ᐊᑕᓃᑦ ᐂᑉᐸᖏᑦ 17
17
ᕼᐆᓯᐊᑉ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥᐅᓄᑦ
1ᐊᖓᔪᖅᑳᕐᔪᐊᑉ ᐂᕼᐊᓯᐅᑉ ᐊᐅᓚᑦᓯᓂᖓᑕ ᔫᑕᒥ ᐊᕐᕌᒍᐃᑦ 12ᖓᓂ, ᕼᐆᓯᐊ ᐄᓚᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐃᓴᕆᐊᓕᒥᐅᓄᑦ. ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 9ᓂᒃ ᓴᒥᐊᕆᐊᒥ. 2ᐊᑕᓂᐅᓪᓗ ᓵᖓᓂ ᐊᔪᕐᑐᓕᓚᐅᕐᐳᖅ, ᓯᕗᓂᖓᓂ ᐊᖓᔪᖅᑳᕐᔪᐊᖑᖃᑦᑕᕐᓯᒪᔪᓂᑦ ᐊᔪᕐᑐᓕᓂᕐᒥ ᐃᓅᓇᓱᐊᑐᐃᓐᓇᖏᓐᓂᕐᓴᐅᒐᓗᐊᕐᓗᓂ. 3ᓵᓪᒪᓃᓴ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐅᓇᑕᓕᓚᐅᕐᐳᖅ ᑖᑦᓱᒧᖓ; ᐊᖓᔪᖅᑳᕐᔪᐊᖅ ᕼᐆᓯᐊ ᓵᓚᐅᒐᒥ, ᐊᑭᓕᕐᓱᐃᖃᑦᑕᕆᐊᖃᓕᓚᐅᕐᐳᖅ ᐊᕐᕌᒍᑕᒫᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓄᑦ. 4ᐊᕐᕌᒍᐃᑦ ᐃᓚᖓᓐᓂ ᕼᐆᓯᐊ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᓲᒥᒃ ᐊᑎᓕᖕᒧᑦ ᐃᑲᔪᕐᑕᐅᔪᒪᑦᔪᑎᓕᐅᕐᐳᖅ ᐃᔨᕋᕐᑐᕐᓗᓂ, ᐊᓯᕆᐊᒥᐅᓄᑦ ᐊᑭᓕᕐᑐᐃᓂᕆᕙᒃᑕᓂ ᐊᕐᕌᒍᑕᒫᑦ ᓄᖅᑲᕐᑎᓪᓗᓂᐅᑉ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᓵᒪᓃᓴᐅᑉ ᑕᒪᓐᓇ ᖃᐅᔨᒐᒥᐅᒃ ᕼᐆᓯᐊ ᑎᒍᔭᐅᑎᓪᓗᒍ ᐊᓄᓪᓚᒃᓰᕕᖕᒧᑦ ᐴᕐᑕᐅᑎᑉᐹ.
