Matiye 7
7
Vo yȩʼen náa zɔʼ ve moò sɛ
Luk 6:37-38, 41-42
1Gaa vo yȩʼen há̧a̧ moò sɛ, ɛn Go̧o̧ge ka yaa yȩʼen vo moò sɛw sɛ. 2Ɛnɔ, Go̧o̧ge de yȩʼ vora too voy yȩʼ náa zɔʼ ve nɔm; de goozin vora hɛn voy goozinaa náa zɔʼ ve nɛy vin. 3Hɛ̧ɛ̧n kɔ moy həra ho̧o̧t wagaa daam o nɔre nɛy zaʼ ɛnɔ mɔn laʼ doll de um nɔre nɔ mɔ hən nɛ nɔ moò nɛɛ? 4Lɔ tuubɔgɛ kaǎm feeza daam: “Mɔ ɛy kay iŋzum ho̧o̧t de um nɔre” ɛn laʼ doll de um nɔre vin nɛy? 5Yak yuu ak, mɔ iŋ laʼ doll um nɔre nɔ doʼ ɛn mɔy hə̧ra za̧a̧za̧a̧ kǎm iŋza daam ho̧o̧t o nɔre nɔ ze. 6‹‹Go̧o̧ge hɛn an nɔ vɛ vo po ǐŋŋɔ ve sɛ, ka ve yaa fil kəy o vo po ka ve nɔn vo sɛ; gaa vo gbəl hiti von naksak o ve timba sɛ ka ve yaa ɗaʼgi dɔʼi.››
Vo haarɛ, vo teerɛ, vo kə ya̧a̧ yɛɛ pek leppa
Luk 11:9-13
7Vo haarɛ ɛn voy hakkaa, vo teerɛ ɛn voy zeee; vo ya̧a̧ yɛɛrɛ ɛn vey kul vora pek leppɔrɛ. 8Ɛnɔ há̧a̧ oò haarɛ hakkɛ, oò teerɛ zeerɛ, oò ya̧a̧ yɛɛrɛ ve kulsaa pek leppɔrɛ. 9Hii o vo tiŋza̧a̧re tuu tân an oò haaa nanna nɔ poʼo pinna nɔ yɛɛ? 10Ongɛ haaa dutta nɔ o poʼo bekkarɛ? 11Náa ɓɛɛ voy si̧ʼ vo gaa sâm von ve hɛn za̧a̧ po voorɛ. Ɛn Baa von oy bɛlba nɔ kaa ɗəən hɛn za̧a̧ ponna náa vey haaa nɔ ve yɛrɛ? 12«Vo koza náa zɔʼ ve hɛn nɔ ve tɛʼ too vo hi̧i̧ do ve kɔt vo nɔm: De ɛn hɛn Moyi̧zə dɛptɛl moò buu an nɔ vɛ vere Go̧o̧ge yaʼyɛɛ an vɛ ve moo nɛy»
Pek lep wagaa
Luk 13:24
13‹‹Vo dɔ pek lep wagaa nɔ oppo! Ɛnɔ lep nɛɛri nɔ de pek lep təə ak oy yɛ, de yana takka vɔɔ yɛɛre nɛy; náa ve duʼza̧a̧ vey daa de oppo. 14Ɛn pek lep wagaa nɔ de lep təə akka, de yana takka za̧a̧n yɛɛre nɛy; náa vey daa tin nɔ ve ɓoo nɛ››
Yaʼyɛɛ və̧ə̧k akkɔ vey
Luk 6:43-44
15Vo laa wɔɔk von vere yɛʼyɛɛ və̧ə̧k akkɔ verɛ. Vey yaay o vo po ve fîli tɛ̧ɛ̧ waa vɛy, ɛn o ve pə̧ə̧re nɔ vey wə̧rkum ɓɛɛ vey. 16Voy gaan voo vere kɔm von vey kɔlla nɔ vey. Kaà ve hǎn bi̧ʼ sa̧a̧t tappa yɛ, kaà ve hǎn bit mɔŋgol tappa yɛ. 17Tap za̧a̧ de lee leet za̧ǎ̧ ɛn tap ɓɛɛ de lee leet ɓɛɛ̌. 18Tap za̧a̧ leen leet ɓɛɛ yɛ tap ɓɛɛ dɔ̌m leen leet za̧a̧ yɛ. 19Tap ve leen leet za̧a̧ yɛ nɔ ve tɛʼ vey do gbəll voo vɛre. 20De too ɛnɔm vin, voy gaana yaʼyɛɛ və̧ə̧k akkɔ vɛ vere hɛn vey kandi von nɔ vɛy.
Hɛn feee vere kɔraa
Luk 13:25-27
21‹‹Ɛn náa vey feeyya: “Gbɛ̧ɛ̧ kɛŋ, Gbɛ̧ɛ̧ kɛŋŋɔ ve tɛʼ”, vey dɔnna Baa min o Gbɛ̧ɛ̧re bɛlba sɛw yɛ, ɛn náa vey kɔra hɛn Baa min oy bɛlba nɔ hi̧i̧ nɔ vey zaʼ. 22Yo̧o̧ moò yȩʼȩba nɔ náa ve duʼza̧a̧ vey feeyya: “Gbɛ̧ɛ̧ kɛŋ, Gbɛ̧ɛ̧ kɛŋ bɔk vi bi̧i̧ Go̧o̧ge yaʼyɛɛ an vɛ vey nii mɔni; bɔk vi nɛn fəəm ɓɛɛ nɔ vɛ vere nii mɔni, bɔk vi kɔ hɛn yɔ̧fittɔ vɛ vere nii mɔni, mo gaanɛrɛ?” 23Ɛnɔ mii feet voo: “Mi bi̧i̧ gaan vo yɛ ɓim; vo luu yəə ii ɛttɛɛrɛ, náa voy kɔlla hɛn ɓɛɛ nɔ voy!”»
Moò bɛmm ka̧a̧ itto
Luk 6:47-49
24‹‹De too ɛnɔm há̧a̧ oò kii hɛn kíí fee nɔrɛ ɛn kə kɔ hɛn nɔ too mi fee nɔm o liizinga há̧a̧ gaa moò zɔʼ yo̧o̧ ka̧a̧ an sȩȩba nɔm. 25Maam naŋŋirɛ, lɛkkɔ ve dɔrɛ, yam ȩȩk duni ka̧a̧ nɔ oppo, ɛn ka̧a̧ nɔ tulin yɛ, ɛnɔ sɛŋki an nɔ bɔk goʼ sȩȩba nɛy. 26Ɛn há̧a̧ oò kii hɛn kíí fee nɔrɛ oò kə kɔn too ɛnɔm yɛ o liizinga too há̧a̧ gîppa ak zɔʼ yo̧o̧ ka̧a̧ hɛt sa̧a̧tpa nɔm. 27Maam naŋŋirɛ, lɛkkɔ vɛ dɔrɛ, yam ȩȩk duni ka̧a̧ ɛnɔ oppo ka̧a̧ nɔ tul hɛge ɓɛɛza̧a̧ tɛʼ tɛʼ.
Yeesu buùm ani
28Yeesu fee ka sǐ̧t yak moot an kəzəkkɔ, náa ve tɛʼ moò oora an nɔ kɔ vo bít; 29Ɛnɔ o paam too náa it Moyi̧zə moò buu an nɔ ve vin yɛ, ɛn o oot vo moò vere buùma.
Currently Selected:
Matiye 7: dae
Highlight
Copy
Compare
Share
Want to have your highlights saved across all your devices? Sign up or sign in
