ᐂᒨᓯᐅᑉ ᐊᒡᓚᖏᑦ 7
7
ᐱᒃᓕᕐᑕᐅᔮᕐᑐᓂᒃ ᑕᑯᑎᑕᐅᓂᖅ
1ᐊᑕᓂᐅᑉ ᒎᑎᐅᑉ ᑕᑯᑎᓚᐅᕐᐹᖓ; ᑕᑯᒋᑦ, ᐱᒡᓕᕐᑕᐅᔮᕐᑐᓂᒃ ᓴᖅᑭᑎᑦᓯᓚᐅᕐᐳᖅ ᐅᓄᕐᑐᕐᔪᐊᓂᒃ ᑲᑎᕐᓱᐃᕕᒃ ᓇᓪᓕᐅᑎᕋᑖᕐᑎᓪᓗᒍ ᐱᕈᕐᑐᑦ ᑭᖑᓪᓕᕐᐹᑦ ᐱᕈᕐᐸᓪᓕᐊᓕᕐᑎᓪᓗᒋᑦ, ᐊᖓᔪᖅᑳᕐᔪᐊᖅ ᑲᑎᕐᓱᐃᕋᑖᕐᑎᓪᓗᒍ ᐃᕕᖕᓂᒃ ᐆᒪᔪᐃᑦ ᓂᕿᒃᓴᖏᓐᓂᒃ. 2ᐱᒡᓕᕐᑕᐅᔮᕐᑐᑦ ᓄᖒᑦᓯᖕᒪᑕ ᐃᕕᖕᓂᒃ ᓄᓇᒦᑦᑐᓂᒃ, ᐅᖃᓚᐅᕐᐳᖓ; ᐊᑕᓃᖅ ᒎᑏᒃ ᕿᓄᕗᖓ ᐃᓱᒪᒋᔪᓐᓁᕐᕕᒋᒃᑭᑦ! ᔧᑰᑉ ᑭᖑᕚᖏᑦ ᐊᓐᓇᒍᓐᓇᖁᓪᓗᒋᑦ, ᒥᑭᔫᓗᐊᕐᒪᑕ.
3ᑕᕝᕙ ᐊᑕᓂᐅᑉ ᐃᓱᒪᓂ ᑕᒪᑐᒧᖓ ᐊᓯᑦᔨᓚᐅᕐᐹ, ᐅᖃᕐᓗᓂ, “ᑍᒤᑦᑐᖃᕐᓂᐊᕈᓃᕐᐳᖅ,” ᐊᑕᓂᖅ ᐅᖃᕐᐳᖅ.
ᐃᑯᐊᓚᔪᒥᒃ ᑕᑯᑎᑕᐅᓂᖅ
4ᐃᒫᒃ ᐊᑕᓂᐅᑉ ᒎᑎᐅᑉ ᑕᑯᑎᓚᐅᕐᐹᖓ: ᑕᑯᒋᑦ, ᐊᑕᓂᖅ ᒎᑎ ᐱᖁᔨᓚᐅᕐᐳᖅ ᐃᖅᑲᕐᑐᐃᓂᕐᒥᒃ ᐃᑯᒪᒧᑦ, ᑕᕆᐅᖅ ᐃᑎᔪᕐᔪᐊᖅ ᐃᑯᐊᓪᓚᓚᐅᕐᐹ ᓄᓇᓗ ᐃᑯᐊᓪᓚᖃᓯᐅᑎᓕᕐᓗᓂ. 5ᐅᖃᓚᐅᕐᐳᖓᓗ,
“ᐊᑕᓃᖅ ᒎᑏᒃ, ᕿᓄᕕᒋᕙᒋᑦ, ᓄᖅᑲᕆᑦ!
ᔧᑰᑉ ᑭᖑᕚᖏᑦ ᐊᓐᓇᒍᓐᓇᖁᓪᓗᒋᑦ ᒥᑭᓗᐊᕐᒪᑕ!”
6ᑕᕝᕙ ᐊᑕᓂᐅᑉ ᐃᓱᒪᓂ ᑕᒪᑐᒧᖓ ᐊᓯᑦᔨᓚᐅᕐᐹ, ᐅᖃᕐᓗᓂ,
“ᑍᒤᑦᑐᖃᕐᓂᐊᕈᓃᕐᐳᖅ,” ᐊᑕᓂᖅ ᒎᑎ ᐅᖃᕐᐳᖅ.
