ᐊᑕᓃᑦ ᓯᕗᓪᓖᑦ 5
5
ᓲᓗᒨᓂᐅᑉ ᐸᕐᓁᕐᓂᖓ ᑐᒃᓯᐊᕐᕕᒃᔪᐊᒥᒃ ᓴᓇᓂᒃᓴᒥᓂᒃ
ᑯᕉᓂᑲ ᐂᑉᐸᖏᑦ 2:1-18
1ᕼᐂᕋᒻ ᑍᕆᐅᑉ ᐊᖓᔪᖅᑳᕐᔪᐊᖓ ᐱᔨᒥᓂᒃ ᑎᓕᓯᓚᐅᕐᐳᖅ ᓲᓗᒨᓂᒧᑦ, ᑐᓴᕋᒥ ᓲᓗᒨᓂ ᐊᖓᔪᖅᑳᕐᔪᐊᓐᖑᕐᑎᑕᐅᖕᒪᑦ ᐊᑖᑕᒥᓂᒃ ᐃᓇᖐᓪᓗᓂ, ᕼᐂᕋᒥᐅᑉ ᑍᕕᑎ ᐃᓚᓐᓈᕆᓚᐅᕋᒥᐅᒃ. 2ᓲᓗᒨᓂ ᑐᓴᕐᑕᐅᖁᔭᒥᓂᒃ ᑍᕋᐅᑉ ᐊᖓᔪᖅᑳᕐᔪᐊᖓᓄᑦ ᐊᐅᓪᓚᕐᑎᑦᓯᕗᖅ ᕼᐂᕋᒻᒧᑦ ᐅᖃᕐᓗᓂ: 3“ᖃᐅᔨᒪᕗᑎᑦ ᐊᑖᑕᒐ ᑍᕕᑎ ᓴᓇᔪᓇᓚᐅᖏᒻᒪᑦ ᑐᒃᓯᐊᕐᕕᒡᔪᐊᒥᒃ ᐊᑕᓂᐅᑉ ᐊᑎᖓᓄᑦ ᒎᑎᒥᓄᑦ ᐅᓇᑕᖃᑦᑕᕐᓂᕐᒥᓄᑦ ᐊᑭᕋᕐᑐᕐᑎᒥᓂᒃ ᐊᕙᑎᒥᓃᑦᑐᓂᒃ, ᐊᑕᓂᐅᑉ ᓵᓚᖃᕐᑎᓚᐅᖏᓐᓂᓕᒫᖓᓂ. 4ᒫᓐᓇᓕ ᐊᑕᓂᐅᑉ ᒎᑎᒪ ᑐᓂᓯᕕᒋᖕᒪᖓ ᐅᓇᑕᕐᓂᖃᖏᑦᑐᒥᒃ, ᓄᓇᓕᒫᓐᓂ; ᒫᓐᓇ ᐊᑭᕋᖃᖏᑦᓯᐊᕋᒪ. ᐃᓱᒫᓗᓇᕐᑐᖃᕈᓐᓃᕐᓗᓂᓗ ᐅᕙᑦᑎᓐᓄᑦ. 5#ᓴᒧᐃᓕ ᐂᑉᐸᖏᑦ 7:12,13; ᑯᕉᓂᑲ ᓯᕗᓪᓖᑦ 17:11,12.ᑕᕝᕙ ᐃᓱᒪᖃᓕᕐᐳᖓ ᐃᒡᓗᓕᐅᕈᒪᓪᓗᖓ ᐊᑕᓂᐅᑉ ᒎᑎᒪ ᐊᑎᖓᓄᑦ, ᐊᑕᓂᖅ ᐊᑖᑕᓄᑦ ᑍᕕᑎᒧᑦ ᐅᖃᕐᓯᒪᖕᒪᑦ, ‘ᐃᕐᓃᑦ, ᑖᓐᓇ ᐊᖓᔪᖅᑳᕐᔪᐊᕈᑎᓛᑕᕋ ᐃᓂᒋᔭᕐᓄᑦ, ᑖᑦᓱᒪ ᐃᒡᓗ ᐊᑎᕐᒪ ᐃᓂᒃᓴᖓ ᓴᓇᔪᒫᕐᐹ.’ 6ᑍᒤᒻᒪᑦ ᑎᓕᓯᖁᕙᒋᑦ ᐊᖑᑎᓂᒃ ᓕᐸᓇᓂᒧᑦ ᓇᐹᕐᑐᓂᒃ ᓰᑕᕆᓂᒃ ᓇᑲᑎᕆᖁᔨᓕᕆᑦ ᐅᕙᓐᓄᐊᕐᑐᒃᓴᓂᒃ, ᐱᔨᒃᑲ ᑖᒃᑯᓂᖓ ᐃᑲᔪᕐᓂᐊᕐᐳᑦ, ᓴᓇᔨᖁᑎᑎᑦ ᐊᑭᓕᓛᕐᐸᒃᑲ ᐊᑭᒋᔭᐅᖁᔭᕐᓂᒃ; ᖃᐅᔨᒪᑦᓯᐊᕋᕕᑦ ᐅᕙᑦᑎᓐᓂᑦ ᐱᓯᒪᔪᑦ ᓇᓪᓕᕐᓯᔪᓐᓇᖏᒻᒪᑕ ᓮᑐᓂᒥᐅᑦ ᕿᔪᓕᕆᔨᖏᓐᓂᒃ ᕿᔪᖕᓂᒃ ᓇᑲᑎᕆᓗᑎᒃ.”
