ᐊᑕᓃᑦ ᓯᕗᓪᓖᑦ 6
6
ᓲᓗᒨᓂᐅᑉ ᓴᓇᓂᖓ ᑐᒃᓯᐊᕐᕕᒡᔪᐊᒥᒃ
1480 ᐊᕐᕌᒍᐃᑦ ᐊᓂᒍᕐᓯᒪᓕᕐᑎᓪᓗᒋᑦ ᐃᓴᕆᐊᓕᐅᑦ ᐃᓄᖏᑦ ᐄᑦᔨᑉᑎᒥᑦ ᐊᐅᓪᓚᓚᐅᕐᓂᖏᑕ, ᐊᕐᕌᒍᓂᒃ ᓯᑕᒪᓂᒃ ᓲᓗᒨᓂ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐃᓴᕆᐊᓕᒥ, ᑕᖅᑭᐅᑉ ᐂᑉᐸᖓᓂ ᔨᕝᒥ, ᐱᒋᐊᓚᐅᕐᐳᖅ ᓴᓇᓕᕐᓗᓂ ᐊᑕᓂᐅᑉ ᐃᒡᓗᖓᓂᒃ. 2ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᐃᒡᓗᓕᐊᖓ ᐊᑕᓂᕐᒧᑦ 60ᓂᒃ ᑕᓕᕐᑐᑦ ᑕᑭᓂᖃᕐᐳᖅ, 20ᓂᒃ ᑕᓕᕐᑐᑦ ᓯᓕᖕᓂᖃᕐᓗᓂ, 30ᓂᒃ ᑕᓕᕐᑐᑦ ᐳᕐᑐᓂᖃᕐᓗᓂ. 3ᐃᑎᕆᐊᕐᕕᖓ 20ᓂᒃ ᑕᓕᕐᑐᑦ ᑕᑭᓂᖃᕐᐳᖅ, ᓴᓂᒧᑐᓂᖓᓗ ᑍᒤᓪᓗᐊᕆᓪᓗᓂ, 10ᓂᒃ ᑕᓕᕐᑐᑦ ᐳᕐᑐᓂᖃᕐᓗᓂ. 4ᐊᕙᓗᕐᔪᐊᖓᓗ ᑭᓪᓚᖃᐅᕐᐳᖅ ᓯᓚᑖ ᓂᕈᑭᓐᓂᕐᓴᐅᔪᓂᒃ ᐃᓗᐊ ᓂᕈᑐᓂᕐᓴᐅᔪᓂᒃ. 5ᓯᓚᑖᑕᓗ ᐊᑭᓐᓇᖓᓂ ᐃᓚᓯᒋᕗᖅ, ᑐᒃᓯᐊᕐᕕᒡᔪᐊᑉ ᓴᓂᕌᒍᑦ ᐃᑎᕐᕕᖓᓂᑦ ᕿᓐᖑᐊᓄᑦ ᑎᑭᓪᓗᒍ, ᐃᒡᓗᐊᕈᓯᓕᐅᕐᓱᒍᓗ ᐊᕙᑎᓕᒫᖓ. 6ᐃᒡᓗᐊᕈᓰᑦ ᐊᑖᓃᑦᑐᑦ ᐊᑐᓂᑦ ᓴᓂᒧᑐᓂᖃᕐᐳᑦ 7ᓂᒃ ᐃᑎᒐᖕᓂᒃ ᕿᑎᖅᑲᒥᒡᓗ, ᕿᑎᖓᓃᑐᑦ 9ᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᓗᑎᒃ, ᖁᓪᓕᕐᐹᖓᓃᑦᑐᖅ ᖁᓕᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᐳᖅ; ᑐᒃᓯᐊᕐᕕᒡᔪᐊᑉ ᐊᑭᓐᓇᖏᒃ ᐊᕙᓗᐊᓃᑦᑑᒃ ᓯᓚᑖᒍᑦ ᐃᓂᓕᐅᕆᕗᖅ ᓱᑬᑦ ᐃᓂᖏᓐᓂᒃ ᐃᒡᓘᑉ ᖁᓛᑕ ᓴᐅᓂᖏᑦ ᐊᑦᑕᕐᓁᓕᓯᒪᑦᓯᐊᖁᓪᓗᒋᑦ ᐃᒡᓘᑉ ᓴᓂᕋᖓᓄᑦ ᐊᑦᓱᖏᐅᒪᑐᐃᓐᓇᖁᓇᒋᑦ. 