Matiye 6
6
Náa gim ak ve pori po voo
1«Vo laa wɔɔk von za̧a̧za̧a̧! Oò voy kɔra hɛn Go̧o̧ge moò buu an fee nɛy nɔ, gaa vo kɔ náa o ve timba sɛw tɛʼ doò ve to vorɛ sɛ. Oò ɛŋgɔ Baa von oy bɛlba nɔ de tokin vora yɛ. 2Oò mɔy pora gim ak ve hɛnna nɔ, mɔ gbazin wɔɔk too náa yak yuu ak#6:2 Yak yuu akkɔ, de náa vey kɔra hɛn nɔ vɛ há̧a̧ o ve nɔtpa doò ve fee vo bo ve za̧a̧ yɔ ɛn o ve pə̧ə̧re nɔ ve paam za̧a̧ yɛ nɔ vey vey kɔra lik faa yakke, vere yanǎ nɔ̌m sɛ, vey kɔra too ɛnɔmmɔ há̧a̧ doò ve vɔŋŋ vorɛ. Mi feet vora, de ginu: Ve hak hɛn kaà vey tok voo nɔ ma. 3Ɛnɔ naak za̧a̧ mɔn òo de pora gim ak hɛnna nɔ, naak kpay mɔn do gaa sɛ. 4Do ɛŋgɔ vin, hɛn mɔy pora nɔ do kan ɗinna za̧a̧; Baa mɔn Go̧o̧ge de hə̧ra hɛn mɔy kɔra ɗinna za̧a̧ ɛn nɔ, de tokumma ze»
Yak faara moǒ
Luk 11:2-4
5Oò vo faara yakkɔ, gaa vo kɔ too yak yuu ak vɛ vin sɛ: Lik faa yakke vere yana yakkɔ vɛ oppo nɔ ve hi̧i̧ von diiri bɛlba ve faa yak ze náa doò ve hə̧ vo tin. Mi feet vora, de ginu: Ve hak hɛn kaà vey tok voo nɔ ma. 6Ɛn mɔy, oò mɔ hi̧i̧ yak faaraa nɔ, mɔ dɔ um liki, mɔ toʼ pek leppɔ tin mɔ kə faa Baa mɔn oy yɛɛ yɔ̧ɔ̧me ɛtuu nɛy; ɛn Baa mɔn de hə̧ra hɛn mɔy kɔra yɔ̧ɔ̧me nɔ, de tokumaa. 7Oò voy faara yakkkɔ gaa vo koʼ̧rin kən yak da̧a̧ nɛy too náa gaan Go̧o̧ge yɛ nɔ ve vin sɛ: Vey tu̧u̧ nɔ Go̧o̧ge kaà boy ɓat voo yak von moò bo ve ɓoozi moot aʼvin nɛy. 8Gaa vo kɔ too vo vin sɛ, ɛnɔ hɛn voy hi̧i̧ra haara nɔ Baa von Go̧o̧ge ɓəə gaa hɛn vo hi̧i̧ nɔ ma.
Gbɛ̧ɛ̧ kɛŋ Yak faara ani
Luk 11:2-4
9Oò voy faara yakkɔ vo fee too nɛnɔm: “Baa vin moy bɛl ti̧i̧ ba, há̧a̧ ve tɛʼ kaà ve gaa bom Go̧o̧ge dȩȩt yɔ, 10Kaǎm yaa buu yɛɛ hɛtte tɛɛ yɔ, hɛn mo hi̧i̧ nɔ kaǎm kɔ hɛtte tɛɛ too bɛlba vin. 11Kaǎm po vi lɛm za̧a̧ vin yo̧o̧ mu nɛn nɛy 12Kaǎm hoozi vi hɛn ɓɛɛ vîn vɛ too vii hoozaa náa vey kɔ vira ɓɛɛ nɔm. 13Gaa mɔ ɛ vi hɛn zɔʼ do goo vi sɛ, ɛn kaǎm vuksi vi hɛn ɓɛɛrerɛ. Ɛnɔ mɔ ɛ de Buùm yɔ, gɔti yɔ, vere Gbəə̀m yɔ tuŋ-tuŋ. Ɛŋgɔ.” 14«Ɛnuu òo voy hoozaa de náa zɔʼ ve ɓɛɛ von vey kɔ vora nɔ verɛ nɔ, Baa von oy ɓɛlba nɔ de hoozi vora vin sɛw. 15Ɛn òo vo hoozinna náa zɔʼ ve yɛ, Baa von de hoozin vora ɓɛɛ von ve yɛ vin sɛw.
Hɛn kɛ̧ɛ̧ moǒ
16Oò voy kɛ̧ɛ̧ hɛnna nɔ, gaa vo ɓi̧ʼsi̧ gbɔy too náa yak yuu ak vey kɔra nɔm sɛ: Ve zàŋ gbɔy von nɛ náa ve tɛʼ doò ve gaa bo vey hɛn kɛ̧ɛ̧ ba. Mi feet vorɛ, de ginu: Ve hak hɛn kaà vey tok voo nɔ ma. 17Ɛn mɔy òo mɔ kɛ̧ɛ̧ de hɛnna nɔ, mɔ uuzi gbɔy mɔn tin mɔ kə muŋ kum sa̧a̧k um wɔɔkpa tin, 18Ɛn náa do ve gaa bǒm kɛ̧ɛ̧ de hɛnna sɛ. Baa mɔn o kan de yɛɛ yɔ̧ɔ̧me nɔ, do gaa yɔ zaʼ; ɛn Baa mɔn de hə̧ra hɛn mɔy kɔra yɛɛ yɔ̧ɔ̧me ɛnɔ, de tokummaa.
