ᔪᐊᓇᓯ ᓯᕗᓪᓖᑦ 2

᙭ᔅᑑᓯ ᐃᑲᔪᕐᑎᕗᑦ

1ᕿᑐᕐᖔᑯᓗᒃᑲ, ᑕᒪᒃᑯᓂᖓ ᑎᑎᕋᕐᕕᒋᕙᑦᓯ ᐊᔪᕐᑐᓕᖁᓇᓯ; ᐊᔪᕐᑐᓕᔪᖃᕐᐸᓪᓕ, ᑐᒃᓯᐅᑦᔨᔨᖃᕐᐳᒍᑦ ᐊᑖᑕᒥ, ᑕᕝᕙ ᔩᓱᓯ ᙭ᔅᑑᓯᒥᒃ ᐱᐅᔪᑐᐊᖑᔪᒥᒃ; 2ᑖᓐᓇᓗ ᐊᖅᑯᑎᒃᓴᑑᕗᖅ ᐊᔪᕐᓂᑦᑕ ᐃᓱᒪᒋᔪᓐᓁᕐᑕᐅᑦᔪᑎᒃᓴᖏᓐᓄᑦ, ᐅᕙᒍᑑᖏᑦᑐᕐᓕ ᓯᓚᕐᔪᐊᕐᒥᐅᓪᓕ ᑕᒪᕐᒥᒃ ᐊᔪᕐᓂᖏᑦ ᐱᓪᓗᒋᑦ.

3ᐱᖁᔭᖏᑦ ᓈᓚᑯᑦᑎᒍ ᖃᐅᔨᒪᑦᔪᑎᒋᔪᓐᓇᕐᐸᕗᑦ ᑖᑦᓱᒥᖓ ᖃᐅᔨᒪᔭᖃᑦᓯᐊᕐᓂᑦᑎᓐᓂᒃ. 4ᓇᓪᓕᐊᑦ ᑖᑦᓱᒥᖓ ᖃᐅᔨᒪᓂᕋᕐᐸᑦ, ᐱᖁᔭᖏᓐᓂᒡᓗ ᒪᓕᖏᓪᓗᓂ ᑖᓐᓇ ᓴᒡᓗᑐᔫᕗᖅ, ᓱᓕᔪᒧᓪᓗ ᓇᔪᕐᑕᐅᓇᓂ. 5ᐅᖃᐅᓯᖓᓂᒡᓕ ᒪᓕᒃᑐᖅ, ᑖᓐᓇᐅᕗᖅ ᒎᑎᒧᑦ ᓇᒡᓕᒍᓱᖕᓂᖓ ᓈᒻᒪᑦᓯᐊᕐᓂᐊᕐᐳᖅ. ᑍᒫᒃ ᑕᑉᕙ ᖃᐅᔨᒪᑦᔪᑎᒋᕙᕗᑦ ᑖᑦᓱᒪᓃᓂᑦᑎᓐᓂᒃ: 6ᓇᓪᓕᐊᑦ ᑖᑦᓱᒪᓃᓂᕋᕐᑐᖅ ᐃᓅᔪᒃᓴᐅᕗᖅ ᑖᑦᓱᒪ ᐃᓕᖅᑯᓯᕆᓚᐅᕐᑕᖓᑐᑦ.

ᐱᖁᔭᖅ ᓄᑖᖅ

7 # ᔪᐊᓇᓯ 13:34. ᓇᒡᓕᒋᔭᒃᑲ, ᐱᖁᔭᖅ ᐃᓕᑦᓯᓐᓄᑦ ᑎᑎᕋᐅᓯᕆᔭᕋ ᓄᑖᖑᓐᖏᓚᖅ, ᐱᖁᔭᑐᖃᐅᕗᖅ ᐱᒋᐊᕐᓂᖓᓂᑦ ᐱᓯᒪᔭᓯ; ᐱᖁᔭᖅ ᑐᓴᕐᓯᒪᔭᑐᖃᕆᔭᓯ. 8ᑍᒤᒻᒪᑦ ᐱᖁᔭᒥᒃ ᓄᑖᒥᒃ ᑎᑎᕋᕐᕕᒋᓕᕐᐸᑦᓯ, ᓱᓕᓂᖓ ᓴᖅᑭᑎᑕᐅᖕᒪᑦ ᙭ᔅᑑᓯᒥ ᐃᓕᑦᓯᓐᓂᓗᑦᑕᐅᖅ, ᑖᕐᑐᕐᔪᐊᖅ ᐊᓂᒍᕐᒪᑦ ᖃᐅᒪᔪᕐᓗ ᓱᓕᔪᖅ ᖃᐅᒪᑎᑦᓯᓕᕇᕐᐳᖅ.

