ᓴᒧᐃᓕ ᓯᕗᓪᓖᑦ 18
18
1ᓴᐅᓕ ᐅᖃᖃᑎᒋᔭᕇᕋᒥᐅᒃ, ᑭᖑᓂᖓᒍᑦ, ᔫᓇᑕᓂᐅᑉ ᑕᕐᓂᖓ ᐃᓚᓕᐅᑎᕗᖅ ᑍᕕᑎᐅᑉ ᑕᕐᓂᖓᓄᑦ, ᔫᓇᑕᓂᐅᓪᓗ ᓇᒡᓕᒋᓕᕐᐹ ᓇᖕᒥᓂᖅ ᑕᕐᓂᕐᒥᑐᑦ. 2ᓴᐅᓕᐅᓪᓗ ᐅᓪᓗᒥ ᑍᑦᓱᒪᓂ ᑍᕕᑎ ᑎᒍᕚ, ᐊᖏᕐᕋᕐᑎᑦᓱᓐᓃᕐᐹᓗ ᐊᑖᑕᖓᑕ ᐃᒡᓗᖓᓄᑦ. 3ᑕᕝᕙ ᔫᓇᑕᓂᒃᑯᒃ ᑍᕕᑎᒃᑯᒃ ᐊᖏᖃᑎᒌᒍᑎᓕᐅᕐᐴᒃ, ᓇᒡᓕᒋᓚᐅᕋᒥᐅᒃ ᓇᖕᒥᓂᖅ ᑕᕐᓂᕐᒥᑐᑦ. 4ᔫᓇᑕᓂᐅᑉ ᐅᓕᒡᔪᐊᓂ ᐊᑐᕐᑕᓂ ᐲᕐᐹ ᑐᓂᓪᓗᒍᓗ ᑍᕕᑎᒧᑦ, ᓴᐴᓗᑕᓂᓗ ᓴᒡᕕᖕᒥᐅᑕᓂ, ᓴᕕᒡᔪᐊᓂᓗ, ᐱᑎᒃᓯᓂᓗ, ᕿᑎᕉᑎᓂᓗ. 5ᑍᕕᑎᓗ ᐂᖃᑦᑕᓚᐅᕐᐳᖅ ᓴᐅᓕᐅᑉ ᑎᓕᓯᑦᔪᑎᒋᔭᖏᓐᓄᑦ ᓇᒧᑐᐃᓐᓇᖅ ᐱᔪᓐᓇᑦᓯᐊᕐᐸᒡᓗᓂ, ᓯᓚᑐᓂᖃᑦᓯᐊᕐᓗᓂᓗ; ᑍᒤᒻᒪᑦ ᓴᐅᓕᐅᑉ ᐊᖓᔪᖅᑳᕈᕐᑎᑉᐹ ᐅᓇᑕᕐᑐᒃᓴᖁᑎᒥᓄᑦ. ᓴᐅᓕᐅᓪᓗ ᐃᓄᖁᑎᖏᑕ ᐊᖓᔪᖅᑳᖁᑎᖏᑕᓗ ᑕᒪᓐᓇ ᖁᕕᐊᒋᑦᓯᐊᓚᐅᕐᐹᑦ.
ᓴᐅᓕᐅᑉ ᐱᔨᓗᒃᓴᕐᓂᖓ–ᓯᒡᒐᑦᔨᓂᖓ ᑍᕕᑎᒥᒃ
6ᑍᕕᑎ ᐅᑎᓕᕐᑎᓪᓗᒍ ᑐᖁᑦᓯᓚᐅᕐᓗᓂ ᐱᓕᔅᑍᓂᒥᐅᒥᒃ ᐅᓇᑕᕐᑐᒃᓮᓪᓗ ᐃᓚᒋᓪᓗᒋᑦ, ᐊᕐᓁᑦ ᐃᓴᕆᐊᓕᒥᐅᑦ ᓄᓇᖓᓃᑦᑐᑦ ᐸᕐᕆᐊᕐᐳᑦ ᐊᖓᔪᖅᑳᕐᔪᐊᒥᒃ ᓴᐅᓕᒥ, ᖁᕕᐊᓇᕐᑐᓂᒃ ᐃᓐᖏᕐᓗᑎᒃ, ᑖᓂᓯᕐᓗᑎᒡᓗ, ᓂᓪᓕᐊᑎᑦᓯᓪᓗᑎᒡᓗ ᓯᕙᓂᕈᑎᓂᒃ ᑯᑭᑦᑕᐸᐅᑎᓂᒡᓗ. 7#ᓴᒧᐃᓕ ᓯᕗᓪᓖᑦ 21:11; 29:5.ᖁᕕᐊᓲᑎᖃᓪᓗᑎᒃ ᐊᕐᓁᑦ ᐃᓐᖏᕐᐳᑦ,
“ᓴᐅᓕ ᑐᖁᑦᓯᓚᐅᕐᐳᖅ 1,000ᓂᒃ,
ᑍᕕᑎᓕ ᑐᖁᑦᓯᓚᐅᕐᐳᖅ 10,000ᓂᒃ.”
