ᓴᒧᐃᓕ ᓯᕗᓪᓖᑦ 27
27
ᑍᕕᑎᐅᑉ ᐱᓕᔅᑏᓂᒦᓐᓂᖓ
1ᑍᕕᑎᓗ ᐆᒻᒪᑎᒥᒍᑦ ᐃᓱᒪᓕᕐᐳᖅ, “ᐅᓪᓗᐃᑦ ᐃᓚᖓᓐᓂ ᓴᐅᓕᐅᑉ ᑐᖁᓛᓕᕋᖓ; ᐱᐅᓂᕐᐸᐅᓕᕐᐳᖅ ᐱᓕᔅᑍᓂᒥᐅᓄᑦ ᕿᒪᒃᓯᓗᖓ; ᓴᐅᓕ ᓴᐱᓕᕋᔭᕐᐳᖅ ᕿᓂᕈᓐᓃᕐᓗᓂ ᐃᓴᕆᐊᓕᒥ, ᓯᕘᕋᓇᕐᑐᒦᑦᓱᓐᓃᕋᔭᕐᐳᖓᓗ.” 2ᑍᒤᒻᒪᑦ ᑍᕕᑎᒃᑯᑦ ᐃᓄᖁᑎᖏᓪᓗ 600ᐃᑦ ᐂᓚᐅᕐᐳᑦ ᐊᑭᔅᒧᑦ ᒪᐅᑭᐅᑉ ᐃᕐᓂᖓᓄᑦ, ᐊᖓᔪᖅᑳᕐᔪᐊᖑᔪᒧᑦ ᒑᑎᒥ. 3ᑍᕕᑎᒃᑯᑦ ᐃᓚᖏᓪᓗ ᓄᓇᑖᓚᐅᕐᐳᑦ ᐊᑭᔅᑯᑦ ᓄᓇᖓᓂ ᒑᑎᒥ, ᐃᓚᓕᒫᑎᒡᓗ ᐃᓚᒋᓪᓗᒋᑦ, ᑍᕕᑎᐅᓪᓗ ᓄᓕᐊᖕᓂ ᒪᕐᕉᒃ ᐱᖃᑎᒋᓚᐅᕐᐹᒃ, ᐊᕼᐃᓄᐊᒻ ᔨᔭᕆᐅᓪᒥᐅᑕᖅ, ᐊᐱᒊᓕᓗ ᓁᐳᓪ ᓄᓕᐊᕕᓂᖓ ᑳᕐᒥᐅᓪᒥᐅᑕᖅ. 4ᓴᐅᓕᓗ ᐅᖃᐅᑦᔭᐅᒐᒥ ᑍᕕᑎᐅᑉ ᕿᒪᓂᖓᓂ ᒑᑎᒧᑦ, ᕿᓂᕈᓐᓃᓚᐅᕐᐳᖅ ᑖᑦᓱᒥᖓ.
5ᑕᕝᕙ ᑍᕕᑎ ᐅᖃᕐᐳᖅ ᐊᑭᔅᒧᑦ, “ᖁᕕᐊᒋᒍᕕᖓ, ᓄᓇᓕᖕᒥᒃ ᒥᑭᔪᒥᒃ ᑐᓂᓯᕕᒋᓚᐅᓐᖓ ᐊᖏᕐᕋᕆᓂᐊᕐᑕᓐᓂᒃ, ᐊᑲᐅᒐᔭᕐᐳᖅ ᐃᒡᓗᒐᓴᖕᓂ ᑕᕝᕙᓂᑦᓮᓇᖅ ᓄᓇᖃᕐᑐᐃᓐᓇᐅᔪᓐᓃᕈᓐᓄᒃ.” 6ᑕᕝᕙᓂ ᐅᓪᓗᒥ ᐊᑭᔅᓯᐅᑉ ᓄᓇᓕᖕᒥᒃ ᑐᓂᓚᐅᕐᐹ ᔨᒃᓛᒡᒥᒃ; ᑍᒤᒻᒪᑦ ᔨᒡᓛᒡ ᑕᕝᕙᓐᖓᑦ ᐱᒋᐊᕐᓗᒍ ᐱᒋᔭᐅᓕᓚᐅᕐᐳᖅ ᔫᑕᐅᑉ ᐊᖓᔪᖅᑳᕐᔪᐊᖏᓐᓄᑦ. 7ᑍᕕᑎᓗ ᓄᓇᖃᓚᐅᕐᐳᖅ ᐱᓕᔅᑍᓂᒥ ᐊᕐᕌᒍᓕᒫᒥᒃ ᑕᖅᑭᓂᒡᓗ ᓯᑕᒪᓂᒃ.
