Matiye 9
9
Yeesu poozi há̧a̧ kɔkrɔk akka
Mar 2:1-12; Luk 5:17-26
1Yeesu hiŋ kɔmballe, ɗaa lɛkkɔ tak o kare. 2Náa ve panzay kɔkrɔk ak zɔʼ kiŋnaŋŋe. Yeesu fee ka hə̧ si̧i̧ tu̧u̧ von ɛnɔ kəzəkkɔ, o feeza kɔkrɔk akkɔ: «Mɔ so si̧i̧rɛ tân min, hɛn ɓɛɛ mɔn ve hoozi ma!» 3Náa it Moyi̧zə moò buu an zɔʼ ve vəʼə o ve si̧i̧ba: «Wa̧y ɛn de zɛɛra Go̧o̧gey#9:3 Vo goozin vere Lɛvitk 24:16!» 4Yeesu gaa hɛn ve vəʼə nɔrɛ kə feet vo: «Hɛ̧ɛ̧n kɔ vo ɛ moò vəʼəra ɓɛɛ ɛn ve nɔ nɛɛ? 5Hɛ̧ɛ̧n poo fee tin nɛɛ? “Hɛn ɓɛɛ mɔn ve hoozi ma nɛyrɛɛ” ha̧a̧rɔɔ fee gɔɔ: “Mɔ luu gǎŋ mɔ emmɛ nɛyrɛ”? 6Ɛn mi hi̧i̧ vo gaa: Há̧a̧ tân an bo ɛ de gɔti hɛn ɓɛɛ hoozii hɛkpa tɛɛ yɔ.» O feeza kɔkrɔk akkɔ: «Mɔ luu gǎŋ mɔ iŋ kiŋnaŋ mɔn tin mɔ kə um kàa!» 7Wa̧y nɔ luu gǎŋ kə luu o kàa. 8Náa ve hə̧ ɛnɔ, dòo kɔ vorɛ ɛn ve gbəŋ Go̧o̧ge po há̧a̧ ve gɔti yəəm too ɛnɔmmɛy.
Yeesu ya̧a̧ Matiyey
Mar 2:13-17; Luk 5:27-32
9Yeesu luu ɛtuu nɔ, o daa hə̧ há̧a̧ zɔʼ nii an Matiyey oy zɔɔri yɛɛ sɔŋ zɔmɔgɔl ba. O feeza: «Mɔ òo mii!» Matiye luu òorarɛ. 10Yeesu de lɛra lɛm Matiye o kàa; náa sɔŋ zɔmɔgɔl ve duʼza̧a̧ vere náa zɔʼ kɔll hɛn ɓɛɛ ak vɛ ve yaa zɔɔ lɛgi vo daŋ, oy vega kaam an vɛʼ. 11Náa Farize ve hə̧ ɛnɔ ve kə feeza Yeesu kaam an vɛ: «Hɛ̧ɛ̧n kɔ wa̧y it hɛn von de lɛgaa lɛm vega náa sɔŋ zɔmɔgɔl vɛ vere náa kɔll hɛn ɓɛɛ ak ve yɛɛ daŋŋɔ nɛɛ#9:11 Vo goozin 10-11 vere Luk 15:1-2 ?» 12Yeesu kii hɛn ve fee nɔ kə fee: «Náa ve ɛ de fo̧o̧ za̧a̧ nɔ kǎn vo vere há̧a̧ yoon ho̧o̧ ak yɛ, ɛn ka de náa ho̧o̧ akkɔ vey. 13Vo tak goksi moò gbǐn Go̧o̧ge yak moot an nɛnɔ oppo nɛy: “Mi hi̧i̧ de sosinna ɛn paam maak gokka oy yɛ#9:13 Vo to Ooze 6:6”, ɛnɔ mi yaani kay ya̧a̧ náa vey vəʼəra bo ba za̧ǎ̧ nɔ vey yɛ, ɛn mi yaay kay ya̧a̧ náa ve gaa bo ba ɓɛɛ̌ nɔ vey.»
Yeesu moo hɛn kɛ̧ɛ̧ moǒ
Mar 2:18-22; Luk 5:33-39
14Zâŋ Batîs kaam an ve diŋ yaa Yeesu o hɛge ve viʼi: «Hɛ̧ɛ̧n kɔ gɔɔ vin viga náa Farize vɛ yɛɛ zɔʼ vii kɛ̧ɛ̧rɛ, mɔn kaam mɔn ve kɛ̧ɛ̧nɛ nɔ moò nɛɛ?» 15Yeesu hiit vo: «Voy tu̧u̧ nɔ náa ve ya̧a̧ vo duʼ ɓasin yɛɛre nɔ kaà ve kan ɓeksumme wa̧y ɓa waà nɔ oy o ve tiŋza̧a̧re keto nɔ opporɛrɛ? Paam ɛŋgɔ yɛ! Ɛn yo̧o̧n de gbɔy tuu vey iŋŋa wiì nɔrɛ; ɛnɔ vey kɛ̧ɛ̧ ze. 16Há̧a̧ kaà maʼtin sam fə̧ə̧k vere sam pəŋ yɛ; Ɛnɔ sam pəŋɔ kaà de dinna sam fə̧ə̧kɔ kaà de ta̧a̧ lallaa. 17Há̧a̧ kaà aan bum ɓɛ̧ɛ̧k pɛɛk fə̧ə̧ke yɛ; oò ɛŋgɔ nɔ pɛɛkɔ kaà de kpəraa, bummɔ kaà de wɛtta hɛge ɛn pɛɛkɔ leerɛ. Oò za̧ǎ̧ nɔ kaà ve aa bum ɓɛ̧ɛ̧k pɛɛk pəŋŋe te ɛn de kanna za̧a̧za̧a̧ ze.»