8ᓴᐅᓕᐅᑉ ᑕᒪᓐᓇ ᖁᕕᐊᒋᓐᖏᓛ, ᓂᓐᖓᒃᓗᓂᓗ ᐅᖃᕐᐳᖅ, “ᑍᕕᑎᒥᒃ ᑐᖁᑦᓯᓂᕅᕗᑦ 10,000ᓂᒃ, ᐅᕙᓐᓂᓪᓕ 1,000ᓂᒃ; ᓱᓇᒦᒃ ᐱᒃᑲᓐᓂᕐᑐᒃᓴᐅᕚ ᐊᖓᔪᖅᑲᐅᕕᖕᒥᒃ ᑭᓯᐊᓂ?” 9ᓴᐅᓕᐅᓪᓗ ᑍᕕᑎ ᐃᒃᐱᒌᓐᓇᓕᕐᐹ ᓯᒡᒐᑎᓪᓗᒍ ᐅᓪᓗᒥᑦ ᑕᕝᕙᓐᖓᑦ ᐱᒋᐊᕐᓗᓂ.
10ᖃᐅᑎᓪᓗᒍ ᐊᓂᕐᓂᕐᓗᖕᒧᑦ ᒎᑎᒥᑦ ᐱᔪᒥᑦ ᓴᐅᓕ ᐊᐅᓚᑕᐅᓕᕐᐳᖅ, ᐃᒡᓗᒥᓂᓗ ᐱᓇᓱᐊᓕᕐᐳᖅ ᑐᑭᖃᑦᓯᐊᖏᑦᑐᑎᑐᑦ, ᑍᕕᑎ ᑯᑭᑦᑕᐹᓚᐅᕐᐳᖅ ᕼᐊᕐᐱᒧᑦ ᑍᒤᑉᐸᒃᑲᒥ ᖃᐅᑕᒫᑦ. ᓴᐅᓕᓕ ᑎᒍᒥᐊᓚᐅᕐᐳᖅ ᖃᓗᒋᐊᒥᓂᒃ; 11ᓴᐅᓕ ᐃᓱᒪᖃᕐᓗᓂ, “ᐊᑭᓐᓇᒧᑦ ᐳᑐᒻᒥᑖᕐᓗᒍ ᐸᐅᒍᐊᕐᓂᐊᕐᐸᕋ,” ᑲᐱᒋᐊᕐᐹᓗ ᖃᓗᒋᐊᕐᒧᑦ ᒪᕐᕉᐊᕐᑎᕐᓗᓂ; ᑍᕕᑎᓕ ᐊᒡᕖᖃᑦᑕᓚᐅᕐᐳᖅ ᑕᒪᖏᖕᓄᑦ.
