Matiye 25
25
Moò bɛmm sâm kep yûk ve boʼ
1‹‹Ɛnɔ gbɛ̧ɛ̧ bɛlba nɔ liizinga de moò bǐt sâm kep yûk ve boʼ ve ǐŋ lalap von ve naʼa ve vuk ka ve tak kasinga wa̧y ɓa waǎ. 2Sáá o ve tiŋza̧a̧re ve gaan moò yɛ ɛn zɔʼ saa nɔ ve gaa von moòrɛ. 3Náa gaan moò yɛ nɔ ve ǐŋ lalap von vɛ ve panin kum zɔʼ sɛkpa yɛ. 4Ɛn sâm kep gaa moò nɔ ve pan lalap von ve kə pan kum tik zɔʼre tin. 5Ɛn wa̧y ɓa waà nɔ diliy yaǎyrɛ; sâm keppɔ ve nəm kɔ vo ve wan nəmma. 6An yɔɔkpa tɛɛ, wɛll zɔʼ kinirɛ: “Wa̧y ɓa waà nɔ oy nɛ! Vo vuk vo kasinga bo.” 7Ɛnɔ sâm kep yûk boʼ nɔ ve tɛʼ, ve niŋzi ve kə bi̧i̧ lalap von vɛ gakaa. 8Zɔʼ saa gaan moò yɛ nɔ ve haa náa gaa moò nɔ vɛ: “Vo po vi kum von nɔ kaʼso dɔ̌m, ɛnɔ lalap vin vɛy ninnaa.” 9Náa gaa moò nɔ ve hi̧i̧t vo: “Hə̧ə̧̀ə̧́, ɛn kaà liin ba vo daŋ vi tin vere vo tin sɛw yɛ. Poo vo tak lik vey makka tin nɔ oppo vo ɓǎy voni.” 10Náa gaan moò yɛ ɛn ve luu tak ɓǎy kummɔrɛ, Ɛn dɔmmɔ, wa̧y ɓa waà nɔ gbɔy o ve piki deé. Sâm kep yûk saa ke ve gakkɔ ve dɔga wa̧y ɓa waà nɔ lik ɓasinne ve kə toʼ pek leppɔ sǎm vere táp tàà yɛɛ nɔ tin. 11An kaʼso, sâm kep zɔʼ saa gaan moò yɛ nɔ ve gbɔ̌y ve ya̧a̧ yɛɛ: “Wa̧y kɛŋ, wa̧y kɛŋ, mɔ kûl vi pek leppɛy!” 12Ɛn ɗaa wa̧y ɓa waà nɔ hi̧i̧: “Mi feet vora, de ginu: mi gàan vo yɛ.” 13Yeesu kə ka̧ʼ ɓɛʼ, vo za̧a̧ nɔtta, ɛn vo gaan yo̧o̧n yɛ, vo gaan yo̧o̧ tânin yɛ vin.››
Moò bɛmm kɔm ak ta̧a̧to vey
Luk 19:11-27
14‹‹De bi̧i̧ too wa̧y zɔʼ kaà de luura gayre nɔm: o ya̧a̧y kɔm ak an vey kə ɛt vo hel an ve naʼa. 15O po há̧a̧ daŋga nɔ, sann zɔŋ wɔɔk saa saa yɛɛ saa, po há̧a̧ zɔʼ nɔ wɔɔk saa saa yɛɛ itto, há̧a̧ goʼ ta̧a̧to nɔ wɔɔk saa: hii yɛ o gɔti ba gɔti ba. Pik an o luurɛ. 