Nagate bɛlba gǎŋ
Luk 12:33-34
19Gaa vo sɔŋ hel hɛkpa nɛnɔ oppo sɛ, yɛɛ maá muʼzi vere sènn nɔ vɛ kaà ve yaa lella tin nɔ oppo sɛ, yɛɛ yuu kaà ve gbàà pek lep ka ve fa̧a̧ tin nɛ nɔ oppo sɛ. 20Oò za̧ǎ̧ nɔ vo sɔŋ hel von vɛ bɛlba gǎŋ gɔɔ te, yɛɛ maá muʼzi vere sȩȩn kaà lelin tin yɛ nɔ oppo, ɛn yuu kaà zeenɛ tin nɔ oppo vin. 21Ɛnɔ si̧i̧ mɔn de kanna yɛɛ hell mɔn kan de tin nɔ oppo tuŋ.
Kandi yɛɛ dȩȩte
Luk 11:34-36
22«Nɔt de lalap fɔn yɔ. Nɔt mɔn oò de za̧ǎ̧ nɔ, fo̧o̧ mɔn tɛʼ dȩȩ derɛ vin; 23ɛn nɔt mɔn oò vey de ho̧ǒ̧ nɔ, fo̧o̧ mɔn tɛʼ de visame. Yɛɛ dȩȩt umpo nɔ oò vi̧i̧ de too visam vin nɔ, visǎmmɔ de vi̧i̧ ɗəəraa!»
Go̧o̧gey ongɛɛ hella
Luk 16:13
24«Háa kaa kɔzinna kɛŋ ve itto kɔm yɛ: Ongɛɛ de ɓɛɛra wa̧y ɓəə timmɔrɛ ɛn de hi̧i̧ra zɔʼ nɔrɛ; ongɛɛ de sosingaa wa̧y ɓəə timmɔrɛ ɛn de sera zɔʼ nɔrɛ. Kaà vo kɔzinna Go̧o̧ge kɔm tin kaa vo kə teen hel tin yak da̧a̧ nɔ oppo yɛ.»
Si̧i̧ ɛtta Go̧o̧ge oppo
Luk 12:22-31
25«Moò an oy mi feet vora: Gaa ka vo yaa tu̧u̧ moò gɔɔ hɛ̧ɛ̧n vii lɛranɛɛ, hɛn vii zɔra nɛɛ nɔ ka vo za̧a̧n ze nɔ sɛ, ongɛɛ moò sam vo hi̧i̧ dɔtta o vo fɔn nɔ vɛ sɛ. Za̧a̧n sȩȩ ɗəə lɛmmɛ ɛn fo̧o̧ sȩȩ ɗəə sammɔ verɛ, paam ɛŋgɔ yɛrɛ? 26Vo to no̧o̧k bɛrɛttɔ vey: Ve bǎn hɛn yɛ ve gən hɛn yɛ vin, ve sɔŋŋin lɛm a̧lle yɛ, ɛn Baa von oy de bɛlba gɔɔ nɔ de yaa voo yɔ! Vo Zɛ ɗəən no̧o̧k bɛrɛttɔ ve yɔ yɛrɛ? 27Hii o vo tiŋza̧a̧re tuu kaà lɔ z̧a̧n an bitta kaʼso vere moò tu̧u̧ yəəmza̧a̧ ɛn ze nɔ yɛɛ? 28Ɛn voy vəʼəra sam dɔtta nɔ moò nɛɛ? Vo to hɛn kɔ̧ɔ̧p vey kɔ̧ɔ̧ haan nɔ vey: Ve kɔn kɔm yɛ, ve tȩȩn sâm yɛ. 29Ɛnɔ mi feet vora, Salmɔŋ sɛw, vere nagate an tɛʼ, o hakin sâm za̧a̧ too hɛn kɔ̧ɔ̧p zɔʼ vin yɛ. 30Go̧o̧ge de dɔzaa ho̧o̧t vey hǎn munɛ nɔ vɛ sam too ɛnɔm, ɛn yɔŋgɔ nɔ ve gbəll vo vɛre. Oò ɛŋgɔ nɔ kaà dɔzin vo sâm too ɛnɔm vo sɛw vin yɛrɛ? De ginu kaa de dɔt vora ɗəəraa náa tu̧u̧n Go̧o̧ge yɛ nɔ voy, ke sȩȩ kaa vo gaarɛ likka za̧a̧: Go̧o̧ge de kɔt vora von ɛŋgɔ vin! 31Gaa voy vəʼəra gɔɔ: “bay lɛ vora nɛɛ, bay zɔ vora nɛɛ bay dɔt vora nɛɛ sɛ!” 32Náa gàan Go̧o̧ge yɛ nɔ ve kan vəʼəra hɛn ɛn vɛ yɔ. Ɛn Baa von oy bɛlba gɔɔ̀ nɔ o gaa hɛn vo hi̧i̧ nɔ verɛ. 33Vo tee Go̧o̧ge Gbɛ̧ɛ̧ an vey kandi za̧ǎ̧ vere hɛn fee nɔ vɛ doʼ ɛn Go̧o̧ge de po vora hɛn pəətummɔ verɛ tɛʼ. 34«Gaa vo vəʼə hɛn yɔŋgɔ nɔ sɛ: Hɛn yɔŋgɔ nɔ de vəʼəra o yɔm. Fo̧o̧ hɔ̧ɔ̧k munɛ nɔ lii yo̧o̧ munɛ nɛy!»
Currently Selected:
Matiye 6: dae
Highlight
Copy
Compare
Share
Want to have your highlights saved across all your devices? Sign up or sign in