9ᓇᓪᓕᐊᑦ ᖃᐅᒪᔪᒦᓐᓂᕋᕐᓗᓂ ᐅᖃᕐᐸᑦ ᐃᓅᖃᑎᒥᓂᒡᓗ ᐆᒥᓱᒡᓗᓂ ᑖᓐᓇ ᓱᓕ ᑖᕐᑐᒦᖏᓐᓇᕐᐳᖅ. 10ᓇᓪᓕᐊᑦ ᐃᓅᖃᑎᒥᓂᒃ ᓇᒡᓕᒍᓱᒃᑐᖅ ᑖᓐᓇ ᖃᐅᒪᔪᒦᑉᐳᖅ, ᑕᕝᕙᓂᓗ ᐃᓅᖃᑎᒥᓄᑦ ᐊᒡᕕᐊᕈᑎᒃᓴᐅᓇᓂ. 11ᐃᓅᖃᑎᒥᓂᒡᓕ ᐆᒥᓱᒃᑐᖅ ᑖᓐᓇ ᑖᕐᑐᒦᑉᐳᖅ ᑖᕐᑐᒥᓗ ᐃᓅᓪᓗᓂ, ᓇᒧᖓᐅᖕᒪᖔᕐᒥᓗ ᖃᐅᔨᒪᓇᓂ, ᑖᕐᑐᒧᑦ ᐃᔨᖏᒃ ᑕᑯᓐᓇᕐᑎᑕᐅᖏᒻᒪᑎᒃ.

12ᕿᑐᕐᖔᐱᒃᑲ, ᑎᑎᕋᕐᕕᒋᕙᑦᓯ, ᐊᔪᕐᓂᓯ ᐃᓱᒪᒋᔪᓐᓁᕐᑕᐅᓯᒪᖕᒪᑕ ᙭ᔅᑑᓯ ᐱᑦᔪᑎᒋᓪᓗᒍ. 13ᐊᑖᑕᐅᔪᓯ, ᑎᑎᕋᕐᕕᒋᕙᑦᓯ, ᑖᓐᓇ ᖃᐅᔨᒪᒐᑦᓯᐅᒃ ᐱᒋᐊᕐᓂᖓᓂᑦ ᐱᑕᕾᓐᓇᓚᐅᕐᑐᖅ. ᐃᓅᓱᒃᑑᔪᓯ ᑎᑎᕋᕐᕕᒋᕙᑦᓯ, ᑖᓐᓇ ᓵᓚᒋᓯᒪᒐᑦᓯᐅᒃ ᐱᐅᖏᑦᑐᐊᓗᒃ. ᕿᑐᕐᖓᒃᑲ ᑎᑎᕋᕐᕕᒋᕙᑦᓯ, ᐊᑖᑕ ᖃᐅᔨᒪᒐᑦᓯᐅᒃ.

14ᐊᑖᑕᐅᔪᓯ ᑎᑎᕋᕐᕕᒋᓚᐅᕐᐸᑦᓯ, ᑖᓐᓇ ᖃᐅᔨᒪᒐᑦᓯᐅᒃ ᐱᒋᐊᕐᓂᖓᓂᑦ ᐱᑕᕾᓐᓇᓚᐅᕐᑐᖅ. ᐃᓅᓱᒃᑑᔪᓯ ᑎᑎᕋᕐᕕᒋᓚᐅᕐᐸᑦᓯ, ᐱᔪᓐᓇᕐᓂᖃᑦᓯᐊᕋᑦᓯ, ᒎᑎᐅᓪᓗ ᐅᖃᐅᓯᖓ ᐃᓗᑦᓯᓐᓃᒻᒪᑦ, ᐱᐅᖏᑦᑐᐊᓗᒡᓗ ᓵᓚᒋᓯᒪᒐᑦᓯᐅᒃ.