ᑕᑯᑎᑕᐅᓂᖅ ᒪᑭᑎᑦᓯᑦᓯᐊᕈᑎᒥᒃ
7ᐃᒫᒃ ᑕᑯᑎᓚᐅᕐᐹᖓ: ᑕᑯᒋᑦ, ᐊᑕᓂᖅ ᓇᖏᓚᐅᕐᐳᖅ ᐊᕙᓗᕐᔪᐊᑉ ᓴᓂᐊᓂ ᓇᐸᑦᓯᐊᕐᒪᖔᑦ ᖃᐅᔨᓴᐅᑎᒧᑦ ᓴᓇᔭᐅᓯᒪᔪᒥ, ᑎᒍᒥᐊᕐᓗᓂᓗ ᓇᐸᑦᓯᐊᕐᒪᖔᑦ ᖃᐅᔨᓴᐅᑎᒥᒃ.
8ᐊᑕᓂᐅᓪᓗ ᐅᖃᐅᑎᓚᐅᕐᐹᖓ, “ᐂᒨᓰ, ᓱᓇᒥᒃ ᑕᑯᕖᑦ?”
ᑭᐅᓚᐅᕐᐸᕋᓗ, “ᓇᐸᑦᓯᐊᕐᒪᖔᑦ ᖃᐅᔨᓴᐅᑎᒥᒃ.”
ᑕᕝᕙ ᐊᑕᓂᐅᑉ ᐅᖃᐅᑎᕚᖓ:
“ᑕᑯᒋᑦ, ᓇᐸᑦᓯᐊᕐᒪᖔᑦ ᖃᐅᔨᓴᐅᑎᒥᒃ ᐋᖅᑭᒃᓯᓂᐊᕐᐳᖓ
ᐃᓄᖁᑎᒪ ᐃᓴᕆᐊᓕᒥᐅᑦ ᐊᑯᕐᖓᓐᓂ, ᖄᖏᑐᐃᓐᓇᕐᓂᐊᕈᓐᓃᕐᐸᒃᑲ.
9ᐂᓴᑭᐅᑉ ᐳᕐᑐᔪᒦᑦᑐᑦ ᑐᒃᓯᐊᕐᕕᒋᕙᒃᑕᕕᓂᖏᑦ ᐃᓄᖃᕈᓐᓃᕈᒫᕐᐳᑦ,
ᐃᓴᕆᐊᓕᐅᓪᓗ ᐃᑦᔪᕐᓁᑦᑐᕕᖁᑎᖏᑦ ᑕᒫᓃᕐᕆᓕᕈᒫᕐᐳᑦ,
ᒪᑭᓐᓂᐊᕐᐳᖓᓗ ᓴᕕᒡᔪᐊᓕᔭᕐᓗᖓ ᔨᕈᐳᐊᒻ ᐊᖓᔪᖅᑲᐅᕕᖓ ᐅᓇᑕᕆᐊᕐᓗᒍ.”
ᐂᒨᓯᓗ ᐊᒪᓮᐊᓗ
10ᐊᒪᔧᐊ ᐱᑎᓕᒥ ᑐᓂᕐᕈᓯᕐᑎᑦᓯᔨ ᑎᓕᓯᓚᐅᕐᐳᖅ ᐅᖃᕆᐊᕐᑐᕐᑎᑦᓯᓪᓗᓂ ᔨᕈᐳᐊᒻᒧᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐃᒫᒃ, “ᐂᒨᓯ ᐃᓱᒪᓕᐅᓕᕐᒪᑦ ᐊᑭᕋᕐᑐᕈᒪᓪᓗᓂ ᐃᓕᖕᓄᑦ ᐃᓴᕆᐊᓕᒥᐅᑎᒍᑦ, ᐅᖃᐅᓯᖏᓪᓗ ᐊᓯᕈᐃᓂᐊᕐᐳᑦ ᓄᓇᖁᑎᑦᑎᓐᓂᒃ. 11ᐂᒨᓯ ᐃᒫᒃ ᐅᖃᓚᐅᕐᒪᑦ, ‘ᔨᕈᐳᐊᒻ ᑐᖁᑕᐅᔪᒫᕐᐳᖅ ᓴᕕᒡᔪᐊᒧᑦ, ᐃᓴᕆᐊᓕᒥᐅᓪᓗ ᐊᐅᓪᓚᕈᑦᔭᐅᔪᒫᕐᐳᑦ ᑎᒍᔭᐅᓗᑎᒃ ᓄᓇᒥᖕᓂᑦ.’”