ᓴᒥᐊᕆᐊᒥᐅᑉ ᓵᓚᒋᔭᐅᓂᖓᑦ
5ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᓴᕆᐊᓕᒥᐅᑦ ᓄᓇᓕᒫᖓ ᓵᓚᒋᓪᓗᒍ ᑎᒍᓚᐅᕐᐹ, ᓴᒥᕆᐊᒥᐅᓪᓗ ᐃᒡᓗᒐᓴᒡᔪᐊᖏᑦ ᐊᕙᑕᖏᕐᓗᒋᑦ ᐊᔪᓕᕐᑎᓯᒪᓚᐅᕐᐰᑦ ᐊᕐᕌᒍᓂᒃ ᐱᖓᓱᓂᒃ. 6ᕼᐆᓯᐊ ᐊᕐᕌᒍᓂᒃ 9ᓂᒃ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᓴᒥᐊᕆᐊᒥᐅᑦ ᓵᓚᒋᒐᒥᒋᑦ ᑎᒍᓚᐅᕐᐰᑦ ᐃᓄᖏᑦ ᐊᐅᓪᓚᕈᑎᓪᓗᓂᒋᑦ ᓄᓇᑖᕐᑎᑉᐰᑦ ᐊᓯᕆᐊᑉ ᓄᓇᓕᖏᑦᑕ ᐃᓚᖏᓐᓂ ᕼᐋᓚᒥᒃ, ᐃᓚᖏᓪᓗ ᕼᐂᐸᒥ ᑰᑉ ᓯᓈᓃᑦᑐᒥ ᒎᔭᓂᐅᑉ ᓄᓇᖓᓂ, ᐃᓚᖏᓪᓗ ᒥᑏᔅᒥᐅᑦ ᐃᒡᓗᒐᓴᖏᓐᓂ. 7ᓴᒥᐊᕆᐊᒥᐅᑦ ᓵᓚᐅᓚᐅᕐᐳᑦ ᐊᔪᕐᑐᓕᓚᐅᕋᒥᒃ ᐊᑕᓂᕐᒧᑦ ᒎᑎᒥᖕᓄᑦ, ᓴᐳᑦᔨᔨᒋᓚᐅᕐᑕᒥᓂᒃ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓂᑦ ᐰᕉᒥᑦ, ᐊᐅᓪᓚᕐᑎᑦᓯᔨᒋᓚᐅᕐᑕᒥᖕᓂᓪᓗ ᐄᑦᔨᑉᑎᒥᐅᑦ ᓄᓇᖓᓐᓂᑦ, ᒎᑎᓐᖑᐊᓄᑦ ᑐᒃᓯᐊᖔᖃᑦᑕᓕᕐᓗᑎᒃ. 8ᒪᓕᓕᕐᓗᑎᒃ ᓄᓁᑦ ᑎᑭᑕᖏᑕ ᐃᓄᖏᓐᓄᑦ ᐃᓕᖅᑯᓯᕆᔭᐅᓚᐅᕐᑐᓂᒃ ᒎᑎᐅᑉ ᓯᖏᑕᐅᑎᓚᐅᕐᑕᖏᓐᓄᑦ ᐃᓴᕆᐊᓕᒥᐅᓄᑦ, ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖏᑕ ᐃᓕᖅᑯᓯᕐᑖᕆᔭᐅᑎᓯᒪᔭᖏᓐᓄᑦ. 