ᑯᕆᓐᑎᐊᒥᐅᓄᑦ ᐂᑉᐸᖏᑦ 5

1ᖃᐅᔨᒪᒐᑦᑕ ᓄᓇᒥ ᑐᐱᕗᑦ ᓇᔪᕐᑕᕗᑦ ᐊᓯᕈᕐᐸᑦ, ᐃᒡᓗᒃᓴᖃᕋᑦᑕ ᒎᑎᒥᑦ ᐱᔪᒥᒃ, ᐊᒡᒐᓄᑦ ᓴᓇᔭᐅᓯᒪᖏᑦᑐᒥᒃ, ᕿᓚᖕᒥ ᐃᒡᓗᒋᔪᒫᕐᑕᑦᑎᓐᓂᒃ ᐃᓱᖃᖏᑦᑐᒧᑦ. 2ᒫᓂ ᐃᓛᒃ ᐊᓂᕐᓴᐅᒥᕗᒍᑦ, ᐊᑯᓂᒍᓱᒃᓗᑕ ᐊᑎᔭᒃᓴᑦᑎᓐᓂᒃ ᕿᓚᖕᒥ ᐃᓂᒃᓴᑦᑎᓐᓂᒃ; 3ᑕᕝᕙ ᐊᑎᒍᑦᑎᒍ ᑕᑯᔭᐅᓂᐊᓐᖏᓚᒍᑦ ᐊᓐᓄᕌᖃᓐᖏᑎᓪᓗᑕ. 4ᑐᐱᕐᒥ ᑕᒫᓃᑎᓪᓗᑕ ᓇᔪᕐᑕᑦᑎᓐᓂ, ᐊᓂᕐᓴᐅᒥᕙᒃᐳᒍᑦ ᐃᓱᒪᔮᕐᓗᑕ; ᑎᒥᑦᑎᓐᓂᒃ ᕿᒤᔪᒪᓂᕐᒧᑦ ᐱᓇᑕ, ᕿᓚᖕᒥᐅᑕᕐᒥᒡᓕ ᐊᑎᑎᑕᐅᔪᒪᓂᕐᒧᑦ, ᑐᖁᔪᒃᓴᖅ ᐄᔭᐅᖁᓪᓗᒍ ᐃᓅᓯᕐᒧᑦ. 5ᐅᕙᑦᑎᓐᓂᒡᓕ ᐅᐸᓗᖕᒊᔧᓯᒪᔪᖅ ᑕᒪᑐᒥᖓ ᑕᕝᕙ ᒎᑎ, ᑖᑦᓱᒪ ᐊᓂᕐᓂᕐᒥᒃ ᑐᓂᓯᕕᒋᓯᒪᕚᑎᒍᑦ ᓇᓗᓁᒃᑯᑕᒃᓴᑦᑎᓐᓂᒃ ᖁᓚᕐᓁᕈᑎᒃᓴᒥᒃ.

6ᑕᕝᕙ ᑍᒪᓐᖓᑦ ᓴᐱᓕᓐᖏᓚᒍᑦ; ᖃᐅᔨᒪᒐᑦᑕ ᑎᒥᑦᑎᓐᓃᑎᓪᓗᑕ ᐊᑕᓂᐅᑉ ᐊᖏᕐᕋᖓᓂᑦ ᐊᕝᕗᑎᓯᒪᒐᑦᑕ. 7ᐅᒃᐱᕐᓂᑯᑦ ᐃᓅᕗᒍᑦ, ᑕᐅᑐᒃᑕᕗᑦ ᐅᒃᐱᕈᑎᒋᓇᒋᑦ. 8ᓴᐱᓐᖏᓚᒍᑦ, ᑎᒥᕗᑦ ᕿᒪᖔᕐᓗᒍ ᐊᖏᕐᕋᕈᒪᓪᓗᑕ ᐊᑕᓂᕐᒧᑦ. 9ᑍᒤᒻᒪᑦ ᐊᖏᕐᕋᕐᓯᒪᒍᑦᑕ ᐊᖏᕐᕋᕐᓯᒪᖏᒃᑯᑦᑕᓘᓐᓃᑦ, ᐊᑕᓂᐅᑉ ᖁᕕᐊᒋᔭᖓᓂᒃ ᐃᓅᓇᓱᐊᕐᐳᒍᑦ. 10#ᕉᒪᒥᐅᓄᑦ 14:10.ᑕᒪᑦᑕ ᓴᖅᑭᑦᑕᕆᐊᖃᕈᒫᕋᑦᑕ ᙭ᔅᑑᓯᐅᑉ ᐃᖅᑲᕐᑐᐃᕕᖓᑕ ᓵᖓᓂ, ᑕᒪᕐᒥᒃ ᐊᑐᓂᑦ ᐱᓂᐊᕐᕕᐅᖁᓪᓗᒋᑦ ᑎᒥᒦᓪᓗᑎᒃ ᐊᑐᓚᐅᕐᑕᖏᑦ ᒪᓕᒡᓗᒋᑦ, ᐱᐅᔪᒥᒃ ᐱᐅᖏᑦᑐᒥᒡᓘᓐᓃᑦ.