7ᕼᐂᕋᒻ ᐱᒐᒥ ᓲᓗᒨᓂᐅᑉ ᑐᓴᕐᑕᐅᖁᔭᖓᓂᒃ ᐊᖏᔪᒥᒃ ᖁᕕᐊᓲᑎᒋᕚ ᐅᖃᕐᓗᓂᓗ, “ᐊᑕᓂᖅ ᓂᕐᑐᕐᑕᐅᓕ ᐅᓪᓗᒥ, ᑍᕕᑎ ᐃᕐᓂᖃᕐᓂᕐᒪᑦ ᓯᓚᑐᔪᒥᒃ ᐃᓇᖏᕐᑎᒋᓂᐊᕐᑕᖓᓂᒃ ᐊᖓᔪᖅᑳᕐᔪᐊᖑᓗᓂ ᐃᓅᖃᑎᒌᒡᔪᐊᓂᒃ ᐃᓄᒋᐊᒃᑐᕐᔪᐊᓂᒃ!” 8ᕼᐂᕋᒻ ᓲᓗᒨᓂᒧᑦ ᑭᐅᑦᔪᑎᖓ ᐃᒪᓕᕗᖅ: “ᐱᕙᒃᑲ ᑎᑎᕋᕐᑕᑎᑦ, ᒫᓐᓇ ᐅᐸᓗᖎᕐᓯᒪᑦᓯᐊᕐᐳᖓ ᐱᒋᐊᕈᓐᓇᕐᓗᖓ ᐱᔪᒪᔭᕐᓂᒃ ᓇᐸᕐᑐᓂᒃ ᑐᓂᓂᐊᕐᐸᒋᑦ ᓰᑕᕆᓂᒃ ᓇᐹᕐᑐᓂᒡᓗ ᐰᓐᓂᒃ. 9ᓴᓇᔨᖁᑎᒪ ᓇᐹᕐᑐᐃᑦ ᓕᐸᓇᓂᐅᑉ ᑕᕆᐅᖓᓄᐊᕈᑎᓂᐊᕐᐰᑦ ᐃᒥᖕᓄᑦ ᕿᓚᓱᕐᓗᒋᑦ, ᐳᒃᑕᓛᕐᓗᑎᒃ ᑐᓚᕕᒋᔭᐅᖁᔭᕐᓄᑦ ᓄᓈᕐᑎᑕᐅᔪᒫᕐᒪᑕ, ᑕᕝᕙᓂ ᓴᓇᔨᖁᑎᒃᑲ ᕿᓚᕈᑦᔮᕐᑎᕆᔭᕇᑐᐊᕈᑎᒃ ᓴᓇᔨᖁᑎᖕᓅᑦ ᑐᓂᓯᒐᔭᕐᒪᑕ ᑖᒃᑯᐊ ᑲᒪᖔᕐᑎᓕᕐᓗᒋᑦ; ᐱᔪᒪᔭᖃᕐᐳᖓ ᐃᓕᖕᓂᑦ ᐊᖓᔪᖅᑳᕐᔪᐊᖃᕐᕕᖕᒥ ᐃᒡᓗᒥᐅᖃᑎᒃᑲ ᓂᕿᒃᓴᕐᑖᕐᑎᑕᐅᖁᓪᓗᒋᑦ.” 10ᑍᒤᒻᒪᑦ ᕼᐂᕋᒻ, ᓲᓗᒨᓂᒧᑦ ᐊᐅᓪᓚᕐᑎᑦᓯᕗᖅ ᓇᐹᕐᑐᓂᒃ ᓰᑕᕆᓂᒃ, ᐊᒻᒪᓗ ᓇᐹᕐᑐᓂᒃ ᐰᓐᓂᒃ ᐱᔪᒪᔭᓕᒫᖏᓐᓂᒃ, 11ᓲᓗᒨᓂ ᑐᓂᓯᖕᒥᑎᓪᓗᒍ ᕼᐂᕋᒻᒧᑦ 20,000ᓂᒃ ᐅᖁᒤᓐᓂᖃᕐᑐᓂᒃ ᐊᖓᔪᖅᑳᕐᔪᐊᖃᕐᕕᐅᑉ ᓂᕿᒃᓴᖏᓐᓂᒃ 20,000ᓂᒃ ᐅᖁᒤᓐᓂᖃᕐᑐᓂᒃ, ᐸᐅᕐᖎᑦ ᐅᕐᓱᖏᓐᓂᒃ ᓯᖃᓪᓕᓪᓗᒋᑦ ᐅᕐᓱᓕᐊᕆᓯᒪᔪᓂᒃ ᑐᓂᓯᖃᑦᑕᓚᐅᕐᐳᖅ ᐊᕐᕌᒍᑕᒫᑦ.
