Matiye 26
26
Kɛŋŋɔ ve a̧a̧za Yeesu bǔlla
Mar 14:1-2; Luk 22:1-2; Zâŋ 11:45-53
1Yeesu sǐ̧t moò oora ɛn ve tɛʼ kəzəkɔ, o feeza kaam an vɛ: 2«Vo gaarɛ pəə yo̧o̧ dɔʼ itto duʼ pâkkɔ de kɔraarɛ: vey hera Há̧a̧ Tân an doò ve gaʼa tap banzinna ba.» 3Ɛnɔ náa kɔ maak ak kɛŋŋɔ vɛ vere náa kɛŋ zik Yuuda nɔ vɛ, ve sɔŋ wa̧y kɔ maak ak kɛŋ, kayîf o pekke; 4ve sɔ̌ŋ yak von daŋ ka ve so Yeesu yɛɛ ɗindire ka ve kə vɔ̌zarɛ. 5Ve fee: «Kaà ba sǒna vo yo̧o̧ duʼ nɔ oppo yɛ, oo ɛŋgɔ nɔ náa kaà vey kɔlla kɔtɔkkee.»
Waà kep zɔʼ guuza Yeesu kum sa̧a̧k wɔɔkpa
Mar 14:3-9; Zâŋ 12:1-8
6Yeesu oy Bɛtani, simɔŋ guni akkɔ o kàa. 7Waà kep zɔʼ diŋŋi o hɛge vere tik Albatərə#26:7 Albatərə nɔ de pinn buyya dȩȩzinna za̧a̧ ve zikkɛ fi too tik vin ve aa kum sa̧a̧k intuu. hi̧ʼzi kum sa̧a̧k sɛ́k ak intuu: o guu kum sa̧a̧k ɛnɔ Yeesu o wɔɔkpa yɛɛ bɔk oy lɛra lɛmmɔ oppo. 8Yeesu kaam an ve hə̧ ɛn nɔ, lu vorɛ ve fee: «O lell kɔn nɛɛ? 9Kaà ve mak kum sa̧a̧k ɛnɔ sɛ́k za̧a̧ kaà ve kə po hell waa nɔ gim ak vey!» 10Yeesu gaa hɛn ve mòò ɛnɔrɛ kə feet vo: «Voy gǒlla waà kep ɛnɔ yɛɛ moò nɛɛ? Hɛn o kɔzi nɔ de za̧ǎ̧. 11Ɛnuu gim akkɔ vey kangaa vega vorɛ faaa ɛn min mi nɔ, voy hə̧nira yo̧o̧ tuŋ yɛ. 12O guuzi kum sa̧a̧k fɔn nɔ, o gâk de ɛn go̧o̧ya̧ nɛy#26:12 Vo to Mar 14: 8. 13Mi feet vora, de ginu: Yɛɛ vey oora moò za̧a̧ ɛnɔ tin, hɛkpa tɛɛ nɔ ve sɛw tɛʼ, vey moo hɛn waà kep ɛnɔ kɔ nɔrɛ, vey kə vəʼəraa.»
Zuudas hi̧i̧ ka hè Yeesu náa kɔ maak ak kɛŋ o ve po
Mar 14:10-11; Luk 22:3-6
14Ɛn kəzəkɔ há̧a̧ daŋga kaam boʼ zoo itto nɔ o ve tiŋza̧acre, ve ya̧a̧a̧ Zudas Iskariyôti, o tak zee náa kɔ maak ak kɛŋŋɔ vey 15kə feet vo: «Hɛ̧ɛ̧n ka vo poy nɛɛ oǒy het vo Yeesurɛ nɛy?» Náa nɔ ve waʼ sann waa gbɛk zoo boʼ ve kə poʼorɛ. 16Bi̧i̧ yɛɛ ɛnɔ oppo, Zudas tee kɛmma za̧a̧za̧a̧ ka het vo Yeesu ze nɛy.
