ᓴᒧᐃᓕ ᓯᕗᓪᓖᑦ 26
26
ᑍᕕᑎᐅᑉ ᐱᐅᓕᒃᓯᒋᐊᓪᓚᖕᓂᖓ ᓴᐅᓕᒥᒃ
1 #
ᐃᓐᖏᕈᑦ 54. ᐊᖑᑏᑦ ᐃᓚᖏᑦ ᔨᑉᕼᐂᑎᒥᐅᑦ ᓴᐅᓕᒧᐊᕐᐳᑦ ᒋᐱᐊᒧᑦ, ᐅᖃᐅᑎᓪᓗᒍᓗ, “ᑍᕕᑎ ᐃᔨᕐᓯᒪᓐᖏᓚᖅ ᖃᖅᑲᒥ ᕼᐊᑭᓚᒥ, ᔫᑕᐅᑉ ᐃᓄᖃᔪᐃᑦᑐᖓᑕ ᑭᒡᓕᖓᓂ?” 2ᓴᐅᓕ ᐊᐅᓪᓚᑦᓴᐅᑎᒋᕗᖅ ᐅᓇᑕᕐᑐᒃᓴᓂᒃ 3,000ᓂ ᐃᓚᖃᕐᓗᓂ, ᐱᓯᑎᐅᓂᕐᐹᓂᒃ ᐃᓴᕆᐊᓕᒥᐅᓂᑦ, ᕿᓂᕆᐊᕐᓗᑎᒃ ᑍᕕᑎᒥᒃ ᐃᓄᖃᔪᐃᑦᑐᒧᑦ ᔨᐸᒧᑦ. 3ᑕᖕᒫᓚᐅᕐᐳᓪᓗ ᐊᖅᑯᑎᐅᑉ ᓴᓂᐊᓄᑦ ᖃᖅᑲᒧᑦ ᕼᐊᑭᓚᒧᑦ. ᑍᕕᑎᓕ ᐃᓄᖃᔪᐃᑦᑐᒦᖏᓐᓇᓚᐅᕐᐳᖅ; ᖃᐅᔨᒐᒥᓗ ᓴᐅᓕᒧᑦ ᕿᓂᕆᐊᕐᑕᐅᓂᕐᒥᓂᒃ ᐃᓄᖃᖏᑦᑐᒧᑦ, 4ᑕᕝᕙ ᑍᕕᑎ ᐃᔨᕋᕐᑐᕐᑐᓂᒃ ᑎᓕᓯᕗᖅ, ᖃᐅᔨᓇᓱᐊᕆᐊᕐᑐᖁᓪᓗᒋᑦ ᓴᐅᓕᐅᑉ ᓇᓃᓪᓚᕆᓐᖓᓂᒃ ᖃᐅᔨᔪᒪᓪᓗᓂ. 5ᑍᕕᑎᓗ ᒪᑭᓐᓇᒥ ᓴᐅᓕᐅᑉ ᓇᔪᕐᑕᖓᓄᐊᕐᐳᖅ ᑕᖕᒫᕐᓯᒪᕕᒋᔭᖓᓄᑦ; ᓴᐅᓕᐅᓪᓗ ᓯᓂᒡᕕᒋᔭᖓ ᖃᐅᔨᓚᐅᕐᐹ, ᐋᑉᓄᓪᓗ ᓂᕆᐅᑉ ᐃᕐᓂᖓᑕ, ᓴᐅᓕᐅᑉ ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖓᑕ ᓇᔪᕐᑕᖏᑦ, ᓴᐅᓕᓕ ᓯᓂᓚᐅᕐᐳᖅ ᑕᖕᒫᕐᓯᒪᕕᖓᑦᑕ ᐊᑯᕐᖓᓐᓂ, ᐅᓇᑕᕐᑐᒃᓴᖁᑎᖏᓪᓗ ᓴᐅᓕᐅᑉ ᐊᕙᑖᓃᓚᐅᕐᐳᑦ.