7ᐃᒡᓗ ᓴᓇᔭᐅᕗᖅ, ᐅᔭᕋᖕᓂᒃ ᓴᓇᔭᐅᔭᕇᕐᓯᒪᔪᓂᒃ ᐅᔭᕋᖕᓂᒃ ᐲᔧᕕᖕᒥ; ᓂᐱᖃᓚᐅᓐᖏᓚᖅ ᑲᑦᔪᒡᕙᓗᒃᑐᒥᒃ ᐅᓕᒪᕐᕙᓗᒃᑐᒥᒡᓘᓐᓃᑦ ᐅᕝᕙᓗ ᓴᓇᕐᕈᑎᓄᑦ ᓴᕕᕋᔭᖕᓄᑦ ᑐᓴᕐᓴᐅᔪᓂᒃ ᑐᒃᓯᐊᕐᕕᒡᔪᐊᖅ ᓴᓇᔭᐅᑎᓪᓗᒍ.
8ᐃᑎᕐᑕᕐᕕᒃ ᐊᓪᓕᕐᐹᖓᓃᑦᑐᖅ ᐅᐃᒍᖓ ᐅᓪᓗᓪᓗᐊᑉ ᓇᓛᓃᑦᑐᖅ, ᒪᔪᕋᐅᑎᖃᕐᓗᓂ ᓇᑏᑦ ᑐᖓᓕᐊᓄᑦ ᐱᖓᔪᐊᓄᓪᓗ ᑐᕌᖓᔪᒥᒃ. 9ᓲᓗᒨᓂᐅᑉ ᐃᒡᓗ ᓴᓇᓚᐅᕐᐹ, ᐱᔭᕇᕐᓗᒍᓗ; ᐃᓗᐊᓂ ᖁᓛᓄᑦ ᐃᓕᓯᕗᖅ ᕿᔪᐊᓗᖕᓂᒃ ᕿᕋᑦᑕᖅᑯᑎᓂᒃ ᕿᔪᖕᓂᒡᓗ ᓵᑦᑐᓂᒃ ᓰᑕᕆᓂᒃ. 10ᐅᐃᒍᖓ ᐳᕐᑐᓂᖃᕐᐳᖅ ᐱᖓᓱᓂᒃ ᓇᑎᓕᒃ ᐃᑎᒐᖕᓂᒃ 7ᓂᒃ ᕿᑎᖅᑲᒥᒡᓗ ᐳᕐᑐᓂᖃᕐᐳᖅ, ᓴᓇᔭᐅᓯᒪᕗᖅ ᐊᒃᑐᐊᓪᓗᓂ ᑐᒃᓯᐊᕐᕕᒡᔪᐊᑉ ᐊᑭᓐᓇᖓᓄᑦ ᑖᓐᓇᑦᑕᐅᖅ ᕿᕋᑦᑕᖅᑯᑎᖃᕐᓗᓂ ᕿᔪᐊᓗᖕᓂᒃ ᓰᑕᕆᓂᒃ. 11ᐊᑕᓂᐅᑉ ᐅᖃᐅᓯᖓ ᓲᓗᒨᓂᒧᑦ ᑎᑭᑉᐳᖅ, 12“ᐅᓇ ᐃᒡᓗᓕᐊᕆᔧᑦ ᐱᑦᔪᑎᒋᓪᓗᒍ, ᐊᑐᕐᑕᐅᖁᔭᒃᑲ ᓈᓚᒃᑯᕕᒋᑦ ᒪᓕᒃᑕᐅᖁᔭᒃᑲᓗ, ᐱᖁᔭᒃᑲᓗ ᐱᓯᒤᓐᓇᕐᓗᒋᑦ ᒪᓕᑦᓯᐊᕈᕕᒋᑦ, ᑕᕝᕙ ᐅᖃᐅᓯᕋ ᐃᓕᖕᓂ ᐃᓂᖃᕐᑎᑦᓱᒪᕙᕋ, ᐊᑖᑕᖕᓄᑦ ᑍᕕᑎᒧᑦ ᐅᖃᐅᓯᕆᓚᐅᕐᑕᒃᑲ. 13ᐃᓂᖃᖃᑕᐅᓂᐅᕐᐳᖓ ᐃᓴᕆᐊᓕᐅᑉ ᑭᖑᕚᖏᓐᓂ, ᕿᒪᖕᓂᐊᕐᓇᒋᓪᓗ ᐃᓴᕆᐊᓕᒥᐅᑦ ᐃᓄᖁᑎᒃᑲ.” 14ᑕᕝᕙ ᓲᓗᒨᓂᐅᑉ ᐃᒡᓗ ᓴᓇᕚ, ᐱᔭᕇᕐᓗᒍᓗ.
