Matiye 8
8
Yeesu poozi guni akka
Mar 1:40-45; Luk 5:12-16
1Yeesu siy gbɔkke tuu nɔ ɛn náa ve duʼza̧a̧ ve ooray piki. 2Ɛnɔ guni ak zɔʼ diŋ yaa o hɛge ɗiksi dɔʼ ɗuk o tmba kə fee: «Wa̧y it hɛn, kaa mɔ hi̧i̧rɛ nɔ kaa mɔ poozira ho̧o̧ min nɛ.» 3Yeesu yɔll naak so̧o̧o̧ kə fee: «Mi hi̧i̧rɛ do poomɛ!» Ɛtuu vin wa̧y nɔ guni an pooorɛ. 4Yeesu kə feeza: «Mɔ kii za̧a̧za̧a̧: Hɛn ɛnɔ mɔ feeza há̧a̧ sɛ. Ɛn daa mɔ tak toy fo̧o̧ mɔn wa̧y kɔ maak ak oppo, mɔ kə kɔ maak hɛn Moyi̧zə moò buu an fee nɔ tin, náa ve tɛʼ ka ve gaa bo poom ma ze#8:4 Vo to Lɛvit 14:2-32.»
Yeesu pooza wa̧a̧ vɛɛ̀ kɛŋ zɔʼ Rɔm kɔm ak an ho̧ǒ̧
Luk 7:1-10; Zâŋ 4:43-54
5Yɛɛ Yeesu bɔk de dɔra Kapɛrnûm tin nɔ oppo, wa̧a̧ vɛɛ̀ kɛŋ zɔʼ Rɔm diŋ yaa kə haaa doò maʼat vorɛ 6feeza: «wa̧y it hɛn, kɔm ak min oy utti kàa, o kɔkkɛ oy yȩʼgii de hɛge kpɛŋ.» 7Yeesu feeza: «Mii takka poozaa.» 8Ɛn ɗaa wa̧a̧ vɛɛ̀ kɛŋŋɔ hi̧i̧za: «Wa̧y it hɛn, mi liin kaà mɔ dɔ ii kàa yɛ. Ɛn mɔ moo yak daŋga zaʼ liirɛ ɛn kɔm ak min ho̧o̧ an de pooo. 9Mi sɛw mi ɛ kɛŋ min vey derɛ vin, mi ɛ de wa̧a̧ vɛɛ vɛ mii buu voo derɛ vin. Oò mi fee há̧a̧ daŋga: “mɔ takkɛ”, de takkaa; oò mi fee há̧a̧ zɔʼ: “mɔ yaarɛ”, de yaay; ɛn oò mi feeza kɔm ak min: “Mɔ kɔ hɛn nɛʼi̧” de kɔraa.» 10Yeesu kii yak moot ɛn vɛ kəzəkkɔ, o vɔ̌ŋ wa̧a̧ vɛɛ̀ kɛŋŋɔrɛ kə feeza náa ke vey ooraa nɔ vɛ: «Mii feet voraa de ginu: mi zeen si̧i̧ tu̧u̧ too ɛnɔm há̧a̧ zɔʼ oppo Islayɛlle yɛ. 11Mi feet vora, náa ve duʼza̧a̧ vey luuy yo̧o̧ vukkare vere yo̧o̧ tunnare ve yaa zɔɔ lɛgaa lɛm vere Abarami, Izâki vere Zakopi Go̧o̧ge o Gbɛ̧ɛ̧re. 12Ɛn náa kaà vey dɔra Go̧o̧ge o Gbɛ̧ɛ̧re nɔ vɛ vey gbəll voo visamme gɔ̌n, vey ba̧a̧zii vey kə yəʼra nuut ɛtuu.» 13Yeesu kə feeza wa̧a̧ vɛɛ̀ kɛŋŋɔ: «Mɔ kə um kàa, Go̧o̧ge de kɔzumma hɛn mɔ haa nɔ too mɔ tu̧u̧ nɔm!» Ɛn naʼa tuu vin wa̧a̧ vɛɛ̀ kɛŋŋɔ kɔm ak an ho̧o̧ an poorɛ vin.