16Kɔm ak bɔk hak sann zɔŋ wɔɔk saa saa yɛɛ saa nɔ luu nɔmpo tak kɔ̂n makpal vere hel waa ɛnɛy kə hakini sann zɔŋ zɔʼ wɔɔk saa saa yɛɛ saa ɓɛʼ. 17Há̧a̧ bɔk hak sann zɔŋ wɔɔk saa saa yɛɛ itto nɔ kɔ da̧a̧ nɔm vin hak sann zɔŋ zɔʼ wɔɔk saa saa yɛɛ itto ɓɛʼ. 18Ɛn, há̧a̧ bɔk hak sann zɔŋ wɔɔk saa nɔ luu tak a̧a̧ va̧a̧ hɛtte ɗin kɛŋ an hell waa an oppo. 19Yɛɛ fee ka yəə kəzəkɔ, pik an náa kɔm ak ɛn vɛ kɛŋ von ɗɛɛ kə̌yrɛ. O vi vo hɛn ve kɔnin hell waa an nɛy. 20Há̧a̧ bɔk hak sann zɔŋ wɔɔk saa saa yɛɛ saa nɔ yaa iza sann zɔŋ zɔʼ wɔɔk saa saa yɛɛ saa fee: “Wá̧y kɛŋ, bɔk mɔ poy sann zɔŋ wɔɔk saa saa yɛɛ saa. Mi hakin sann zɔŋ zɔʼ wɔɔk saa saa yɛɛ saa ɓɛʼ de nɛ.” 21Kɛŋ an nɔ feeza: “Sȩȩrɛ mɔ kɔ kɔm ak za̧ǎ̧. Bɔk mɔ kɔ̂n za̧a̧ vere hɛnaa kaʼsorɛ, mii ɛzumma hɛn za̧a̧ ve ɓooza̧a̧. Mɔ yaa gbo̧ʼ vey mii.” 22Kɔm ak bɔk hak sann zɔŋ wɔɔk saa saa yɛɛ itto nɔ yaay fee: “Wa̧y kɛŋ, bɔk mɔ poy sann zɔŋ wɔɔk saa saa yɛɛ itto. Mi kə hakini zɔʼ wɔɔk saa saa yɛɛ itto ɓɛʼ de nɛ.” 23Kɛŋ an nɔ feeza: “Ɛn sȩȩrɛ, ɛn mɔ kɔm ak za̧ǎ̧. Mɔ kɔ za̧a̧ vere hɛnaa kaʼsorɛ, mii ɛzumma hɛn zɔʼ za̧a̧ ve ɓooza̧a̧. Mɔ yaa gbo̧ʼ vey mii.” 24Si̧ʼtum an, kɔm ak bɔk hak sann zɔŋ wɔɔk saa nɔ yaa fee: “Wa̧y kɛŋ, mi gaamɛ mɔ wa̧y senna akka: mɔy sɔŋŋa lɛm bɔk mɔ bǎn yɔ yɛ nɛy, mɔy gəra hɛn bɔk mɔ ɗakin yɔ yɛ nɛy. 25Dòo kɔy mɔrɛ ɛn mi tak ɗǐn hell waa mɔn hɛtte. Mɔ ɓa hell waa mɔn de nɛ.” 26Kɛŋ an nɔ hi̧i̧za: “Mɔ kɔm ak ɓɛɛ, zo̧ò̧ akka! Bɔk mɔ gaarɛ mii sɔŋŋa hɛn mi bǎnyɔ yɛ nɛy, mii gəra hɛn mi ɗakin yɔ yɛ nɛy. 27Ɛn ke sȩȩrɛ, bɔk kaà mɔ ɛ hell waa min nɔ baŋkəre, ɛn kaǎy kə̌y yaa iŋŋa vere goʼtum daake tin. 28Vo fǎt sann zɔŋ an wɔɔk saa nɔrɛ ɛn vo po há̧a̧ ɛ de sàʼa daŋga nɛy. 29Ɛnɔ há̧a̧ oò ɛ de hɛn nɛ, de hakka zɔʼ tin aʼvin; ɛn há̧a̧ oò ɛ̂nnɛ biʼ ɓimmɔ, vey fǎtta hɛn an kaʼso kaà de pəəə nɔrɛ. 30Oò kɔm ak ɓɛɛ ɛn oppo nɛy nɔ vo gbəla gɔ̌n visǎmme, yɛɛ ka ba̧a̧ yəʼra nuut tin oppo.”››
Moò yȩʼȩ si̧ʼtumma