15ᓯᓚᕐᔪᐊᕐᒥᒃ ᓇᒡᓕᒍᓱᖕᓂᐊᕋᓯ ᓯᓚᕐᔫᑉ ᐱᖏᓐᓂᒡᓘᓐᓃᑦ. ᓇᓪᓕᐊᑦ ᓯᓚᕐᔪᐊᕐᒥᒃ ᓇᒡᓕᒍᓱᒃᑐᖅ, ᐊᑖᑕᒥᒃ ᓇᒡᓕᒍᓱᓐᖏᓚᖅ. 16ᒪᑯᐊ ᑕᕝᕙ ᓯᓚᕐᔪᐊᕐᒦᑦᑐᑦ, ᑎᒥᐅᑉ ᐃᒃᖠᒎᕐᓂᖏᑦ ᑕᑯᔭᒃᑯᑦ ᐱᔪᒪᔭᖃᓗᐊᕐᓃᑦ ᐃᓅᓯᒃᑯᓪᓗ ᐊᔪᖏᓐᓇᓱᒋᓗᐊᕐᓃᑦ, ᑕᒪᒃᑯᐊ ᐊᑖᑕᒥᑦ ᐱᓐᖏᓚᑦ ᓯᓚᕐᔪᐊᕐᒥᓪᓕ ᐱᕗᑦ. 17ᓯᓚᕐᔪᐊᖅ ᓄᖑᔪᒫᕐᐳᖅ, ᐃᒃᓯᒎᕐᓃᓪᓗ ᓄᖑᔪᒫᕐᐳᑦ; ᒎᑎᐅᓪᓕ ᐱᔪᒪᔭᖓᓂᒃ ᐊᑐᕐᑐᖅ ᑖᓐᓇ ᐃᓱᖃᖏᑦᑐᒧᑦ ᐃᓅᔪᒫᕐᐳᖅ.

᙭ᔅᑑᓯᒥᒃ ᐊᑭᕋᕐᑐᕐᑐᖅ

18ᕿᑐᕐᖓᒃᑲ, ᓯᓚᕐᔫᑉ ᓇᒡᒐᑎᒃᓴᖓ ᓇᓪᓕᐅᑎᓕᕐᐳᖅ; ᑐᓴᐅᒪᒐᑦᓯᓗ ᙭ᔅᑑᓯᒥᒃ ᐊᑭᕋᕐᑐᕐᑐᖅ ᑎᑭᓐᓂᐊᕐᓂᕋᕐᑕᐅᑎᓪᓗᒍ, ᒫᓐᓇᓕ ᙭ᔅᑑᓯᒥᒃ ᐊᑭᕋᕐᑐᕐᑐᑦ ᑎᑭᓯᒪᓕᕐᐳᑦ; ᑍᒤᒻᒪᑦ ᖃᐅᔨᒪᓕᕐᐳᒍᑦ ᓯᓚᕐᔫᑉ ᓇᒡᒐᑎᒃᓴᖓ ᓇᓪᓕᐅᑎᓕᕐᒪᑦ. 19ᑖᒃᑯᐊ ᐅᕙᑦᑎᓐᓂᒃ ᕿᒤᕗᑦ, ᐃᓚᒋᔭᐅᓪᓚᕆᒃᓯᒪᖏᓐᓇᒥᒃ; ᐅᕙᑦᑎᓐᓄᑦ ᐃᓚᒋᔭᐅᓪᓚᕆᒃᓯᒪᒍᑎᒃ, ᐃᓚᐅᖏᓐᓇᕋᔭᓚᐅᕐᐳᑦ; ᕿᒤᓯᒪᕗᓪᓕ, ᓇᓗᓇᕈᓐᓁᖁᓪᓗᒋᑦ ᐅᕙᑦᑎᓐᓄᑦ ᐃᓚᒋᔭᐅᓪᓚᕆᒃᓯᒪᖏᓐᓂᖏᓐᓂᒃ.

20ᐃᓕᑦᓯᓕ ᐃᓗᒻᒥᕐᑕᐅᓯᒪᕗᓯ ᐃᑦᔪᕐᓁᑦᑐᒧᑦ,#2:20 ᐃᑦᔪᕐᓁᑦᑐᒧᑦ ᐅᕝᕙᓗ ᙭ᔅᑑᓯᒧᑦ ᑕᒪᑦᓯᓗ ᖃᐅᔨᓯᒪᓕᕐᓗᓯ. 21ᑍᒤᒻᒪᑦ ᑎᑎᕋᕐᕕᒋᕙᑦᓯ, ᓱᓕᓂᕐᒥᒃ ᖃᐅᔨᒪᖏᓐᓂᓯ ᐱᑦᔪᑎᒋᓇᒍ, ᖃᐅᔨᒪᒐᑦᓯᐅᒡᓕ, ᖃᐅᔨᒪᓪᓗᓯᓗ ᓱᓕᓐᖏᑦᑐᖅ ᓱᓕᓂᕐᒥᑦ ᐱᓯᒪᖏᒻᒪᑦ.