12ᐊᑕᓂᐅᑉ ᓲᓗᒨᓂ ᑐᓂᓚᐅᕐᒪᒍ ᓯᓚᑐᓂᕐᒥᒃ, ᑍᒫᒃ ᐊᖏᕐᕕᒋᓯᒪᒐᒥᐅᒃ; ᐊᑭᕋᕐᑑᑎᓂᕐᑕᖃᓚᐅᓐᖏᓚᖅ ᕼᐂᕋᒻ ᓲᓗᒨᓂᐅᓪᓗ ᐊᑯᓐᓂᖓᓂ; ᐃᒻᒥᖕᓄᑦ ᐊᖏᖃᑎᒌᑦᓯᐊᕐᓯᒪᓪᓗᑎᒃ.
13ᐊᖓᔪᖅᑳᕐᔪᐊᖅ ᓲᓗᒨᓂ ᑎᓕᓯᕗᖅ 30,000ᓂᒃ ᐊᖑᑎᓂᒃ ᓴᓇᔪᒃᓴᓂᒃ, ᐊᑭᓕᕐᓱᕐᑕᐅᒐᑎᒃ ᐱᓇᓱᐊᕐᓂᐊᕐᑐᓂᒃ ᐃᓴᕆᐊᓕᑎᑦ ᓄᓇᓕᒫᖓᓂᑦ, 14#ᐊᑕᓃᑦ ᓯᕗᓪᓖᑦ 12:18.ᑖᒃᑯᐊᓗ ᑎᓕᕔᑦ ᓕᐸᓇᓂᒧᑦ, 10,000ᐃᑦ ᑕᖅᑭᒥᒃ ᐊᑕᐅᓯᕐᒥᒃ ᓕᐸᓇᓂᒦᑉᐸᒃᓗᑎᒃ ᑕᖅᑮᖕᓂᒡᓗ ᒪᕐᕉᖕᓂᒃ ᐊᖏᕐᕋᕐᓯᒪᕙᒃᓗᑎᒃ ᑭᖑᕝᕕᕐᑕᕐᑎᒌᒃᓗᑎᒃ; ᐊᑐᓁᕌᒻ ᐊᖓᔪᖅᑳᕆᔭᐅᓪᓗᓂ ᑖᒃᑯᓄᖓ. 15ᓲᓗᒨᓂ 70,000ᓂᒃ ᐊᒡᔭᕐᑐᕐᑎᖃᕐᐳᖅ 80,000ᓂᒡᓗ ᐊᕕᒃᑐᐃᔪᓂᒃ ᐅᔭᕋᖕᓂᒃ ᐲᔧᔨᖃᕐᓗᓂ ᐱᖑᖃᐅᕐᑐᒥ, 16ᓲᓗᒨᓂ ᐊᖓᔪᖅᑳᖁᑎᖃᓚᐅᕐᐳᖅ 3,300ᓂᒃ ᓴᓇᔪᑦ ᑲᒪᔨᖏᓐᓂᒃ, ᑖᒃᑯᐊᓗ ᐊᖓᔪᖅᑳᓐᖑᓚᐅᕐᐳᑦ ᓴᓇᔪᓄᑦ. 17ᐊᖓᔪᖅᑳᕐᔪᐊᑉ ᐱᖁᔨᓂᖓ ᒪᓕᒡᓗᒍ ᐅᔭᕅᑦ ᐱᐅᔪᒻᒪᕆᐊᓗᐃᑦ ᐲᔭᕐᑕᐅᓚᐅᕐᐳᑦ, ᐊᑭᑐᔪᐊᓗᐃᑦ ᑐᒃᓯᐊᕐᕕᒡᔪᐊᑉ ᑐᓐᖓᕕᒃᓴᖏᑦ ᓴᓇᓯᒪᖁᓪᓗᒋᑦ ᐅᔭᕋᖕᓂᒃ ᓴᓇᑦᓯᐊᕐᓯᒪᔪᓂᒃ. 18ᓲᓗᒨᓂᐅᑉ ᕼᐂᕋᒻᓗ ᓴᓇᔨᖁᑎᖏᑦ ᐃᒡᓗᒐᓴᖕᓂ ᒋᐸᐅᓕᒥᐅᑍᑦ ᐅᔭᕋᒃᔪᐊᓂᒃ ᐋᖅᑭᒃᓱᐃᕗᑦ ᐱᐅᔪᒻᒪᕆᖕᓂᒃ ᕿᔪᖕᓂᒡᓗ ᑐᒃᓯᐊᕐᕕᒡᔪᐊᒧᑦ ᐃᓚᒋᔭᐅᓂᐊᕐᑐᓂᒃ.
Currently Selected:
ᐊᑕᓃᑦ ᓯᕗᓪᓖᑦ 5: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
