕᕝᕙ ᒨᓯᓯᐅᑉ ᐃᒡᓗᒐᓮᑦ ᐱᖓᓱᐃᑦ ᔪᐊᕐᑕᓂᐅᑉ ᑕᓕᕐᐱᐊᓃᑦᑐᑦ ᓯᕿᓂᐅᑉ ᓄᐃᕕᑕ ᓇᓛᓃᑦᑐᑦ ᕿᒫᕕᒃᓴᓐᖑᕐᑎᑉᐰᑦ, 42ᐃᓅᖃᑎᒥᓂᒃ ᐱᔮᕆᖏᓪᓗᑎᒃ ᐊᑭᕋᕆᓐᖏᑕᒥᖕᓂᒃ ᑐᖁᑦᓯᔪᑦ ᑕᕝᕗᖓ ᕿᒫᔪᓐᓇᖁᓪᓗᒋᑦ. ᑕᕝᕗᖓᓗ ᕿᒫᔪᑦ ᑐᖁᑕᐅᖁᓇᒋᑦ. 43ᕉᐱᓂᐅᑉ ᑭᖑᕚᖏᑦ ᕿᒫᕕᒃᓴᖃᕐᐳᑦ ᐃᒡᓗᒐᓴᒡᔪᐊᒥᒃ ᐱᔮᕆᒥᒃ, ᐱᕈᕐᑐᖃᖏᑦᑐᒦᑦᑐᒥᒃ; ᒑᑎᐅᓪᓕ ᑭᖑᕚᖏᑦ ᕿᒫᕕᒃᓴᖃᕐᐳᑦ ᐃᒡᓗᒐᓴᒡᔪᐊᒥᒃ ᕌᒪᑦᒥᒃ, ᒋᓕᐊᑎᐅᑉ ᓄᓇᖓᓃᑦᑐᒥᒃ; ᒫᓇᓯᐅᓪᓕ ᑭᖑᕚᖏᑦ ᕿᒫᕕᒃᓴᖃᕐᐳᑦ ᐃᒡᓗᒐᓴᒡᔪᐊᒥᒃ ᒎᓚᓐᒥᒃ, ᐹᓴᓂᐅᑉ ᓄᓇᖓᓃᑦᑐᒥᒃ.
ᒎᑎᐅᑉ ᐱᖁᔭᖏᑕ ᑐᓂᔭᐅᓂᒃᓴᖏᓐᓄᑦ ᓇᓗᓁᕐᓯᑦᔪᑏᑦ
44ᐅᑯᐊ ᑕᕝᕙ ᒎᑎᐅᑉ ᐱᖁᔭᖏᑦ ᒨᓯᓯᐅᑉ ᑐᓂᓚᐅᕐᑕᖏᑦ ᐃᓴᕆᐊᓕᒥᐅᓄᑦ. 45ᐅᑯᐊ ᑕᕝᕙ ᓇᓗᓁᕐᓯᑦᔪᑎᐅᔪᑦ, ᓴᖅᑭᔮᕐᓗᑎᒃ, ᒪᓕᒐᒃᓴᐅᓪᓗᑎᒡᓗ, ᒨᓯᓯᐅᑉ ᐅᖃᐅᓯᕆᓚᐅᕐᑕᖏᑦ ᐃᓴᕆᐊᓕᒥᐅᓄᑦ ᓄᓇᒥᑦ ᐄᑦᔨᑉᑎᒥᑦ ᐊᐅᓪᓚᕐᓯᒪᓕᕐᑎᓪᓗᒋᑦ, 46ᑰᑉ ᔪᐊᕐᑕᓂᐅᑉ ᐊᑭᐊᓃᓕᕐᑎᓪᓗᒋᑦ ᓄᓇᓖᑦ ᐱᑦ-ᐱᐅᕋᐅᑉ ᐊᑭᐊᓂ, ᓄᓇᒥ ᓮᕼᐆᓂᒥ ᐊᒧᕅᑎᒥᐅᑦ ᐊᖓᔪᖅᑳᕐᔪᐊᖓᑦᑕ ᓄᓇᖁᑎᖓᓂ, ᕼᐃᓴᐸᓂᒥ ᓄᓇᖃᕐᓗᓂ ᐊᐅᓚᑦᓯᓚᐅᕐᑑᑉ, ᑖᒃᑯᐊ ᒨᓯᓯᒃᑯᑦ ᐃᓴᕆᐊᓕᒥᐅᓪᓗ ᓵᓚᒋᓚᐅᕐᑕᖓᑦᑕ ᐄᑦᔨᑉᑎᒥᑦ ᐊᐅᓪᓚᕐᓯᒪᓂᖓᑕ ᑭᖑᓂᖓᓂ. 47ᑖᑦᓱᒪ ᓄᓇᖁᑎᖓ ᓄᓇᑖᕆᓚᐅᕐᒪᑦᔪᒃ ᐋᒡᒥᐅᓪᓗ ᓄᓇᖓ ᐹᓴᓂᐅᑉ ᐊᖓᔪᖅᑳᕐᔪᐊᖓᑕ, ᑖᒃᑯᐊᒃ ᐊᒧᕅᑎᒥᐅᑦ ᐊᖓᔪᖅᑳᕐᔪᐊᕆᓚᐅᕐᒪᒋᒃ ᒪᕐᕉᒃ, ᑕᒪᕐᒥᒡᓗ ᓄᓇᖃᓚᐅᕐᐴᒃ ᑰᑉ ᔪᐊᕐᑕᓂᐅᑉ ᐊᑭᐊᓂ; 48ᑕᒪᓐᓇ ᓄᓇ ᐊᕈᐃᕆᒥᑦ ᓄᓇᒥᑦ ᐱᒋᐊᕐᓯᒪᓚᐅᕐᐳᖅ, ᐋᕐᓄᓂᐅᑉ ᑰᖓᑕ ᑭᒡᓕᖓᓄᑦ ᑎᑭᓯᒪᓪᓗᓂ, ᑕᑉᐸᐅᖓᓕᒫᖅ ᓮᕆᐅᓂᐅᑉ ᖃᖅᑲᖓᓄᑦ ᑎᑭᓪᓗᒍ, ᑍᔭᐅᔪᒧᑦ ᕼᐊᕐᒪᓂᐅᑉ ᖃᖅᑲᖓᓂᒃ. 49ᑰᓪᓗ ᔪᐊᕐᑕᓂᐅᑉ ᐊᑭᐊᓂᑦ ᐱᒋᐊᕐᓯᒪᓪᓗᓂ ᑕᐅᓄᖓᓕᒫᖅ ᐃᒪᕐᒧᑦ ᑐᖁᖓᔪᒧᑦ ᑎᑭᐅᑎᓯᒪᓚᐅᕐᐳᖅ ᑕᒪᑐᒪᓗ ᑕᓕᕐᐱᐊᓄᑦ ᑎᑭᐅᒪᓪᓗᓂ ᖃᖅᑲᒧᑦ ᐱᔅᒐᒧᑦ ᑎᑭᓪᓗᒍ.
Currently Selected:
ᒨᓯᓯ ᑕᓪᓕᒪᖏᑦ 4: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