ᒎᑎᒧᑦ ᐃᓚᓐᓇᕆᔭᐅᓂᖅ ᙭ᔅᑑᓯᒃᑯᑦ

11ᑍᒤᒻᒪᑦ ᐊᑕᓂᕐᒥᒃ ᓯᕘᕋᒋᔭᖃᕐᓂᕐᒥᒃ ᖃᐅᔨᒪᒐᑦᑕ, ᐃᓄᐃᑦ ᐃᓇᓐᓇᓱᐊᕐᐸᕗᑦ; ᒎᑎᐅᓪᓕ ᖃᐅᔨᒪᕚᑎᒍᑦ, ᐃᓕᑦᓯᓐᓄᓪᓕᑦᑕᐅᖅ ᖃᐅᔨᔭᐅᓂᐊᕐᑐᒃᓴᐅᒐᓗᐊᕐᐳᒍᑦ. 12ᐅᕙᑦᑎᓐᓂᒃ ᐱᐅᓯᑎᓐᓇᓱᓐᖏᓚᒍᑦ ᐃᓕᑦᓯᓐᓄᑦ ᐱᕕᒃᓴᖃᕐᑎᑦᓯᓇᓱᐊᕐᐳᒍᓪᓕ ᐅᕙᑦᑎᓐᓂᒃ ᐅᐱᒍᓲᑎᖃᖁᓪᓗᓯ, ᑭᒡᒍᓯᒃᓴᖃᖁᓪᓗᓯ ᑍᒃᑯᓄᖓ ᑕᑯᒃᓴᐅᔪᓂᒃ ᐱᐅᔪᕆᑦᔪᑎᖃᕐᑐᓄᑦ, ᐃᓅᑉ ᐃᓅᓯᖓᓂᒃ ᐃᓱᒪᖏᑦᑐᓄᑦ. 13ᐃᓱᒤᕈᑎᔫᔮᕈᑦᑕ, ᒎᑎ ᐱᑦᔪᑎᒋᓪᓗᒍ ᑍᒤᑉᐳᒍᑦ; ᐃᓱᒪᖃᑦᓯᐊᕈᑦᑕ, ᐃᓕᑦᓯ ᐱᓪᓗᓯ ᑍᒤᑉᐳᒍᑦ. 14᙭ᔅᑑᓯᐅᑉ ᓇᒡᓕᖕᓂᖓᑕ ᐊᐅᓚᒻᒪᑎᒍᑦ, ᐅᒃᐱᕈᓱᒃᑲᑦᑕ ᐃᒫᒃ ᐊᑕᐅᓯᖅ ᑐᖁᓚᐅᕐᒪ ᐃᓄᓕᒫᑦ ᐱᓪᓗᒋᑦ; ᑍᒤᒻᒪᑦ ᐃᓄᓕᒫᑦ ᑖᑦᓱᒧᖓ ᑐᖁᖃᑕᐅᕗᑦ. 15ᑖᓐᓇ ᑐᖁᓚᐅᕐᐳᖅ ᐃᓄᓕᒫᑦ ᐱᑦᔪᑎᒋᓪᓗᒋᑦ, ᑖᒃᑯᐊ ᐃᓅᔪᑦ ᐃᒻᒥᓃᓐᓇᖅ ᐃᓱᒪᒋᓗᑎᒃ ᐃᓅᓯᖃᕈᓐᓃᖁᓪᓗᒋᑦ, ᑖᑦᓱᒧᖓᓕ ᐱᑦᔪᑎᒋᓪᓗᒋᑦ ᑐᖁᓚᐅᕐᑐᒧᑦ ᒪᑭᓚᐅᕐᑐᒧᓪᓗ ᐃᓅᖔᓕᖁᓪᓗᒋᑦ.