6ᑕᕝᕙ ᑍᕕᑎᐅᑉ ᐊᕼᐃᒥᓕᒃ ᕼᐃᑍᑎᒥᐅᑕᖅ ᐅᖃᐅᑎᕚ, ᐊᐱᓮᓗ ᔪᐊᐱᐅᑉ ᓄᑲᖓ, ᔨᕈᐃᐊᐅᑉ ᐃᕐᓂᖓ, ᐅᖃᕐᓗᓂ, “ᓇᓕᕐᓯᒃ ᒪᓕᖕᓂᐊᕐᐹ ᐅᕙᓐᓂᒃ ᓴᐅᓕᐅᑉ ᑕᖕᒫᕐᓯᒪᕕᖓᓄᑦ?”
ᐊᐱᓮᓗ ᑭᐅᕗᖅ, “ᐅᕙᖓ ᒪᓕᖕᓂᐊᕐᐳᖓ.”
7ᐅᓐᓄᒃᑎᓪᓗᒍ ᑍᕕᑎᒃᑯᒃ ᐊᐱᓮᑯᒃ ᐂᕘᒃ ᓴᐅᓕᐅᑉ ᑕᖕᒫᕐᓯᒪᕕᖓᓄᑦ; ᑕᑯᕘᒡᓗ ᓴᐅᓕᒥᒃ ᓯᓂᒃᑐᒥᒃ ᕿᑎᐊᓂ, ᖃᓗᒋᐊᖓᓗ ᓂᐊᖁᐊᑕ ᓴᓂᐊᓃᓚᐅᕐᐳᖅ ᓇᐸᓪᓗᓂ; ᐋᑉᓄ ᐅᓇᑕᕐᑐᒃᓮᓪᓗ ᐊᕙᑖᓂ ᓯᓂᒃᑎᓪᓗᒋᑦ. 8ᐊᐱᓮ ᐅᖃᕐᐳᖅ ᑍᕕᑎᒧᑦ, “ᒎᑎᐅᑉ ᐊᑭᕅᑦ ᐅᓪᓗᒥ ᑐᓂᕚ ᐃᓕᖕᓄᑦ; ᑍᒤᒻᒪᑦ ᒫᓐᓇ ᑲᐱᓚᐅᕐᓚᒍ ᓇᖕᒥᓂᖅ ᖃᓗᒋᐊᖓᓄᑦ ᐸᐅᒍᐊᕐᓗᒍᓗ ᓄᓇᒧᑦ ᐊᑕᐅᓯᐊᕐᓗᖓ ᐱᒋᐊᒃᑲᓐᓂᕆᐊᖃᑦᔮᖏᓐᓇᒪ.”
9ᑍᕕᑎᓕ ᐊᐱᓮᒧᑦ ᑭᐅᕗᖅ, “ᑐᖁᑦᑍᓕᒍᒃ; ᐊᑕᓂᐅᑉ ᓂᕈᐊᕐᓯᒪᔭᖓᓂᒃ ᑐᖁᑦᓯᔪᖃᕈᓐᓇᕐᐹ, ᐸᓯᔭᒃᓴᐅᓕᖏᓪᓗᓂ?” 