31«Há̧a̧ tân an oò de yaay o gbəə̀me vegare zə̧ə̧̀ an vɛ daŋ tɛʼ nɔ, de zɔɔ o gbɛ̧ɛ̧ dɔ̂mba. 32Zik hɛkpa tɛɛ nɔ ve tɛʼ, vey sɔŋŋa o timba de kə ɓɛ̧ɛ̧zina náa ve too laa tɛ̧ɛ̧ de ɓɛ̧ɛ̧zinna tɛ̧ɛ̧ vere hôl ve nɔm; 33Oy ɛra tɛ̧ɛ̧ nɔ ve o naak za̧a̧ ba ɛn hôllɔ ve dɔmmɔ o naak kpay ba. 34Ɛnɔ gbɛ̧ɛ̧ nɔ de feezaa náa vey o naak za̧a̧ ba nɔ vɛ: “Vo yaarɛ náa Baa min su vo nɔ voy, vo ɓa gbɛ̧ɛ̧ bɔk ve gâk ɛ̂t vo zɛɛ hɛk bi̧i̧ tin nɔ oppo nɛy 35Ɛnɔ bɔk mi gɔ̧lle vo poy lɛmmɛ; maam bɔk ɔ̌zirɛ ɛn vo poy maam zɔrarɛ; bɔk mi gayya vo ɓǎy o vo kàarɛ; 36bɔk mi bɛ̧lla vo dɔzi sammɛ; bɔk mi ho̧ǒ̧ vo yoonirɛ; bɔk mi lik naʼre vo kə yaa tǒyrɛ.” 37Náa bɔk ve kɔ hɛn Go̧o̧ge hi̧i̧ nɔ ve hi̧i̧za: “gbɛ̧ɛ̧ kɛŋ, bɔk yɛtugɛ vi hə̌m gɔ̧lla vi pom lɛmma ze nɛy, ongɛɛ maam ɔ̌zummɛ vi pom maam zɔra ze nɛy? 38Bɔk yɛtugɛ vi hə̌m mɔ gayya vi ɓa tanum ivi kàa ze nɛy, ongɛɛ bɛ̧lla vi dɔzum samma ze nɛy? 39Bɔk yɛtugɛ vi hə̧ mɔ ho̧ǒ̧ ongɛɛ lik naʼre ɛn vi tak tǒmmɛ zenɛy?” 40GBɛ̧ɛ̧ nɔ de hi̧i̧t voo: “Mi feet vora, de ginu: hɛn vo kɔza há̧a̧ daŋga daay ve kòò dəə ɛn o ve tiŋza̧a̧re nɔ, ɛn vo kɔza de mii.” 41‹‹Pik an, GBɛ̧ɛ̧ nɔ de feezaa náa o naak kpay ba nɔ vɛ: “Vo luu yəə ii ɛtɛɛrɛ, Go̧o̧ge mòò lell vo mà! Vo tak dɔ vɛɛ̀ ha̧ vɛll Go̧o̧ge bɔk gaksa sɛɛɗan vega zə̧ə̧̀ an ve nɔ oppo! 42Ɛnɔ gɔ̧ll bɔk yǎ̧yrɛ ɛn vo poni lɛm yɛ; maam bɔk ɔ̌zirɛ ɛn vo poni maam zɔra yɛ; 43bɔk mi gayya ɛn vo ɓani yɛ; bɔk mi bɛ̧lla ɛn vo dɔzini sam yɛ; bɔk mi ho̧ǒ̧ bɔk mi lik naʼre vo yoonini yɛ.” 44Vey hi̧i̧zaa gɔɔ: “GBɛ̧ɛ̧ kɛŋ, bɔk yɛtugɛ vi hə̧ mɔy gɔ̧lla, ongɛɛ maam ɔ̌zummɛ, mɔ gayya, ongɛɛ mɔ bɛ̧lla, mɔ ho̧ǒ̧, ongɛɛ mɔ lik naʼre ɛn vi maʼzinum yɛ nɛy?” 45GBɛ̧ɛ̧ nɔ de hi̧i̧t voo: “Mi feet vora, de ginu: hɛn vo kɔzinna há̧a̧ daŋga náa min ve kòò ɗəə ɛnɔ o ve tiŋza̧a̧re tuu yɛ nɔ, ɛn vo bɔn de kɔzaa mii ɓim.” 46Ɛn vey tak dɔra gim ha̧ vɛlle, ɛn náa bɔk ve kɔ hɛn Go̧o̧ge hi̧i̧ nɔ vey takka za̧a̧n ha̧ vɛlle.»
Currently Selected:
Matiye 25: dae
Highlight
Copy
Compare
Share
Want to have your highlights saved across all your devices? Sign up or sign in