16ᒫᓐᓇᓕ ᑕᕝᕙ, ᑍᒤᒻᒪᑦ, ᑭᓇᒥᒡᓘᓐᓃᑦ ᐃᓱᒪᒋᔭᖃᕈᓐᓃᕐᐳᒍᑦ ᓯᓚᕐᔪᐊᕐᒥᐅᑦ ᐃᓱᒪᒋᔭᖃᕐᓂᖏᑎᑐᑦ; ᑍᑦᓱᒪᓂᑦᑕᐅᖅ ᙭ᔅᑑᓯ ᓯᓚᕐᔪᐊᕐᒥᐅᑎᑐᑦ ᐃᓱᒪᒋᓚᐅᕋᓗᐊᕋᑦᑎᒍ, ᒫᓐᓇᓕ ᑍᒫᒃ ᐃᓱᒪᒋᓐᖏᓕᕐᐸᕗᑦ. 17ᑍᒤᒻᒪᑦ, ᙭ᔅᑑᓯᒧᐊᕐᑐᖃᕐᐸᑦ, ᑖᓐᓇ ᓄᑖᓐᖑᕐᑎᑕᐅᕗᖅ; ᐃᓅᓯᑐᖃᖓ ᐲᕐᑕᐅᕗᖅ, ᑕᑯᒋᑦ, ᓄᑖᖅ ᐱᒋᐊᓕᕐᐳᖅ. 18ᑕᒪᓐᓇᓕ ᑕᒪᕐᒥᒃ ᒎᑎᒥᑦ ᐱᕗᖅ, ᑖᑦᓱᒪ ᙭ᔅᑑᓯᒃᑯᑦ ᐊᓯᑦᔨᕐᐹᑎᒍᑦ ᐃᒻᒥᓄᑦ ᐃᓚᓐᓇᕆᔭᐅᓕᕐᑎᓪᓗᑕ, ᐱᔭᒃᓴᕐᑖᕐᑎᑉᐹᑎᒍᓪᓗ ᐃᓄᖕᓄᑦ ᑖᒃᑯᐊᑦᑕᐅᖅ ᒎᑎᒧᑦ ᐃᓚᓐᓇᕆᔭᐅᓕᖁᓪᓗᒋᑦ; 19ᑕᕝᕙ, ᒎᑎ ᙭ᔅᑑᓯᒃᑯᑦ ᓯᓚᕐᔪᐊᕐᒥᐅᓂᒃ ᐃᓚᓐᓇᕆᔭᕐᑖᕐᓯᒪᖕᒪᑦ, ᐊᔪᕐᑐᓕᓂᖏᓐᓂᒃ ᐃᓱᒪᒋᔪᓐᓁᕐᕕᒋᓪᓗᒋᑦ, ᐃᓄᖕᓄᓪᓗ ᐅᖃᓪᓚᖁᕚᑎᒍᑦ ᐃᓚᓐᓇᕆᔭᐅᓕᕈᓐᓇᕐᓂᖏᓐᓂᒃ.

20ᑍᒤᒻᒪᑦ ᑎᓕᔭᐅᓯᒪᕗᒍᑦ ᙭ᔅᑑᓯ ᐃᓇᖏᕐᓗᒍ, ᒎᑎ ᐅᕙᑦᑎᒍᑦ ᐃᓄᖕᓂᒃ ᐃᓇᑦᓯᕗᖅ. ᑍᒤᒻᒪᑦ ᐃᓇᑉᐸᑦᓯ ᙭ᔅᑑᓯᒃᑯᑦ, ᒎᑎᒥᒃ ᐃᓚᓐᓇᕆᔭᕐᑖᓕᕆᑦᓯ. 21ᐊᔪᕐᑐᓕᓂᕐᒥᒃ ᖃᐅᔨᓚᐅᕐᓯᒪᖏᑦᑐᖅ ᒎᑎᐅᑉ ᐊᔪᕐᑐᓕᔪᓐᖑᕐᑎᓚᐅᕐᐹ ᐱᑦᔪᑎᒋᓪᓗᑕ, ᐅᕙᒍᑦ ᑖᑦᓱᒨᓇ ᒎᑎᒧᑦ ᐃᓗᐊᕐᑐᓐᖑᕐᑎᑕᐅᖁᓪᓗᑕ.

Currently Selected:

ᑯᕆᓐᑎᐊᒥᐅᓄᑦ ᐂᑉᐸᖏᑦ 5: EAIB

Highlight

Compare

Copy