Yeesu de lɛgaa lɛm duʼ Pâkkɛy vega kaam an vey
Mar 14:12-21; Luk 22:7-14; Zâŋ 13:21-30
17Yo̧o̧ bi̧i̧tum, duʼ lɛm ve kuun waak tin yɛ nɔ oppo, kaamɔ ve yaa vi Yeesu: «Mɔ hi̧i̧ vi tak yoonzum lɛm pakkɔ tɔŋ anɛ?» 18Yeesu feet vo: «Vo tak kare tuu, há̧a̧ zɔʼ oppo ɛn vo feeza: “Wa̧y it hɛn fee: Yɛɛ liiy ma; mii kɔra duʼ Pakkɔ um tɛɛ viga kaam min vey.”» 19Kaamɔ ve kɔ hɛn Yeesu ke feet vo nɔrɛ ve kə yoon lɛm Pakkɔrɛ. 20Mim yak kɔ kəzəkɔ Yeesu zɔɔ yɛɛ lɛ lɛmba vega kaam bɔʼzoo itto nɔ vey. 21Yɛɛ vey lɛra lɛm tin ɛn oppo, Yeesu fee: «Mi feet vora, de ginu: Há̧a̧ von daŋga de heyyaa.» 22Kaamɔ ve lu vorɛ kpɛ̌ŋ ɛn ve sɛw ve dii viʼii daŋga daŋga!: Ɛn de mi oy yɛɛ gɔrɔ, Gbɛ̧ɛ̧ kɛŋ?» 23Yeesu hi̧i̧: «De há̧a̧ vii o̧o̧gaa de nân daŋ ɓɔllɛ nɛʼi̧, oy hěyya yɔ#26:23 Vo to Mar 14: 20. 24Há̧a̧ Tân an de vɔraa too Dɛptɛl mòò moò an nɔm; ɛn yɔʼ de zee há̧a̧ de heʼee nɔrɛ! Pòò wa̧y ɛnɔ bɔk kaà ɓɔɔnɛ ɓimmɛy!» 25Zudas wa̧y hè Yeesu nɔ, ǐŋ yak moot kə vi: «Ɛn de mi oy yɛ gɔ wa̧y it hɛn?» Yeesu hi̧i̧za: «Mɔy fee de yɔ ɛnɔ.»
Go̧o̧ge nânna
Mar 14:22-26; Luk 22:14-20; 1Kɔ 11:23-25
26Yɛɛ ke vey lɛra lɛm tin ɛn oppo, Yeesu ǐŋ nân nɔ, kə dɛnza Go̧o̧ge naak kəzəkɔ, o kpəllɛ kə po kaam an vey; o feet vo: «Vo ɓa vo lɛrɛ, de nɛnɔ fo̧o̧ mini.» 27Pik an o ǐŋ bum makka, dɛnza Go̧o̧ge naak kəzəkɔ, kə po vo fee: «Vo zɔrɛ sɛw tɛʼ, 28de nɛnɔ mɛɛm mini, de mɛɛ̀m Go̧o̧ge yak tasin an, guu moò náa ve duʼza̧a̧ hɛn ɓɛɛ von doò hoozirɛ nɛy. 29Mi feet vora: De ɓɔllɛ nɛ, mii zɔnna bum ɛn ɓɛ yɛ de gbɔra yo̧o̧n mi yaa zɔra bum pəŋ vega vo daŋ Baa min o Gbɛ̧ɛ̧re tin nɔ oppo.» 30Pik an ve bi̧i̧ duʼ gəəm tin, ɛn kəzəkɔ ve luu dɔk gbɔk yɛɛ tap Oliviye ve dii tin nɔ oppo.
Yeesu fee Piyɛr bo de yaa pa voo
Mar 14:27-31; Luk 22:31-34; Zâŋ 13:36-38
31Ɛnɔ Yeesu feeza kaam an vɛ: «Vi̧i̧ nɛnɔ oppo vin, vo tɛʼ voy gbəlira, Ɛnɔ, de Dɛptɛlle nɔ ve waʼ de: “Mii vɔ̌tta lawɔrɛ, ɛn tɛ̧ɛ̧ duʼ nɔ vey wɛksii sɛkkɔ ve tɛʼ#26:31 Vo to Zak 13: 7.” 32Yeesu kaʼ ɓɛʼ: «Ɛn ɗaa, oò mi niŋzi kəy za̧a̧n ma nɔ, mii tak laa vora Galile.» 33Piyɛr ǐŋ yak moot kə feeza: «Ɛn náa zɔʼ ve tɛʼ oò ve gbəlummɛ si̧ʼ, min kaǎy gbəlin mɔ yɛ ɓim.» 34Yeesu hi̧i̧za: «Mi feezummɛ, de ginu: Vi̧i̧ nɛnɔ oppo vin, nook ka hȩȩ ze nɔ mɔy pǎyya dɔʼ ta̧a̧to bo vo gaani yɛ.» 35Piyɛr hi̧i̧za: «Ɛn oò lii vɔɔ̌ si̧ʼ kǎy vɔ vega mɔ daŋ, mii feena bàa mi gaanum yɛ nɔ yɛ.» Ɛn kaam zɔʼ nɔ ve sɛw tɛʼ ve fee yak da̧a̧ nɛy.