12ᓴᐅᓕᐅᑉ ᑍᕕᑎ ᑲᑉᐱᐊᒋᓕᕐᐹ, ᐊᑕᓂᕐᒧᑦ ᓇᔪᕐᑕᐅᓂᖓᓄᑦ ᐃᒻᒥᓂᒡᓗ ᕿᒪᒃᑕᐅᓯᒪᓕᕐᓂᕐᒥᓄᑦ ᐊᑕᓂᕐᒧᑦ. 13ᑕᕝᕙ ᓴᐅᓕᐅᑉ ᓇᔪᕐᑕᒥᓃᑦᓱᓐᓃᕐᑎᑉᐹ, ᐊᖓᔪᖅᑳᓐᖑᕐᑎᓪᓗᒍᓗ ᐅᓇᑕᕐᑎᓄᑦ 1,000ᓄᑦ; ᐊᐅᓪᓚᖃᑦᑕᓚᐅᕐᐳᖅ ᑎᑭᑉᐸᒡᓗᓂᓗ ᐃᓄᐃᑦ ᓯᕗᓕᕐᓗᒋᑦ. 14ᑍᕕᑎᓗ ᐱᔪᓐᓇᑦᓯᐊᖃᑦᑕᓚᐅᕐᐳᖅ ᐱᓇᓱᐊᕐᑕᓕᒫᒥᓂᒃ; ᐊᑕᓂᐅᑉ ᐃᓚᒋᓚᐅᕐᒪᒍ. 15ᓴᐅᓕᓗ ᖃᐅᔨᒐᒥ ᑍᕕᑎᐅᑉ ᐱᔪᓐᓇᑦᓯᐊᖃᑦᑕᕐᓂᖓᓂᒃ ᐱᓇᓱᐊᕐᑕᓕᒫᒥᓂᒃ, ᑕᐰᑦᓯᐊᓚᐅᕐᐳᖅ ᑲᑉᐱᐊᒋᒋᐊᓪᓚᓕᕐᓗᒍᓗ. 16ᐃᓴᕆᐊᓕᒥᐅᓕᒫᓪᓕ ᔫᑕᒥᐅᓪᓗ ᐱᓐᓇᕈᓱᓕᓚᐅᕐᐳᑦ ᑍᕕᑎᒥᒃ; ᑕᓯᐅᕐᑎᑦᓯᐊᕙᐅᓂᖓᓄᑦ ᐊᐅᓪᓚᕐᑎᓪᓗᒋᑦ ᐅᑎᕐᑎᓪᓗᒋᓪᓗ.
ᑍᕕᑎᐅᑉ ᓄᓕᐊᕐᑖᕐᓂᖓ ᓴᐅᓕᐅᑉ ᐸᓂᖓᓂᒃ ᒦᑲᓪᒥᒃ
17ᑕᕝᕙ ᓴᐅᓕ ᐅᖃᕐᐳᖅ ᑍᕕᑎᒧᑦ, “ᐅᓇ ᐸᓂᒐ ᐊᖓᔪᒃᓯᖅ ᒥᕋᑉ; ᐃᓕᖕᓄᑦ ᑐᓂᔭᕋ ᓄᓕᐊᕐᑖᖑᖁᓪᓗᒍ, ᓯᕘᕋᖏᓪᓗᑎᑦ ᐅᓇᑕᕐᓂᐊᕈᕕᑦ, ᐊᑕᓂᐅᑉ ᐅᓇᑕᕐᓂᖓᓂᒃ.” ᓴᐅᓕ ᐃᓱᒪᖃᓚᐅᕋᒥ, “ᐱᔪᓐᓇᕐᓂᓐᓄᑦ ᑖᑦᓱᒥᖓ ᐱᓇᓱᐊᖏᓪᓗᖓ, ᐱᓕᔅᑍᓂᒥᐅᓪᓕ ᐱᔪᓐᓇᕐᓂᖏᑦ ᐱᓇᓱᐊᖔᓕᕐᓕᑦ ᑖᑦᓱᒥᖓ.”
18ᑍᕕᑎᓗ ᐅᖃᕐᐳᖅ ᓴᐅᓕᒧᑦ, “ᐱᓪᓚᕆᐅᖏᑦᑐᖓᓕ, ᐊᑖᑕᒪᓗ ᐃᓚᖏᑦ ᐱᓪᓚᕆᐅᖏᓐᓂᕗᑦ ᐃᓴᕆᐊᓕᒥ, ᓂᖓᐅᑖᕆᔭᒃᓴᐅᓐᖏᓚᖓ ᐊᖓᔪᖅᑳᕐᔪᐊᕐᒧᑦ.” 19ᒥᕋᑉᓕ ᓴᐅᓕᐅᑉ ᐸᓂᖓᑕ ᑐᓂᔭᐅᕕᒃᓴᖓ ᓇᓪᓕᐅᑎᓯᒪᓕᕐᑎᓪᓗᒍ ᑍᕕᑎᒧᑦ, ᑐᓂᔭᐅᖔᕐᐳᖅ ᐊᖑᒻᒧᑦ ᐊᑦᕆᐅᓪᒧᑦ ᒥᕼᐅᓚᑍᑎᒥᐅᑕᕐᒧᑦ.