8ᑍᑦᓱᒪᓂᐅᑎᓪᓗᒍ ᑍᕕᑎᒃᑯᑦ ᐃᓚᖏᓪᓗ ᐅᓇᑕᕆᐊᖃᑦᑕᓚᐅᕐᐳᑦ ᒋᓱᕅᒥᐅᓂᒃ, ᒋᕆᔧᒥᐅᓂᒃ, ᐊᒪᓕᑬᑎᒥᐅᓂᒡᓗ; ᐊᑯᓂᐊᓗᒃ ᑕᒫᓂ ᓄᓇᖃᓚᐅᕐᑐᓂᒃ, ᓄᓇᖏᓐᓂᒡᓗ ᐊᕐᓵᓚᐅᕐᐰᑦ, ᓲᕆᒥᐅᑦ ᐱᒋᐊᕐᓗᒋᑦ, ᓄᓇᓖᑦ ᑕᐅᓄᖓ ᐄᑦᔨᑉᑎᒥᐅᓄᑦ ᑎᑭᓪᓗᒋᑦ. 9ᑍᕕᑎᓗ ᑐᖁᕅᖃᑦᑕᓚᐅᕐᐳᖅ ᐊᖑᑎᓂᒃ ᐊᕐᓇᓂᒡᓗ, ᓰᐱᖁᑎᖏᑦ, ᐆᒪᔪᖁᑎᖏᓪᓗ, ᓯᐅᑎᖅᑯᕐᑐᔪᖁᑎᖏᓪᓗ, ᑳᒥᓕᖁᑎᖏᓪᓗ ᑎᒍᖃᑦᑕᓚᐅᕐᐰᑦ, ᐊᓐᓄᕌᖏᓪᓗ, ᐅᑎᖃᑦᑕᕐᓗᓂᓗ ᐊᑭᔅᒧᑦ. 10ᐊᑭᔅᒥᐅᓂᓪᓗ ᐊᐱᕆᔭᐅᒐᒥ, “ᐅᓪᓗᒥ ᓇᑭᑦ ᐊᕐᓵᑎᕆᓚᐅᕐᐲᑦ?” ᑍᕕᑎ ᐅᖃᕐᐸᓚᐅᕐᐳᖅ, “ᔫᑕᐅᑉ ᓯᕿᓂᖓᓂᑦ ᓂᒋᑉᒥᑦ,” ᐅᕝᕙᓗ, “ᔨᕋᒥᐅᓕᒃᑯᑦ ᓄᓇᖓᓂᑦ,” ᐅᕝᕙᓗ, “ᑭᓁᑎᒥᐅᑦ ᓄᓇᖓᓐᓂᑦ.” 11ᑍᕕᑎᐅᓪᓗ ᓄᖑᑦᓯᐊᕐᓗᒋᑦ ᑐᖁᕋᕐᐸᓚᐅᕐᐰᑦ, ᐊᖑᑏᑦ ᐊᕐᓁᓪᓗ, ᐅᑎᕐᑐᖃᖁᓇᒋᑦ ᒑᑎᒧᑦ ᐅᖃᕆᐊᕐᑐᕐᓗᑎᒃ ᑖᒃᑯᐊ ᐱᓂᐊᕐᓂᖏᓐᓂᒃ. ᑍᕕᑎ ᑍᒫᒃ ᐱᓂᐊᕐᓂᕾᓐᓇᓚᐅᕐᐳᖅ ᐱᓕᔅᑍᓂᒦᓐᓂᓕᒫᒥᓂ. 12ᐊᑭᔅᓯᒥᐅᑦ ᑍᕕᑎ ᐅᒃᐱᕆᑦᓯᐊᓚᐅᕐᐹᑦ, ᐃᓱᒪᖃᕐᓗᑎᒃ, “ᐆᒥᒋᔭᐅᓗᐊᕐᒪᑦ ᐃᓄᖁᑎᒥᓄᑦ ᐃᓴᕆᐊᓕᒥᐅᓄᑦ; ᑍᒤᒻᒪᑦ ᐃᓅᓯᓕᒫᒥᓂᒃ ᐅᕙᓐᓂᒃ ᐱᔨᑦᓯᕆᐊᖃᕐᓂᐊᕐᓕᕐᐳᖅ.”
Currently Selected:
ᓴᒧᐃᓕ ᓯᕗᓪᓖᑦ 27: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