12ᐊᒪᔧᐊᓗ ᐅᖃᕐᐳᖅ ᐂᒨᓯᒧᑦ, “ᐊᐅᓪᓚᓕᕆᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ! ᕿᒫᓕᕆᑦ ᔫᑕᐅᑉ ᓄᓇᖓᓄᑦ, ᑍᑲᓂᓗ ᓂᕆᖃᑦᑕᕐᓗᑎᑦ ᓂᐊᖂᔭᒥᒃ, ᐅᖃᓪᓚᖃᑦᑕᕆᐊᕐᑐᓕᕆᑦ. 13ᐅᖃᓪᓚᓚᐅᕐᓯᒪᓂᐊᕈᓐᓃᕐᐳᑎᑦ ᐱᑎᓕᒥ, ᐊᖓᔪᖅᑳᕐᔪᐊᑉ ᐃᑦᔪᕐᓁᑦᑐᕕᖁᑎᒋᖕᒪᒍ, ᑐᒃᓯᐊᕐᕕᒃᔪᐊᖃᕐᕕᐅᓪᓗᓂᓗ ᐊᖓᔪᖅᑳᕐᔪᐊᖃᕐᕕᖕᒥ.”
14ᑕᕝᕙ ᐂᒨᓯᐅᑉ ᐊᒪᔧᐊ ᑭᐅᕚ ᐅᖃᐅᑎᓪᓗᒍ: “ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᒋᓐᖏᓛᖓ, ᐃᕐᓂᕆᔭᐅᓇᖓᓘᓐᓃᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ, ᓰᐱᓕᕆᔨᑐᐃᓐᓇᐅᕗᖓᓕ, ᓇᐹᕐᑐᒥᒃ ᓯᑲᒧᐊᕆᒥᒃ ᐸᐅᕐᖓᖏᓐᓂᒡᓗ ᑲᒪᔨᑐᐃᓐᓇᐅᕗᖓ. 15ᐊᑕᓂᐅᑉ ᕾᖁᓚᐅᕐᐹᖓ ᓰᐱᓕᕆᔨᐅᑎᓪᓗᖓ, ᐊᑕᓂᐅᓪᓗ ᐅᖃᐅᑎᕚᖓ, ‘ᐅᖃᓪᓚᒋᐊᕐᑐᕆᑦ ᐃᓄᖁᑎᓐᓄᑦ ᐃᓴᕆᐊᓕᐅᒥᐅᓄᑦ.’ 16ᑍᒤᒻᒪᑦ ᒫᓐᓇ ᐊᑕᓂᐅᑉ ᐅᖃᐅᓯᖏᓐᓂᒃ ᑐᓴᓕᕆᑦ; ᐃᕝᕕᓪᓕ ᐅᖃᕐᐳᑎᑦ, ‘ᐅᖃᓪᓚᖕᓂᐊᕐᓇᒃ ᐊᑭᕋᕐᑐᕐᓗᑎᑦ ᐃᓴᕆᐊᓕᒥᐅᓂᒃ, ᐊᔪᕆᕐᑐᐃᑦᑍᓕᓗᑎᓪᓗ ᐂᓴᑭᐅᑉ ᑭᖑᕚᖏᓐᓄᑦ.’ 17ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ: ‘ᓄᓕᐊᑦ ᐊᖑᑎᓄᑦ ᐊᑐᒐᐅᓂᐊᓕᕐᐳᖅ ᐃᒡᓗᒐᓴᖕᓂ, ᐃᕐᓂᑎᓪᓗ ᐸᓂᑎᓪᓗ ᑐᖁᑕᐅᔪᒫᕐᐳᑦ ᓴᕕᒡᔪᐊᒧᑦ, ᓄᓇᖁᑏᑦ ᐊᕕᒃᑐᕐᑕᐅᔪᒫᕐᐳᖅ ᐆᒃᑐᕋᐅᑏᑦ ᐊᑐᕐᓗᒋᑦ; ᑐᖁᑕᐅᔪᒫᕐᐳᑎᓪᓗ ᓄᓇᒥ ᐃᑦᔪᕐᓇᕐᓂᕋᕐᑕᐅᔪᒥ, ᐃᓴᕆᐊᓕᒥᐅᓪᓗ ᐊᐅᓪᓚᕈᑦᔭᐅᓪᓚᕆᒍᒫᕐᐳᑦ ᑎᒍᔭᐅᓗᑎᒃ ᓄᓇᒥᖕᓂᑦ.’”
Currently Selected:
ᐂᒨᓯᐅᑉ ᐊᒡᓚᖏᑦ 7: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