20ᓴᐅᓕᐅᑉ ᐸᓂᖓ ᒤᑲᓪ ᐱᐅᒃᓴᓚᐅᕐᐳᖅ ᐅᖓᒋᓕᕐᓗᒍᓗ ᑍᕕᑎ; ᓴᐅᓕᓗ ᐅᖃᐅᑦᔭᐅᕗᖅ ᑕᒪᑐᒥᖓ, ᓴᐅᓕᓗ ᑐᓴᕋᒥ ᖁᕕᐊᓲᑎᖃᓚᐅᕐᐳᖅ. 21ᐃᓱᒪᖃᕐᓗᓂ, “ᒤᑲᓪ ᑍᕕᑎᒧᑦ ᑐᓂᓂᐊᕐᐸᕋ; ᑖᓐᓇ ᐊᑐᕐᓗᒍ ᐱᕖᕈᑎᑎᓐᓂᐊᕋᒃᑯ, ᐱᓕᔅᑍᓂᒥᐅᓪᓗ ᐊᖅᑯᑎᒋᓗᒋᑦ ᑐᖁᑕᐅᑎᓐᓂᐊᕋᒃᑯ.” ᑍᒤᒻᒪᑦ ᓴᐅᓕᐅᑉ ᑍᕕᑎ ᐅᖃᐅᑎᓕᕆᕚ, “ᒫᓐᓇ ᓂᖓᐅᑖᕆᔭᒃᓴᕆᓕᕐᐸᒋᑦ.” 22ᓴᐅᓕᐅᓪᓗ ᐱᔨᓂ ᐊᖓᔪᖅᑲᐅᔪᑦ ᐱᖁᕔᑦ, “ᑍᕕᑎ ᐅᖃᐅᑎᓯᐅᒃ ᐃᓄᑑᖃᑎᒋᓗᒍ ᐅᖃᐅᑎᓗᒍ, ‘ᑕᑯᒋᑦ, ᐊᖓᔪᖅᑳᕐᔪᐊᑉ ᖁᕕᐊᒋᕚᑎᑦ, ᐊᖓᔪᖅᑲᐅᔪᖁᑎᖏᑕᓗ ᓇᒡᓕᒋᕚᑎᑦ; ᑍᒤᒻᒪᑦ ᒫᓐᓇ ᐊᖓᔪᖅᑳᕐᔪᐊᕐᒧᑦ ᓂᖓᐅᑖᕆᔭᐅᓕᕆᑦ.’”
23ᓴᐅᓕᐅᓪᓗ ᐱᔨᖏᑦ ᑍᒫᒃ ᑍᕕᑎᒧᑦ ᐅᖃᓚᐅᕐᐳᑦ. ᑍᕕᑎᐅᓪᓗ ᑭᐅᕔᑦ, “ᐅᖅᑭᑦᑑᓇᓱᒋᕕᓯᐅᒃ ᐊᖓᔪᖅᑳᕐᔪᐊᕐᒧᑦ ᓂᖓᐅᑖᕆᔭᐅᓗᓂ, ᑕᑯᒋᑦ ᐊᔪᕐᓴᕐᑑᔪᖓ ᐅᐱᓐᓇᕐᑑᓇᖓᓗ.”