9ᐃᓴᕆᐊᓕᒥᐅᑦ ᐱᓂᐊᓚᐅᕐᒪᑕ ᐊᑕᓂᐅᑉ ᓈᒻᒪᒋᓐᖏᑕᖏᓐᓂᒃ ᐃᔨᕋᕐᑐᕐᓗᑎᒃ. ᐃᒡᓗᒐᓴᒡᔪᐊᖁᑎᓕᒫᒥᖕᓂᒃ ᒎᑎᓐᖑᐊᒥᖕᓄᑦ ᑐᒃᓯᐊᕐᕕᒃᑕᖃᕐᑎᑦᓯᓚᐅᕐᒪᑕ, ᐃᒡᓗᒐᓴᖏᓐᓂᑦ ᒥᑭᓐᓂᕐᐹᓂᑦ ᐃᒡᓗᒐᓴᒡᔪᐊᑦ ᐊᖏᓂᕐᐹᑦ ᑎᑭᓪᓗᒋᑦ. 10#ᐊᑕᓃᑦ ᓯᕗᓪᓖᑦ 14:23.ᒎᑎᓐᖑᐊᓕᐊᕆᓯᒪᔪᓂᒃ ᓇᑉᐰᓯᒪᓚᐅᕐᐳᑦ ᐱᖑᐃᑦ ᐳᕐᑐᓂᓕᒫᖏᓐᓂ, ᓇᐹᕐᑐᐃᓪᓗ ᐊᑖᓐᓂ ᒎᑎᓐᖑᐊᑉ ᐊᓯᕋᐅᑉ ᐊᑦᔨᖏᓐᓂᒃ. 11ᑐᓂᕐᕈᓯᕐᕕᖕᓂ ᒎᑎᓐᖑᐊᓄᑦ ᐃᑯᐊᓚᑎᑦᓯᕗᑦ ᐴᔪᕐᑎᑦᓯᓪᓗᑎᒡᓗ, ᐃᓅᖃᑎᒌᒡᔪᐊᓄᑦ ᒎᑎᐅᑉ ᓯᖏᑕᐅᑎᓚᐅᕐᑕᖏᑕ ᐃᓴᕆᐊᓕᒥᐅᓄᑦ ᐃᓕᖅᑯᓯᕕᓂᖏᓐᓂᒃ ᐊᑐᕐᓗᑎᒃ. ᐊᑕᓂᐅᑉ ᓂᓐᖓᒍᑎᒃᓴᖏᓐᓂᒃ ᐱᓂᐊᕐᓂᖃᓚᐅᕐᐳᑦ ᓈᒻᒪᒋᓐᖏᑕᖏᓐᓂᒃ ᐱᓇᓱᐊᕐᓂᕐᒥᖕᓄᑦ. 12ᐊᑕᓂᐅᓪᓗ ᐱᖁᔭᖓᓂᒃ ᑍᒤᓕᐅᓂᕐᒧᑦ ᓯᖁᒥᑦᓯᓚᐅᕐᐳᑦ, ᐅᖃᐅᑎᓯᒪᓚᐅᕐᒪᒋᑦ, ᒎᑎᓐᖑᐊᓄᑦ ᑐᒃᓯᐊᕐᕕᖃᕐᑐᒃᓴᐅᖏᓐᓂᖏᓐᓂᒃ. 13ᐊᑕᓂᐅᑉ ᐅᖃᕐᑎᓂ ᑎᓕᕙᓚᐅᕋᓗᐊᕐᐰ ᐃᖅᑬᑎᑦᓯᔭᕐᑐᕐᑎᓪᓗᓂᒋᑦ ᐃᓴᕆᐊᓕᒥᐅᓂᒃ ᔫᑕᒥᐅᓂᒡᓗ, ᐅᖃᕐᓗᓂ, ᐃᓕᖅᑯᓯᕆᔭᓯ ᓈᒻᒪᖏᑦᑐᑦ ᕿᒪᒡᓗᒋᑦ ᐱᖁᔭᒃᑲ ᒪᓕᒐᒃᓴᕆᕙᓯ ᓯᕗᓕᕕᓂᑦᓯᓐᓄᑦ ᑐᓂᔭᐅᑎᓚᐅᕐᑕᒃᑲ ᒪᓕᒃᑕᐅᖁᓪᓗᒋᑦ ᐃᓕᑦᓯᓐᓄᑦᑕᐅᖅ ᐅᖃᐅᓯᕆᔭᐅᑎᓯᒪᔭᒃᑲ ᒪᓕᒃᑕᐅᖁᓪᓗᒋᑦ ᐱᔨᒋᔭᒃᑲ ᐅᖃᕐᑎᖁᑎᒃᑲᓗ ᐊᖅᑯᑎᒋᓪᓗᒋᑦ. 