ᑐᒃᓯᐊᕐᕕᒡᔪᐊᑉ ᐃᓗᐊᑕ ᐱᔭᕇᕐᑕᐅᑦᓯᐊᕐᓂᖓ
ᑯᕉᓂᑲ ᐂᑉᐸᖏᑦ 3:8-14
15ᐃᓗᐊᑕ ᐊᑭᓐᓇᖏᑦ ᐃᓗᐹᕈᑦᓯᓚᐅᕐᐰᑦ ᕿᔪᖕᓂᒃ ᓵᑦᑐᓂᒃ ᓰᑕᕆᓂᒃ; ᓇᑎᕐᒥᑦ ᐱᒋᐊᕐᓗᒍ ᖁᓛᓄᑦ ᑎᑭᑦᑐᓂᒃ ᐃᓗᐱᐊᕈᑦᑎᕐᐹ ᕿᔪᖕᓂᒃ; ᓇᑎᖓᓗ ᕿᔪᖕᓂᒃ ᓮᐳᕋᓯᓂᒃ ᓇᑎᓕᐅᕐᓗᒍ. 16#ᒨᓯᓯ ᐂᑉᐸᖏᑦ 26:33,34.ᐃᒡᓘᑉ ᕿᓐᖑᐊ ᓵᑦᑐᓂᒃ ᕿᔪᖕᓂᒃ ᓰᑕᕆᓂᒃ 30ᓂᒃ ᐃᑎᒐᖕᓂᒃ ᑕᑭᓂᓕᖕᒥᒃ ᓇᑎᕐᒥᑦ ᖁᓛᓄᑦ ᐃᓗᐱᐊᕈᑦᑎᕐᐹ, ᑕᕝᕙᓂᓗ ᕿᓐᖑᐊᓂ ᐃᓗᕙᓯᖕᓂᕐᐹᒥᒃ, ᓴᓇᕗᖅ ᐃᑦᔪᕐᓁᓐᓂᕐᐹᒥᒃ ᑍᔭᐅᔪᒥᒃ. 17ᐃᒡᓗᒥ ᐃᑦᔪᕐᓁᓐᓂᕐᐹᑉ ᓯᕗᕌᓃᑦᑐᖅ ᐃᓚᒋᓪᓗᒍ 60ᓂᒃ ᐃᑎᒐᖕᓂᒃ ᑕᑭᓂᖃᕐᐳᖅ. 18ᑖᒃᑯᐊ ᕿᔪᖏᑦ ᑕᑯᒥᓇᕐᓴᕐᓯᒪᓪᓗᑎᒃ ᓴᓇᓐᖑᐊᕐᓯᒪᔪᓂᒃ ᐃᓗᖃᐅᕐᑐᓂᒃ ᓄᓇᕋᓐᖑᐊᓂᒡᓗ; ᑖᑦᓱᒪ ᐃᓗᓕᒫᖓ ᐃᓘᓐᓇᖓ ᕿᔪᖕᓂᒃ ᓰᑕᕆᓂᒃ ᑕᓕᑎᑕᐅᓯᒪᑦᓯᐊᕐᐳᖅ ᐊᑭᓐᓇᖓ ᐅᔭᕋᒃ ᓴᖅᑭᔮᕐᑐᖃᕋᓂ. 