Yeesu faa yak gɛtsemaani
Mar 14:32-42; Luk 22:39-46
36Ɛnɔ Yeesu gbɔga kaam an ve yɛɛ zɔʼ ve ya̧a̧ bo Gɛtsemaani nɔ oppo o kə feet vo: «Vo zɔɔ ɛtɛɛ, mii takka ituu kǎy faa yakka.» 37O kə ǐŋ Piyɛr vere Zebede sâm an itto nɔ ve tin. Fo̧o̧ bi̧i̧ vɔʼɔrɛ wɔɔk kə hȩȩȩrɛ kpɛ̌ŋ. 38Ɛnɔ o feet vo: «Si̧i̧ duǔy derɛ; vo kan ɛtɛɛ ɛn vo zà̧à̧ nɔt vega mi daŋ.» 39O yəə tak kaʼso, o zuʼ zo̧o̧ gbɔy an hɛge kə faa yak too nɛnɔm: «Baa min, oò sȩȩrɛ nɔ, kaǎm yəənzi mak zɔ fo̧o̧ ho̧o̧k ɛnɔ tɔŋgba. Ɛn ɗaa gaa mɔ kɔ too mi hi̧i̧ nɔm sɛ, ɛn mɔ kɔ too mɔ hi̧i̧ nɔm.» 40O kəy kaam an ta̧a̧to nɔ o ve po ɛn o zee vo nəmme. O feeza Piyɛr: «De ɛn vo liin kaà vo kanin nɔt yo̧o̧ tân daŋga maaki vey mi daŋ yɛrɛ? 41Vo kan vo zà̧à̧ nɔtta vo kə faa yakkɛ ka vo yaa wan hɛn gootumme sɛ. Há̧a̧ hi̧i̧ hɛn za̧a̧ kɔrarɛ ɗaa, ɛn o hȩȩriya.» 42O yəə kə tak dɔʼ itto an ɓɛʼ faa yak ɛŋgɔ: «Baa min, oò sȩȩn mak zɔ fo̧o̧ ho̧o̧k ɛnɔ kaà yəəzinga mirɛ yɛ nɔ kǎy zɔrɛ, hɛn mɔ hi̧i̧ nɔ do kɔrɛ!» 43O kəy kaam an o ve po ɓɛʼ kə zee vo nəmme; kaà ve lɔn kandi nɔt yɛ. 44Yeesu luu ɛ vo kə yəəzingi vorɛ ɓɛʼ kə faa yak dɔʼ ta̧a̧to ani sɛn yak da̧a̧ nɛy. 45Pik an o kəy kaam an o ve po feet vo: «Voy nəmme ketorɛ? Voy wə̧ə̧ri barɛ? Ɓɔllɛ nɛ yɛɛ lii ma, Há̧a̧ Tân an vey heʼee náa kɔll hɛn ɓɛɛ ak o ve naʼa. 46Vo luu gǎŋ, ba luu vorɛ! Vo torɛ, wa̧y de hěyya nɔ oy nɛ!»