14ᓈᓚᒍᒪᓚᐅᓐᖏᓚᓪᓕ, ᓯᕗᓕᕕᓂᖏᑕ ᓯᑎᔫᓂᕆᓚᐅᕐᑕᖏᑎᑐᑦ ᑍᒤᓐᓇᒥᒃ, ᐅᒃᐱᕈᓱᓚᐅᓐᖏᓚᑦ ᐊᑕᓂᕐᒥᒃ ᒎᑎᒥᖕᓂᒃ. 15ᒪᓕᒃᑕᐅᖁᔭᖏᓐᓂᒃ ᒪᓕᒍᒪᓚᐅᓐᖏᓚᑦ ᓯᕗᓕᕕᓂᖏᑕ ᒎᑎᒥᒃ ᐊᖏᖃᑎᒌᒍᑎᓕᐅᕐᓯᒪᓂᖏᓐᓂᒃ ᑲᔪᓯᑎᑦᓯᓚᐅᓐᖏᓚᑦ, ᐃᓂᕐᑎᕆᑦᔪᑎᖏᓪᓗ ᓈᓚᓚᐅᓐᖏᓔᑦ. ᑐᒃᓯᐊᕐᕕᖃᖔᓕᕐᓗᑎᒃ ᒎᑎᓐᖑᐊᓂᒃ ᓱᓕᖏᑦᑐᓂᒃ ᓇᖕᒥᓂᖅ ᓱᓕᔪᓐᓃᕐᑎᓚᐅᕐᐳᑦ, ᐃᓅᖃᑎᒌᒡᔪᐊᓂᒃ ᐊᑕᓂᕐᒥᒃ ᐅᒃᐱᕆᔭᖃᖏᑦᑐᓂᒃ ᒪᓕᖃᑕᐅᑐᐃᓐᓇᓕᕐᓗᑎᒃ, ᐊᑕᓂᐅᑉ ᒪᓕᒃᑕᐅᖁᓚᐅᓐᖏᑕᖏᓐᓂᒃ. 16#ᐊᑕᓃᑦ ᓯᕗᓪᓖᑦ 12:28.ᐊᑕᓂᐅᑉ ᒎᑎᖓᑦᑕ ᐱᖁᔭᖏᓐᓂᒃ ᒪᓕᒍᓐᓁᓚᐅᕐᐳᑦ, ᓴᓇᓚᐅᕐᐳᑦ ᒪᕐᕉᖕᓂᒃ ᑐᒃᑐᕙᓐᖑᐊᖕᓂᒃ ᑐᒃᓯᐊᕐᕕᒋᔭᒃᓴᒥᖕᓂᒃ, ᓴᓇᓚᐅᕆᕗᑦ ᐊᕐᓇᐅᑉ ᒎᑎᓐᖑᐊᑉ ᐊᓯᕋᐅᑉ ᐊᑦᔨᖓᓂᒃ ᓴᓇᓐᖑᐊᕐᓯᒪᔪᒥᒃ, ᐅᓪᓗᕆᐊᓄᓪᓗ ᑐᒃᓯᐊᕐᐸᒃᑭᓪᓗᑎᒃ ᒪᓕᒐᖃᕐᓗᑎᒡᓗ ᒎᑎᓐᖑᐊᒥᒃ ᐰᓕᒥᒃ. 17#ᒨᓯᓯ ᑕᓪᓕᒪᖏᑦ 18:10.ᐃᑯᐊᓚᑎᓪᓗᒍ ᑐᓂᕐᕈᓯᕐᕕᖕᓂ ᑐᓂᕐᕈᓯᖃᑦᑕᓚᐅᕐᐳᑦ ᐃᕐᓂᕐᒥᖕᓂᒃ ᐸᓂᖕᒥᖕᓂᒡᓗ, ᐊᖓᒃᑯᓂᒡᓗ ᑕᑎᖃᖃᑦᑕᕐᓗᑎᒃ ᐃᒻᒥᖕᓂᒃ ᑐᓂᓯᒪᓂᖃᓚᐅᕐᐳᑦ ᐱᐅᖏᑦᑐᓂᒃ ᐱᓂᐊᕐᓂᐅᔪᓄᑦ ᐊᑕᓂᐅᑉ ᓵᖓᓂ ᓂᓐᖓᒍᑎᒋᔪᓐᓇᕐᑕᖏᓐᓂᒃ. 18ᐊᑕᓂᐅᑉ ᐃᓴᕆᐊᓕᒥᐅᑦ ᓂᓐᖓᒡᕕᒋᓚᐅᕐᐰᑦ ᓇᔪᕈᒪᔪᓐᓃᕐᓗᓂᒋᓪᓗ, ᔫᑕᐅᑉ ᑭᖑᕚᖏᑦ ᐃᓚᓕᐅᕐᓯᒪᔭᑐᐊᕆᓕᕐᓗᓂᒋᑦ. 