19ᐃᒡᓘᑉ ᕿᓐᖑᐊᓂ ᐃᓪᓗᐊᕈᓯᕐᒥᒃ ᓴᓇᓚᐅᕆᕗᖅ, ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓᑕ ᐃᓂᒋᓂᐊᕐᑕᖓᓂᒃ. 20ᑖᓐᓇ ᐃᓪᓗᐊᕈᓯᖅ 30ᓂᒃ ᐃᑎᖓᖕᓂᒃ ᑕᑭᓂᖃᕐᐳᖅ, 30ᓂᒡᓗ ᐃᑎᒐᖕᓂᒃ ᓯᓕᖕᓂᖃᕐᓗᓂ, 30ᓂᒡᓗ ᐃᑎᒐᖕᓂᒃ ᐳᕐᑐᓂᖃᕐᓗᓂ, ᐃᓘᓐᓇᖓ ᒥᖑᐊᕐᓯᒪᓪᓗᓂ ᒎᓗᒥ. ᑐᓂᕐᕈᓯᕐᕕᒃ ᖄᓕᐅᕐᓯᒪᓪᓗᓂ ᕿᔪᖕᓂᒃ ᓰᑕᕆᓂᒃ. 21ᑐᒃᓯᐊᕐᕕᒡᔪᐊᓪᓗ ᐃᓗᐊ ᓲᓗᒨᓂᐅᑉ ᖄᐹᓚᐅᕐᐹ ᒎᓗᓪᓚᕆᖕᒥᒃ ᐃᓚᓯᒪᖏᑦᑐᒥᒃ, ᕿᓚᐅᕐᖑᔭᕐᓗ ᐃᑎᕐᑕᕐᕕᐊᓄᐊᕐᐹ ᒎᓗ, ᐃᑎᕐᑕᕕᖓᓕ ᐃᓗᓪᓕᖅ ᐃᓘᓐᓇᖓ ᒎᓗᐃᓐᓇᐅᓚᐅᓐᖏᓚᖅ. 22#ᒨᓯᓯ ᐂᑉᐸᖏᑦ 30:1-3.ᐃᓗᓕᒫᑦᓯᐊᖓ ᐃᓗᑉᐱᐊᓕᓚᐅᕐᐹ ᒎᓗᒥᒃ, ᐃᒡᓗᓕᒫᖅ ᐱᔭᕇᕐᑕᐅᓂᖓᓄᑦ ᑎᑭᓪᓗᒍ. ᑐᓂᕐᕈᓯᕐᕕᒃᑕᐅᖅ ᐃᑦᔪᕐᓁᓐᓂᕐᐹᖅ ᑕᒪᕐᒥᑦᓯᐊᖅ ᖄᓕᕐᓯᒪᕗᖅ ᒎᓗᒥᒃ. 23#ᒨᓯᓯ ᐂᑉᐸᖏᑦ 25:18-20.ᐃᑦᔪᕐᓁᑦᑐᕕᖕᒥ ᐃᓗᓪᓕᕐᐹᒥ ᓴᓇᓚᐅᕆᕗᖅ ᒪᕐᕉᖕᓂᒃ ᓯᕈᐱᓐᖑᐊᖕᓂᒃ ᕿᔫᖕᓂᒃ ᐊᓕᕕᑎᓂᒃ, ᐊᑐᓂᑦ ᐳᕐᑐᓂᖃᕐᓗᑎᒃ ᐃᑎᒐᖕᓂᒃ 15ᓂᒃ.