Ve so Yeesurɛ
47Yeesu moò sǐ̧zinná dee yɛ, Zuudâs o kaam boʼzoo itto nɔ o vo tíŋzâre gbɔ̌y mà. Vega dùʼ yə̀əm mo ve dáŋ, ve pànni pak bindɛllarɛ̀, gbâŋŋárɛ̀. Náa kɔ maak ak kɛŋŋɔ vɛ vere kɛ̂ŋ visîn moò yuudà nɔ ve yàʼ voy yɔ. 48Zuudâs, wǎy de het voo Yeesu nɔ, bɔk feeza náa duʼ nɔ vɛ: Háà míi moogǎ too gbàáre vín nɔ, ɛ̀n oy vo soʼorɛ. 49Zuudâs díŋ Yeesu o hɛge nɔ̌m po mooga fèè: Mí Moogúmmɛ wǎ̧y ît hɛn, kə̀ vá̧a̧ tín. 50Yeesu hí̧i̧za: gbàáre mîn, hɛ̂n kúm yaa kɔ́rá nɔ mɔ kɔ́ bɔ̀ nɔm. Náa zɔʼ nɔ ve diŋŋi, ve yɔ̌l naak ve so yeesurɛ. 51Náa bɔk vega Yeesu nɔ há̧a̧ daŋga o ve tiŋza̧a̧re sə̀ pak bindɛl an, wà̧a̧n wa̧y kɔ maak ak kɛ̂ŋ zɔ̂ʼ kɔ̂m ak âni fà̧à̧a̧ kɔ̂ʼ hɛge. 52Yeesu feeza: mɔ yàʼ kə̌n bindɛl mɔn o goore, ɛnɔ náa vey səzaa há̧a̧ ve bindɛllɔ, vey hɛɛná bindɛlla. 53Mɔ gàan boy lìì Baa mîn hááǎ kaà faŋzíi zə̧ə̧̀ ân ve yɛɛ̀ boʼzoo itto kaà ve yaa mâʼzinnirɛ yɛ́rɛ̀? 54Ɛǹ oǒm kɔ́rá too ɛ̀nɔ̌m mɔ hɛ̂n dɛptɛ̂l fèè nɔ de kurá túu bɔ̀gɛ́? Dɛptɛ̂l fèè: hɛ̂n ɛ̀nɔ doò dàà too ɛ̀nɔ̌m. 55Yeesu kə̀ feeza náa duʼ nɔ ve: kaà vo yaani pak bindɛllɔ vɛ vere gbâŋŋɔ vɛ ka vo sǒyrɛ mí yúu seè vin nɛɛ? Yo̧o̧ túŋ bɔk mii zɔɔrì Go̧o̧ge ligí moò ooráá vo sǒní yɛ. 56Hɛn ɛn tɛʼ dàà nɔ ka kǔt hɛ̂n Go̧o̧ge yaʼyɛɛ̀ ak ân bɔk ve fee dɛptɛ̂lle nɛ̌y. Ɛ̀n kə́zə́kɔ̀ kàam̀ ân ve lúú ɛ́ʼɛrɛ ve âttɛ.
Yeesu oy kɛŋ visin moò o ve timba
Mar 14:53-65; Luk 22:54-55, 63-71; Zâŋ 18:13-14, 19-24
57Náa ke ve so Yeesu nɔ vɛ, ve pana tak Kayîf oppo wa̧y kɔ maak ak kɛŋŋɛy, yɛɛ náa it Moyi̧zə moò buu an vɛ vere náa kɛŋ kappɔ vɛ, ve sɔŋ tin nɔ oppo. 58Piyɛr òo Yeesu piki o daa yɛɛ yəəte, tak gbɔ wa̧y kɔ maak ak Kayîf o kàa. O dɔ gba̧ʼaba zɔɔga náa laa yɛɛ nɔ ve daŋ ka to hɛn ɛnɔ kěy si̧ʼra tuubɔgɛrɛ. 59Náa kɔ maak ak kɛŋŋɔ vɛ vere náa kɛŋ visin moò nɔ ve tɛʼ ve tee və̧ə̧ka yana, ka ve so Yeesu, ka ve vɔ̌zinnarɛ; 60ɛn ɗaa ve hakin yɛ, ɛn kəzəkɔ, náa ve duʼza̧a̧ ve təŋŋa və̧ə̧ke za̧a̧ ɓaʼ#26:60 Vo goozin vere Dɛg 27:12; 35: 11. Si̧ʼtum an wa̧p ve itto ve gbɔ̌y ve fee: 61«Wa̧y ɛn bɔk fee: “Kaǎy gbǎl Go̧o̧ge likkɔ hɛge kaǎy kə yò̧ò̧ kənna yo̧o̧ dɔʼ ta̧a̧to zaʼ#26:61 Vo to Zâŋ 2: 19”». 