19ᔫᑕᒥᐅᑦᑕᐅᖅ ᒪᓕᑦᓯᐊᕐᓗᑎᒃ ᐃᓅᓚᐅᓐᖏᓚ ᐊᑕᓂᐅᑉ ᒎᑎᖓᑦᑕ ᒪᓕᒃᑕᐅᖁᔭᖏᓐᓂᒃ, ᒪᓕᖃᑕᐅᓯᑐᐃᓐᓇᕐᓂᑰᖕᒥᒐᒥᒃ ᐃᓴᕆᐊᓕᒥᐅᑦ ᐃᓕᖅᑯᓯᕐᑖᕆᓯᒪᔭᖏᓐᓂᒃ. 20ᐊᑕᓂᐅᑉ ᐃᓴᕆᐊᓕᐅᑉ ᑭᖑᕚᓕᒫᖏᑦ ᖁᔭᓈᓚᐅᕐᐰᑦ, ᐅᖁᒤᒃᓴᕐᓇᕐᑐᓂᒃ ᐊᑑᑎᑎᓚᐅᕐᐰᑦ ᐊᑭᕋᕐᑐᕐᑎᖏᓐᓄᑦ ᓇᒡᓕᓂᖃᖏᑦᑐᓄᑦ ᐱᓇᓱᐊᕐᕕᐅᑎᓪᓗᓂᒋᑦ ᐃᓚᒋᔪᒪᔪᓐᓃᓚᐅᕐᐰᑦ. 21ᐊᑕᓂᐅᑉ ᐊᕕᑎᓯᒪᓕᕐᒪᒋᑦ ᐃᓴᕆᐊᓕᒥᐅᑉ ᔫᑕᒥᐅᓪᓗ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᕐᑖᕐᐳᑦ ᔨᕆᐳᐊᒻᒥᒃ ᓂᐹᑎᐅᑉ ᐃᕐᓂᖓᓂᒃ, ᔨᕈᐳᐊᒻ ᐃᓴᕆᐊᓕᒥᐅᑉ ᐊᑕᓂᕐᒥᒃ ᕿᒤᑎᒋᐊᓪᓚᑐᐃᓐᓇᓚᐅᕐᐰᑦ ᐊᔪᕐᑐᓕᓂᕐᒥ ᐃᓅᓯᖃᕐᑎᓪᓗᓂᒋᑦ. 22ᐃᓴᕆᐊᓕᒥᐅᑉ ᔨᕈᐳᐊᒻ ᐊᔪᕐᑐᓕᑦᔪᑎᖏᓐᓂᒃ ᒪᓕᑐᐃᓐᓇᓚᐅᕐᐳᑦ, ᖃᕿᐊᓕᕈᒪᓇᑎᒡᓗ. 23ᐊᑕᓂᐅᑉ ᓇᔪᕈᒪᔪᓐᓃᓚᐅᕐᐰᑦ, ᐅᖃᕐᑎᒥᒍᑦ ᖃᐅᔨᑎᒋᐊᕐᓗᓂᒋᑦ ᐅᖃᐅᑎᕙᓚᐅᕋᓗᐊᕐᓗᓂᒋᑦ. ᐃᓴᕆᐊᓕᒥᐅᑦ ᓄᓇᒥᖕᓂᑦ ᐊᐅᓪᓚᕈᑦᔭᐅᓚᐅᕐᐳᑦ ᐊᓯᕆᐊᒧᐊᕐᑎᑕᐅᓪᓗᑎᒃ ᑕᕝᕙᓂᓗ ᓄᓇᖃᓕᕐᓗᑎᒃ ᐅᓪᓗᒥᒧᑦ.
ᐊᓯᕆᐊᒥᐅᑦ ᓄᓇᑖᕐᓂᖓᑦ ᐃᓴᕆᐊᓕᒥ
24ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᓄᓇᖁᑎᒥᓂᑦ ᐹᐱᓘᓂᒥᐅᑦ, ᑰᓴᕼᐊᒥᐅᑦ, ᐊᕙᒥᐅᑦ, ᕼᐊᒫᑎᒥᐅᑦ, ᓯᑉᕼᐊᕋᕔᓐᒥᐅᓪᓗ ᓄᓇᑖᕐᑎᑉᐰᑦ ᓴᒥᐊᕆᐊᒥ ᐃᓴᕆᐊᓕᒥᐅᑦ ᐊᐅᓪᓚᕈᑎᓚᐅᕐᑕᓂ ᑖᒃᑯᓄᖓ ᐃᓇᖏᕐᑕᐅᑎᓪᓗᓂᒋᑦ ᓄᓇᖁᑎᑖᕐᑐᕐᑎᑉᐰᑦ ᓄᓇᒋᓂᐊᓕᕐᓗᒋᑦ. 