10ᑍᕕᑎᓗ ᐅᖃᕆᐊᓪᓚᒃᐳᖅ, “ᐊᑕᓂᖅ ᐆᒪᖕᒪᑦ, ᑲᐅᔨᒪᕗᖓ ᐊᑕᓂᐅᑉ ᓇᖕᒥᓂᖅ ᑐᖁᓛᕐᒪᒍ; ᐅᕝᕙᓗ ᑐᖁᕕᒃᓴᖓ ᓇᓪᓕᐅᑎᒃᐸᑦ; ᐅᕝᕙᓗ ᐅᓇᑕᕐᓂᒃᑯᑦ ᑐᖁᔪᒫᕐᐳᖅ. 11#ᓴᒧᐃᓕ ᓯᕗᓪᓖᑦ 24:6.ᐊᑕᓂᐅᑉ ᑍᒤᑎᑦᑍᓕᓛᖓ ᐊᓯᕈᐃᓂᕐᒥᒃ ᓂᕈᐊᕐᓯᒪᔭᖓᓂᒃ ᐊᖓᔪᖅᑳᕐᔪᐊᖑᖁᓪᓗᒍ; ᖃᓗᒋᐊᖓ ᐃᒥᐅᑎᖓᓗ ᑎᒍᓚᐅᕐᓚᕗᒃ ᓂᐊᖁᐊᑕ ᓴᓂᐊᓃᑦᑐᑦ, ᑕᒫᓃᑦᓱᓐᓃᕐᓗᒃ.” 12ᑍᒤᒻᒪᑦ ᓴᐅᓕᐅᑉ ᖃᓗᒋᐊᖓ ᐃᒥᐅᑎᖓᓗ ᓂᐊᖁᐊᑕ ᓴᓂᐊᓃᑦᑑᒃ ᑍᕕᑎᐅᑉ ᑎᒍᓚᐅᕐᐰᑦ; ᐊᐅᓪᓚᕐᓗᑎᒡᓗ. ᖃᐅᔨᔪᖃᓚᐅᓐᖏᓚᖅ ᑕᑯᔪᖃᓚᐅᕋᓂᓗ, ᑐᐸᒃᑐᖃᓚᐅᓐᖏᓚᕐᓘᓐᓃᑦ; ᓯᓂᒃᑐᐃᓐᓇᐅᓚᐅᕐᒪᑕ, ᐊᑕᓂᐅᑉ ᓯᓂᕕᒃᔪᐊᕐᑎᓚᐅᕐᒪᒋᑦ.
13ᑍᕕᑎᓗ ᓇᕐᓴᐅᑉ ᐊᑭᐊᓄᐊᕐᐳᖅ, ᖃᖅᑲᐅᑉ ᖄᖓᓄᑦ ᖃᕝᕕᕐᓗᓂ ᐅᖓᓯᒋᔮᓄᑦ, ᐊᑯᓐᓂᖓ ᓯᕕᑐᔫᓪᓗᓂ. 14ᑍᕕᑎᓗ ᕾᒐᓛᓕᕐᐳᖅ ᓴᐅᓕᐅᑉ ᐅᓇᑕᕐᑐᒃᓴᖁᑎᖏᓐᓄᑦ ᐋᑉᓄᒧᓪᓗ ᓂᕆᐅᑉ ᐃᕐᓂᖓᓄᑦ, ᐅᖃᕐᓗᓂ, “ᐋᑉᓅ ᑐᓵᕕᖔ?”
ᐋᑉᓄ ᑭᐅᕗᖅ, “ᑭᓈᓗᖏᓐᓈ ᕾᒐᓛᕐᑐᐊᓗᒃ ᐊᖓᔪᖅᑳᕐᔪᐊᕐᒥᒡᓗ ᕿᑦᓯᓵᕆᔪᐊᓗᒃ?”