62Wa̧y kɔ maak ak kɛŋŋɔ luu bɛlba kə feeza Yeesu: «Mɔ hi̧i̧n yak hɛn náa vey moo umpo too ɛnɔmmɔ yɛrɛ?» 63Ɛn Yeesu kan nikvin. Wa̧y kɔ maak ak kɛŋŋɔ feeza: «Vere Go̧o̧ge za̧a̧n nii ani, mi vimma mɔ hi̧i̧t vi vere gall sa̧a̧a̧: Mɔ kiris Go̧o̧ge tân anirɛ?» 64Yeesu hi̧i̧za: «Mɔy fee de yɔ. Ɛn mii feet voraa: Bi̧i̧ de ɓollɛ nɛ voy hə̧ra Há̧a̧ Tân an zɔɔri Go̧o̧ge Gɔti ak o naak za̧a̧ ba; voy hə̧ʼə̧ə̧̌ de yaay kuʼ zà̧a̧za̧à̧re bɛlba vin#26:64 Vo to Dɛg 110: 1; Dan 7: 13.» 65Ɛnɔ wa̧y kɔ maak ak kɛŋŋɔ ta̧ll sam an verɛ kə fee: «O ke zɛɛ Go̧o̧gerɛ! Kaà kan ba vo vere há̧a̧ sək moò ak zɔʼ ɓɛ yɛ! Ke vo kii zɛɛk ke zɛɛ Go̧o̧ge nɔrɛ. 66Vo vəʼə tuubɔgɛ?» Ve hi̧i̧za: «O gbo̧o̧k akka ɛn kaà lii vɔ̌zaarɛ#26:66 Vo to Lɛv 24: 16..» 67Ve kə tuuza sɔt gbɔ̌y ve kə duuu tin; náa zɔʼ ve denarɛ#26:67 Vo goozin vere Ezǎ 50:6 68ve feeza: «Kiris mɔy, mɔ ôn bɔ, hii denummɛy!
Piyɛr pa Yeesurɛ
Mar 14:66-72; Luk 22:56-62; Zâŋ 18:15-18, 25-27
69Piyɛr ke de zɔɔri gbaʼaba gɔ̌n. Kep kɔ kɔm ak zɔʼ diŋ yaa o hɛge kə feeza: «Mɔ sɛw, ke voga Yeesu wa̧y Galile ɛnɔ daŋ.» 70Ɛn ɗaa Piyɛr paʼa náa o ve timba tuu sɛw tɛʼ fee: «Mi gaan hɛn mɔy hi̧i̧ra fee nɔ yɛ.» 71Pik an o luu tak gbaʼa leppa. Kep kɔm ak zɔʼ hə̧ʼə̧ nɔ kə feeza náa ke vey ɛtuu nɔ vɛ: «Wa̧y nɛnɔ ke vega Yeesu wa̧y Nazarɛttɔ daŋ.» 72Ɛn Piyɛr kə paʼa zɔʼɔ ɓɛʼ fee: «Mi sa̧a̧ galla ɓim mi gaan wa̧y ɛnɔ yɛ.» 73An kaʼso pik an, náa ke vey ɛtuu ve diŋ yaa Piyɛr o hɛge ve kə feeza: «Moò za̧ǎ̧ ɓim, mɔy náa ɛn o ve tiŋza̧a̧re: Yak moot mɔn de itta yɛɛ mɔ yaay tin nɔ yɔ.» 74Ɛnɔ Piyɛr fee: «Ɛn Go̧o̧ge gaarɛ oǒy mi kɔra və̧ə̧ka nɔ gɔ! Mi sa̧a̧rɛ ɓim mi gaan wa̧y ɛnɔ yɛ goy!» Yɛɛ ɛnɔ oppo vin, nook hȩȩrɛ, 75Piyɛr vəʼə gaa hɛn Yeesu ke feeza: «Nook ka hȩȩ ze nɔ, mɔy pǎyya dɔʼ ta̧a̧to bo vo gaani yɛ.» Piyɛr vuk gbaʼa ba o ba̧a̧rɛ aʼvin.
Currently Selected:
Matiye 26: dae
Highlight
Copy
Compare
Share
Want to have your highlights saved across all your devices? Sign up or sign in