25ᓄᓇᑖᕐᐸᓪᓕᐊᓕᕐᑎᓪᓗᒋᑦ, ᐊᑕᓂᕐᒥᒃ ᐅᐱᒋᔭᖃᖏᒻᒪᑕ, ᒎᑎᐅᑉ ᐃᓚᖏᑦ ᐅᒋᐊᕐᑕᐅᑎᑉᐰᑦ ᓛᔭᓄᑦ ᐃᓔᓐᓇᕋᓗᐊᖏᑦ ᑐᖁᑕᐅᓚᐅᕐᐳᑦ. 26ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᐅᑎᔭᐅᕗᖅ, “ᐃᓅᖃᑎᒌᒡᔪᐊᑦ ᓴᒥᐊᕆᐊᒧᑦ ᓄᓇᑖᕐᑎᓚᐅᕐᑕᑎᑦ ᓄᓇᐅᑉ ᑕᐅᕙᑦᓱᒪ ᒎᑎᖓᑦᑕ ᐱᖁᔭᖏᓐᓂᒃ ᖃᐅᔨᒪᖏᒻᒪᑕ ᒎᑎᐅᑉ ᓛᔭᓄᑦ ᐹᔭᕐᑕᐅᑎᓪᓗᒋᑦ ᐃᓚᖏᑦ ᑐᖁᕋᕐᑕᐅᓯᒪᓕᕐᐳᑦ.” 27ᑕᕝᕙ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ, ᑐᓂᕐᕈᓯᕐᑎᑦᓯᔩᑦ ᐃᓚᖓᓐᓂᒃ ᑕᐅᕗᖓ ᐊᐅᓪᓛᖁᔨᓕᕐᐳᖅ ᑎᒍᔭᐅᖃᑕᐅᓚᐅᕐᑐᑦ ᐃᓚᖏᓐᓂᑦ, ᐊᔪᕆᕐᑐᐃᖁᓪᓗᒍ ᐃᓄᖕᓂᒃ ᓄᓇᒋᓕᕐᑕᖓᑦᑕ ᒎᑎᖓᑕ ᐱᖁᔭᖏᓐᓂᒃ. 28ᐃᓴᕆᐊᓕᒥᐅᑦ ᑐᓂᕐᕈᓯᕐᑎᑦᓯᔨᖓᑦᑕ ᐃᓚᖓᑦ ᐊᐅᓪᓚᕈᑦᔭᐅᖃᑕᐅᓂᑯ ᓴᒥᐊᕆᐊᒥᑦ ᐱᑎᓕᒥ ᓄᓇᑖᕐᑎᑕᐅᕗᖅ, ᐃᓄᖕᓂᒡᓗ ᐊᔪᕆᕐᑐᐃᓕᕐᓗᓂ ᖃᓄᖅ ᐊᑕᓂᕐᒥᒃ ᐅᐱᒋᔭᖃᕆᐊᖃᕐᓂᖏᓐᓂᒃ. 29ᐃᓅᖃᑎᒌᒡᔪᐊᑦ ᓴᒥᐊᕆᐊᒧᑦ ᓄᓇᑖᕐᑐᕕᓃᑦ ᓇᖕᒥᓂᖅ ᒎᑎᓐᖑᐊᕆᔭᒥᖕᓂᒃ ᓴᓇᖃᑦᑕᑐᐃᓐᓇᓚᐅᕐᐳᑦ, ᐃᓂᖃᕐᑎᓪᓗᒋᓪᓗ ᓴᒥᐊᕆᐊᒥᐅᑦ ᒎᑎᓐᖑᐊᓄᑦ ᑐᒃᓯᐊᕐᕕᒋᖃᑦᑕᕐᑕᕕᓂᖏᓐᓂ, ᐃᓅᖃᑎᒌᒡᔪᐊᓕᒫᓪᓗ ᓄᓇᒋᔭᒥᖕᓂ ᒎᑎᓐᖑᐊᖃᕐᕕᖕᒥᖕᓂᒃ ᐊᖅᑭᒃᓯᓯᒪᔪᐃᓐᓇᐅᓚᐅᕐᐳᑦ. 