Yeesu poozi ho̧o̧ ve duʼza̧a̧
Mar 1:29-34; Luk 4:38-41
14Yeesu tak Piyɛr o kàa. O zee Piyɛr a̧kkií de ǔzinna ho̧o̧ ka̧a̧k hɛge. 15Yeesu so̧o̧o̧ naakpa ɛn ho̧o̧ nɔ vukkɛ; o luu bɛlba yoonza lɛm tin. 16Mim yak kɔ nɔ, ve panzay Yeesu náa ve duʼza̧a̧ feem ɓɛɛ bɔk de kěm voo nɔ vey. Yeesu nɛnn fəəm ɓɛɛ nɔ vɛ vere yak moot ani kə poozi náa ve ho̧o̧ nɔ verɛ tɛʼ. 17Yeesu kɔ too ɛnɔmmɔ ka kǔt hɛn Go̧o̧ge yaʼyɛɛ an Ezǎy bɔk fee: «O iŋ kɔkrɔk ban vorɛ ɛn o îŋ ba vo ho̧o̧ ban vorɛ.#8:17 Vo to Ezǎy 53:4»
Náa ve hi̧i̧ Yeesu ooraa nɔ vey
Luk 9:57-62
18Yeesu fee ka hə̧ duʼ yəəmɔ ve tɛʼ ve kəga nɔ, o po kaam an ve ya̧à̧ ka bo ve ɗaa takki vo lɛk dən ii nɔ oppo. 19Wa̧y it Moyi̧zə moò buu an zɔʼ diŋ yaa o hɛge kə feeza: «Wa̧y it hɛn, mi oorumma yɛɛ mɔy takka tin nɔ ve tɛʼ.» 20Yeesu hi̧i̧za: «Wɔ̀ɔ̀kɔ vɛ ve ɛ va̧a̧rɛ vere nook bɛrɛttɔ vɛ ve ɛ puukɛ, ɛn há̧a̧ tan an o ɛ̂n an yɛɛ ka ǔt wə̧ə̧ tin nɔ yɛ.» 21Há̧a̧ zɔʼ daŋga kaam an o ve tiŋza̧a̧re feeza: «Wa̧y it hɛn, mɔ ɛy kay tak ləəy baa min doʼ.» 22Yeesu hi̧i̧za: «Mɔ òo mii ɛn mɔ ɛ vɔɔ do ve ləə vɔɔ von vey.»
Yeesu dìi yam ȩȩka
Mar 4:35-41; Luk 8:22-25
23Yeesu hiŋ kɔmballe ɛn kaam an ve ɛ̌za tin. 24Ɛtuu vin yam ɔɔŋ duni maam ba tuu, ɛn maam heŋzinna nɔ vɛ bi̧i̧ hi̧ʼi̧ kɔmballe tuu. Ɛn Yeesu bɔk oy nəmme. 25Kaamɔ ve diŋŋi o hɛge ve niŋza vere yak wa̧a̧ka: «Gbɛ̧ɛ̧ kɛŋ mɔ sɔt ba vorɛ! Bay vɔ vora goy!» 26Yeesu hi̧i̧t vo: «Hɛ̧ɛ̧n kɔ vo waa dòo nɔ nɛɛ? Si̧i̧ tu̧u̧ von ɓoonɛ nɛy!» Ɛnɔ o luu, moo zɛt yammɔ vere maam lɛke nɔ daŋ, ɛn yɛɛ kan səŋŋ. 27Náa ve tɛʼ kɔ vo bit ɛn ve fee: «Hii wa̧y an o too ɛnɔm yam vere maam ve kiiza kɔʼrɛ ɛnɔ yɛɛ#8:27 Vo goozin vere dɛptɛl gəəmɛy dən 65:8?»
Yeesu poozi wa̧p kemmɛte ak ve itto
Mar 5:1-20; Luk 8:26-39
28Yeesu fee ka gbɔ lɛk dən ii nɔ oppo kəzəkkɔ, hɛk Gadara#8:28 Gadara nɔ de kap aʼnii náa yuuda ve paam tuu yɛ kaà kɔ kilo mɛɛtərə boʼrɛ (10) yəəzin vere lɛk Gɛnesarɛtɔ yɛ ongɛɛ Galile nɔ yɛ nɔ oppo, wa̧p ve itto ve vuki gak tiŋza̧a̧re ɛn ve yaa kasingarɛ. Náa ɛn vɛ fəəm ɓɛɛ bɔk dɔt vo fɔn; bɔk ve hȩȩ wɔɔkɛ kpɛŋ há̧a̧ kaà daan yana ɛnɔ oppo yɛ. 29Ve dii wɔɔk gbattaa: «Hɛ̧ɛ̧n mɔ hi̧i̧ ivi po tɛɛ nɛɛ, Go̧o̧ge tan an? Bollɔ gbɔnna dee keto yɛ, mɔ yaay ɗeʼen vii tiyɔrɛ? 30Naksak duʼ zɔʼ bɔk ve tuu ve yəə kaʼrɛ bɔk vey lɛraa. 31Fəəm ɓɛɛ nɔ ve haa Yeesu ve fee: «Oò mɔ hi̧i̧ nɛnzi viraa nɔ, mɔ yaʼ vi naksak duʼ ɛn o ve po.» 32Yeesu feet vo: «vo takpɔ», ve vuk há̧a̧ itto nɔ o ve po tuu ve tak naksakkɔ o ve po. Ɛnɔ, naksak duʼ nɔ ve tɛʼ ve dɔpi atti yɛɛ paakpa ve wa̧a̧l zo̧o̧ maame e dəppɛ. 33Náa ke vey laa naksakkɔ vɛ nɔ ve âttɛ; ve tak kap aʼre ve òo hɛn ke daa náa kemmɛte ak itto o ve po nɛy. 34Ɛnɔ náa kappa tuu nɔ ve tɛʼ ve vuk ka ve yaa kasinga Yeesurɛ; ve fee ka ve hə̧ʼə kəzəkkɔ, ve haaa dóò luu o ve hɛkpa tuurɛ.
Currently Selected:
Matiye 8: dae
Highlight
Copy
Compare
Share
Want to have your highlights saved across all your devices? Sign up or sign in
