ᐲᑦᑐᕉᓯ ᓯᕗᓪᓖᑦ 4
4
ᐃᓅᓯᖅ ᐊᓯᑦᔨᕐᓯᒪᔪᖅ
1ᑍᒤᒻᒪᑦ ᙭ᔅᑑᓯ ᐋᓐᓂᐊᓚᐅᕐᒪᑦ ᑎᒥᒥᒍᑦ, ᐃᓕᑦᓯᑦᑕᐅᖅ ᑍᒫᒃ ᐃᓱᒪᖃᓕᕆᑦᓯ ᐱᔪᓐᓇᐅᑎᒋᓗᒍ, ᐃᓄᒃ ᑎᒥᒥᒍᑦ ᐋᓐᓂᐊᑎᑕᐅᔪᖅ ᐊᔪᕐᑐᓕᓂᖅ ᐊᑐᕈᓐᓃᕐᒪᒍ. 2ᒫᓐᓇᒥᑦ ᑕᒫᓂ ᓄᓇᒥ ᐃᓅᓯᓕᒫᓯ ᓈᓗᒍ ᐃᓅᔭᕆᐊᖃᓕᕐᐳᓯ ᒎᑎᐅᑉ ᐱᔪᒪᔭᖓᓄᑦ ᐊᐅᓚᑕᐅᓗᓯ, ᑎᒥᐅᑉ ᐱᔪᒪᔭᖓᓅᖏᑦᑐᖅ. 3ᐊᓂᒍᕐᓯᒪᓕᕐᒪᑕ ᐃᓅᓯᕆᓚᐅᕐᑕᓯ ᐅᒃᐱᖏᑦᑐᑦ ᐱᔪᒪᓂᖏᑦ ᒪᓕᒃᓗᒋᑦ, ᐃᓅᓯᒪᒐᑦᓯ ᑲᓐᖑᓇᕐᑐᓕᓂᕐᓂᒃ, ᐃᒃᖠᒍᖕᓂᕐᓂᒃ, ᐋᖓᔮᕐᓂᕐᓂᒃ, ᓄᓕᐊᕐᓂᕐᓂᒃ, ᐃᒥᐊᓗᖕᒧᑦ ᖁᕕᐊᓲᑎᖃᕐᓂᕐᓂᒃ, ᓇᕐᕈᓇᕐᑐᓄᓪᓗ ᑐᒃᓯᐊᖃᑦᑕᕐᓂᕐᓂᒃ ᒎᑎᐅᖏᑦᑐᓄᑦ. 4ᑍᒤᓕᐅᖃᑎᒋᕙᓚᐅᕐᑕᓯ ᑲᒪᓂᐊᕐᐳᑦ ᐱᓕᕆᐊᖏᓐᓂᒃ ᐱᓇᓱᐊᖃᑎᒋᔪᓐᓃᕋᑦᓯᐅᒃ ᐃᓅᓯᖃᕈᓐᓃᕋᑦᓯᓗ ᑐᑮᕈᑎᓯᒪᔪᑎᑐᑦ, ᑍᒤᒻᒪᑦ ᐅᖃᕐᓂᕐᓘᑎᖃᕋᓱᐊᓕᕐᐳᑦ ᐃᓕᑦᓯᓐᓂᒃ. 5ᐃᓅᓯᕐᒥᖕᓂᒡᓕ ᒎᑎᒧᑦ ᐅᖃᐅᓯᖃᕆᐊᖃᕈᒫᕐᐳᑦ ᐅᐸᓗᖕᒊᕐᓯᒪᔪᒧᑦ ᐃᖅᑲᕐᑐᐃᓂᐊᕐᓗᓂ ᐃᓅᔪᓂᒃ ᑐᖁᖓᔪᓂᒡᓗ. 6ᑕᒪᓐᓇ ᐱᑦᔪᑎᒋᓪᓗᒍ ᐅᖃᐅᓰᑦ ᑐᓴᕈᒥᓇᕐᑐᑦ ᐊᔪᕆᕐᑐᐃᑦᔪᑕᐅᓯᒪᕗᑦ ᑐᖁᓚᐅᕐᓯᒪᔪᓄᑦ ᐊᒡᓛᑦ, ᑖᒃᑯᐊᑦᑕᐅᖅ ᐃᖅᑲᕐᑐᕐᑕᐅᔪᒫᕐᒪᑕ ᑎᒥᒥ ᐃᓅᔪᑦ ᐃᖅᑲᕐᑐᕐᑕᐅᓂᒃᓴᖏᑎᑐᑦ, ᐊᓂᕐᓂᑯᑦ ᐆᒪᓕᖁᓪᓗᒋᑦ ᓲᕐᓗ ᒎᑎ ᐆᒪᖕᒪᑦ.