30ᐹᐱᓘᓂᒥᐅᑦ ᒎᑎᓐᖑᐊᖃᓚᐅᕐᐳᑦ ᑍᔭᒥᖕᓂᒃ ᓴᑰᑎ-ᐱᓈᔅ; ᑰᓵᒥᐅᑦ ᒎᑎᓐᖑᐊᖃᓚᐅᕐᐳᑦ ᐊᑎᖃᕐᑎᑕᒥᖕᓂᒃ ᓂᕐᒐᐅᓪᒥᒃ, ᕼᐊᒫᑎᒥᐅᑦ ᒎᑎᓐᖑᐊᖃᓚᐅᕐᐳᑦ ᐊᑎᖃᕐᑎᑕᒥᖕᓂᒃ ᐊᓰᒪᒥᒃ. 31ᐊᐅᐃᒥᐅᑉ ᒎᑎᓐᖑᐊᖃᓚᐅᕐᐳᑦ ᑍᔭᒥᖕᓂᒃ ᓂᑉᕼᐋᑦᔨᒥᒃ ᑖᕐᑖᒡᒥᒡᓗ; ᓯᑉᕼᐊᕋᕔᑎᒥᐅᑉ ᕿᑐᕐᖓᒥᖕᓂᒃ ᑐᓂᕐᕈᓯᖃᑦᑕᓚᐅᕐᐳᑦ ᐃᑯᐊᓪᓚᑎᓪᓗᒍ ᑐᓂᕐᕈᓯᕐᕕᖕᓂ ᒎᑎᓐᖑᐊᒥᖕᓄᑦ ᐋᑕᕆᒥᓚᒃ-ᒧᑦ ᐋᓇᒥᓕᒃᒧᓪᓗ. 32ᑖᒃᑯᐊ ᑐᒃᓯᐊᕐᐸᒃᑲᓗᐊᕐᓗᑎᒃ ᐊᑕᓂᕐᒧᑦ, ᓂᕈᐊᕐᓯᓯᒪᖃᑦᑕᓚᐅᕐᐳᑦ ᑐᓂᕐᕈᓯᕐᑎᑦᓯᔨᐅᖁᔭᒥᖕᓂᒃ ᐃᓄᑐᐃᓐᓇᕐᓂᑦ ᐱᓯᒪᔪᓂᒃ ᒎᑎᓐᖑᐊᓄᑦ ᑐᒃᓯᐊᕐᕕᐅᕙᒃᑐᓂ ᑐᓂᕐᕈᓯᕐᑎᑦᓯᔨᐅᓂᐊᕐᑐᓂᒃ ᑐᒃᓯᐊᓕᕌᖓᑕ. 33ᐊᑕᓂᕐᒧᑦ ᑐᒃᓯᐊᖃᑦᑕᕋᓗᐊᕐᓗᑎᒃ ᒎᑎᓐᖑᐊᕆᔭᒥᖕᓄᓪᓕ ᑐᒃᓯᐊᖃᑦᑍᓐᓇᓚᐅᕐᐳᑦ, ᐃᓅᖃᑎᒌᒡᔪᐊᑦ ᓄᓇᑐᖃᓖᑦ ᐱᐅᓯᑐᖃᖏᑦ ᒪᓕᒡᓗᒋᑦ. 34#ᒨᓯᓯ ᓯᕗᓪᓖᑦ 32:28; 35:10.ᑍᒫᒡᓗ ᐅᓪᓗᒥ ᑎᑭᓪᓗᒍ ᐱᐅᓯᑐᖃᕐᒥᖕᓂᒃ ᒪᓖᓐᓇᓚᐅᕐᐳᑦ. ᐊᑕᓂᕐᒥᒃ ᑐᒃᓯᐊᕐᕕᖃᕈᒪᓚᐅᓐᖏᓚᑦ ᐱᖁᔭᖏᓐᓂᒡᓗ ᒪᓕᒍᒪᓇᑎᒃ ᔧᑰᑉ ᑭᖑᕚᖏᓐᓄᑦ ᒪᓕᒃᑕᐅᖁᓚᐅᕐᑕᖏᓐᓂᒃ, ᑍᓕᓚᐅᕐᑕᖓᓂᒃ ᐃᓴᕆᐊᓕᒥᒃ. 35#ᒨᓯᓯ ᐂᑉᐸᖏᑦ 20:5; ᒨᓯᓯ ᑕᓪᓕᒪᖏᑦ 5:9.ᐊᑕᓂᐅᑉ ᐊᖏᖃᑎᒌᖕᓂᕐᒥᒃ ᐋᖅᑭᒃᓯᖃᑎᒋᓚᐅᕐᒪᒋᑦ ᐅᖃᐅᑎᓪᓗᓂᒋᓪᓗ: “ᒎᑎᒥᒃ ᐊᓯᓐᓂᒃ ᑐᒃᓯᐊᕐᕕᖃᕐᑐᒃᓴᐅᓐᖏᓚᓯ, ᐹᒻᒪᒃᑎᕐᕕᒋᓗᒋᑦ ᐱᔨᑦᓯᕐᑕᒃᓴᕆᓐᖏᓚᓯ ᑐᓂᕐᕈᓯᕐᕕᒋᓇᒋᓪᓘᓐᓃᑦ. 