15ᑍᕕᑎᓗ ᐅᖃᕐᐳᖅ, “ᐋᑉᓄ, ᐱᒃᑲᐅᓂᕐᐸᐅᓐᖏᓚᑏᑦ ᐃᓴᕆᐊᓕᒥᐅᓂᑦ? ᓱᖕᒪᓪᓕ ᓴᐳᓐᓂᐊᓐᖏᓚᑎᑦ ᐊᑕᓂᕐᓂᒃ ᐊᖓᔪᖅᑳᕐᔪᐊᒦᒃ? ᒫᓐᓇᕋᑖᖅ ᑕᖕᒫᕐᓯᒪᕕᒋᔭᓯ ᐃᑎᕐᑕᐅᑬᓐᓇᕐᒪᑦ ᑐᖁᑦᓯᒋᐊᕐᑐᕐᑐᒥᒃ ᐊᖓᔪᖅᑳᕐᔪᐊᕐᓂᒃ. 16ᐱᔭᒃᓴᕐᓂᒃ ᐱᓇᓱᐊᖏᓐᓇᕕᑦ ᐋᑉᓅ. ᓱᓕᑦᓯᐊᕐᐳᖓ ᐃᓘᓐᓇᓯ ᑐᖁᔪᒃᓴᐅᕗᓯ, ᓴᐳᓐᓂᐊᓚᐅᖏᓐᓇᑦᓯ ᐊᖓᔪᖅᑳᑦᓯᓐᓂᒃ, ᐊᑕᓂᐅᑉ ᐊᖓᔪᖅᑳᕐᔪᐊᕈᕐᑎᓯᒪᔭᖓᓂᒃ. ᑕᑯᒋᑦ ᓇᐅᒡᓕ ᐊᖓᔪᖅᑳᕐᔪᐊᑉ ᖃᓗᒋᐊᖓ? ᐃᒪᖃᐅᑎᖓᓕ ᓇᐅᒃ ᓂᐊᖁᐊᑕ ᓴᓂᐊᓃᓚᐅᕐᑐᖅ?”
17ᓴᐅᓕ ᐃᓕᑕᕐᓯᕗᖅ ᑍᕕᑎᐅᑉ ᓂᐱᖓᓂᒃ ᐊᐱᕆᓪᓗᓂᓗ, “ᑍᕕᑏ ᐃᕝᕕᐅᕖᑦ, ᐃᕐᓃᒃ?”
ᑍᕕᑎ ᑭᐅᕗᖅ, “ᓂᐱᒊᓐᓇ, ᐊᖓᔪᖅᑳᒃ, ᐊᖓᔪᖅᑳᕐᔪᐊᕋ.” 18ᐅᖃᕆᐊᓪᓚᒡᓗᓂᓗ, “ᓱᖕᒪᑦ ᐊᖓᔪᖅᑳᒃ, ᐅᕙᓐᓂᒃ ᓱᓕ ᕿᓂᕐᐲᑦ ᐱᔨᖕᓂᒃ? ᖃᓄᐃᓕᐅᕐᓯᒪᒐᒫ? ᓱᓇᒦᒃ ᐸᓯᔭᒃᓴᐅᑦᔪᑎᖃᕋᒫ? 19ᒫᓐᓇ ᑍᒤᒻᒪᑦ ᐊᖓᔪᖅᑳᒃ ᐊᖓᔪᖅᑳᕐᔪᐊᕋ ᓈᓚᓚᐅᕆᑦ ᐅᖃᐅᓯᓐᓂᒃ. ᐊᑕᓂᐅᑉ ᓵᑎᑉᐹᑎᑦ ᐅᕙᓐᓄᑦ, ᑐᓂᕐᕈᓯᕈᕕᑦ ᐃᓱᒪᖓ ᐊᓯᑦᔨᕐᓂᐊᕐᐳᖅ; ᐃᓄᖕᓂᓪᓕ ᑍᒤᑎᑕᐅᒍᕕᑦ, ᐊᑕᓂᐅᑉ ᑍᒃᑯᐊ ᓇᕐᕈᓇᕐᓯᑎᓪᓕᒋᑦ, ᓯᖏᑕᐅᓯᒪᒐᒪ ᐊᑕᓂᐅᑉ ᓄᓇᖁᑖᓂᑦ ᓄᓇᒦᓕᕐᐳᖓ ᒎᑎᓐᖑᐊᓄᑦ ᑭᓯᐊᓂ ᑐᒃᓯᐊᕐᕕᖃᕐᓇᕐᑐᒥ. 20ᑍᒤᒻᒪᑦ, ᑐᖁᑕᐅᑎᑦᑍᓕᓐᖓ ᓄᓇᒃᓴᔭᕆᓐᖏᑕᑦᑎᓐᓂ ᐊᑕᓂᐅᑉ ᓇᔪᕐᑕᖓᑕ ᐅᖓᓯᒋᔭᖓᓂ; ᓱᖕᒪᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᑐᖁᑦᓯᓇᓱᐊᕐᐹ ᐅᕙᓐᓂᒃ, ᑎᖕᒥᐊᕋᓱᒃᑐᑎᑐᑦ ᐊᕿᒡᒋᐊᑦᓯᐊᓂᒃ ᖃᖅᑲᓃᑦᑐᓂᒃ?”