ᒎᑎᐅᑉ ᑐᓂᕐᕈᑎᖏᓐᓂᒃ ᑲᒪᔨᐅᑦᓯᐊᕐᓂᖅ
7ᓱᓇᓕᒫᑦ ᐃᓱᓕᕝᕕᒃᓴᖓᑦ ᖃᒡᓕᕗᖅ; ᑍᒤᒻᒪᑦ ᖃᐅᔨᒪᓇᓱᑦᓯᐊᕆᐊᖃᓕᕐᐳᓯ ᐃᒻᒥᓂᒃ ᐱᓯᒪᑦᓯᐊᕈᓐᓇᕐᑐᒥᒃ ᐃᓅᓯᑲᕐᓗᓯ ᑐᒃᓯᐊᕈᓐᓇᕐᓂᐊᕋᑦᓯ. 8#ᓲᓗᒨᓂ 10:12.ᐊᖏᓂᕐᐹᒥᒡᓕ ᓱᓕᓪᓚᕆᒃᑐᒥᒃ ᓇᒡᓕᒃᑎᒌᒃᑐᒃᓴᐅᕗᓯ ᐃᓕᑦᓯᓐᓄᑦ, ᓇᒡᓕᖕᓂᐅᑉ ᑲᒪᒋᔪᓐᓇᕐᒪᒋᑦ ᐊᔪᕐᑐᓕᓃᑦ ᐊᒥᓱᑦ. 9ᐊᖏᕐᕋᑦᓯᓐᓄᑦ ᑐᓐᖓᓱᑎᑦᑎᖃᑦᑕᕆᑦᓯ#4:9 ᑐᔪᕐᒥᑎᑦᓯᖃᑕᕋᓯ ᓈᒻᒪᒃᓴᖏᑦᔪᑎᒋᓐᖏᓪᓗᒍ. 10ᐊᑐᓂᑦ ᑐᓂᕐᕈᓯᐊᕐᓯᒪᒐᑦᓯ, ᑕᒪᒃᑯᐊ ᐃᓅᖃᑎᑦᓯᓐᓄᑦ ᐱᔨᑦᓯᕈᑎᒋᓯᐅᒃ, ᐊᑐᑦᓯᐊᖁᓪᓗᓯ ᒎᑎᒥᑦ ᑐᓂᕐᕈᓯᐊᑦᓯᓐᓂᒃ ᐱᑦᓯᐊᕐᓂᖓᑕ ᐱᔪᓐᓇᕐᓯᑎᑦᓯᓂᖓᒍᑦ: 11ᓇᓪᓕᐊᑦ ᐊᔪᕆᕐᑐᐃᒍᓂ, ᐊᔪᕆᕐᑐᐃᔪᒃᓴᐅᕗᖅ ᒎᑎᐅᑉ ᐅᖃᐅᓯᐅᖁᔭᖓᓂᒃ; ᓇᓪᓕᐊᑦ ᐱᔨᑦᓯᕐᑐᖅ, ᐱᔨᑦᓯᕐᑐᒃᓴᐅᕗᖅ ᐱᔪᓐᓇᕐᓂᖅ ᒎᑎᒥᑦ ᑐᓂᕐᕈᓯᐊᕆᔭᓂ ᐊᑐᕐᓗᓂᐅᒃ; ᑕᒤᑎᒍᑦ ᒎᑎ ᓂᕐᑐᕐᓇᕐᑎᑕᐅᖁᓪᓗᒍ ᔩᓱᓯ ᙭ᔅᑑᓯᒃᑯᑦ. ᑖᓐᓇ ᓂᕐᑐᕐᑕᐅᓂᕐᒥᒃ ᐱᓕᑑᖕᒪᑦ ᐱᔪᓐᓇᕐᓂᕐᒥᒡᓗ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. ᐋᒦᓐ.