Yeesu niŋzi kɛŋ Yuuda zɔʼ tân kep an vɔɔ̌ yɛɛre vere waà kep zɔʼ so̧o̧ yeesu sam yak ani
Mar 5:21-43; Luk 8:40-56
18Yeesu bɔk de moo ɛn dɔmmɔ, kɛŋ zɔ Yuuda yaa ɗiksi o timba kə fee: «Tân kěp min key vɔra ɛnɔ ɓɔllɛ; ɛn mɔ yaarɛ, mɔ goʼza naak mɔn o wɔɔkpa de za̧a̧ kəra.» 19Yeesu luu vega kaam an ve daŋ ve òorarɛ. 20Waà kěp zɔ bɔk de yȩʼginna ho̧ò̧ mɛɛ̀m lekkaa kɔ vɛll boʼzoo itto, o diŋ yaa Yeesu o hɛge toŋ piki kə so̧o̧ sam yak ani. 21Ɛnɔ o vəʼə: «kaày hak so̧o̧ sam yak ani zaʼ si̧ʼ, ho̧ò̧ min de pooyyaa.» 22Yeesu fill tò waà kěppɔ kə fee: «Mɔ so si̧ǐ̧, tân min! Si̧i̧ tu̧u̧ mɔn poozummà#9:22 Poozummà ongɛɛ sɔzummà. .» Ɛn ɛtuu vin, waà keppɔ pooorɛ. 23Yeesu gbɔ kɛŋ Yuuda nɔ o kàa ma. O hə̧ náa bi̧i̧ hɛn vey gakka vɔɔ ləə ɛn náa ve duʼza̧a̧ vey kəlsinna wɔɔk gbatta za̧a̧, 24Yeesu feet vo: «Vo vuk ɛtɛɛrɛ, ɛnɔ tân kěppɔ o vɔnnɛ, oy nəmme.» Ɛn ve zàarɛ. 25Ve fee ka ve vuksi náa duʼ nɔ ve gɔn kəzəkkɔ, Yeesu dɔ tak liki tuu, o so tân kěp waa nɔ naakpa ɛn tân kěp waa nɔ luu bɛlba. 26Moò ɛnɔ wɛksi hɛkpa tuu sɛw tɛʼ.
Yeesu poozi yə̧ə̧̀ ve itto
27Yeesu de luura ɛtuu nɔ, yə̧ə̧̀ ve itto ve òora piki vere wɔɔk gbattaa: «Davit tân an, mɔ tot vi gîm vin paa gee!» 28Yeesu gbɔ kàa kəzəkkɔ, yə̧ə̧̀ nɔ ve diŋŋi o hɛge, o kə vi vo: «Vo tu̧u̧ de boy ɛ gɔti hɛn ɛnɔ kɔrarɛrɛ?» Ve hi̧i̧za: «ə̧ə̧̀ wa̧y it hɛn.» 29Ɛnɔ Yeesu so̧o̧ nɔt von nɔ kə fee: «Go̧o̧ge do kɔt vo hɛn nɔ too vo tu̧u̧ nɔm!» 30Ɛn nɔt von nɔ kɛʼrɛ. Yeesu dìn vo kɔʼ fee: «Vo kii za̧a̧za̧a̧, há̧a̧ do gaa moò ɛnɔ sɛ.» 31Ɛn ɗaa ve luu ve tak moo Yeesu moò an hɛk ɛn oppo sɛw tɛʼ.
Yeesu poozi há̧a̧ kemmete ak munna
Luk 11:14-15; Mat 12:22-24
32Yɛɛ yə̧ə̧̀ nɔ vey vuk luura tin nɔ oppo, ve panzay Yeesu há̧a̧ zɔʼ o munna moò fəəm ɓɛɛ bɔk dɔza fɔn. 33Yeesu nɛn fəəm ɓɛɛ nɔ kəzəkkɔ, há̧a̧ mun nɔ bi̧i̧ yak mooo. Náa duʼ no ve kɔ vo bit ve kə fee: «Ba hən vo hɛn too ɛnɔm Islayɛlle yɛ!» 34Ɛn náa farize ve fee: «Fəəm ɓɛɛ nɔ vɛ gbɛ̧ɛ̧ von poʼo gɔti feem ɓɛɛ nɔ nɛnin voo yɔ!»
Yeesu gîm kɔza duʼ nɔ verɛ
35Yeesu daa kəll kap aʼ nɔ vɛ vere kap wagaa nɔ vɛ tɛʼ, o òo moò náa Yuuda o ve lik faa yakke, pa pamò za̧a̧ Gbɛ̧ɛ̧ yɛɛre bɛlba nɛy kə poozi ho̧o̧ nɔ verɛ tɛʼ vere náa ve kɔkkɔ vɛʼ. 36Yeesu hə̧ duʼ nɔ ve nɔ gîm kɔza vorɛ náa ɛn ve noorɛ, fo̧o̧ vɔ vorɛ ve too tɛ̧ɛ̧ zɔʼ ve ɛ̂n lǎw yɛ nɔm. 37Ɛnɔ Yeesu feeza kaam an vɛ: «Lɛm ɓoo hǎn nɛ, náa kɔ kɔmmɔ ve ɓoon ke yɛ. 38Vo haa wa̧y haŋ akkɔ do yaʼi náa kɔ kɔm zɔʼ ve tin ka ve sɔ̂ŋza lɛm an ze.››
Currently Selected:
Matiye 9: dae
Highlight
Copy
Compare
Share
Want to have your highlights saved across all your devices? Sign up or sign in