21ᑕᕝᕙ ᓴᐅᓕ ᐅᖃᕐᐳᖅ, “ᐊᔪᕐᑐᓕᓚᐅᕐᐳᖓ; ᐅᑎᓕᕆᑦ, ᐃᕐᓃᒃ ᑍᕕᑏ, ᐋᓐᓂᕋᓱᐊᕐᓂᐊᕈᓐᓃᕐᐸᒋᑦ, ᐃᓅᓯᕋ ᐱᐅᓕᓚᐅᕋᕕᐅᒃ ᐅᓪᓗᒥ; ᑕᑯᒋᑦ, ᓯᓔᑦᑐᐊᓗᖕᒥᒃ ᐱᓇᓱᐊᕐᓯᒪᕗᖓ, ᐱᐅᖏᑦᑐᐊᓗᖕᒥᒡᓗ ᐱᓇᓱᐊᕐᓯᒪᓪᓗᖓ.”
22ᑍᕕᑎᓗ ᑭᐅᕗᖅ ᐅᖃᕐᓗᓂ, “ᐅᕝᕙ ᖃᓗᒋᐊᑦ, ᐊᖓᔪᖅᑳᕐᔪᐊᖅ! ᐃᓄᖁᑎᕕᑦ ᐃᓚᖓᓐᓄᑦ ᐂᔭᐅᓕᕐᓕ. 23ᐊᑕᓂᐅᑉ ᐊᑭᓕᑦᓯᐊᖃᑦᑕᕐᐰᑦ ᓇᓛᒍᑦ ᐱᓇᓱᐊᕐᑐᑦ ᐃᓱᐊᕐᑐᓪᓗ; ᐅᓪᓗᒥ ᐊᑕᓂᐅᑉ ᐅᕙᓐᓄᑦ ᑐᓂᓚᐅᕐᐹᑎᑦ, ᑭᓯᐊᓂᓕ ᐱᒋᐊᓚᐅᓐᖏᓚᒋᑦ ᐊᑕᓂᐅᑉ ᐊᖓᔪᖅᑳᕐᔪᐊᕈᕐᑎᓚᐅᕐᒪᑎᑦ. 24ᑕᑯᒋᑦ, ᑍᒫᒃ ᐅᓪᓗᒥ ᐱᐅᓕᖅᑲᐅᒐᒃᑭᑦ, ᑍᒫᒃᑕᐅᖅ ᐊᑕᓂᐅᑉ ᐱᓂᐊᕐᕕᒋᓕᖓ ᐃᓱᐃᓪᓕᐅᕈᑎᒃᑲᓗ ᐲᕐᑎᓪᓗᓂᒋᑦ.”
25ᑕᕝᕙ ᓴᐅᓕ ᐅᖃᕐᐳᖅ ᑍᕕᑎᒧᑦ, “ᒎᑎᐅᑉ ᓮᒻᒪᕐᑎᓪᓕᑎᑦ, ᐃᕐᓃᒃ ᑍᕕᑏ! ᐱᓇᓱᐊᕐᑕᓕᒫᕐᓂ ᐱᔪᓐᓇᑦᓯᐊᕐᓂᐊᕐᐳᑎᑦ.”
ᑍᒤᒻᒪᑦ ᑍᕕᑎ ᐅᐸᒍᒪᔭᒥᓄᐊᓕᓚᐅᕐᐳᖅ, ᓴᐅᓕᓗ ᐅᑎᓕᕐᓗᓂ ᐊᖏᕐᕋᒥᓄᑦ.
Currently Selected:
ᓴᒧᐃᓕ ᓯᕗᓪᓖᑦ 26: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
