Matiye 10
10
Yaʼyɛɛ boʼzoo itto nɔ vey
Mar 3:16-19; Luk 6:14-16
1Yeesu ya̧a̧ kaam an boʼzoo itto nɔ vɛ kə po vo gɔti doò ve nenin fəəm bɛɛ nɔ vey, doò vɛ kə poozi ho̧o̧ nɔ ve tɛʼ vere kpɛllɔ ve tɛʼ. 2Yeesu yaʼyɛɛ an bo zɔ itto nɔ vɛ nii von de nɛ: ɓəə daŋga nɔ simɔŋŋi, ve ya̧a̧ bo piyɛri, vere daak an Aŋderey; Zâk vere Zâŋ ve itto sɛw ve Zebede sâm an vey; 3Filip vere Bartələmii; Tomas vere Matiyey wa̧y sɔŋ sɔmɔgɔlɛy; Zâk Alfe tân an nɛy vere Tadey; 4Simoŋ wa̧y hɛkpa tuu nɛy vere Zuudas Iskaryoti, wa̧y a̧a̧za yeesu bullɛy.
Yeesu yaʼ náa boʼzoo itto nɔ ve yɛɛ̌
Mar 6:7-13; Luk 9:1-6
5Yeesu yaʼ náa an boʼ zoo itto nɔ vɛ yɛɛ̌, o feet vo: «Vo pek hɛk yɛɛ náa ve paam náa yuuda vey yɛ vey kanna tin nɔ verɛ, ɛn vo dɔ kap aʼ zɔʼ ve hɛk Samari nɔ ve oppo sɛ. 6Vo tak náa Islayɛl vey too tɛ̧ɛ̧ ve ti nɔmmɔ o ve po te. 7Ɛn yana embe ba tuu nɔ, vo pa pamo, vo fee: “Gbɛ̧ɛ̧ bɛlba nɔ sani ma!” 8Vo poozi ho̧o̧ verɛ, vo kənza vɔɔ vɛ zaan von nɛ, vo poozi guni ak verɛ vo nen fəəm ɓɛɛ nɔ verɛ. Vo hak de hɛgumma vo po hɛgumma vin. 9Vo pan sann zɔŋ sɛ, ke hel waarɛ, ke san yȩȩk ka vo yaʼ vo ziibarɛ sɛ. 10Vo iŋ saʼa ka vo luun gay sɛ, Ke sam ittorɛ, ke tɛkkarɛ ke gbaŋŋarɛ. Ɛnuu, kɔm ak lii lɛm an hakkarɛ. 11Oò vo gbɔ kap aʼre ongɛ kap wagare, vo tee ha̧a̧ o lii kaà ɓa vorɛ nɛy. Vo kan há̧a̧ ɛnɔ o kàa do gbɔ o vo yo̧o̧ luuri ba. 12Oò voy dɔra kàa nɔ oppo nɔ, vo fee: «za̧a̧ do kanga voy.» 13Náa vey kanna kàa tuu nɔ vɛ oò ve ɓa vorɛ, za̧a̧ ke vo páat vo ɛnɔ de kanna o ve porɛ, ɛn oò ve bɔn ɓa vorarɛ dɔmmɔ vo ǐŋ kə̌n za̧a̧ von ke vo páat vo nɔrɛ. 14Oò ka̧a̧ zɔʼre, ongɛ kap aʼ zɔʼre, oò ve bɔn ɓa vorarɛ, ongɛ kiit vorarɛ nɔ, vo luu tuurɛ ɛn vo kə taazi uurum o vo dɔʼ ba nɔ verɛ. 15Mii feet vora, de ginu: yo̧o̧ moò yȩʼȩ ba nɔ, náa Sodɔm vɛ vere Gomɔr vɛ moò yȩʼȩ von de poo kaʼrɛ vega náa vey kanna kap aʼre tuu ve gɔ.
Hɛn de yaa zee Yeesu kaam an ve nɛy
Mar 13:9-13; Luk 21:12-17
16«Vo kiirɛ! Mi yaʼ vo too tɛ̧ɛ̧ vɛ vin wəərkum o ve tiŋzare. Vo gaa kɛmmɛ too bekkɔ ve vin, dȩȩ too kə̌kkɔ ve vin. 17Vo laa wɔɔk von nɛ, ɛnɔ há̧a̧ vey he vora náa yə̧ʼ moò o ve naʼá ɛn vey waan vora ɓɛt o ve lik faa yakke 18Ɛn vey pan vora gɔmna kɛŋ vɛ vere Gbɛ̧ɛ̧ nɔ vɛ o ve timba, ii moòre. Ɛn voy náa sək moò min o ve timba vere náa ve paam náa yuuda yɛ nɔ o ve timba. 19Ɛn o vey pan vora náa yə̧ʼ moò o ve timba nɔ, gaa si̧i̧ ka yaa duu vora hɛn vo hi̧i̧ ka vo fee nɔ vɛ oppo sɛ, ke hɛn ka vo moo nɛyrɛ; yak moot vo yaa punna nɔ vɛ Go̧o̧ge de po vora ɛtuu yɔ: 20yak moot ɛn vey vukinii o vo po yɛ, ɛn Baa von fəəm an de yaa moo o vo po yɔ. 21Daakɔ vey hera daak von ɓimmɔ vɛ, doò ve vɔ̌t vorɛ. Tan baʼ nɔ vey kɔsingaa sâm von vɛ too ɛnɔm vin; Sâmmɔ vey fîl kəsingaa baʼ vey, ɛn vey vɔt voo. 22Háa ve tɛʼ vey bɛɛ vora ii more. Ɛn há̧a̧ oò dii za̧a̧za̧a̧ oò gbɔ yɛɛ si̧ʼtumba nɔ de sɔraa. 23O vey ɗeʼen vora kap zɔʼre, vo luu tak kap zɔʼ ba. Mii feet vora, de ginu: Voy kə́ə́ si̧zinna kap aʼ Islayɛllɔ ve tɛʼ doʼ Há̧a̧ Tan an ka yaay ze yɛ. 24«Há̧a̧ gɔksi hɛn ak kaà bi̧i̧n kɛŋ ka dəə wa̧y de izaa nɔ yɛ; há̧a̧ kɔ kɔm ak kaà dəən kɛŋ an yɛ. 25Ke lii há̧a̧ gɔksi hɛn kaà bii too wa̧y it hɛn an nɔ vin nɛ ɛn háa kɔ kɔm ak kaà bii too kɛŋ an vin nɛ. Oò ve zɛɛ wa̧y ka̧a̧ yoò nɔ, Bɛʼɛlzebûli nɔ, kà vey zɛɛ ɗəəra náa o kàa nɔ verɛ!»