24ᓯᕈᐱᐅᑉ ᐃᓴᕈᐊ ᑕᑭᓂᖃᕐᐳᖅ ᐃᑎᒐᖕᓂᒃ 7ᓂ ᕿᑎᖅᑲᒥᒡᓗ, ᐂᑉᐸᖓᑕᓗ ᐃᓴᕈᐊ ᓯᕈᐱᐅᑉ ᐃᑎᒐᖕᓂᒃ 7ᓂ ᕿᑎᖅᑲᒥᒡᓗ ᑕᑭᓂᖃᕐᐳᖅ, ᐃᓴᕈᐊᑕ ᓄᕗᐊᓂᑦ ᐂᑉᐸᖓᑕ ᐃᓴᕈᐊᑕ ᓄᕗᐊᓄᑦ ᑎᑭᓪᓗᒍ 15ᓂᒃ ᐃᑎᒐᖕᓂᒃ ᑕᑭᓂᖃᕐᐴᒃ. 25ᓯᕈᐱᐅᑉ ᐂᑉᐸᖓ ᑕᑭᓂᖃᕐᐳᖅ 15ᓂᒃ; ᑕᒪᒃᑮᒃ ᓯᕈᐲᒃ ᐊᑦᔨᒌᖕᓂᒃ ᐊᖏᓂᖃᕐᐴᒃ ᑕᐅᑦᑐᖃᕐᓗᑎᒡᓗ ᐊᑦᔨᒌᖕᓂᒃ. 26ᐊᑐᓂᑦ ᑖᒃᑯᐊᒃ ᐊᑦᔨᒌᑦᓯᐊᖕᓂᒃ ᐊᖏᓂᖃᕐᐴᒃ ᐊᑐᓂᑦ ᐃᑎᒐᖕᓂᒃ 15ᓂᒃ. 27ᐃᓕᔭᐅᕗᒃ ᓴᓂᓕᕇᒃᑎᓪᓗᒋᒃ, ᐃᑦᔪᕐᓁᓐᓂᕐᐹᒥ; ᑖᒃᑯᐊ ᐃᓵᖓᒐᒥᒃ ᐊᒃᑐᐊᖃᑦᑕᐅᑎᕘᒃ ᐃᓴᕈᖏᒃᑕ ᓄᕗᖏᒃ, ᐃᓪᓗᐊᕈᓯᐅᑉ ᕿᑎᖓᓃᑉᐴᒃ ᐃᒡᓗᒌᖕᓄᑦ ᐃᓴᕈᒥ ᐊᑭᓐᓇᖅ ᐊᒃᑐᐊᓪᓗᒍ. 28ᑖᒃᑯᐊᒃ ᑕᒪᖏᒃ ᖄᓕᕐᓯᓪᒪᕘᒃ ᒎᓗᒥᒃ.
29ᑖᒃᑯᐊᒃ ᓇᔪᕐᑕᖓᑕ ᐃᓗᓕᒪᖓ, ᓴᓇᓐᖑᐊᕐᓯᒪᔪᖃᕐᐳᖅ ᐊᑭᓐᓇᓕᒫᖓ ᓯᕈᐱᓐᖑᐊᓂᒃ ᓇᐹᕐᑐᓐᖑᐊᓂᒡᓗ ᐹᒥᓂᒃ ᓄᓇᕋᓐᖑᐊᓂᒡᓗ ᐊᕙᒻᒧᖓᔪᓂᒃ, ᐃᒡᓗᐊᕈᓯᓕᒫᖏᑦ ᐃᓗᐊᒍᓪᓗ ᓯᓚᑖᒍᓪᓗ. 30ᐊᒻᒪ ᓇᑎᓕᒫᖓ ᒎᓗᒥᒃ ᖄᓕᕐᓯᒪᕗᖅ ᐃᓗᐊᓗ ᓯᓚᑖᓗ. 31ᐃᑎᕐᑕᕐᕕᖓ ᐃᑦᔪᕐᓁᓐᓂᕐᐹᒧᑦ ᐅᒃᑯᐊᖏᒃ ᒪᕐᕉᒃ ᓴᓇᓯᒪᕘᒃ ᕿᔪᖕᒥᒃ ᐊᓕᕕᑎᒥᑦ; ᐅᒃᑯᐊᖏᑕ ᖁᓛ ᐊᕙᓗᐊᓗ ᐊᔭᒍᑕᐅᔨᖓᕗᑦ ᐊᓂᖓᓪᓗᑎᒃ. 