ᐊᒃᓱᕈᕐᓇᕐᑐᑰᕐᑎᑕᐅᓂᖅ ᙭ᔅᑑᓯᒥᐅᑕᐅᓂᕐᒧᑦ
12ᓇᒡᓕᖕᓇᕐᑐᓯ, ᑲᒪᓂᐊᕐᑍᓕᒋᑦᓯ ᒫᓐᓇ ᐊᒃᓱᕈᖕᓇᕐᑐᒦᑎᑕᐅᓗᐊᕐᓂᓯ ᐱᑦᔪᑎᒋᓗᒍ, ᐆᒃᑐᕋᕐᑕᐅᑦᔪᑎᒋᒐᑦᓯᐅᒃ ᐊᑦᔨᐅᖏᑦᑐᒥᒃ ᐊᑐᕋᓱᒋᑦᑍᓕᒋᑦᓯ. 13ᖁᕕᐊᓲᑎᒋᓯᐅᒡᓕ ᙭ᔅᑑᓯᐅᑉ ᓯᕐᓕᕿᑎᑕᐅᓂᕆᓚᐅᕐᑕᖓᓂᒃ ᐃᓚᖏᐅᑎᑎᑕᐅᒐᑦᓯ ᑕᒪᑐᒧᖓ, ᖁᕕᐊᓲᑎᖃᒻᒪᕆᒍᓐᓇᖁᓪᓗᓯ ᓯᕆᓗᓯᓗ ᑖᑦᓱᒪ ᓂᕐᑐᕐᓇᕐᓂᕐᔪᐊᖓ ᓴᖅᑭᑎᑕᐅᒃᐸᑦ. 14ᐅᖃᕐᓂᕐᓗᒃᕕᐅᒍᑦᓯ ᙭ᔅᑑᓯᐅᑉ ᐊᑎᖓ ᐱᓪᓗᒍ, ᑕᑉᕙ ᓮᒻᒪᕐᑎᑕᐅᑦᔪᑎᒃᓴᖃᕐᐳᓯ ᒎᑎᐅᑉ ᐊᓂᕐᓂᖓ ᐱᓐᓇᕐᓇᕐᑐᕐᔪᐊᖅ ᐃᓂᖃᕐᒪᑦ ᐃᓕᑦᓯᓐᓂ. 15ᓇᓪᓕᓯ ᐊᒡᕕᐊᕈᕐᑎᑕᐅᑦᑍᓕᓕ ᐃᓄᐊᕐᓂᕐᒧᑦ, ᑎᒡᓕᖕᓂᕐᒧᑦ, ᐊᔪᕐᑐᓕᓂᕐᒧᑦ, ᐅᕝᕙᓘᓐᓃᑦ ᐃᓅᖃᑎᒥᓄᑦ ᐸᒃᕕᓵᕆᔨᐅᓂᕐᒧᑦ; 16ᐅᖁᒤᑐᕐᔪᐊᕐᒥᑎᑕᐅᓕᕈᑦᓯᓕ ᙭ᔅᑑᓯᒥᐅᑕᐅᓂᓯ ᐱᑦᔪᑎᒋᓗᒍ, ᑕᒪᓐᓇ ᑲᓐᖑᓲᑎᒋᑦᑍᓕᓯᐅᒃ, ᒎᑎᓕ ᓂᕐᑐᕐᓯᐅᒃ ᑖᑦᓱᑐᓇᖅ ᐱᔭᐅᓂᓯ ᐱᑦᔪᑎᒋᓗᒍ.
17ᒫᓐᓇ ᐃᖅᑲᕐᑐᕐᑕᐅᓂᖅ ᐱᒋᐊᕐᒪᑦ ᒎᑎᐅᑉ ᐃᓄᖁᑎᖏᓐᓂᑦ; ᐅᕙᑦᑎᓐᓂᓪᓗ ᐱᒋᐊᕐᓂᖃᕐᐸᑦ, ᖃᓄᕐᓕ ᒎᑎᐅᑉ ᐅᖃᐅᓯᖏᓐᓂᒃ ᑐᓴᕈᒥᓇᕐᑐᖁᑎᖏᓐᓂᑦ ᓈᓚᒍᒪᖏᑦᑐᑦ ᐃᓱᓕᑉᕕᖃᓛᕐᐸᑦ? 18#ᓲᓗᒨᓂ 11:31.ᐊᒡᓔᑦ ᐅᖃᕐᒪᑕ,
“ᐃᓗᐊᕐᑐᓕᔪᖅ ᓯᕐᓚᒃ ᐱᐅᓕᔭᐅᔪᓐᓇᕐᐸᑦ,
ᖃᓄᕐᓕ ᑍᒪ ᒎᑎᖃᖏᑦᑐᑦ ᐊᔪᕐᑐᓕᔪᓪᓗ ᐱᒐᔭᓕᕐᐸᑦ?”
19ᑍᒤᒻᒪᑦ ᐊᒃᓱᕈᕐᓇᕐᑐᒦᑎᑕᐅᔪᑦ ᒎᑎᐅᑉ ᐱᔪᒪᔭᖓ ᒪᓕᒡᓗᒍ ᐱᓂᐊᕐᓂᖃᑦᓯᐊᕆᐊᖃᕐᐳᑦ ᐃᒻᒥᖕᓂᒡᓗ ᑐᓂᓯᒪᑦᓯᐊᕐᓗᑎᒃ ᐱᓐᖑᕐᑎᑦᑎᔨᒥᖕᓄᑦ, ᐊᖏᕈᑎᒋᓯᒪᔭᒥᓂᒃ ᓴᖑᑎᑦᓯᕙᖏᑦᑐᒧᑦ.
Currently Selected:
ᐲᑦᑐᕉᓯ ᓯᕗᓪᓖᑦ 4: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