Ha̧a̧ kaà vo waaa dòo nɛy
Luk 12:2-7
26«Gaa ka voy waa ha̧a̧ dòo sɛ. Hɛn ɗin de nɔ ve tɛʼ de vukkaa, ɛn hɛn yɔ̧ɔ̧mɔ ve tɛʼ de yaa gaanaa. 27Hɛn mii feet vora vi̧sâme nɔ, vo fee kən yɛɛ dȩȩte yo̧o̧re; ɛn hɛn vey moo lame o vo kɔʼ ba nɔ vo gbatzin wɔɔk dɔk ka̧a̧ wɔɔkpa gǎŋ. 28Vo waaa doo ha̧a̧ vey vɔta fo̧ǒ̧ zaʼ nɔ sɛ; Ɛn kaa ve lɔn vɔzin vɔkkɔ yɛ; vo waa Go̧o̧ge dòo oy te o lii kaà tǔt fo̧o̧ von vere vɔ̂k von daŋ vɛɛ va̧a̧re. 29Ve magin zǎw ve itto saŋ waa daŋga ba yɛrɛ? Ɛn oppo nɔ, zɔʼ daŋga kaà wanin hɛgɛ Baa von Go̧o̧ge bo gaan nɛ nɔ paamɛ. 30Ɛn o vo po nɔ, wɔɔk húu von ve sɛw tɛʼ de sɛ́kke. 31Ɛn dòo do kɔ vo sɛ vo zɛ ɗəə zaw verɛ!»
Yeesu moò an səkkaa ongɛɛ paʼaa
Luk 12:8-9
32«Ha̧a̧ oo fee náa o ve timba sɛɛ bo vo kaamini, mi sɛw mii fee Baa min oy bɛlba gɔɔ nɔ o timba bàa o há̧a̧ mini; 33Ɛn ɗaa, ha̧a̧ oò fee náa o ve timba sɛɛ bo vo gaani yɛ, mi sɛw mii fee Baa min oy bɛlba gɔɔ nɔ o timba bàa mi gaana yɛ vin.»
Yeesu yaay ka pani sozinna yɛ, ɛn pani seě te
Luk 12:51-53; Luk 14:26-27
34«Gaa ka voy vəʼəra gɔɔ boy yaa de nɛnɔ boy pani de sozin hɛkpa sɛ: Mi yaani kay pani sozin na yɛ, ɛn seě te. 35Mi yaay kay hɛzin há̧a̧ vey baʼani, tan kep vere naʼani, a̧k kep vere a̧kkii; 36Há̧a̧ de bi̧i̧ za̧a̧k eeraa ɓimmɔ o ve po. 37Há̧a̧ oò hi̧i̧ baʼan vere naʼan ɗəə mirɛ nɔ, o liin dɔk iipo yɛ, há̧a̧ oò hi̧i̧ tân wa̧p an vere tân kep an ɗəə mirɛ nɔ o liin dɔk iipo yɛ. 38Ha̧a̧ oò ganin tap ɓanzinna an, ka òorini piki yɛ, o liin dɔk iipo yɛ. 39Ha̧a̧ o hii za̧a̧n an sɔtta nɔ ɛn de titta te; ɛn ha̧a̧ oò tit za̧a̧n an ii moòre de hakka oy te.»
Ha̧a̧ oò ɓa kaamɔ verɛ, ɛn o ɓa Yeesuy
Mar 9:37, 41; Luk 9:48; 10:16; Zâŋ 13:20
40Ha̧a̧ o ɓa vorɛ ɛn o ɓa de mii; ha̧a̧ o ɓayre ɛn o ɓa de há̧a̧ yaʼiy nɛy. 41Ha̧a̧ o ɓa Go̧o̧ge yaʼyɛɛ an moò bo o yaʼyɛɛ̌ nɛy de hakka hɛn vey tokka Go̧o̧ge yaʼyɛɛ an ve nɔrɛ; ha̧a̧ oò ɓa ha̧a̧ kan de za̧a̧ Go̧o̧ge oppo nɛy o bo za̧ǎ̧ nɛy nɔ de hakka hɛn vey tokka ha̧a̧ za̧a̧ ve nɔrɛ. 42Mii feet vora, de ginu: Ha̧a̧ o po náa kaʼso ɛn vɛ daŋga von maam kaan mak wagare kaam min o ve tiŋza̧a̧re tuu bo o kaam mini nɛy nɔ de hakka hɛn tokka annɛ.»
Currently Selected:
Matiye 10: dae
Highlight
Copy
Compare
Share
Want to have your highlights saved across all your devices? Sign up or sign in