36#ᒨᓯᓯ ᑕᓪᓕᒪᖏᑦ 6:13.ᐊᑕᓂᖅ ᓯᕘᕋᒋᓯᐅᒃ, ᑖᑦᓱᒪ ᐊᐅᓪᓚᕐᑎᓚᐅᕐᒪᓯ ᐄᑦᔨᑉᑎᒥᑦ ᐱᔪᓐᓇᕐᓂᕐᔪᐊᒥᓄᑦ ᑕᓕᕐᒥᓄᓪᓗ ᐃᓵᖓᔫᖕᓄᑦ, ᑖᓐᓇ ᓯᕘᕋᒋᓯᐅᒃ, ᐹᒻᒪᒃᑎᕐᕕᒋᓯᐅᒃ ᑐᒃᓯᐊᕐᕕᒋᓗᒍᓗ, ᑖᑦᓱᒧᖓᓗ ᑐᓂᕐᕈᓯᕐᓗᓯ. 37ᒪᓕᑦᓯᐊᕋᓱᐊᕐᑐᒃᓴᐅᕗᓯ ᐱᐅᓯᐅᖁᔭᓐᓂᒃ, ᐱᓂᐊᕐᑕᐅᖁᔭᓐᓂᒡᓗ, ᐱᖁᔭᓕᐊᕆᓯᒪᔭᓐᓂᒡᓗ, ᒪᓕᒐᒃᓴᓕᐊᕆᓯᒪᔭᓐᓂᒡᓗ ᑎᑎᕋᕐᑕᐅᑎᓯᒪᔭᓐᓂᒃ, ᐊᓯᓐᓂᒃ ᒎᑎᖃᕋᓱᐊᕐᑐᒃᓴᐅᓐᖏᓚᓯ. 38ᐊᖏᖃᑎᒌᒍᑎᓕᐊᕆᓚᐅᕐᑕᕗᑦ ᐳᐃᒍᒐᒃᓴᕆᓐᖏᓚᓯ ᒎᑎᒋᔭᐅᔪᓂᒃ ᐊᓯᓐᓂᒃ ᐅᐱᒋᓗᒋᑦ ᑐᒃᓯᐊᕐᕕᖃᕐᑐᒃᓴᐅᓐᖏᓚᓯ. 39ᐃᒫᖔᕐᓕ ᐊᑕᓂᖅ ᒎᑎᓯ ᓯᕘᕋᒋᓗᒍ ᑐᒃᓯᐊᕐᕕᒋᔭᒃᓴᕆᕙᓯ, ᑖᑦᓱᒪ ᑕᕝᕙ ᐊᑭᕋᕐᑐᕐᑎᓕᒫᑦᓯᓐᓂᑦ ᐱᐅᓕᓂᐊᕐᐹᓯ.” 40ᑭᓯᐊᓂᓕ ᓈᓚᒍᒪᓚᐅᓐᖏᓚᑦ, ᑲᔪᓯᑐᐃᓐᓇᕐᓗᑎᒡᓗ ᐱᐅᓯᕆᔭᑐᖃᕐᒥᖕᓂᒃ.
41ᑍᒤᒻᒪᑦ ᑖᒃᑯᐊ ᐃᓅᖃᑎᒌᒡᔪᐊᑦ ᐊᑕᓂᖅ ᓯᕘᕋᒋᓚᐅᕋᓗᐊᕐᐹᑦ, ᒎᑎᓐᖑᐊᒥᖕᓄᓪᓗ ᑐᒃᓯᐊᖃᑦᑕᓚᐅᕆᕗᑦ; ᑍᒫᒃᑕᐅᖅ ᐅᓪᓗᒥᒧᑦ ᑎᑭᓪᓗᒍ ᑭᖑᕚᖏᑦ, ᑭᖑᕚᖏᑕᓗ ᑭᖑᕚᖏᑦ ᑕᒪᑐᒥᖓ ᑲᔪᓯᒪᕕᖃᕐᐳᑦᑕᐅᖅ.
Currently Selected:
ᐊᑕᓃᑦ ᐂᑉᐸᖏᑦ 17: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