32ᐅᒃᑯᐊᖏᒃ ᕿᔫᒃ ᓴᓇᓐᖑᐊᕐᕕᒋᕚᒃ ᓯᕈᐱᓐᖑᐊᓂᒃ, ᓇᐹᕐᑐᓐᖑᐊᓂᒡᓗ ᐹᒥᓂᒃ, ᓄᓇᕋᓐᖑᐊᓂᒡᓗ ᐊᕙᒻᒧᖓᔪᓂᒃ; ᓯᕈᐱᓐᖑᐊᑦ, ᓇᐹᕐᑐᓐᖑᐊᑦ, ᐱᕈᕐᑐᓐᖑᐊᑦ; ᑕᒪᕐᒥᒃ ᖄᓕᕐᓯᒪᕗᑦ ᒎᓗᓂᒃ. 33ᐃᑎᕐᑕᕐᕕᖓᑕ ᐅᒃᑯᐊᕐᔪᐊᖏᑦ ᐃᓗᓪᓚᕆᐊᓄᑦ ᐅᒃᑯᐊᖓ ᐊᕙᓗᓯᒪᕗᖅ ᕿᔪᖕᒥᒃ ᐊᓕᕕᑎᒥᒃ ᓯᒃᑭᑕᓪᓗᐊᒥᒃ. 34ᒪᕐᕉᒡᓗ ᐅᒃᑯᐊᒃ ᐱᕆᑦᑕᔫᖑᓪᓗᑎᒃ ᕿᔫᕘᒃ ᓮᐳᕋᓯᐅᓪᓗᑎᒃ. 35ᖄᖏᑎᒍᑦ ᑕᑯᒥᓇᕐᓴᕐᓯᒪᓪᓗᑎᒃ ᓴᓇᓐᖑᐊᕐᓯᒪᔪᓂᒃ ᓯᕈᐱᐊᓐᖑᐊᓂᒃ, ᓇᐹᕐᑐᓐᖑᐊᓂᒡᓗ ᓄᓇᕋᓐᖑᐊᓂᒡᓗ, ᖄᓕᐅᕐᓯᒪᔪᐃᓐᓇᐅᓪᓗᑎᒃ ᒎᓗᓂᒃ. 36ᐃᓗᒻᒪᕆᐊ ᑲᑎᒪᕕᐅᑉ ᓴᓇᓯᒪᓗᓂ ᐹᕐᐸᓯᖓᓃᓪᓗᓂ ᐅᔭᕋᖕᓂᒃ ᓴᓇᓯᒪᔪᓂᒃ, ᐊᑭᓐᓇᓕᒫᖏᑦ ᕿᔪᖕᓂᒃ ᓰᑕᕆᓂᒃ ᕿᕋᑦᑕᖅᑯᑎᖃᕐᐳᑦ ᓱᑲᖏᓐᓂᒃ. 37ᓲᓗᒨᓂᐅᑉ ᐊᖓᔪᖅᑳᕐᔪᐊᖑᓂᖓᑕ ᓯᑕᒪᒋᓕᕐᑕᖓᓂ ᐊᑕᓂᐅᑉ ᐃᒡᓗᖓᑕ ᑐᓐᖓᕕᒃᓴᖓ ᐃᓕᔭᐅᓚᐅᕐᐳᖅ, ᑕᖅᑭᒥ ᔨᕝᕕᒥ. 38ᑕᖅᑮᑦ ᓯᑕᒪᐅᔪᕐᑐᖓᓂ, ᑕᖅᑭᒥ ᐴᓪᒥ, ᓲᓗᒨᓂᐅᑉ ᐊᐅᓚᑦᓯᓂᖓᑕ 11ᒋᓕᕐᑕᖓᓂ, ᐊᑕᓂᐅᑉ ᐃᒡᓗᖓ ᐱᔭᕇᕐᑕᐅᑦᓯᐊᓚᐅᕐᐳᖅ ᐃᓘᓐᓇᖓ, ᐸᕐᓇᒃᑕᐅᓂᕕᓂᖓ ᓈᒻᒪᓈᕐᑕᐅᑦᓯᐊᕐᓗᓂ. ᓲᓗᒨᓂᐅᑉ ᓴᓇᓚᐅᕐᐹ ᐊᕐᕌᒍᓂᒃ 7ᓂᒃ.
Currently Selected:
ᐊᑕᓃᑦ ᓯᕗᓪᓖᑦ 6: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