22ᑭᓇᓖ ᑍᒪ ᓴᒡᓗᑐᕙ ᑖᓐᓇᐅᕗᖅ ᓇᓪᓕᐊᑦ ᔩᓱᓯᒥᒃ ᙭ᔅᑑᓯᐅᖏᓐᓂᕅᔪᖅ?#2:22 ᙭ᔅᑑᓯᐅᖏᓐᓂᕅᔪᖅ ᐅᕝᕙᓗ ᒥᓮᐊᓯᐅᖏᓐᓂᕅᔪᖅ ᑖᓐᓇᐅᕗᖅ ᑕᕝᕙ ᙭ᔅᑑᓯᒥᒃ ᐊᑭᕋᕐᑐᕐᑐᖅ, ᐊᑖᑕᒥᒡᓗ ᐃᕐᓂᕐᒥᒡᓗ ᖃᐅᔨᒪᖏᓐᓂᕋᕐᑐᖅ. 23ᓇᓪᓕᐊᑦ ᐃᕐᓂᕐᒥᒃ ᖃᐅᔨᒪᖏᓐᓂᕋᕐᑐᖅ ᐊᑖᑕᒥᒃ ᐱᖃᓐᖏᓚᖅ; ᓇᓪᓕᐊᓪᓕ ᐃᕐᓂᕐᒥᒃ ᐃᓚᓕᐅᕐᓯᔪᖅ ᐊᑖᑕᒥᒃ ᐱᖃᕆᕗᖅ.

24ᐱᒋᐊᕐᓂᖓᓂᑦ ᑐᓴᕐᓯᒪᔭᓯ ᐃᓕᑦᓯᓃᖏᓐᓇᕐᓕ. ᐱᒋᐊᕐᓂᖓᓂᑦ ᑐᓴᕐᓯᒪᔭᓯ ᐱᓯᒤᓐᓇᕈᑦᓯᐅ, ᑕᕝᕙ ᐃᕐᓂᕐᒦᖏᓐᓇᕐᓂᐊᕐᐳᓯ ᐊᑖᑕᒦᓪᓗᓯᓗ 25ᑕᒪᓐᓇ ᑕᕝᕙ ᑐᓂᓂᐊᕐᓂᕋᕐᓯᒪᔭᖓ ᐅᕙᑦᑎᓐᓄᑦ ᐃᓅᓯᖅ ᓄᖑᓱᐃᑦᑐᖅ.

26ᑕᒪᒃᑯᓂᖓ ᑎᑎᕋᕐᕕᒋᕙᑦᓯ ᐃᓕᑦᓯᓐᓂᒃ ᑕᒻᒪᕐᑎᑦᓯᓇᓱᐊᕐᑐᑦ ᐱᑦᔪᑎᒋᓪᓗᒋᑦ. 27ᐃᓕᑦᓯᓕ, ᑖᑦᓱᒪᓐᖓᑦ ᐅᕐᓱᕐᑎᕐᑕᐅᓯᒪᓂᓯ ᐱᓯᒤᓐᓇᕈᑦᓯᐅᒃ, ᑭᓇᒧᓪᓘᓃᑦ ᐊᔪᕆᕐᑐᕐᑕᐅᔭᕆᐊᖃᕋᔭᓐᖏᓚᓯ. ᑖᑦᓱᒪᓕ ᐅᕐᓱᕐᑎᑕᐅᓯᒪᓂᑦᓯ ᐊᔪᕆᕐᓱᒐᕆᓕᕐᒪᓯ ᓱᓇᑐᐃᓐᓇᕐᓂᒃ, ᑕᒪᓐᓇᓗ ᓱᓕᓪᓗᓂ, ᓴᒡᓗᓂᕐᑕᖃᕋᓂᓗ; ᐊᔪᕆᕐᓲᕐᑎᒋᓯᒪᒐᑦᓯᐅᒃ ᑖᑦᓱᒪᓃᖏᓐᓇᓕᕆᑦᓯ.

28ᒫᓐᓇᓗ ᕿᑐᕐᖓᒃᑲ, ᑖᑦᓱᒪᓃᑦᓮᓐᓇᕆᑦᓯ, ᑖᓐᓇ ᓴᖅᑭᑉᐸᑦ ᓯᕘᕋᑦᔪᑎᒃᓴᖃᖁᓇᑕ ᑲᓐᖑᓲᑎᒃᓴᖃᖁᓇᑕᓗ ᑖᑦᓱᒪ ᑎᑭᕝᕕᐊᓂ. 29ᖃᐅᔨᒪᒍᑦᓯ ᑭᓇᒧᓪᓘᓐᓃᑦ ᐃᓗᐊᕐᑑᓂᖓᓂᒃ, ᑕᕝᕙ ᖃᐅᔨᒪᒋᕗᓯ ᑭᒃᑯᓕᒫᑦ ᐃᓗᐊᕐᑐᒥᒃ ᐱᓇᓱᐊᕐᑐᑦ ᑖᑦᓱᒪᖓᑦ ᐃᕐᓂᐊᖑᓯᒪᖕᒪᑕ.

Currently Selected:

ᔪᐊᓇᓯ ᓯᕗᓪᓖᑦ 2: EAIB

Highlight

Copy