24ᓴᐅᓕᐅᓪᓗ ᐱᔨᖏᑦ ᓴᐅᓕᒧᑦ ᐅᑎᕋᒥᒃ ᐅᖃᕐᐳᑦ, “ᑍᕕᑎ ᑍᒫᒃ ᐅᖃᓚᐅᕐᐳᖅ.” 25ᑕᕝᕙ ᓴᐅᓕᐅᑉ ᐅᖃᐅᑎᕔᑦ, “ᐃᒫᒃ ᑍᕕᑎ ᐅᖃᐅᑎᓯᐅᒃ, ‘ᐊᖓᔪᖅᑳᕐᔪᐊᖅ ᑐᓂᓯᕕᐅᔪᒪᓐᖏᓚᖅ ᐊᑭᓕᐅᑎᒃᓴᓂᒃ ᓄᓕᐊᒃᓴᒧᑦ ᐃᒫᖔᕐᓕ ᐱᓇᓱᐊᖁᔨᕗᖅ ᐱᓕᔅᑍᓂᒥᐅᑦ 100ᐃᑦ ᐅᓕᕝᕙᖏᓐᓂᒃ#18:25 ᐅᓕᕝᕙᖏᑦ ᐅᓱᖏᑕ ᐹᓯᓂᖏᑦ ᐱᔪᒪᕗᖅ, ᐊᑭᕋᖏᓐᓄᑦ ᐊᑭᓂᐊᕈᑎᒃᓴᐅᖁᓪᓗᒋᑦ.’” ᑍᒫᒃ ᓴᐅᓕ ᐃᓱᒪᖃᓚᐅᕐᐳᖅ ᑍᕕᑎ ᑐᖁᑕᐅᔪᓐᓇᖁᓪᓗᒍ ᐱᓕᔅᑍᓂᒥᐅᓄᑦ. 26ᓴᐅᓕᐅᑉ ᐊᖓᔪᖅᑳᖁᑎᖏᑦ ᑍᒫᒃ ᑍᕕᑎᒧᑦ ᐅᖃᕐᐳᑦ ᓴᐅᓕᐅᑉ ᐅᖃᐅᓯᕆᖁᔭᖓᓂᒃ, ᑍᕕᑎᐅᓪᓗ ᑕᒪᓐᓇ ᖁᕕᐊᓲᑎᒋᕚ ᐃᓱᒪᓪᓗᓂ ᐊᖓᔪᖅᑳᕐᔪᐊᕐᒧᑦ ᑍᒫᒃ ᓂᖓᐅᒋᔭᐅᓕᕈᓐᓇᕐᓂᕐᒥᓂᒃ. ᐅᓪᓗᕐᓕ ᓱᓕ ᖄᖏᓚᐅᕐᑎᓐᓇᒍ, 27ᑍᕕᑎ ᒪᑭᑉᐳᖅ ᐊᐅᓪᓚᕐᓗᓂᓗ, ᐃᓄᖁᑎᖏᓪᓗ ᑐᖁᑦᓯᕗᑦ ᐱᓕᔅᑍᓂᒥᐅᓂᒃ 200ᓂᒃ; ᑍᕕᑎᐅᓪᓗ ᑐᖁᑕᖏᑕ ᐅᓕᕝᕙᖏᑦ ᐊᖓᔪᖅᑳᕐᔪᐊᒧᐊᕈᑎᕔᑦ ᐊᑭᓕᐅᑎᒋᓪᓗᓂᒋᑦ, ᓂᖓᐅᒃᓴᕐᑖᕆᔭᐅᔪᓐᓇᖁᓪᓗᒍ. ᓴᐅᓕᐅᓪᓗ ᐸᓂᓂ ᒤᑲᓪ ᑐᓂᕚ ᑲᑎᑎᑕᐅᖁᓪᓗᒍ ᑍᕕᑎᒧᑦ.
28ᓴᐅᓕᓗ ᑕᑯᒐᒥ ᖃᐅᔨᓪᓗᓂᓗ ᐊᑕᓂᐅᑉ ᑍᕕᑎ ᐃᓚᒋᖕᒪᒍ, ᐸᓂᖓᑕᓗ ᒤᑲᓕᐅᑉ ᐅᖓᓕᕐᓗᒍ ᓇᒡᓕᒋᓕᕐᒪᒍ, 29ᓴᐅᓕᐅᓪᓕ ᑍᕕᑎ ᑲᑉᐱᐊᒋᒋᐊᓪᓚᓕᓚᐅᕐᐹ. ᐊᑭᕋᕐᑐᕆᐊᓪᓚᓕᕐᓗᓂᐅᒡᓗ ᑲᔪᓯᔪᒥᒃ.
30ᐱᓕᔅᑍᓂᒥᐅᓪᓕ ᐊᖓᔪᖅᑳᖏᑕ ᐅᓇᑕᕐᑎᖏᑦ ᐅᓇᑕᕆᐊᕐᐳᑦ, ᐅᓇᑕᕆᐊᑐᐊᕐᒪᑕᓕ ᑍᕕᑎ ᓵᓚᖃᕐᓂᕐᓴᐅᖃᑦᑕᓚᐅᕐᐳᖅ ᓴᐅᓕᐅᑉ ᐱᔨᓕᒫᖏᓐᓂᑦ; ᑍᕕᑎᓗ ᐅᐱᒋᔭᐅᓂᕐᒧᑦ ᐱᓪᓚᕆᕈᕐᑎᑕᐅᒻᒪᕆᓚᐅᕐᐳᖅ.
Currently Selected:
ᓴᒧᐃᓕ ᓯᕗᓪᓖᑦ 18: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
